| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༤. སཱམུགིཡསུཏྟཾ
4. Sāmugiyasuttaṃ
༡༩༤. ཨེཀཾ སམཡཾ ཨཱཡསྨཱ ཨཱནནྡོ ཀོལིཡེསུ ཝིཧརཏི སཱམུགཾ ནཱམ 1 ཀོལིཡཱནཾ ནིགམོ། ཨཐ ཁོ སམྦཧུལཱ སཱམུགིཡཱ ཀོལིཡཔུཏྟཱ ཡེནཱཡསྨཱ ཨཱནནྡོ ཏེནུཔསངྐམིཾསུ; ཨུཔསངྐམིཏྭཱ ཨཱཡསྨནྟཾ ཨཱནནྡཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣེ ཁོ ཏེ སཱམུགིཡེ ཀོལིཡཔུཏྟེ ཨཱཡསྨཱ ཨཱནནྡོ ཨེཏདཝོཙ –
194. Ekaṃ samayaṃ āyasmā ānando koliyesu viharati sāmugaṃ nāma 2 koliyānaṃ nigamo. Atha kho sambahulā sāmugiyā koliyaputtā yenāyasmā ānando tenupasaṅkamiṃsu; upasaṅkamitvā āyasmantaṃ ānandaṃ abhivādetvā ekamantaṃ nisīdiṃsu. Ekamantaṃ nisinne kho te sāmugiye koliyaputte āyasmā ānando etadavoca –
‘‘ཙཏྟཱརིམཱནི, བྱགྒྷཔཛྫཱ, པཱརིསུདྡྷིཔདྷཱནིཡངྒཱནི ཏེན བྷགཝཏཱ ཛཱནཏཱ པསྶཏཱ ཨརཧཏཱ སམྨཱསམྦུདྡྷེན སམྨདཀྑཱཏཱནི སཏྟཱནཾ ཝིསུདྡྷིཡཱ སོཀཔརིདེཝཱནཾ 3 སམཏིཀྐམཱཡ དུཀྑདོམནསྶཱནཾ ཨཏྠངྒམཱཡ ཉཱཡསྶ ཨདྷིགམཱཡ ནིབྦཱནསྶ སཙྪིཀིརིཡཱཡ། ཀཏམཱནི ཙཏྟཱརི? སཱིལཔཱརིསུདྡྷིཔདྷཱནིཡངྒཾ, ཙིཏྟཔཱརིསུདྡྷིཔདྷཱནིཡངྒཾ , དིཊྛིཔཱརིསུདྡྷིཔདྷཱནིཡངྒཾ, ཝིམུཏྟིཔཱརིསུདྡྷིཔདྷཱནིཡངྒཾ།
‘‘Cattārimāni, byagghapajjā, pārisuddhipadhāniyaṅgāni tena bhagavatā jānatā passatā arahatā sammāsambuddhena sammadakkhātāni sattānaṃ visuddhiyā sokaparidevānaṃ 4 samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāya. Katamāni cattāri? Sīlapārisuddhipadhāniyaṅgaṃ, cittapārisuddhipadhāniyaṅgaṃ , diṭṭhipārisuddhipadhāniyaṅgaṃ, vimuttipārisuddhipadhāniyaṅgaṃ.
‘‘ཀཏམཉྩ , བྱགྒྷཔཛྫཱ, སཱིལཔཱརིསུདྡྷིཔདྷཱནིཡངྒཾ? ཨིདྷ, བྱགྒྷཔཛྫཱ, བྷིཀྑུ སཱིལཝཱ ཧོཏི…པེ॰… སམཱདཱཡ སིཀྑཏི སིཀྑཱཔདེསུ། ཨཡཾ ཝུཙྩཏི, བྱགྒྷཔཛྫཱ, སཱིལཔཱརིསུདྡྷི། ཨིཏི ཨེཝརཱུཔིཾ སཱིལཔཱརིསུདྡྷིཾ ཨཔརིཔཱུརཾ ཝཱ པརིཔཱུརེསྶཱམི པརིཔཱུརཾ ཝཱ ཏཏྠ ཏཏྠ པཉྙཱཡ ཨནུགྒཧེསྶཱམཱིཏི, ཡོ ཏཏྠ ཚནྡོ ཙ ཝཱཡཱམོ ཙ ཨུསྶཱཧོ ཙ ཨུསྶོལ༹ྷཱི ཙ ཨཔྤཊིཝཱནཱི ཙ སཏི ཙ སམྤཛཉྙཉྩ, ཨིདཾ ཝུཙྩཏི, བྱགྒྷཔཛྫཱ, སཱིལཔཱརིསུདྡྷིཔདྷཱནིཡངྒཾ།
‘‘Katamañca , byagghapajjā, sīlapārisuddhipadhāniyaṅgaṃ? Idha, byagghapajjā, bhikkhu sīlavā hoti…pe… samādāya sikkhati sikkhāpadesu. Ayaṃ vuccati, byagghapajjā, sīlapārisuddhi. Iti evarūpiṃ sīlapārisuddhiṃ aparipūraṃ vā paripūressāmi paripūraṃ vā tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṃ vuccati, byagghapajjā, sīlapārisuddhipadhāniyaṅgaṃ.
‘‘ཀཏམཉྩ, བྱགྒྷཔཛྫཱ, ཙིཏྟཔཱརིསུདྡྷིཔདྷཱནིཡངྒཾ? ཨིདྷ, བྱགྒྷཔཛྫཱ, བྷིཀྑུ ཝིཝིཙྩེཝ ཀཱམེཧི…པེ॰… ཙཏུཏྠཾ ཛྷཱནཾ ཨུཔསམྤཛྫ ཝིཧརཏི། ཨཡཾ ཝུཙྩཏི, བྱགྒྷཔཛྫཱ, ཙིཏྟཔཱརིསུདྡྷི། ཨིཏི ཨེཝརཱུཔིཾ ཙིཏྟཔཱརིསུདྡྷིཾ ཨཔརིཔཱུརཾ ཝཱ པརིཔཱུརེསྶཱམི པརིཔཱུརཾ ཝཱ ཏཏྠ ཏཏྠ པཉྙཱཡ ཨནུགྒཧེསྶཱམཱིཏི, ཡོ ཏཏྠ ཚནྡོ ཙ ཝཱཡཱམོ ཙ ཨུསྶཱཧོ ཙ ཨུསྶོལ༹ྷཱི ཙ ཨཔྤཊིཝཱནཱི ཙ སཏི ཙ སམྤཛཉྙཉྩ, ཨིདཾ ཝུཙྩཏི, བྱགྒྷཔཛྫཱ, ཙིཏྟཔཱརིསུདྡྷིཔདྷཱནིཡངྒཾ།
‘‘Katamañca, byagghapajjā, cittapārisuddhipadhāniyaṅgaṃ? Idha, byagghapajjā, bhikkhu vivicceva kāmehi…pe… catutthaṃ jhānaṃ upasampajja viharati. Ayaṃ vuccati, byagghapajjā, cittapārisuddhi. Iti evarūpiṃ cittapārisuddhiṃ aparipūraṃ vā paripūressāmi paripūraṃ vā tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṃ vuccati, byagghapajjā, cittapārisuddhipadhāniyaṅgaṃ.
‘‘ཀཏམཉྩ, བྱགྒྷཔཛྫཱ, དིཊྛིཔཱརིསུདྡྷིཔདྷཱནིཡངྒཾ? ཨིདྷ, བྱགྒྷཔཛྫཱ, བྷིཀྑུ ‘ཨིདཾ དུཀྑ’ནྟི ཡཐཱབྷཱུཏཾ པཛཱནཱཏི…པེ॰… ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡཐཱབྷཱུཏཾ པཛཱནཱཏི། ཨཡཾ ཝུཙྩཏི, བྱགྒྷཔཛྫཱ, དིཊྛིཔཱརིསུདྡྷི། ཨིཏི ཨེཝརཱུཔིཾ དིཊྛིཔཱརིསུདྡྷིཾ ཨཔརིཔཱུརཾ ཝཱ…པེ॰… ཏཏྠ ཏཏྠ པཉྙཱཡ ཨནུགྒཧེསྶཱམཱིཏི, ཡོ ཏཏྠ ཚནྡོ ཙ ཝཱཡཱམོ ཙ ཨུསྶཱཧོ ཙ ཨུསྶོལ༹ྷཱི ཙ ཨཔྤཊིཝཱནཱི ཙ སཏི ཙ སམྤཛཉྙཉྩ, ཨིདཾ ཝུཙྩཏི, བྱགྒྷཔཛྫཱ, དིཊྛིཔཱརིསུདྡྷིཔདྷཱནིཡངྒཾ །
‘‘Katamañca, byagghapajjā, diṭṭhipārisuddhipadhāniyaṅgaṃ? Idha, byagghapajjā, bhikkhu ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti. Ayaṃ vuccati, byagghapajjā, diṭṭhipārisuddhi. Iti evarūpiṃ diṭṭhipārisuddhiṃ aparipūraṃ vā…pe… tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṃ vuccati, byagghapajjā, diṭṭhipārisuddhipadhāniyaṅgaṃ .
‘‘ཀཏམཉྩ, བྱགྒྷཔཛྫཱ, ཝིམུཏྟིཔཱརིསུདྡྷིཔདྷཱནིཡངྒཾ? ས ཁོ སོ, བྱགྒྷཔཛྫཱ, ཨརིཡསཱཝཀོ ཨིམིནཱ ཙ སཱིལཔཱརིསུདྡྷིཔདྷཱནིཡངྒེན སམནྣཱགཏོ ཨིམིནཱ ཙ ཙིཏྟཔཱརིསུདྡྷིཔདྷཱནིཡངྒེན སམནྣཱགཏོ ཨིམིནཱ ཙ དིཊྛིཔཱརིསུདྡྷིཔདྷཱནིཡངྒེན སམནྣཱགཏོ རཛནཱིཡེསུ དྷམྨེསུ ཙིཏྟཾ ཝིརཱཛེཏི, ཝིམོཙནཱིཡེསུ དྷམྨེསུ ཙིཏྟཾ ཝིམོཙེཏི། སོ རཛནཱིཡེསུ དྷམྨེསུ ཙིཏྟཾ ཝིརཱཛེཏྭཱ, ཝིམོཙནཱིཡེསུ དྷམྨེསུ ཙིཏྟཾ ཝིམོཙེཏྭཱ སམྨཱཝིམུཏྟིཾ ཕུསཏི། ཨཡཾ ཝུཙྩཏི, བྱགྒྷཔཛྫཱ, ཝིམུཏྟིཔཱརིསུདྡྷི། ཨིཏི ཨེཝརཱུཔིཾ ཝིམུཏྟིཔཱརིསུདྡྷིཾ ཨཔརིཔཱུརཾ ཝཱ པརིཔཱུརེསྶཱམི པརིཔཱུརཾ ཝཱ ཏཏྠ ཏཏྠ པཉྙཱཡ ཨནུགྒཧེསྶཱམཱིཏི, ཡོ ཏཏྠ ཚནྡོ ཙ ཝཱཡཱམོ ཙ ཨུསྶཱཧོ ཙ ཨུསྶོལ༹ྷཱི ཙ ཨཔྤཊིཝཱནཱི ཙ སཏི ཙ སམྤཛཉྙཉྩ, ཨིདཾ ཝུཙྩཏི, བྱགྒྷཔཛྫཱ, ཝིམུཏྟིཔཱརིསུདྡྷིཔདྷཱནིཡངྒཾ།
‘‘Katamañca, byagghapajjā, vimuttipārisuddhipadhāniyaṅgaṃ? Sa kho so, byagghapajjā, ariyasāvako iminā ca sīlapārisuddhipadhāniyaṅgena samannāgato iminā ca cittapārisuddhipadhāniyaṅgena samannāgato iminā ca diṭṭhipārisuddhipadhāniyaṅgena samannāgato rajanīyesu dhammesu cittaṃ virājeti, vimocanīyesu dhammesu cittaṃ vimoceti. So rajanīyesu dhammesu cittaṃ virājetvā, vimocanīyesu dhammesu cittaṃ vimocetvā sammāvimuttiṃ phusati. Ayaṃ vuccati, byagghapajjā, vimuttipārisuddhi. Iti evarūpiṃ vimuttipārisuddhiṃ aparipūraṃ vā paripūressāmi paripūraṃ vā tattha tattha paññāya anuggahessāmīti, yo tattha chando ca vāyāmo ca ussāho ca ussoḷhī ca appaṭivānī ca sati ca sampajaññañca, idaṃ vuccati, byagghapajjā, vimuttipārisuddhipadhāniyaṅgaṃ.
‘‘ཨིམཱནི ཁོ, བྱགྒྷཔཛྫཱ, ཙཏྟཱརི པཱརིསུདྡྷིཔདྷཱནིཡངྒཱནི ཏེན བྷགཝཏཱ ཛཱནཏཱ པསྶཏཱ ཨརཧཏཱ སམྨཱསམྦུདྡྷེན སམྨདཀྑཱཏཱནི སཏྟཱནཾ ཝིསུདྡྷིཡཱ སོཀཔརིདེཝཱནཾ སམཏིཀྐམཱཡ དུཀྑདོམནསྶཱནཾ ཨཏྠངྒམཱཡ ཉཱཡསྶ ཨདྷིགམཱཡ ནིབྦཱནསྶ སཙྪིཀིརིཡཱཡཱ’’ཏི། ཙཏུཏྠཾ།
‘‘Imāni kho, byagghapajjā, cattāri pārisuddhipadhāniyaṅgāni tena bhagavatā jānatā passatā arahatā sammāsambuddhena sammadakkhātāni sattānaṃ visuddhiyā sokaparidevānaṃ samatikkamāya dukkhadomanassānaṃ atthaṅgamāya ñāyassa adhigamāya nibbānassa sacchikiriyāyā’’ti. Catutthaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༤. སཱམུགིཡཱསུཏྟཝཎྞནཱ • 4. Sāmugiyāsuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༤. སཱམུགིཡསུཏྟཝཎྞནཱ • 4. Sāmugiyasuttavaṇṇanā
