| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. ஸாமுகி³யாஸுத்தவண்ணனா
4. Sāmugiyāsuttavaṇṇanā
194. சதுத்தே² ஸாமுகி³யாதி ஸாமுக³னிக³மவாஸினோ. ப்³யக்³க⁴பஜ்ஜாதி தே ஆலபந்தோ ஏவமாஹ. கோலனக³ரஸ்ஸ ஹி கோலருக்கே² ஹாரெத்வா கதத்தா கோலனக³ரந்தி ச ப்³யக்³க⁴பதே² மாபிதத்தா ப்³யக்³க⁴பஜ்ஜந்தி ச த்³வே நாமானி. ஏதேஸஞ்ச புப்³ப³புரிஸா தத்த² வஸிங்ஸூதி ப்³யக்³க⁴பஜ்ஜவாஸிதாய ப்³யக்³க⁴பஜ்ஜவாஸினோ ப்³யக்³க⁴பஜ்ஜாதி வுச்சந்தி. தே ஆலபந்தோ ஏவமாஹ. பாரிஸுத்³தி⁴பதா⁴னியங்கா³னீதி பாரிஸுத்³தி⁴அத்தா²ய பதா⁴னியங்கா³னி பத³ஹிதப்³ப³வீரியஸ்ஸ அங்கா³னி, கொட்டா²ஸாதி அத்தோ². ஸீலபாரிஸுத்³தி⁴பதா⁴னியங்க³ந்தி ஸீலபரிஸோத⁴னவீரியஸ்ஸேதங் நாமங். தஞ்ஹி ஸீலபாரிஸுத்³தி⁴பரிபூரணத்தா²ய பதா⁴னியங்க³ந்தி ஸீலபாரிஸுத்³தி⁴பதா⁴னியங்க³ங். ஸேஸேஸுபி ஏஸேவ நயோ. தத்த² தத்த² பஞ்ஞாய அனுக்³க³ஹெஸ்ஸாமீதி தஸ்மிங் தஸ்மிங் டா²னே விபஸ்ஸனாபஞ்ஞாய அனுக்³க³ஹெஸ்ஸாமி . யோ தத்த² ச²ந்தோ³திஆதீ³ஸு யோ தஸ்மிங் அனுக்³க³ண்ஹனே கத்துகாமதாச²ந்தோ³தி இமினா நயேன அத்தோ² வேதி³தப்³போ³. ஸதிஸம்பஜஞ்ஞங் பனெத்த² ஸதிங் உபட்ட²பெத்வா ஞாணேன பரிச்சி²ந்தி³த்வா வீரியபக்³க³ஹனத்த²ங் வுத்தங். ரஜனீயேஸு த⁴ம்மேஸு சித்தங் விராஜேதீதி ராக³பச்சயேஸு இட்டா²ரம்மணேஸு யதா² சித்தங் விரஜ்ஜதி, ஏவங் கரோதி. விமோசனீயேஸு த⁴ம்மேஸு சித்தங் விமோசேதீதி யேஹி ஆரம்மணேஹி சித்தங் விமோசேதப்³ப³ங், தேஸு யதா² விமுச்சதி, ஏவங் கரோதி. விராஜெத்வாதி எத்த² மக்³க³க்க²ணே விராஜேதி நாம, ப²லக்க²ணே விரத்தங் நாம ஹோதி. து³தியபதே³பி ஏஸேவ நயோ. ஸம்மாவிமுத்திங் பு²ஸதீதி ஹேதுனா நயேன அரஹத்தப²லவிமுத்திங் ஞாணப²ஸ்ஸேன பு²ஸதீதி.
194. Catutthe sāmugiyāti sāmuganigamavāsino. Byagghapajjāti te ālapanto evamāha. Kolanagarassa hi kolarukkhe hāretvā katattā kolanagaranti ca byagghapathe māpitattā byagghapajjanti ca dve nāmāni. Etesañca pubbapurisā tattha vasiṃsūti byagghapajjavāsitāya byagghapajjavāsino byagghapajjāti vuccanti. Te ālapanto evamāha. Pārisuddhipadhāniyaṅgānīti pārisuddhiatthāya padhāniyaṅgāni padahitabbavīriyassa aṅgāni, koṭṭhāsāti attho. Sīlapārisuddhipadhāniyaṅganti sīlaparisodhanavīriyassetaṃ nāmaṃ. Tañhi sīlapārisuddhiparipūraṇatthāya padhāniyaṅganti sīlapārisuddhipadhāniyaṅgaṃ. Sesesupi eseva nayo. Tattha tattha paññāya anuggahessāmīti tasmiṃ tasmiṃ ṭhāne vipassanāpaññāya anuggahessāmi . Yo tattha chandotiādīsu yo tasmiṃ anuggaṇhane kattukāmatāchandoti iminā nayena attho veditabbo. Satisampajaññaṃ panettha satiṃ upaṭṭhapetvā ñāṇena paricchinditvā vīriyapaggahanatthaṃ vuttaṃ. Rajanīyesu dhammesu cittaṃ virājetīti rāgapaccayesu iṭṭhārammaṇesu yathā cittaṃ virajjati, evaṃ karoti. Vimocanīyesu dhammesu cittaṃ vimocetīti yehi ārammaṇehi cittaṃ vimocetabbaṃ, tesu yathā vimuccati, evaṃ karoti. Virājetvāti ettha maggakkhaṇe virājeti nāma, phalakkhaṇe virattaṃ nāma hoti. Dutiyapadepi eseva nayo. Sammāvimuttiṃ phusatīti hetunā nayena arahattaphalavimuttiṃ ñāṇaphassena phusatīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. ஸாமுகி³யஸுத்தங் • 4. Sāmugiyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4. ஸாமுகி³யஸுத்தவண்ணனா • 4. Sāmugiyasuttavaṇṇanā
