| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. ஸமுக்³கா⁴தஸாருப்பஸுத்தங்
8. Samugghātasāruppasuttaṃ
30. ‘‘ஸப்³ப³மஞ்ஞிதஸமுக்³கா⁴தஸாருப்பங் வோ, பி⁴க்க²வே, படிபத³ங் தே³ஸெஸ்ஸாமி. தங் ஸுணாத², ஸாது⁴கங் மனஸி கரோத²; பா⁴ஸிஸ்ஸாமீதி. கதமா ச ஸா, பி⁴க்க²வே, ஸப்³ப³மஞ்ஞிதஸமுக்³கா⁴தஸாருப்பா படிபதா³? இத⁴, பி⁴க்க²வே, பி⁴க்கு² சக்கு²ங் ந மஞ்ஞதி, சக்கு²ஸ்மிங் ந மஞ்ஞதி, சக்கு²தோ ந மஞ்ஞதி, சக்கு²ங் மேதி ந மஞ்ஞதி. ரூபே ந மஞ்ஞதி, ரூபேஸு ந மஞ்ஞதி, ரூபதோ ந மஞ்ஞதி, ரூபா மேதி ந மஞ்ஞதி. சக்கு²விஞ்ஞாணங் ந மஞ்ஞதி, சக்கு²விஞ்ஞாணஸ்மிங் ந மஞ்ஞதி, சக்கு²விஞ்ஞாணதோ ந மஞ்ஞதி, சக்கு²விஞ்ஞாணங் மேதி ந மஞ்ஞதி. சக்கு²ஸம்ப²ஸ்ஸங் ந மஞ்ஞதி, சக்கு²ஸம்ப²ஸ்ஸஸ்மிங் ந மஞ்ஞதி, சக்கு²ஸம்ப²ஸ்ஸதோ ந மஞ்ஞதி, சக்கு²ஸம்ப²ஸ்ஸோ மேதி ந மஞ்ஞதி. யம்பித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ந மஞ்ஞதி , தஸ்மிம்பி ந மஞ்ஞதி, ததோபி ந மஞ்ஞதி, தங் மேதி ந மஞ்ஞதி…பே॰… ஜிவ்ஹங் ந மஞ்ஞதி, ஜிவ்ஹாய ந மஞ்ஞதி, ஜிவ்ஹாதோ ந மஞ்ஞதி, ஜிவ்ஹா மேதி ந மஞ்ஞதி. ரஸே ந மஞ்ஞதி, ரஸேஸு ந மஞ்ஞதி, ரஸதோ ந மஞ்ஞதி, ரஸா மேதி ந மஞ்ஞதி. ஜிவ்ஹாவிஞ்ஞாணங் ந மஞ்ஞதி, ஜிவ்ஹாவிஞ்ஞாணஸ்மிங் ந மஞ்ஞதி, ஜிவ்ஹாவிஞ்ஞாணதோ ந மஞ்ஞதி, ஜிவ்ஹாவிஞ்ஞாணங் மேதி ந மஞ்ஞதி. ஜிவ்ஹாஸம்ப²ஸ்ஸங் ந மஞ்ஞதி, ஜிவ்ஹாஸம்ப²ஸ்ஸஸ்மிங் ந மஞ்ஞதி, ஜிவ்ஹாஸம்ப²ஸ்ஸதோ ந மஞ்ஞதி, ஜிவ்ஹாஸம்ப²ஸ்ஸோ மேதி ந மஞ்ஞதி. யம்பித³ங் ஜிவ்ஹாஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ந மஞ்ஞதி, தஸ்மிம்பி ந மஞ்ஞதி, ததோபி ந மஞ்ஞதி, தங் மேதி ந மஞ்ஞதி…பே॰… மனங் ந மஞ்ஞதி, மனஸ்மிங் ந மஞ்ஞதி, மனதோ ந மஞ்ஞதி, மனோ மேதி ந மஞ்ஞதி. த⁴ம்மே ந மஞ்ஞதி, த⁴ம்மேஸு ந மஞ்ஞதி, த⁴ம்மதோ ந மஞ்ஞதி, த⁴ம்மா மேதி ந மஞ்ஞதி. மனோவிஞ்ஞாணங் ந மஞ்ஞதி, மனோவிஞ்ஞாணஸ்மிங் ந மஞ்ஞதி, மனோவிஞ்ஞாணதோ ந மஞ்ஞதி, மனோவிஞ்ஞாணங் மேதி ந மஞ்ஞதி. மனோஸம்ப²ஸ்ஸங் ந மஞ்ஞதி, மனோஸம்ப²ஸ்ஸஸ்மிங் ந மஞ்ஞதி, மனோஸம்ப²ஸ்ஸதோ ந மஞ்ஞதி, மனோஸம்ப²ஸ்ஸோ மேதி ந மஞ்ஞதி . யம்பித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ந மஞ்ஞதி, தஸ்மிம்பி ந மஞ்ஞதி, ததோபி ந மஞ்ஞதி, தங் மேதி ந மஞ்ஞதி. ஸப்³ப³ங் ந மஞ்ஞதி, ஸப்³ப³ஸ்மிங் ந மஞ்ஞதி, ஸப்³ப³தோ ந மஞ்ஞதி, ஸப்³ப³ங் மேதி ந மஞ்ஞதி. ஸோ ஏவங் அமஞ்ஞமானோ ந ச கிஞ்சி லோகே உபாதி³யதி. அனுபாதி³யங் ந பரிதஸ்ஸதி. அபரிதஸ்ஸங் பச்சத்தஞ்ஞேவ பரினிப்³பா³யதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதி. அயங் கோ² ஸா, பி⁴க்க²வே, ஸப்³ப³மஞ்ஞிதஸமுக்³கா⁴தஸாருப்பா படிபதா³’’தி. அட்ட²மங்.
30. ‘‘Sabbamaññitasamugghātasāruppaṃ vo, bhikkhave, paṭipadaṃ desessāmi. Taṃ suṇātha, sādhukaṃ manasi karotha; bhāsissāmīti. Katamā ca sā, bhikkhave, sabbamaññitasamugghātasāruppā paṭipadā? Idha, bhikkhave, bhikkhu cakkhuṃ na maññati, cakkhusmiṃ na maññati, cakkhuto na maññati, cakkhuṃ meti na maññati. Rūpe na maññati, rūpesu na maññati, rūpato na maññati, rūpā meti na maññati. Cakkhuviññāṇaṃ na maññati, cakkhuviññāṇasmiṃ na maññati, cakkhuviññāṇato na maññati, cakkhuviññāṇaṃ meti na maññati. Cakkhusamphassaṃ na maññati, cakkhusamphassasmiṃ na maññati, cakkhusamphassato na maññati, cakkhusamphasso meti na maññati. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññati , tasmimpi na maññati, tatopi na maññati, taṃ meti na maññati…pe… jivhaṃ na maññati, jivhāya na maññati, jivhāto na maññati, jivhā meti na maññati. Rase na maññati, rasesu na maññati, rasato na maññati, rasā meti na maññati. Jivhāviññāṇaṃ na maññati, jivhāviññāṇasmiṃ na maññati, jivhāviññāṇato na maññati, jivhāviññāṇaṃ meti na maññati. Jivhāsamphassaṃ na maññati, jivhāsamphassasmiṃ na maññati, jivhāsamphassato na maññati, jivhāsamphasso meti na maññati. Yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññati, tasmimpi na maññati, tatopi na maññati, taṃ meti na maññati…pe… manaṃ na maññati, manasmiṃ na maññati, manato na maññati, mano meti na maññati. Dhamme na maññati, dhammesu na maññati, dhammato na maññati, dhammā meti na maññati. Manoviññāṇaṃ na maññati, manoviññāṇasmiṃ na maññati, manoviññāṇato na maññati, manoviññāṇaṃ meti na maññati. Manosamphassaṃ na maññati, manosamphassasmiṃ na maññati, manosamphassato na maññati, manosamphasso meti na maññati . Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññati, tasmimpi na maññati, tatopi na maññati, taṃ meti na maññati. Sabbaṃ na maññati, sabbasmiṃ na maññati, sabbato na maññati, sabbaṃ meti na maññati. So evaṃ amaññamāno na ca kiñci loke upādiyati. Anupādiyaṃ na paritassati. Aparitassaṃ paccattaññeva parinibbāyati. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāti. Ayaṃ kho sā, bhikkhave, sabbamaññitasamugghātasāruppā paṭipadā’’ti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. ஸமுக்³கா⁴தஸாருப்பஸுத்தவண்ணனா • 8. Samugghātasāruppasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. ஸமுக்³கா⁴தஸாருப்பஸுத்தவண்ணனா • 8. Samugghātasāruppasuttavaṇṇanā
