| Library / Tipiṭaka / ತಿಪಿಟಕ • Tipiṭaka / ವಿನಯವಿನಿಚ್ಛಯ-ಟೀಕಾ • Vinayavinicchaya-ṭīkā |
ಸಮುಟ್ಠಾನಸೀಸಕಥಾವಣ್ಣನಾ
Samuṭṭhānasīsakathāvaṇṇanā
೩೨೫-೬. ಮಹೇಸಿನಾ ದ್ವೀಸು ವಿಭಙ್ಗೇಸು ಪಞ್ಞತ್ತಾನಿ ಯಾನಿ ಪಾರಾಜಿಕಾದೀನಿ ಸಿಕ್ಖಾಪದಾನಿ ಉಪೋಸಥೇ ಉದ್ದಿಸನ್ತಿ, ತೇಸಂ ಸಿಕ್ಖಾಪದಾನಂ ಸಮುಟ್ಠಾನಂ ಭಿಕ್ಖೂನಂ ಪಾಟವತ್ಥಾಯ ಇತೋ ಪರಂ ಪವಕ್ಖಾಮಿ, ತಂ ಸಮಾಹಿತಾ ಸುಣಾಥಾತಿ ಯೋಜನಾ।
325-6. Mahesinā dvīsu vibhaṅgesu paññattāni yāni pārājikādīni sikkhāpadāni uposathe uddisanti, tesaṃ sikkhāpadānaṃ samuṭṭhānaṃ bhikkhūnaṃ pāṭavatthāya ito paraṃ pavakkhāmi, taṃ samāhitā suṇāthāti yojanā.
೩೨೭. ಕಾಯೋ ಚ ವಾಚಾ ಚ ಕಾಯವಾಚಾ ಚಾತಿ ಅಚಿತ್ತಕಾನಿ ಯಾನಿ ತೀಣಿ ಸಮುಟ್ಠಾನಾನಿ, ತಾನೇವ ಚಿತ್ತೇನ ಪಚ್ಚೇಕಂ ಯೋಜಿತಾನಿ ಸಚಿತ್ತಕಾನಿ ತೀಣಿ ಸಮುಟ್ಠಾನಾನಿ ಹೋನ್ತೀತಿ ಏವಮೇವ ಸಮುಟ್ಠಾನಂ ಪುರಿಮಾನಂ ದ್ವಿನ್ನಂ ವಸೇನ ಏಕಙ್ಗಿಕಂ, ತತಿಯಚತುತ್ಥಪಞ್ಚಮಾನಂ ವಸೇನ ದ್ವಙ್ಗಿಕಂ, ಛಟ್ಠಸ್ಸ ವಸೇನ ತಿವಙ್ಗಿಕಞ್ಚಾತಿ ಏವಂ ಛಧಾ ಸಮುಟ್ಠಾನವಿಧಿಂ ವದನ್ತೀತಿ ಯೋಜನಾ। ಕಾಯೋ, ವಾಚಾತಿ ಏಕಙ್ಗಿಕಂ ದ್ವಯಂ, ಕಾಯವಾಚಾ , ಕಾಯಚಿತ್ತಂ, ವಾಚಾಚಿತ್ತನ್ತಿ ದುವಙ್ಗಿಕತ್ತಯಂ, ಕಾಯವಾಚಾಚಿತ್ತನ್ತಿ ಅಙ್ಗಭೇದೇನ ತಿವಿಧಮ್ಪಿ ಅವಯವಭೇದೇನ ಸಮುಟ್ಠಾನಭೇದವಿಧಿಂ ಛಪ್ಪಕಾರಂ ವದನ್ತೀತಿ ಅಧಿಪ್ಪಾಯೋ।
327. Kāyo ca vācā ca kāyavācā cāti acittakāni yāni tīṇi samuṭṭhānāni, tāneva cittena paccekaṃ yojitāni sacittakāni tīṇi samuṭṭhānāni hontīti evameva samuṭṭhānaṃ purimānaṃ dvinnaṃ vasena ekaṅgikaṃ, tatiyacatutthapañcamānaṃ vasena dvaṅgikaṃ, chaṭṭhassa vasena tivaṅgikañcāti evaṃ chadhā samuṭṭhānavidhiṃ vadantīti yojanā. Kāyo, vācāti ekaṅgikaṃ dvayaṃ, kāyavācā , kāyacittaṃ, vācācittanti duvaṅgikattayaṃ, kāyavācācittanti aṅgabhedena tividhampi avayavabhedena samuṭṭhānabhedavidhiṃ chappakāraṃ vadantīti adhippāyo.
೩೨೮. ತೇಸು ಛಸು ಸಮುಟ್ಠಾನೇಸು ಏಕೇನ ವಾ ಸಮುಟ್ಠಾನೇನ ದ್ವೀಹಿ ವಾ ತೀಹಿ ವಾ ಚತೂಹಿ ವಾ ಛಹಿ ವಾ ಸಮುಟ್ಠಾನೇಹಿ ನಾನಾ ಆಪತ್ತಿಯೋ ಜಾಯರೇತಿ ಸಮ್ಬನ್ಧೋ।
328.Tesu chasu samuṭṭhānesu ekena vā samuṭṭhānena dvīhi vā tīhi vā catūhi vā chahi vā samuṭṭhānehi nānā āpattiyo jāyareti sambandho.
೩೨೯. ತತ್ಥ ತಾಸು ನಾನಾಪತ್ತೀಸು। ಪಞ್ಚ ಸಮುಟ್ಠಾನಾನಿ ಏತಿಸ್ಸಾತಿ ಪಞ್ಚಸಮುಟ್ಠಾನಾ, ಏವರೂಪಾ ಕಾಚಿ ಆಪತ್ತಿ ನ ವಿಜ್ಜತಿ। ಏಕಮೇಕಂ ಸಮುಟ್ಠಾನಂ ಯಾಸನ್ತಿ ವಿಗ್ಗಹೋ। ಪಚ್ಛಿಮೇಹೇವ ತೀಹಿಪೀತಿ ಸಚಿತ್ತಕೇಹೇವ ತೀಹಿ ಸಮುಟ್ಠಾನೇಹಿ, ಯಾ ಆಪತ್ತಿ ಏಕಸಮುಟ್ಠಾನಾ ಹೋತಿ, ಸಾ ಸಚಿತ್ತಕಾನಂ ತಿಣ್ಣಮಞ್ಞತರೇನ ಹೋತೀತಿ ಅಧಿಪ್ಪಾಯೋ।
329.Tattha tāsu nānāpattīsu. Pañca samuṭṭhānāni etissāti pañcasamuṭṭhānā, evarūpā kāci āpatti na vijjati. Ekamekaṃ samuṭṭhānaṃ yāsanti viggaho. Pacchimeheva tīhipīti sacittakeheva tīhi samuṭṭhānehi, yā āpatti ekasamuṭṭhānā hoti, sā sacittakānaṃ tiṇṇamaññatarena hotīti adhippāyo.
೩೩೦-೧. ತತಿಯಚ್ಛಟ್ಠತೋಪಿ ಚಾತಿ ಕಾಯವಾಚತೋ, ಕಾಯವಾಚಾಚಿತ್ತತೋ ಚ। ಚತುತ್ಥಚ್ಛಟ್ಠತೋ ಚೇವಾತಿ ಕಾಯಚಿತ್ತತೋ ಕಾಯವಾಚಾಚಿತ್ತತೋ ಚ। ಪಞ್ಚಮಚ್ಛಟ್ಠತೋಪಿ ಚಾತಿ ವಾಚಾಚಿತ್ತತೋ ಕಾಯವಾಚಾಚಿತ್ತತೋ ಚ। ‘‘ಕಾಯತೋ ಕಾಯಚಿತ್ತತೋ’’ತಿ ಪಠಮಂ ದ್ವಿಸಮುಟ್ಠಾನಂ, ‘‘ವಾಚತೋ ವಾಚಾಚಿತ್ತತೋ’’ತಿ ದುತಿಯಂ, ‘‘ಕಾಯವಾಚತೋ ಕಾಯವಾಚಾಚಿತ್ತತೋ’’ತಿ ತತಿಯಂ, ‘‘ಕಾಯಚಿತ್ತತೋ ಕಾಯವಾಚಾಚಿತ್ತತೋ’’ತಿ ಚತುತ್ಥಂ, ‘‘ವಾಚಾಚಿತ್ತತೋ ಕಾಯವಾಚಾಚಿತ್ತತೋ’’ತಿ ಪಞ್ಚಮಂ ದ್ವಿಸಮುಟ್ಠಾನನ್ತಿ ಏವಂ ಪಞ್ಚಧಾ ಏವ ಠಿತೇಹಿ ದ್ವೀಹಿ ಸಮುಟ್ಠಾನೇಹಿ ಏಸಾ ದ್ವಿಸಮುಟ್ಠಾನಾಪತ್ತಿ ಜಾಯತೇ ಸಮುಟ್ಠಾತಿ। ನ ಅಞ್ಞತೋತಿ ಕಾಯತೋ ವಾಚತೋತಿ ಏಕಂ, ವಾಚತೋ ಕಾಯವಾಚತೋತಿ ಏಕನ್ತಿ ಏವಂ ಯಥಾವುತ್ತಕ್ಕಮವಿಪರಿಯಾಯೇನ ಯೋಜಿತೇಹಿ ಅಞ್ಞೇಹಿ ಸಮುಟ್ಠಾನೇಹಿ ನ ಸಮುಟ್ಠಾತಿ।
330-1.Tatiyacchaṭṭhatopi cāti kāyavācato, kāyavācācittato ca. Catutthacchaṭṭhato cevāti kāyacittato kāyavācācittato ca. Pañcamacchaṭṭhatopi cāti vācācittato kāyavācācittato ca. ‘‘Kāyato kāyacittato’’ti paṭhamaṃ dvisamuṭṭhānaṃ, ‘‘vācato vācācittato’’ti dutiyaṃ, ‘‘kāyavācato kāyavācācittato’’ti tatiyaṃ, ‘‘kāyacittato kāyavācācittato’’ti catutthaṃ, ‘‘vācācittato kāyavācācittato’’ti pañcamaṃ dvisamuṭṭhānanti evaṃ pañcadhā eva ṭhitehi dvīhi samuṭṭhānehi esā dvisamuṭṭhānāpatti jāyate samuṭṭhāti. Na aññatoti kāyato vācatoti ekaṃ, vācato kāyavācatoti ekanti evaṃ yathāvuttakkamavipariyāyena yojitehi aññehi samuṭṭhānehi na samuṭṭhāti.
೩೩೨. ಪಠಮೇಹಿ ಚ ತೀಹೀತಿ ‘‘ಕಾಯತೋ, ವಾಚತೋ, ಕಾಯವಾಚತೋ’’ತಿ ಪಠಮಂ ನಿದ್ದಿಟ್ಠೇಹಿ ತೀಹಿ ಅಚಿತ್ತಕಸಮುಟ್ಠಾನೇಹಿ। ಪಚ್ಛಿಮೇಹಿ ಚಾತಿ ‘‘ಕಾಯಚಿತ್ತತೋ, ವಾಚಾಚಿತ್ತತೋ, ಕಾಯವಾಚಾಚಿತ್ತತೋ’’ತಿ ಏವಂ ಪಚ್ಛಾ ವುತ್ತೇಹಿ ಸಚಿತ್ತಕೇಹಿ ತೀಹಿ ಸಮುಟ್ಠಾನೇಹಿ। ನ ಅಞ್ಞತೋತಿ ‘‘ಕಾಯತೋ, ವಾಚತೋ, ಕಾಯಚಿತ್ತತೋ, ವಾಚತೋ, ಕಾಯವಾಚತೋ, ಕಾಯಚಿತ್ತತೋ’’ತಿ ಏವಂ ವುತ್ತವಿಪಲ್ಲಾಸತೋ ಅಞ್ಞೇಹಿ ತೀಹಿ ಸಮುಟ್ಠಾನೇಹಿ ನ ಸಮುಟ್ಠಾತಿ।
332.Paṭhamehi ca tīhīti ‘‘kāyato, vācato, kāyavācato’’ti paṭhamaṃ niddiṭṭhehi tīhi acittakasamuṭṭhānehi. Pacchimehi cāti ‘‘kāyacittato, vācācittato, kāyavācācittato’’ti evaṃ pacchā vuttehi sacittakehi tīhi samuṭṭhānehi. Na aññatoti ‘‘kāyato, vācato, kāyacittato, vācato, kāyavācato, kāyacittato’’ti evaṃ vuttavipallāsato aññehi tīhi samuṭṭhānehi na samuṭṭhāti.
೩೩೩-೪. ಪಠಮಾ ತತಿಯಾ ಚೇವ, ಚತುತ್ಥಚ್ಛಟ್ಠತೋಪಿ ಚಾತಿ ಕಾಯತೋ, ಕಾಯವಾಚತೋ, ಕಾಯಚಿತ್ತತೋ, ಕಾಯವಾಚಾಚಿತ್ತತೋತಿ ಏತೇಹಿ ಚತೂಹಿ ಸಮುಟ್ಠಾನೇಹಿ ಚೇವ। ದುತಿಯಾ…ಪೇ॰… ಚ್ಛಟ್ಠತೋಪಿ ಚಾತಿ ವಾಚತೋ, ಕಾಯವಾಚತೋ, ವಾಚಾಚಿತ್ತತೋ, ಕಾಯವಾಚಾಚಿತ್ತತೋತಿ ಇಮೇಹಿ ಚತೂಹಿ ಚಾತಿ ಚತುಸಮುಟ್ಠಾನೇನಾಪತ್ತಿ।
333-4.Paṭhamā tatiyā ceva, catutthacchaṭṭhatopi cāti kāyato, kāyavācato, kāyacittato, kāyavācācittatoti etehi catūhi samuṭṭhānehi ceva. Dutiyā…pe… cchaṭṭhatopi cāti vācato, kāyavācato, vācācittato, kāyavācācittatoti imehi catūhi cāti catusamuṭṭhānenāpatti.
ಸಾ ಏವಂ ದ್ವಿಧಾ ಠಿತೇಹಿ ಚತೂಹಿ ಸಮುಟ್ಠಾನೇಹಿ ಜಾಯತೇ। ನ ಪನಞ್ಞತೋತಿ ‘‘ಕಾಯತೋ, ವಾಚತೋ, ಕಾಯವಾಚತೋ, ಕಾಯಚಿತ್ತತೋ’’ತಿ ಏವಮಾದಿನಾ ವಿಪಲ್ಲಾಸನಯೇನ ಯೋಜಿತೇಹಿ ಚತೂಹಿ ಸಮುಟ್ಠಾನೇಹಿ ನ ಸಮುಟ್ಠಾತಿ। ಛ ಸಮುಟ್ಠಾನಾನಿ ಯಸ್ಸಾ ಸಾ ಛಸಮುಟ್ಠಾನಾ। ಸಚಿತ್ತಕೇಹಿ ತೀಹಿ, ಅಚಿತ್ತಕೇಹಿ ತೀಹೀತಿ ಛಹಿ ಏವ ಸಮುಟ್ಠಾನೇಹಿ ಸಮುಟ್ಠಾತೀತಿ। ಪಕಾರನ್ತರಾಭಾವಾ ಇಧ ‘‘ನ ಅಞ್ಞತೋ’’ತಿ ನ ವುತ್ತಂ।
Sā evaṃ dvidhā ṭhitehi catūhi samuṭṭhānehi jāyate. Na panaññatoti ‘‘kāyato, vācato, kāyavācato, kāyacittato’’ti evamādinā vipallāsanayena yojitehi catūhi samuṭṭhānehi na samuṭṭhāti. Cha samuṭṭhānāni yassā sā chasamuṭṭhānā. Sacittakehi tīhi, acittakehi tīhīti chahi eva samuṭṭhānehi samuṭṭhātīti. Pakārantarābhāvā idha ‘‘na aññato’’ti na vuttaṃ.
ಆಹ ಚ ಅಟ್ಠಕಥಾಚರಿಯೋ ಮಾತಿಕಟ್ಠಕಥಾಯಂ।
Āha ca aṭṭhakathācariyo mātikaṭṭhakathāyaṃ.
೩೩೫. ಸಮುಟ್ಠಾತಿ ಏತಸ್ಮಾತಿ ಸಮುಟ್ಠಾನಂ, ಕಾಯಾದಿ ಛಬ್ಬಿಧಂ, ಏಕಂ ಸಮುಟ್ಠಾನಂ ಕಾರಣಂ ಯಸ್ಸಾ ಸಾ ಏಕಸಮುಟ್ಠಾನಾ। ಪಕಾರನ್ತರಾಭಾವಾ ತಿಧಾ। ಕಥಂ? ಸಚಿತ್ತಕಾನಂ ತಿಣ್ಣಂ ಸಮುಟ್ಠಾನಾನಂ ವಸೇನ ತಿವಿಧಾ। ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಿತಾ ದ್ವಿಸಮುಟ್ಠಿತಾ, ದ್ವಿಸಮುಟ್ಠಾನಾಪತ್ತೀತಿ ಅತ್ಥೋ। ಪಞ್ಚಧಾತಿ ವುತ್ತನಯೇನ ಪಞ್ಚಪ್ಪಕಾರಾ। ತೀಣಿ ಸಮುಟ್ಠಾನಾನಿ ಯಸ್ಸಾ ಸಾ ತಿಸಮುಟ್ಠಾನಾ, ಚತ್ತಾರಿ ಸಮುಟ್ಠಾನಾನಿ ಯಸ್ಸಾ ಸಾ ಚತುರುಟ್ಠಾನಾ, ತಿಸಮುಟ್ಠಾನಾ ಚ ಚತುರುಟ್ಠಾನಾ ಚ ತಿಚತುರುಟ್ಠಾನಾತಿ ಏಕದೇಸಸರೂಪೇಕಸೇಸೋ, ತಿಸಮುಟ್ಠಾನಾ ದ್ವಿಧಾ ವಿಭತ್ತಾ, ಚತುಸಮುಟ್ಠಾನಾ ಚ ದ್ವಿಧಾ ಏವ ವಿಭತ್ತಾತಿ ಅತ್ಥೋ। ಛಹಿ ಸಮುಟ್ಠಾನೇಹಿ ಸಮುಟ್ಠಿತಾ ಛಸಮುಟ್ಠಿತಾ, ಛಸಮುಟ್ಠಾನಾತಿ ಅತ್ಥೋ। ಏಕಧಾತಿ ಪಕಾರನ್ತರಾಭಾವಾ ಏಕಧಾವ ಠಿತಾತಿ ಅಧಿಪ್ಪಾಯೋ।
335. Samuṭṭhāti etasmāti samuṭṭhānaṃ, kāyādi chabbidhaṃ, ekaṃ samuṭṭhānaṃ kāraṇaṃ yassā sā ekasamuṭṭhānā. Pakārantarābhāvā tidhā. Kathaṃ? Sacittakānaṃ tiṇṇaṃ samuṭṭhānānaṃ vasena tividhā. Dvīhi samuṭṭhānehi samuṭṭhitā dvisamuṭṭhitā, dvisamuṭṭhānāpattīti attho. Pañcadhāti vuttanayena pañcappakārā. Tīṇi samuṭṭhānāni yassā sā tisamuṭṭhānā, cattāri samuṭṭhānāni yassā sā caturuṭṭhānā, tisamuṭṭhānā ca caturuṭṭhānā ca ticaturuṭṭhānāti ekadesasarūpekaseso, tisamuṭṭhānā dvidhā vibhattā, catusamuṭṭhānā ca dvidhā eva vibhattāti attho. Chahi samuṭṭhānehi samuṭṭhitā chasamuṭṭhitā, chasamuṭṭhānāti attho. Ekadhāti pakārantarābhāvā ekadhāva ṭhitāti adhippāyo.
೩೩೬. ಸಬ್ಬಾ ಆಪತ್ತಿಯೋ ಸಮುಟ್ಠಾನವಿಸೇಸತೋ ಏವಂ ತೇರಸಧಾ ಠಿತಾನಂ ಸಮುಟ್ಠಾನಭೇದಾನಂ ನಾನತ್ತತೋ ತೇಹಿ ಸಮುಟ್ಠಿತಾನಂ ಪಠಮಂ ಪಞ್ಞತ್ತತ್ತಾ ಸೀಸಭೂತಾನಂ ಸಿಕ್ಖಾಪದಾನಂ ವಸೇನ ತೇರಸೇವ ನಾಮಾನಿ ಲಭನ್ತಿ, ತಾನಿ ಇತೋ ಪರಂ ವಕ್ಖಾಮೀತಿ ಯೋಜನಾ।
336.Sabbā āpattiyo samuṭṭhānavisesato evaṃ terasadhā ṭhitānaṃ samuṭṭhānabhedānaṃ nānattato tehi samuṭṭhitānaṃ paṭhamaṃ paññattattā sīsabhūtānaṃ sikkhāpadānaṃ vasena teraseva nāmāni labhanti, tāni ito paraṃ vakkhāmīti yojanā.
೩೩೭. ಪಠಮನ್ತಿಮವತ್ಥುಞ್ಚಾತಿ ಪಠಮಪಾರಾಜಿಕಸಮುಟ್ಠಾನಂ। ದುತಿಯನ್ತಿ ಅದಿನ್ನಾದಾನಸಮುಟ್ಠಾನಂ। ಸಞ್ಚರಿತ್ತಕನ್ತಿ ಸಞ್ಚರಿತ್ತಸಮುಟ್ಠಾನಂ। ಸಮನುಭಾಸನನ್ತಿ ಸಮನುಭಾಸನಸಮುಟ್ಠಾನಂ। ‘‘ಕಥಿನಂ ಏಳಕಲೋಮಕ’’ನ್ತಿ ಪದಚ್ಛೇದೋ, ಕಥಿನಸಮುಟ್ಠಾನಂ ಏಳಕಲೋಮಸಮುಟ್ಠಾನಞ್ಚ।
337.Paṭhamantimavatthuñcāti paṭhamapārājikasamuṭṭhānaṃ. Dutiyanti adinnādānasamuṭṭhānaṃ. Sañcarittakanti sañcarittasamuṭṭhānaṃ. Samanubhāsananti samanubhāsanasamuṭṭhānaṃ. ‘‘Kathinaṃ eḷakalomaka’’nti padacchedo, kathinasamuṭṭhānaṃ eḷakalomasamuṭṭhānañca.
೩೩೮. ಪದಸೋಧಮ್ಮನ್ತಿ ಪದಸೋಧಮ್ಮಸಮುಟ್ಠಾನಂ। ಅದ್ಧಾನಂ ಥೇಯ್ಯಸತ್ಥನ್ತಿ ಅದ್ಧಾನಸಮುಟ್ಠಾನಂ ಥೇಯ್ಯಸತ್ಥಸಮುಟ್ಠಾನಂ। ದೇಸನಾತಿ ಧಮ್ಮದೇಸನಾಸಮುಟ್ಠಾನಂ। ಭೂತಾರೋಚನಕನ್ತಿ ಭೂತಾರೋಚನಸಮುಟ್ಠಾನಂ। ಚೋರಿವುಟ್ಠಾಪನನ್ತಿ ಚೋರಿವುಟ್ಠಾಪನಸಮುಟ್ಠಾನಂ।
338.Padasodhammanti padasodhammasamuṭṭhānaṃ. Addhānaṃ theyyasatthanti addhānasamuṭṭhānaṃ theyyasatthasamuṭṭhānaṃ. Desanāti dhammadesanāsamuṭṭhānaṃ. Bhūtārocanakanti bhūtārocanasamuṭṭhānaṃ. Corivuṭṭhāpananti corivuṭṭhāpanasamuṭṭhānaṃ.
೩೩೯. ಅನನುಞ್ಞಾತಕಞ್ಚಾತಿ ಅನನುಞ್ಞಾತಕಸಮುಟ್ಠಾನಞ್ಚಾತಿ ಏತಾನಿ ತೇರಸ ತೇಹಿ ಸಮುಟ್ಠಾನೇಹಿ ಸಮುಟ್ಠಿತಾನಂ ತೇಸಂ ಸಿಕ್ಖಾಪದಾನಂ ಪಠಮಂ ಪಠಮಂ ನಿದ್ದಿಟ್ಠಾನಂ ಪಠಮಪಾರಾಜಿಕಾದಿಸಿಕ್ಖಾಪದಸಮುಟ್ಠಾನಾನಂ ಇತರೇಸಂ ಪುಬ್ಬಙ್ಗಮಭಾವತೋ ‘‘ಸೀಸಾನೀ’’ತಿ ವುತ್ತಾನಿ। ಯಥಾಹ ಪರಿವಾರಟ್ಠಕಥಾಯಂ ‘‘ಪಠಮಪಾರಾಜಿಕಂ ನಾಮ ಏಕಂ ಸಮುಟ್ಠಾನಸೀಸಂ, ಸೇಸಾನಿ ತೇನ ಸದಿಸಾನೀ’’ತಿಆದಿ (ಪರಿ॰ ಅಟ್ಠ॰ ೨೫೮)। ತೇರಸೇತೇ ಸಮುಟ್ಠಾನನಯಾತಿ ಏತೇ ಸೀಸವಸೇನ ದಸ್ಸಿತಾ ತೇರಸ ಸಮುಟ್ಠಾನನಯಾ। ವಿಞ್ಞೂಹಿ ಉಪಾಲಿತ್ಥೇರಾದೀಹಿ।
339.Ananuññātakañcāti ananuññātakasamuṭṭhānañcāti etāni terasa tehi samuṭṭhānehi samuṭṭhitānaṃ tesaṃ sikkhāpadānaṃ paṭhamaṃ paṭhamaṃ niddiṭṭhānaṃ paṭhamapārājikādisikkhāpadasamuṭṭhānānaṃ itaresaṃ pubbaṅgamabhāvato ‘‘sīsānī’’ti vuttāni. Yathāha parivāraṭṭhakathāyaṃ ‘‘paṭhamapārājikaṃ nāma ekaṃ samuṭṭhānasīsaṃ, sesāni tena sadisānī’’tiādi (pari. aṭṭha. 258). Terasete samuṭṭhānanayāti ete sīsavasena dassitā terasa samuṭṭhānanayā. Viññūhi upālittherādīhi.
೩೪೦. ತತ್ಥ ತೇರಸಸು ಸಮುಟ್ಠಾನಸೀಸೇಸು। ಯಾತಿ ಯಾ ಪನ ಆಪತ್ತಿ। ಆದಿಪಾರಾಜಿಕುಟ್ಠಾನಾತಿ ಪಠಮಪಾರಾಜಿಕಸಮುಟ್ಠಾನಾ।
340.Tattha terasasu samuṭṭhānasīsesu. Yāti yā pana āpatti. Ādipārājikuṭṭhānāti paṭhamapārājikasamuṭṭhānā.
೩೪೧. ಅದಿನ್ನಾದಾನ-ಸದ್ದೋ ಪುಬ್ಬಕೋ ಪಠಮೋ ಏತಿಸ್ಸಾ ತಂಸಮುಟ್ಠಾನಾಪತ್ತಿಯಾತಿ ಅದಿನ್ನಾದಾನಪುಬ್ಬಕಾ, ಅದಿನ್ನಾದಾನಸಮುಟ್ಠಾನಾತಿ ಉದ್ದಿಟ್ಠಾತಿ ಯೋಜನಾ।
341. Adinnādāna-saddo pubbako paṭhamo etissā taṃsamuṭṭhānāpattiyāti adinnādānapubbakā, adinnādānasamuṭṭhānāti uddiṭṭhāti yojanā.
೩೪೨. ಜಾತೂತಿ ಏಕಂಸೇನ।
342.Jātūti ekaṃsena.
೩೪೩. ಅಯಂ ಸಮುಟ್ಠಾನವಸೇನ ‘‘ಸಮನುಭಾಸನಾಸಮುಟ್ಠಾನಾ’’ತಿ ವುತ್ತಾತಿ ಯೋಜನಾ।
343. Ayaṃ samuṭṭhānavasena ‘‘samanubhāsanāsamuṭṭhānā’’ti vuttāti yojanā.
೩೪೪. ಕಥಿನ-ಸದ್ದೋ ಉಪಪದೋ ಯಸ್ಸಾ ತಂಸಮುಟ್ಠಾನಾಯ ಆಪತ್ತಿಯಾ ಸಾ ಕಥಿನುಪಪದಾ, ಕಥಿನಸಮುಟ್ಠಾನಾತಿ ಮತಾ ಞಾತಾ, ಅಯಂ ಸಮುಟ್ಠಾನವಸೇನ ‘‘ಕಥಿನಸಮುಟ್ಠಾನಾ’’ತಿ ಞಾತಾತಿ ಅತ್ಥೋ।
344. Kathina-saddo upapado yassā taṃsamuṭṭhānāya āpattiyā sā kathinupapadā, kathinasamuṭṭhānāti matā ñātā, ayaṃ samuṭṭhānavasena ‘‘kathinasamuṭṭhānā’’ti ñātāti attho.
೩೪೫. ಏಳಕಲೋಮ-ಸದ್ದೋ ಆದಿ ಯಸ್ಸಾ ತಂಸಮುಟ್ಠಾನಾಪತ್ತಿಯಾ ಸಾ ಏಳಕಲೋಮಾದಿಸಮುಟ್ಠಾನಾತಿ ಅತ್ಥೋ।
345. Eḷakaloma-saddo ādi yassā taṃsamuṭṭhānāpattiyā sā eḷakalomādisamuṭṭhānāti attho.
೩೪೯. ಏತ್ಥ ಸಮುಟ್ಠಾನೇಸು।
349.Ettha samuṭṭhānesu.
೩೫೦. ಭೂತಾರೋಚನ-ಸದ್ದೋ ಪುಬ್ಬಭಾಗೋ ಏತಿಸ್ಸಾ ತಂಸಮುಟ್ಠಾನಾಯ ಆಪತ್ತಿಯಾತಿ ಭೂತಾರೋಚನಪುಬ್ಬಕಾ, ಭೂತಾರೋಚನಸಮುಟ್ಠಾನಾತಿ ಅತ್ಥೋ।
350. Bhūtārocana-saddo pubbabhāgo etissā taṃsamuṭṭhānāya āpattiyāti bhūtārocanapubbakā, bhūtārocanasamuṭṭhānāti attho.
೩೫೧. ಸಮುಟ್ಠಾನಂ ಸಮುಟ್ಠಿತಂ, ಚೋರಿವುಟ್ಠಾಪನಂ ಸಮುಟ್ಠಿತಂ ಯಸ್ಸಾ ಸಾ ಚೋರಿವುಟ್ಠಾಪನಸಮುಟ್ಠಿತಾ, ಚೋರಿವುಟ್ಠಾಪನಸಮುಟ್ಠಾನಾತಿ ಅತ್ಥೋ।
351. Samuṭṭhānaṃ samuṭṭhitaṃ, corivuṭṭhāpanaṃ samuṭṭhitaṃ yassā sā corivuṭṭhāpanasamuṭṭhitā, corivuṭṭhāpanasamuṭṭhānāti attho.
೩೫೩. ತತ್ಥಾತಿ ತೇರಸಸಮುಟ್ಠಾನಸೀಸೇಸು, ‘‘ಸಮುಟ್ಠಾನಂ ಸಚಿತ್ತಕ’’ನ್ತಿ ಇದಂ ‘‘ಪಠಮ’’ನ್ತಿಆದೀಹಿ ಪಚ್ಚೇಕಂ ಯೋಜೇತಬ್ಬಂ। ಪಠಮಂ ಸಮುಟ್ಠಾನನ್ತಿ ಪಠಮಪಾರಾಜಿಕಸಮುಟ್ಠಾನಂ। ದುತಿಯಂ ಸಮುಟ್ಠಾನನ್ತಿ ಅದಿನ್ನಾದಾನಸಮುಟ್ಠಾನಂ। ಚತುತ್ಥಂ ಸಮುಟ್ಠಾನನ್ತಿ ಸಮನುಭಾಸನಸಮುಟ್ಠಾನಂ। ನವಮಂ ಸಮುಟ್ಠಾನನ್ತಿ ಥೇಯ್ಯಸತ್ಥಸಮುಟ್ಠಾನಂ। ದಸಮಂ ಸಮುಟ್ಠಾನನ್ತಿ ಧಮ್ಮದೇಸನಾಸಮುಟ್ಠಾನಂ। ದ್ವಾದಸಮಂ ಸಮುಟ್ಠಾನನ್ತಿ ಚೋರಿವುಟ್ಠಾಪನಸಮುಟ್ಠಾನಂ।
353.Tatthāti terasasamuṭṭhānasīsesu, ‘‘samuṭṭhānaṃ sacittaka’’nti idaṃ ‘‘paṭhama’’ntiādīhi paccekaṃ yojetabbaṃ. Paṭhamaṃ samuṭṭhānanti paṭhamapārājikasamuṭṭhānaṃ. Dutiyaṃ samuṭṭhānanti adinnādānasamuṭṭhānaṃ. Catutthaṃ samuṭṭhānanti samanubhāsanasamuṭṭhānaṃ. Navamaṃ samuṭṭhānanti theyyasatthasamuṭṭhānaṃ. Dasamaṃ samuṭṭhānanti dhammadesanāsamuṭṭhānaṃ. Dvādasamaṃ samuṭṭhānanti corivuṭṭhāpanasamuṭṭhānaṃ.
೩೫೪. ಸಮುಟ್ಠಾನೇತಿ ಸಮುಟ್ಠಾನಸೀಸೇ। ಸದಿಸಾತಿ ತೇನ ತೇನ ಸಮುಟ್ಠಾನಸೀಸೇನ ಸಮುಟ್ಠಾನಾ ಆಪತ್ತಿಯೋ। ಇಧಾತಿ ಇಮಸ್ಮಿಂ ಸಮುಟ್ಠಾನವಿನಿಚ್ಛಯೇ। ದಿಸ್ಸರೇತಿ ದಿಸ್ಸನ್ತೇ, ದಿಸ್ಸನ್ತೀತಿ ಅತ್ಥೋ। ಅಥ ವಾ ಇಧ ದಿಸ್ಸರೇತಿ ಇಧ ಉಭತೋವಿಭಙ್ಗೇ ಏತೇಸು ತೇರಸಸಮುಟ್ಠಾನೇಸು ಏಕೇಕಸ್ಮಿಂ ಅಞ್ಞಾನಿಪಿ ಸದಿಸಾನಿ ಸಮುಟ್ಠಾನಾನಿ ದಿಸ್ಸನ್ತೀತಿ ಅತ್ಥೋ। ಇದಾನಿ ತಾನಿ ಸರೂಪತೋ ನಿದಸ್ಸೇತುಮಾಹ ‘‘ಸುಕ್ಕಞ್ಚಾ’’ತಿಆದಿ। ತತ್ಥ ಸುಕ್ಕನ್ತಿ ಸುಕ್ಕವಿಸ್ಸಟ್ಠಿಸಿಕ್ಖಾಪದಂ। ಏಸ ನಯೋ ‘‘ಕಾಯಸಂಸಗ್ಗೋ’’ತಿಆದೀಸುಪಿ। ಯದೇತ್ಥ ದುವಿಞ್ಞೇಯ್ಯಂ, ತಂ ವಕ್ಖಾಮ।
354.Samuṭṭhāneti samuṭṭhānasīse. Sadisāti tena tena samuṭṭhānasīsena samuṭṭhānā āpattiyo. Idhāti imasmiṃ samuṭṭhānavinicchaye. Dissareti dissante, dissantīti attho. Atha vā idha dissareti idha ubhatovibhaṅge etesu terasasamuṭṭhānesu ekekasmiṃ aññānipi sadisāni samuṭṭhānāni dissantīti attho. Idāni tāni sarūpato nidassetumāha ‘‘sukkañcā’’tiādi. Tattha sukkanti sukkavissaṭṭhisikkhāpadaṃ. Esa nayo ‘‘kāyasaṃsaggo’’tiādīsupi. Yadettha duviññeyyaṃ, taṃ vakkhāma.
೩೫೫. ಪುಬ್ಬುಪಪರಿಪಾಕೋ ಚಾತಿ ‘‘ಜಾನಂ ಪುಬ್ಬುಪಗತಂ ಭಿಕ್ಖು’’ನ್ತಿ (ಪಾಚಿ॰ ೧೨೦) ಸಿಕ್ಖಾಪದಞ್ಚ ‘‘ಭಿಕ್ಖುನಿಪರಿಪಾಚಿತ’’ನ್ತಿ (ಪಾಚಿ॰ ೧೯೨, ೧೯೪) ಪಿಣ್ಡಪಾತಸಿಕ್ಖಾಪದಞ್ಚ। ರಹೋ ಭಿಕ್ಖುನಿಯಾಸಹಾತಿ ಭಿಕ್ಖುನಿಯಾ ಸದ್ಧಿಂ ರಹೋ ನಿಸಜ್ಜಸಿಕ್ಖಾಪದಞ್ಚ। ಸಭೋಜನೇ, ರಹೋ ದ್ವೇ ಚಾತಿ ಸಭೋಜನೇ ಕುಲೇ ಅನುಪಖಜ್ಜಸಿಕ್ಖಾಪದಞ್ಚ ದ್ವೇ ರಹೋನಿಸಜ್ಜಸಿಕ್ಖಾಪದಾನಿ ಚ। ಅಙ್ಗುಲೀ ಉದಕೇ ಹಸನ್ತಿ ಅಙ್ಗುಲಿಪತೋದಞ್ಚ ಉದಕಹಸಧಮ್ಮಸಿಕ್ಖಾಪದಞ್ಚ।
355.Pubbupaparipāko cāti ‘‘jānaṃ pubbupagataṃ bhikkhu’’nti (pāci. 120) sikkhāpadañca ‘‘bhikkhuniparipācita’’nti (pāci. 192, 194) piṇḍapātasikkhāpadañca. Raho bhikkhuniyāsahāti bhikkhuniyā saddhiṃ raho nisajjasikkhāpadañca. Sabhojane, raho dve cāti sabhojane kule anupakhajjasikkhāpadañca dve rahonisajjasikkhāpadāni ca. Aṅgulī udake hasanti aṅgulipatodañca udakahasadhammasikkhāpadañca.
೩೫೬. ಪಹಾರೇ ಉಗ್ಗಿರೇ ಚೇವಾತಿ ಪಹಾರದಾನಸಿಕ್ಖಾಪದಞ್ಚ ತಲಸತ್ತಿಉಗ್ಗಿರಣಸಿಕ್ಖಾಪದಞ್ಚ। ತೇಪಞ್ಞಾಸಾ ಚ ಸೇಖಿಯಾತಿ ಪಞ್ಚಸತ್ತತಿಸೇಖಿಯಾಸು ವಕ್ಖಮಾನಾನಿ ಉಜ್ಜಗ್ಘಿಕಾದೀನಿ ಸಮನುಭಾಸನಸಮುಟ್ಠಾನಾನಿ ದಸ, ಛತ್ತಪಾಣಿಆದೀನಿ ಧಮ್ಮದೇಸನಾಸಮುಟ್ಠಾನಾನಿ ಏಕಾದಸ, ಥೇಯ್ಯಸತ್ಥಸಮುಟ್ಠಾನಂ , ಸೂಪೋದನವಿಞ್ಞತ್ತಿಸಿಕ್ಖಾಪದಞ್ಚಾತಿ ಬಾವೀಸತಿ ಸಿಕ್ಖಾಪದಾನಿ ಠಪೇತ್ವಾ ಪರಿಮಣ್ಡಲನಿವಾಸನಾದೀನಿ ಇತರಾನಿ ತೇಪಞ್ಞಾಸ ಸೇಖಿಯಸಿಕ್ಖಾಪದಾನಿ ಚ। ಅಧಕ್ಖಕುಬ್ಭಜಾಣುಞ್ಚಾತಿ ಭಿಕ್ಖುನೀನಂ ಅಧಕ್ಖಕಉಬ್ಭಜಾಣುಸಿಕ್ಖಾಪದಞ್ಚ। ಗಾಮನ್ತರಮವಸ್ಸುತಾತಿ ಗಾಮನ್ತರಗಮನಂ, ಅವಸ್ಸುತಸ್ಸ ಹತ್ಥತೋ ಖಾದನೀಯಗ್ಗಹಣಸಿಕ್ಖಾಪದಞ್ಚ।
356.Pahāre uggire cevāti pahāradānasikkhāpadañca talasattiuggiraṇasikkhāpadañca. Tepaññāsā ca sekhiyāti pañcasattatisekhiyāsu vakkhamānāni ujjagghikādīni samanubhāsanasamuṭṭhānāni dasa, chattapāṇiādīni dhammadesanāsamuṭṭhānāni ekādasa, theyyasatthasamuṭṭhānaṃ , sūpodanaviññattisikkhāpadañcāti bāvīsati sikkhāpadāni ṭhapetvā parimaṇḍalanivāsanādīni itarāni tepaññāsa sekhiyasikkhāpadāni ca. Adhakkhakubbhajāṇuñcāti bhikkhunīnaṃ adhakkhakaubbhajāṇusikkhāpadañca. Gāmantaramavassutāti gāmantaragamanaṃ, avassutassa hatthato khādanīyaggahaṇasikkhāpadañca.
೩೫೭-೮. ತಲಮಟ್ಠುದಸುದ್ಧಿ ಚಾತಿ ತಲಘಾತಂ, ಜತುಮಟ್ಠಂ, ಉದಕಸುದ್ಧಿಕಾದಿಯನಞ್ಚ। ವಸ್ಸಂವುತ್ಥಾತಿ ‘‘ವಸ್ಸಂವುತ್ಥಾ…ಪೇ॰… ಛಪ್ಪಞ್ಚಯೋಜನಾನೀ’’ತಿ (ಪಾಚಿ॰ ೯೭೪) ಸಿಕ್ಖಾಪದಞ್ಚ। ಓವಾದಾಯ ನ ಗಚ್ಛನ್ತೀತಿ ಓವಾದಾಯ ಅಗಮನಸಿಕ್ಖಾಪದಞ್ಚ। ನಾನುಬನ್ಧೇ ಪವತ್ತಿನಿನ್ತಿ ‘‘ವುಟ್ಠಾಪಿತಂ ಪವತ್ತಿನಿಂ ದ್ವೇ ವಸ್ಸಾನಿ ನಾನುಬನ್ಧೇಯ್ಯಾ’’ತಿ (ಪಾಚಿ॰ ೧೧೧೨) ಸಿಕ್ಖಾಪದಞ್ಚಾತಿ ಉಭತೋವಿಭಙ್ಗೇ ನಿದ್ದಿಟ್ಠಾ ಇಮೇ ಪಞ್ಚಸತ್ತತಿ ಧಮ್ಮಾ ಕಾಯಚಿತ್ತಸಮುಟ್ಠಿತಾ ಮೇಥುನೇನ ಸಮಾ ಏಕಸಮುಟ್ಠಾನಾ ಮತಾತಿ ಯೋಜನಾ।
357-8.Talamaṭṭhudasuddhi cāti talaghātaṃ, jatumaṭṭhaṃ, udakasuddhikādiyanañca. Vassaṃvutthāti ‘‘vassaṃvutthā…pe… chappañcayojanānī’’ti (pāci. 974) sikkhāpadañca. Ovādāya na gacchantīti ovādāya agamanasikkhāpadañca. Nānubandhe pavattininti ‘‘vuṭṭhāpitaṃ pavattiniṃ dve vassāni nānubandheyyā’’ti (pāci. 1112) sikkhāpadañcāti ubhatovibhaṅge niddiṭṭhā ime pañcasattati dhammā kāyacittasamuṭṭhitā methunena samā ekasamuṭṭhānā matāti yojanā.
ಏತ್ಥ ಚ ಪಾಳಿಯಂ ‘‘ಛಸತ್ತತೀ’’ತಿ ಗಣನಪರಿಚ್ಛೇದೋ ಸಮುಟ್ಠಾನಸಿಕ್ಖಾಪದೇನ ಸಹ ದಸ್ಸಿತೋ। ಇಧ ಪನ ತಂ ವಿನಾ ತಂಸದಿಸಾನಮೇವ ಗಣನಾ ದಸ್ಸಿತಾ। ತೇನೇವ ಪಠಮಂ ಸಮುಟ್ಠಾನಸೀಸಂ ಪಾಳಿಯಂ ಗಣನಾಯಪಿ ದಸ್ಸಿತಂ, ಇಧೇವ ನ ದಸ್ಸಿತಂ। ಉಪರಿ ಕತ್ಥಚಿ ಸಮುಟ್ಠಾನಸೀಸಸ್ಸ ದಸ್ಸನಂ ಪನೇತ್ಥ ವಕ್ಖಮಾನಾನಂ ತಂಸದಿಸಭಾವದಸ್ಸನತ್ಥಂ, ಗಣನಾಯ ವಕ್ಖಮಾನಾಯ ಅನ್ತೋಗಧಭಾವದಸ್ಸನತ್ಥಂ। ತೇನೇವ ತತ್ಥಪಿ ತಂ ವಿನಾ ಗಣನಂ ವಕ್ಖತಿ।
Ettha ca pāḷiyaṃ ‘‘chasattatī’’ti gaṇanaparicchedo samuṭṭhānasikkhāpadena saha dassito. Idha pana taṃ vinā taṃsadisānameva gaṇanā dassitā. Teneva paṭhamaṃ samuṭṭhānasīsaṃ pāḷiyaṃ gaṇanāyapi dassitaṃ, idheva na dassitaṃ. Upari katthaci samuṭṭhānasīsassa dassanaṃ panettha vakkhamānānaṃ taṃsadisabhāvadassanatthaṃ, gaṇanāya vakkhamānāya antogadhabhāvadassanatthaṃ. Teneva tatthapi taṃ vinā gaṇanaṃ vakkhati.
ಪಠಮಪಾರಾಜಿಕಸಮುಟ್ಠಾನವಣ್ಣನಾ।
Paṭhamapārājikasamuṭṭhānavaṇṇanā.
೩೫೯. ವಿಗ್ಗಹನ್ತಿ ಮನುಸ್ಸವಿಗ್ಗಹಸಿಕ್ಖಾಪದಂ। ಉತ್ತರಿ ಚೇವಾತಿ ಉತ್ತರಿಮನುಸ್ಸಧಮ್ಮಸಿಕ್ಖಾಪದಞ್ಚ। ದುಟ್ಠುಲ್ಲನ್ತಿ ದುಟ್ಠುಲ್ಲವಾಚಾಸಿಕ್ಖಾಪದಂ। ಅತ್ತಕಾಮತಾತಿ ಅತ್ತಕಾಮಪಾರಿಚರಿಯಸಿಕ್ಖಾಪದಞ್ಚ। ದುಟ್ಠದೋಸಾ ದುವೇ ಚೇವಾತಿ ದ್ವೇ ದುಟ್ಠದೋಸಸಿಕ್ಖಾಪದಾನಿ ಚ। ದುತಿಯಾನಿಯತೋಪಿ ಚಾತಿ ದುತಿಯಅನಿಯತಸಿಕ್ಖಾಪದಞ್ಚ।
359.Viggahanti manussaviggahasikkhāpadaṃ. Uttari cevāti uttarimanussadhammasikkhāpadañca. Duṭṭhullanti duṭṭhullavācāsikkhāpadaṃ. Attakāmatāti attakāmapāricariyasikkhāpadañca. Duṭṭhadosā duve cevāti dve duṭṭhadosasikkhāpadāni ca. Dutiyāniyatopi cāti dutiyaaniyatasikkhāpadañca.
೩೬೦. ಅಚ್ಛಿನ್ದನಞ್ಚಾತಿ ಸಾಮಂ ಚೀವರಂ ದತ್ವಾ ಅಚ್ಛಿನ್ದನಞ್ಚ। ಪರಿಣಾಮೋತಿ ಸಙ್ಘಿಕಲಾಭಸ್ಸ ಅತ್ತನೋ ಪರಿಣಾಮನಞ್ಚ। ಮುಸಾಓಮಸಪೇಸುಣಾತಿ ಮುಸಾವಾದೋ ಚ ಓಮಸವಾದೋ ಚ ಭಿಕ್ಖುಪೇಸುಞ್ಞಞ್ಚ। ದುಟ್ಠುಲ್ಲಾರೋಚನಞ್ಚೇವಾತಿ ದುಟ್ಠುಲ್ಲಾಪತ್ತಿಆರೋಚನಸಿಕ್ಖಾಪದಞ್ಚ। ಪಥವೀಖಣನಮ್ಪಿ ಚಾತಿ ಪಥವೀಖಣನಸಿಕ್ಖಾಪದಞ್ಚ।
360.Acchindanañcāti sāmaṃ cīvaraṃ datvā acchindanañca. Pariṇāmoti saṅghikalābhassa attano pariṇāmanañca. Musāomasapesuṇāti musāvādo ca omasavādo ca bhikkhupesuññañca. Duṭṭhullārocanañcevāti duṭṭhullāpattiārocanasikkhāpadañca. Pathavīkhaṇanampi cāti pathavīkhaṇanasikkhāpadañca.
೩೬೧. ಭೂತಗಾಮಞ್ಚ ವಾದೋ ಚಾತಿ ಭೂತಗಾಮಸಿಕ್ಖಾಪದಂ, ಅಞ್ಞವಾದಕಸಿಕ್ಖಾಪದಞ್ಚ। ಉಜ್ಝಾಪನಕಮೇವ ಚಾತಿ ಉಜ್ಝಾಪನಕಸಿಕ್ಖಾಪದಞ್ಚ। ನಿಕ್ಕಡ್ಢೋ ಸಿಞ್ಚನಞ್ಚೇವಾತಿ ವಿಹಾರತೋ ನಿಕ್ಕಡ್ಢನಞ್ಚ ಉದಕೇ ತಿಣಾದಿಸಿಞ್ಚನಞ್ಚ। ಆಮಿಸಹೇತು ಚಾತಿ ಆಮಿಸಹೇತು ಭಿಕ್ಖುನಿಯೋ ಓವಾದಸಿಕ್ಖಾಪದಞ್ಚ।
361.Bhūtagāmañcavādo cāti bhūtagāmasikkhāpadaṃ, aññavādakasikkhāpadañca. Ujjhāpanakameva cāti ujjhāpanakasikkhāpadañca. Nikkaḍḍho siñcanañcevāti vihārato nikkaḍḍhanañca udake tiṇādisiñcanañca. Āmisahetu cāti āmisahetu bhikkhuniyo ovādasikkhāpadañca.
೩೬೨. ಭುತ್ತಾವಿನ್ತಿ ಭುತ್ತಾವಿಂ ಅನತಿರಿತ್ತೇನ ಖಾದನೀಯಾದಿನಾ ಪವಾರಣಸಿಕ್ಖಾಪದಞ್ಚ। ಏಹನಾದರಿನ್ತಿ ‘‘ಏಹಾವುಸೋ, ಗಾಮಂ ವಾ’’ತಿ (ಪಾಚಿ॰ ೨೭೫) ವುತ್ತಸಿಕ್ಖಾಪದಞ್ಚ ಅನಾದರಿಯಸಿಕ್ಖಾಪದಞ್ಚ। ಭಿಂಸಾಪನಮೇವ ಚಾತಿ ಭಿಕ್ಖುಭಿಂಸನಕಞ್ಚ। ಅಪನಿಧೇಯ್ಯಾತಿ ಪತ್ತಾದಿಅಪನಿಧಾನಸಿಕ್ಖಾಪದಞ್ಚ। ಸಞ್ಚಿಚ್ಚ ಪಾಣನ್ತಿ ಸಞ್ಚಿಚ್ಚ ಪಾಣಂ ಜೀವಿತಾವೋರೋಪನಞ್ಚ। ಸಪ್ಪಾಣಕಮ್ಪಿ ಚಾತಿ ಜಾನಂ ಸಪ್ಪಾಣಕಉದಕಸಿಕ್ಖಾಪದಞ್ಚ।
362.Bhuttāvinti bhuttāviṃ anatirittena khādanīyādinā pavāraṇasikkhāpadañca. Ehanādarinti ‘‘ehāvuso, gāmaṃ vā’’ti (pāci. 275) vuttasikkhāpadañca anādariyasikkhāpadañca. Bhiṃsāpanameva cāti bhikkhubhiṃsanakañca. Apanidheyyāti pattādiapanidhānasikkhāpadañca. Sañcicca pāṇanti sañcicca pāṇaṃ jīvitāvoropanañca. Sappāṇakampi cāti jānaṃ sappāṇakaudakasikkhāpadañca.
೩೬೩. ಉಕ್ಕೋಟನಞ್ಚಾತಿ ಪುನಕಮ್ಮಾಯ ಉಕ್ಕೋಟನಞ್ಚ। ಊನೋತಿ ಊನವೀಸತಿವಸ್ಸಸಿಕ್ಖಾಪದಞ್ಚ। ಸಂವಾಸೋತಿ ಉಕ್ಖಿತ್ತಕೇನ ಸದ್ಧಿಂ ಸಂವಾಸಸಿಕ್ಖಾಪದಞ್ಚ। ನಾಸನೇ ಚಾತಿ ನಾಸಿತಕಸಾಮಣೇರಸಮ್ಭೋಗಸಿಕ್ಖಾಪದಞ್ಚ। ಸಹಧಮ್ಮಿಕನ್ತಿ ಸಹಧಮ್ಮಿಕಂ ವುಚ್ಚಮಾನಸಿಕ್ಖಾಪದಞ್ಚ। ವಿಲೇಖಾ ಚಾತಿ ‘‘ವಿಲೇಖಾಯ ಸಂವತ್ತನ್ತೀ’’ತಿ (ಪಾಚಿ॰ ೪೩೯) ಆಗತಸಿಕ್ಖಾಪದಞ್ಚ। ಮೋಹನಾತಿ ಮೋಹನಸಿಕ್ಖಾಪದಞ್ಚ। ಅಮೂಲಕೇನ ಚಾತಿ ಅಮೂಲಕೇನ ಸಙ್ಘಾದಿಸೇಸೇನ ಅನುದ್ಧಂಸನಸಿಕ್ಖಾಪದಞ್ಚ।
363.Ukkoṭanañcāti punakammāya ukkoṭanañca. Ūnoti ūnavīsativassasikkhāpadañca. Saṃvāsoti ukkhittakena saddhiṃ saṃvāsasikkhāpadañca. Nāsane cāti nāsitakasāmaṇerasambhogasikkhāpadañca. Sahadhammikanti sahadhammikaṃ vuccamānasikkhāpadañca. Vilekhā cāti ‘‘vilekhāya saṃvattantī’’ti (pāci. 439) āgatasikkhāpadañca. Mohanāti mohanasikkhāpadañca. Amūlakena cāti amūlakena saṅghādisesena anuddhaṃsanasikkhāpadañca.
೩೬೪. ಕುಕ್ಕುಚ್ಚಂ ಖೀಯನಂ ದತ್ವಾತಿ ಕುಕ್ಕುಚ್ಚಉಪ್ಪಾದನಞ್ಚ ಧಮ್ಮಿಕಾನಂ ಕಮ್ಮಾನಂ ಛನ್ದಂ ದತ್ವಾ ಖೀಯನಞ್ಚ ಚೀವರಂ ದತ್ವಾ ಖೀಯನಞ್ಚ। ಪರಿಣಾಮೇಯ್ಯ ಪುಗ್ಗಲೇತಿ ಸಙ್ಘಿಕಂ ಲಾಭಂ ಪುಗ್ಗಲಸ್ಸ ಪರಿಣಾಮನಸಿಕ್ಖಾಪದಞ್ಚ। ಕಿಂ ತೇ, ಅಕಾಲಂ, ಅಚ್ಛಿನ್ದೇತಿ ‘‘ಕಿಂ ತೇ, ಅಯ್ಯೇ, ಏಸೋ ಪುರಿಸಪುಗ್ಗಲೋ ಕರಿಸ್ಸತೀ’’ತಿ (ಪಾಚಿ॰ ೭೦೫) ಆಗತಸಿಕ್ಖಾಪದಞ್ಚ ಅಕಾಲಚೀವರಂ ‘‘ಕಾಲಚೀವರ’’ನ್ತಿ ಅಧಿಟ್ಠಹಿತ್ವಾ ಭಾಜನಸಿಕ್ಖಾಪದಞ್ಚ ಭಿಕ್ಖುನಿಯಾ ಸದ್ಧಿಂ ಚೀವರಂ ಪರಿವತ್ತೇತ್ವಾ ಅಚ್ಛಿನ್ದನಸಿಕ್ಖಾಪದಞ್ಚ। ದುಗ್ಗಹನಿರಯೇನ ಚಾತಿ ದುಗ್ಗಹಿತೇನ ದುಪಧಾರಿತೇನ ಪರಂ ಉಜ್ಝಾಪನಸಿಕ್ಖಾಪದಞ್ಚ ನಿರಯೇನ ವಾ ಬ್ರಹ್ಮಚರಿಯೇನ ವಾ ಅಭಿಸಪನಸಿಕ್ಖಾಪದಞ್ಚ।
364.Kukkuccaṃ khīyanaṃ datvāti kukkuccauppādanañca dhammikānaṃ kammānaṃ chandaṃ datvā khīyanañca cīvaraṃ datvā khīyanañca. Pariṇāmeyya puggaleti saṅghikaṃ lābhaṃ puggalassa pariṇāmanasikkhāpadañca. Kiṃ te, akālaṃ, acchindeti ‘‘kiṃ te, ayye, eso purisapuggalo karissatī’’ti (pāci. 705) āgatasikkhāpadañca akālacīvaraṃ ‘‘kālacīvara’’nti adhiṭṭhahitvā bhājanasikkhāpadañca bhikkhuniyā saddhiṃ cīvaraṃ parivattetvā acchindanasikkhāpadañca. Duggahanirayena cāti duggahitena dupadhāritena paraṃ ujjhāpanasikkhāpadañca nirayena vā brahmacariyena vā abhisapanasikkhāpadañca.
೩೬೫. ಗಣಸ್ಸ ಚಾತಿ ‘‘ಗಣಸ್ಸ ಚೀವರಲಾಭಂ ಅನ್ತರಾಯಂ ಕರೇಯ್ಯಾ’’ತಿ (ಪಾಚಿ॰ ೯೦೮) ವುತ್ತಸಿಕ್ಖಾಪದಞ್ಚ। ವಿಭಙ್ಗಞ್ಚಾತಿ ‘‘ಧಮ್ಮಿಕಂ ಚೀವರವಿಭಙ್ಗಂ ಪಟಿಬಾಹೇಯ್ಯಾ’’ತಿ (ಪಾಚಿ॰ ೯೧೨) ವುತ್ತಸಿಕ್ಖಾಪದಞ್ಚ। ದುಬ್ಬಲಾಸಾ ತಥೇವ ಚಾತಿ ‘‘ದುಬ್ಬಲಚೀವರಪಚ್ಚಾಸಾಯ ಚೀವರಕಾಲಸಮಯಂ ಅತಿಕ್ಕಾಮೇಯ್ಯಾ’’ತಿ (ಪಾಚಿ॰ ೯೨೧) ವುತ್ತಸಿಕ್ಖಾಪದಞ್ಚ। ಧಮ್ಮಿಕಂ ಕಥಿನುದ್ಧಾರನ್ತಿ ‘‘ಧಮ್ಮಿಕಂ ಕಥಿನುದ್ಧಾರಂ ಪಟಿಬಾಹೇಯ್ಯಾ’’ತಿ (ಪಾಚಿ॰ ೯೨೮) ವುತ್ತಸಿಕ್ಖಾಪದಞ್ಚ। ಸಞ್ಚಿಚ್ಚಾಫಾಸುಮೇವ ಚಾತಿ ‘‘ಭಿಕ್ಖುನಿಯಾ ಸಞ್ಚಿಚ್ಚ ಅಫಾಸುಂ ಕರೇಯ್ಯಾ’’ತಿ (ಪಾಚಿ॰ ೯೪೨) ವುತ್ತಸಿಕ್ಖಾಪದಞ್ಚ।
365.Gaṇassa cāti ‘‘gaṇassa cīvaralābhaṃ antarāyaṃ kareyyā’’ti (pāci. 908) vuttasikkhāpadañca. Vibhaṅgañcāti ‘‘dhammikaṃ cīvaravibhaṅgaṃ paṭibāheyyā’’ti (pāci. 912) vuttasikkhāpadañca. Dubbalāsā tatheva cāti ‘‘dubbalacīvarapaccāsāya cīvarakālasamayaṃ atikkāmeyyā’’ti (pāci. 921) vuttasikkhāpadañca. Dhammikaṃ kathinuddhāranti ‘‘dhammikaṃ kathinuddhāraṃ paṭibāheyyā’’ti (pāci. 928) vuttasikkhāpadañca. Sañciccāphāsumeva cāti ‘‘bhikkhuniyā sañcicca aphāsuṃ kareyyā’’ti (pāci. 942) vuttasikkhāpadañca.
೩೬೬. ಸಯಂ ಉಪಸ್ಸಯಂ ದತ್ವಾತಿ ‘‘ಭಿಕ್ಖುನಿಯಾ ಉಪಸ್ಸಯಂ ದತ್ವಾ ಕುಪಿತಾ ಅನತ್ತಮನಾ ನಿಕ್ಕಡ್ಢೇಯ್ಯಾ’’ತಿ (ಪಾಚಿ॰ ೯೫೧) ವುತ್ತಸಿಕ್ಖಾಪದಞ್ಚ। ಅಕ್ಕೋಸೇಯ್ಯ ಚಾತಿ ‘‘ಭಿಕ್ಖುಂ ಅಕ್ಕೋಸೇಯ್ಯ ವಾ ಪರಿಭಾಸೇಯ್ಯ ವಾ’’ತಿ (ಪಾಚಿ॰ ೧೦೨೯) ವುತ್ತಸಿಕ್ಖಾಪದಞ್ಚ। ಚಣ್ಡಿಕಾತಿ ‘‘ಚಣ್ಡೀಕತಾ ಗಣಂ ಪರಿಭಾಸೇಯ್ಯಾ’’ತಿ (ಪಾಚಿ॰ ೧೦೩೪) ವುತ್ತಸಿಕ್ಖಾಪದಞ್ಚ। ಕುಲಮಚ್ಛರಿನೀ ಅಸ್ಸಾತಿ ‘‘ಕುಲಮಚ್ಛರಿನೀ ಅಸ್ಸಾ’’ತಿ (ಪಾಚಿ॰ ೧೦೪೩) ವುತ್ತಸಿಕ್ಖಾಪದಞ್ಚ। ಗಬ್ಭಿನಿಂ ವುಟ್ಠಾಪೇಯ್ಯ ಚಾತಿ ‘‘ಗಬ್ಭಿನಿಂ ವುಟ್ಠಾಪೇಯ್ಯಾ’’ತಿ (ಪಾಚಿ॰ ೧೦೬೮) ವುತ್ತಸಿಕ್ಖಾಪದಞ್ಚ।
366.Sayaṃ upassayaṃ datvāti ‘‘bhikkhuniyā upassayaṃ datvā kupitā anattamanā nikkaḍḍheyyā’’ti (pāci. 951) vuttasikkhāpadañca. Akkoseyya cāti ‘‘bhikkhuṃ akkoseyya vā paribhāseyya vā’’ti (pāci. 1029) vuttasikkhāpadañca. Caṇḍikāti ‘‘caṇḍīkatā gaṇaṃ paribhāseyyā’’ti (pāci. 1034) vuttasikkhāpadañca. Kulamaccharinī assāti ‘‘kulamaccharinī assā’’ti (pāci. 1043) vuttasikkhāpadañca. Gabbhiniṃ vuṭṭhāpeyya cāti ‘‘gabbhiniṃ vuṭṭhāpeyyā’’ti (pāci. 1068) vuttasikkhāpadañca.
೩೬೭. ಪಾಯನ್ತಿನ್ತಿ ‘‘ಪಾಯನ್ತಿಂ ವುಟ್ಠಾಪೇಯ್ಯಾ’’ತಿ (ಪಾಚಿ॰ ೧೦೭೩) ವುತ್ತಸಿಕ್ಖಾಪದಞ್ಚ। ದ್ವೇ ಚ ವಸ್ಸಾನೀತಿ ‘‘ದ್ವೇ ವಸ್ಸಾನಿ ಛಸು ಧಮ್ಮೇಸು ಅಸಿಕ್ಖಿತಸಿಕ್ಖಂ ಸಿಕ್ಖಮಾನಂ ವುಟ್ಠಾಪೇಯ್ಯಾ’’ತಿ (ಪಾಚಿ॰ ೧೦೮೦) ವುತ್ತಸಿಕ್ಖಾಪದಞ್ಚ। ಸಙ್ಘೇನಾಸಮ್ಮತನ್ತಿ ‘‘ಸಿಕ್ಖಿತಸಿಕ್ಖಂ ಸಿಕ್ಖಮಾನಂ ಸಙ್ಘೇನ ಅಸಮ್ಮತಂ ವುಟ್ಠಾಪೇಯ್ಯಾ’’ತಿ (ಪಾಚಿ॰ ೧೦೮೬) ವುತ್ತಸಿಕ್ಖಾಪದಞ್ಚ। ತಿಸ್ಸೋ ಗಿಹಿಗತಾ ವುತ್ತಾತಿ ‘‘ಊನದ್ವಾದಸವಸ್ಸಂ ಗಿಹಿಗತಂ (ಪಾಚಿ॰ ೧೦೯೧), ಪರಿಪುಣ್ಣದ್ವಾದಸವಸ್ಸಂ ಗಿಹಿಗತಂ ದ್ವೇ ವಸ್ಸಾನಿ ಛಸು ಧಮ್ಮೇಸು ಅಸಿಕ್ಖಿತಸಿಕ್ಖಂ (ಪಾಚಿ॰ ೧೦೯೭), ದ್ವೇವಸ್ಸಾನಿ ಸಿಕ್ಖಿತಸಿಕ್ಖಂ ಸಙ್ಘೇನ ಅಸಮ್ಮತ’’ನ್ತಿ (ಪಾಚಿ॰ ೧೧೦೩) ವುತ್ತಸಿಕ್ಖಾಪದಾನಿ ಚ। ತಿಸ್ಸೋಯೇವ ಕುಮಾರಿಕಾತಿ ‘‘ಊನವೀಸತಿವಸ್ಸಂ ಕುಮಾರಿಭೂತ’’ನ್ತಿಆದಿನಾ (ಪಾಚಿ॰ ೧೧೨೦) ನಯೇನ ವುತ್ತಾ ತಿಸ್ಸೋ ಚ।
367.Pāyantinti ‘‘pāyantiṃ vuṭṭhāpeyyā’’ti (pāci. 1073) vuttasikkhāpadañca. Dve ca vassānīti ‘‘dve vassāni chasu dhammesu asikkhitasikkhaṃ sikkhamānaṃ vuṭṭhāpeyyā’’ti (pāci. 1080) vuttasikkhāpadañca. Saṅghenāsammatanti ‘‘sikkhitasikkhaṃ sikkhamānaṃ saṅghena asammataṃ vuṭṭhāpeyyā’’ti (pāci. 1086) vuttasikkhāpadañca. Tisso gihigatā vuttāti ‘‘ūnadvādasavassaṃ gihigataṃ (pāci. 1091), paripuṇṇadvādasavassaṃ gihigataṃ dve vassāni chasu dhammesu asikkhitasikkhaṃ (pāci. 1097), dvevassāni sikkhitasikkhaṃ saṅghena asammata’’nti (pāci. 1103) vuttasikkhāpadāni ca. Tissoyeva kumārikāti ‘‘ūnavīsativassaṃ kumāribhūta’’ntiādinā (pāci. 1120) nayena vuttā tisso ca.
೩೬೮. ಊನದ್ವಾದಸವಸ್ಸಾ ದ್ವೇತಿ ‘‘ಊನದ್ವಾದಸವಸ್ಸಾ ವುಟ್ಠಾಪೇಯ್ಯ (ಪಾಚಿ॰ ೧೧೩೭), ಪರಿಪುಣ್ಣದ್ವಾದಸವಸ್ಸಾ ಸಙ್ಘೇನ ಅಸಮ್ಮತಾ ವುಟ್ಠಾಪೇಯ್ಯಾ’’ತಿ (ಪಾಚಿ॰ ೧೧೪೨) ವುತ್ತಾನಿ ದ್ವೇ ಸಿಕ್ಖಾಪದಾನಿ ಚ। ಅಲಂ ತಾವ ತೇತಿ ‘‘ಅಲಂ ತಾವ ತೇ, ಅಯ್ಯೇ, ವುಟ್ಠಾಪಿತೇನಾ’’ತಿ (ಪಾಚಿ॰ ೧೧೪೭) ವುತ್ತಸಿಕ್ಖಾಪದಞ್ಚ। ಸೋಕಾವಸ್ಸಾತಿ ‘‘ಚಣ್ಡಿಂ ಸೋಕಾವಾಸಂ ಸಿಕ್ಖಮಾನಂ ವುಟ್ಠಾಪೇಯ್ಯಾ’’ತಿ (ಪಾಚಿ॰ ೧೧೫೯) ವುತ್ತಸಿಕ್ಖಾಪದಞ್ಚ। ಪಾರಿವಾಸಿಕಚ್ಛನ್ದದಾನತೋತಿ ‘‘ಪಾರಿವಾಸಿಕಛನ್ದದಾನೇನ ಸಿಕ್ಖಮಾನಂ ವುಟ್ಠಾಪೇಯ್ಯಾ’’ತಿ (ಪಾಚಿ॰ ೧೧೬೭) ವುತ್ತಸಿಕ್ಖಾಪದಞ್ಚ।
368.Ūnadvādasavassā dveti ‘‘ūnadvādasavassā vuṭṭhāpeyya (pāci. 1137), paripuṇṇadvādasavassā saṅghena asammatā vuṭṭhāpeyyā’’ti (pāci. 1142) vuttāni dve sikkhāpadāni ca. Alaṃ tāva teti ‘‘alaṃ tāva te, ayye, vuṭṭhāpitenā’’ti (pāci. 1147) vuttasikkhāpadañca. Sokāvassāti ‘‘caṇḍiṃ sokāvāsaṃ sikkhamānaṃ vuṭṭhāpeyyā’’ti (pāci. 1159) vuttasikkhāpadañca. Pārivāsikacchandadānatoti ‘‘pārivāsikachandadānena sikkhamānaṃ vuṭṭhāpeyyā’’ti (pāci. 1167) vuttasikkhāpadañca.
೩೬೯. ಅನುವಸ್ಸಂ ದುವೇ ಚಾತಿ ‘‘ಅನುವಸ್ಸಂ ವುಟ್ಠಾಪೇಯ್ಯ (ಪಾಚಿ॰ ೧೧೭೧), ಏಕಂ ವಸ್ಸಂ ದ್ವೇ ವುಟ್ಠಾಪೇಯ್ಯಾ’’ತಿ (ಪಾಚಿ॰ ೧೧೭೫) ವುತ್ತಸಿಕ್ಖಾಪದಾನಿ ಚಾತಿ ಏಕೂನಸತ್ತತಿ ಸಿಕ್ಖಾಪದಾನಿ। ಅದಿನ್ನಾದಾನತುಲ್ಯತ್ತಾತಿ ಅದಿನ್ನಾದಾನೇನ ಸಮಾನಸಮುಟ್ಠಾನತ್ತಾ। ತಿಸಮುಟ್ಠಾನಿಕಾ ಕತಾತಿ ಸಚಿತ್ತಕೇಹಿ ತೀಹಿ ಸಮುಟ್ಠಾನೇಹಿ ಸಮುಟ್ಠಹನ್ತೀತಿ ವುತ್ತಾ।
369.Anuvassaṃ duve cāti ‘‘anuvassaṃ vuṭṭhāpeyya (pāci. 1171), ekaṃ vassaṃ dve vuṭṭhāpeyyā’’ti (pāci. 1175) vuttasikkhāpadāni cāti ekūnasattati sikkhāpadāni. Adinnādānatulyattāti adinnādānena samānasamuṭṭhānattā. Tisamuṭṭhānikā katāti sacittakehi tīhi samuṭṭhānehi samuṭṭhahantīti vuttā.
ದುತಿಯಪಾರಾಜಿಕಸಮುಟ್ಠಾನವಣ್ಣನಾ।
Dutiyapārājikasamuṭṭhānavaṇṇanā.
೩೭೦. ಸಞ್ಚರಿಕುಟಿಮಹಲ್ಲಕನ್ತಿ ಸಞ್ಚರಿತ್ತಂ, ಸಞ್ಞಾಚಿಕಾಯ ಕುಟಿಕರಣಂ, ಮಹಲ್ಲಕವಿಹಾರಕರಣಞ್ಚ। ಧೋವಾಪನಞ್ಚ ಪಟಿಗ್ಗಹೋತಿ ಅಞ್ಞಾತಿಕಾಯ ಭಿಕ್ಖುನಿಯಾ ಪುರಾಣಚೀವರಧೋವಾಪನಞ್ಚ ಚೀವರಪಟಿಗ್ಗಹಣಞ್ಚ। ಚೀವರಸ್ಸ ಚ ವಿಞ್ಞತ್ತಿನ್ತಿ ಅಞ್ಞಾತಕಂ ಗಹಪತಿಂ ವಾ ಗಹಪತಾನಿಂ ವಾ ಚೀವರವಿಞ್ಞಾಪನಸಿಕ್ಖಾಪದಞ್ಚ। ಗಹಣಞ್ಚ ತದುತ್ತರಿನ್ತಿ ತದುತ್ತರಿಸಾದಿಯನಸಿಕ್ಖಾಪದಞ್ಚ।
370.Sañcarikuṭimahallakanti sañcarittaṃ, saññācikāya kuṭikaraṇaṃ, mahallakavihārakaraṇañca. Dhovāpanañca paṭiggahoti aññātikāya bhikkhuniyā purāṇacīvaradhovāpanañca cīvarapaṭiggahaṇañca. Cīvarassa ca viññattinti aññātakaṃ gahapatiṃ vā gahapatāniṃ vā cīvaraviññāpanasikkhāpadañca. Gahaṇañca taduttarinti taduttarisādiyanasikkhāpadañca.
೩೭೧. ಉಪಕ್ಖಟದ್ವಯಞ್ಚೇವಾತಿ ‘‘ಚೀವರಚೇತಾಪನ್ನಂ ಉಪಕ್ಖಟಂ ಹೋತೀ’’ತಿ (ಪಾರಾ॰ ೫೨೮) ಆಗತಸಿಕ್ಖಾಪದದ್ವಯಞ್ಚ। ತಥಾ ದೂತೇನ ಚೀವರನ್ತಿ ದೂತೇನಚೀವರಚೇತಾಪನ್ನಪಹಿತಸಿಕ್ಖಾಪದಞ್ಚ। ಕೋಸಿಯನ್ತಿ ಕೋಸಿಯಮಿಸ್ಸಕಸಿಕ್ಖಾಪದಞ್ಚ। ಸುದ್ಧಕಾಳಾನನ್ತಿ ‘‘ಸುದ್ಧಕಾಳಕಾನ’’ನ್ತಿಆದಿಸಿಕ್ಖಾಪದಞ್ಚ (ಪಾರಾ॰ ೫೪೮)। ದ್ವೇ ಭಾಗಾದಾನಮೇವ ಚಾತಿ ‘‘ದ್ವೇ ಭಾಗಾ ಆದಾತಬ್ಬಾ’’ತಿ (ಪಾರಾ॰ ೫೫೩) ವುತ್ತಸಿಕ್ಖಾಪದಞ್ಚ।
371.Upakkhaṭadvayañcevāti ‘‘cīvaracetāpannaṃ upakkhaṭaṃ hotī’’ti (pārā. 528) āgatasikkhāpadadvayañca. Tathā dūtena cīvaranti dūtenacīvaracetāpannapahitasikkhāpadañca. Kosiyanti kosiyamissakasikkhāpadañca. Suddhakāḷānanti ‘‘suddhakāḷakāna’’ntiādisikkhāpadañca (pārā. 548). Dve bhāgādānameva cāti ‘‘dve bhāgā ādātabbā’’ti (pārā. 553) vuttasikkhāpadañca.
೩೭೨. ಛಬ್ಬಸ್ಸಾನೀತಿ ಛಬ್ಬಸ್ಸಾನಿ ಧಾರಣಸಿಕ್ಖಾಪದಞ್ಚ। ಪುರಾಣಸ್ಸಾತಿ ‘‘ಪುರಾಣಸನ್ಥತಸ್ಸಾ’’ತಿ (ಪಾರಾ॰ ೫೬೭) ವುತ್ತಸಿಕ್ಖಾಪದಞ್ಚ। ಲೋಮಧೋವಾಪನಮ್ಪಿ ಚಾತಿ ಏಳಕಲೋಮಧೋವಾಪನಸಿಕ್ಖಾಪದಞ್ಚ। ರೂಪಿಯಸ್ಸ ಪಟಿಗ್ಗಾಹೋತಿ ರೂಪಿಯಪಟಿಗ್ಗಹಣಸಿಕ್ಖಾಪದಞ್ಚ। ಉಭೋ ನಾನಪ್ಪಕಾರಕಾತಿ ರೂಪಿಯಸಂವೋಹಾರಕಯವಿಕ್ಕಯಸಿಕ್ಖಾಪದಾನಿ ಚ।
372.Chabbassānīti chabbassāni dhāraṇasikkhāpadañca. Purāṇassāti ‘‘purāṇasanthatassā’’ti (pārā. 567) vuttasikkhāpadañca. Lomadhovāpanampi cāti eḷakalomadhovāpanasikkhāpadañca. Rūpiyassa paṭiggāhoti rūpiyapaṭiggahaṇasikkhāpadañca. Ubho nānappakārakāti rūpiyasaṃvohārakayavikkayasikkhāpadāni ca.
೩೭೩. ಊನಬನ್ಧನಪತ್ತೋ ಚಾತಿ ಊನಪಞ್ಚಬನ್ಧನಪತ್ತಸಿಕ್ಖಾಪದಞ್ಚ। ವಸ್ಸಸಾಟಿಕಸುತ್ತಕನ್ತಿ ವಸ್ಸಿಕಸಾಟಿಕಸಿಕ್ಖಾಪದಞ್ಚ ಸುತ್ತಂ ವಿಞ್ಞಾಪೇತ್ವಾ ಚೀವರಕಾರಾಪನಸಿಕ್ಖಾಪದಞ್ಚ। ವಿಕಪ್ಪಾಪಜ್ಜನನ್ತಿ ತನ್ತವಾಯೇ ಉಪಸಙ್ಕಮಿತ್ವಾ ಚೀವರೇ ವಿಕಪ್ಪಾಪಜ್ಜನಞ್ಚ। ಯಾವ ದ್ವಾರದಾನಞ್ಚ ಸಿಬ್ಬನನ್ತಿ ‘‘ಯಾವ ದ್ವಾರಕೋಸಾ ಅಗ್ಗಳಟ್ಠಪನಾಯಾ’’ತಿ (ಪಾಚಿ॰ ೧೩೫) ವುತ್ತಸಿಕ್ಖಾಪದಞ್ಚ ‘‘ಅಞ್ಞಾತಿಕಾಯ ಭಿಕ್ಖುನಿಯಾ ಚೀವರಂ ದದೇಯ್ಯ (ಪಾಚಿ॰ ೧೭೧), ಚೀವರಂ ಸಿಬ್ಬೇಯ್ಯಾ’’ತಿ (ಪಾಚಿ॰ ೧೭೬) ವುತ್ತಸಿಕ್ಖಾಪದದ್ವಯಞ್ಚ।
373.Ūnabandhanapatto cāti ūnapañcabandhanapattasikkhāpadañca. Vassasāṭikasuttakanti vassikasāṭikasikkhāpadañca suttaṃ viññāpetvā cīvarakārāpanasikkhāpadañca. Vikappāpajjananti tantavāye upasaṅkamitvā cīvare vikappāpajjanañca. Yāva dvāradānañca sibbananti ‘‘yāva dvārakosā aggaḷaṭṭhapanāyā’’ti (pāci. 135) vuttasikkhāpadañca ‘‘aññātikāya bhikkhuniyā cīvaraṃ dadeyya (pāci. 171), cīvaraṃ sibbeyyā’’ti (pāci. 176) vuttasikkhāpadadvayañca.
೩೭೪. ಪೂವೇಹೀತಿ ಪೂವೇಹಿ ವಾ ಮನ್ಥೇಹಿ ವಾ ಅಭಿಹಟ್ಠುಂ ಪವಾರಣಸಿಕ್ಖಾಪದಞ್ಚ। ಪಚ್ಚಯೋತಿ ಚತುಮಾಸಪಚ್ಚಯಪವಾರಣಸಿಕ್ಖಾಪದಞ್ಚ। ಜೋತೀತಿ ಜೋತಿಯಾ ಸಮಾದಹನಸಿಕ್ಖಾಪದಞ್ಚ। ರತನನ್ತಿ ರತನಸಿಕ್ಖಾಪದಞ್ಚ। ಸೂಚಿ…ಪೇ॰… ಸುಗತಸ್ಸ ಚಾತಿ ಸೂಚಿಘರಸಿಕ್ಖಾಪದಾದೀನಿ ಸತ್ತ ಸಿಕ್ಖಾಪದಾನಿ ಚ।
374.Pūvehīti pūvehi vā manthehi vā abhihaṭṭhuṃ pavāraṇasikkhāpadañca. Paccayoti catumāsapaccayapavāraṇasikkhāpadañca. Jotīti jotiyā samādahanasikkhāpadañca. Ratananti ratanasikkhāpadañca. Sūci…pe… sugatassa cāti sūcigharasikkhāpadādīni satta sikkhāpadāni ca.
೩೭೫. ಅಞ್ಞವಿಞ್ಞತ್ತಿಸಿಕ್ಖಾ ಚಾತಿ ‘‘ಅಞ್ಞಂ ವಿಞ್ಞಾಪೇಯ್ಯಾ’’ತಿ (ಪಾಚಿ॰ ೭೪೯) ವುತ್ತಸಿಕ್ಖಾಪದಞ್ಚ। ಅಞ್ಞಂ ಚೇತಾಪನಮ್ಪಿ ಚಾತಿ ‘‘ಅಞ್ಞಂ ಚೇತಾಪೇತ್ವಾ ಅಞ್ಞಂ ಚೇತಾಪೇಯ್ಯಾ’’ತಿ (ಪಾಚಿ॰ ೭೪೯) ವುತ್ತಸಿಕ್ಖಾಪದಞ್ಚ। ಸಙ್ಘಿಕೇನ ದುವೇ ವುತ್ತಾತಿ ‘‘ಸಙ್ಘಿಕೇನ ಅಞ್ಞಂ ಚೇತಾಪೇಯ್ಯ (ಪಾಚಿ॰ ೭೫೯), ಸಙ್ಘಿಕೇನ ಸಞ್ಞಾಚಿಕೇನ ಅಞ್ಞಂ ಚೇತಾಪೇಯ್ಯಾ’’ತಿ (ಪಾಚಿ॰ ೭೬೪) ವುತ್ತಾನಿ ದ್ವೇ ಸಿಕ್ಖಾಪದಾನಿ ಚ। ದ್ವೇ ಮಹಾಜನಿಕೇನಾತಿ ‘‘ಮಹಾಜನಿಕೇನ ಅಞ್ಞಂ ಚೇತಾಪೇಯ್ಯ (ಪಾಚಿ॰ ೭೬೯), ಮಹಾಜನಿಕೇನ ಸಞ್ಞಾಚಿಕೇನ ಅಞ್ಞಂ ಚೇತಾಪೇಯ್ಯಾ’’ತಿ (ಪಾಚಿ॰ ೭೭೪) ವುತ್ತಾನಿ ದ್ವೇ ಸಿಕ್ಖಾಪದಾನಿ ಚ।
375.Aññaviññattisikkhā cāti ‘‘aññaṃ viññāpeyyā’’ti (pāci. 749) vuttasikkhāpadañca. Aññaṃ cetāpanampi cāti ‘‘aññaṃ cetāpetvā aññaṃ cetāpeyyā’’ti (pāci. 749) vuttasikkhāpadañca. Saṅghikena duve vuttāti ‘‘saṅghikena aññaṃ cetāpeyya (pāci. 759), saṅghikena saññācikena aññaṃ cetāpeyyā’’ti (pāci. 764) vuttāni dve sikkhāpadāni ca. Dve mahājanikenāti ‘‘mahājanikena aññaṃ cetāpeyya (pāci. 769), mahājanikena saññācikena aññaṃ cetāpeyyā’’ti (pāci. 774) vuttāni dve sikkhāpadāni ca.
೩೭೬. ತಥಾ ಪುಗ್ಗಲಿಕೇನೇಕನ್ತಿ ‘‘ಪುಗ್ಗಲಿಕೇನ ಸಞ್ಞಾಚಿಕೇನ ಅಞ್ಞಂ ಚೇತಾಪೇಯ್ಯಾ’’ತಿ (ಪಾಚಿ॰ ೭೭೯) ವುತ್ತಮೇಕಸಿಕ್ಖಾಪದಞ್ಚ। ಗರುಪಾವುರಣನ್ತಿ ಗರುಪಾವುರಣಚೇತಾಪನಸಿಕ್ಖಾಪದಞ್ಚ। ಲಹುನ್ತಿ ಲಹುಪಾವುರಣಚೇತಾಪನಸಿಕ್ಖಾಪದಂ। ‘‘ವಿಘಾಸಾ ಉದಸಾಟಿ ಚಾ’’ತಿ ಪದಚ್ಛೇದೋ। ದ್ವೇ ವಿಘಾಸಾತಿ ‘‘ಉಚ್ಚಾರಂ ವಾ ಪಸ್ಸಾವಂ ವಾ ಸಙ್ಕಾರಂ ವಾ ವಿಘಾಸಂ ವಾ ತಿರೋಕುಟ್ಟೇ ವಾ ತಿರೋಪಾಕಾರೇ ವಾ ಛಡ್ಡೇಯ್ಯ ವಾ ಛಡ್ಡಾಪೇಯ್ಯ ವಾ (ಪಾಚಿ॰ ೮೨೫), ಹರಿತೇ ಛಡ್ಡೇಯ್ಯ ವಾ ಛಡ್ಡಾಪೇಯ್ಯ ವಾ’’ತಿ (ಪಾಚಿ॰ ೮೨೯) ಏವಂ ವುತ್ತಾನಿ ದ್ವೇ ವಿಘಾಸಸಿಕ್ಖಾಪದಾನಿ ಚ। ಉದಸಾಟಿ ಚಾತಿ ಉದಕಸಾಟಿಕಸಿಕ್ಖಾಪದಞ್ಚ। ತಥಾ ಸಮಣಚೀವರನ್ತಿ ತಥಾ ‘‘ಸಮಣಚೀವರಂ ದದೇಯ್ಯಾ’’ತಿ (ಪಾಚಿ॰ ೯೧೭) ವುತ್ತಸಿಕ್ಖಾಪದಞ್ಚಾತಿ।
376.Tathāpuggalikenekanti ‘‘puggalikena saññācikena aññaṃ cetāpeyyā’’ti (pāci. 779) vuttamekasikkhāpadañca. Garupāvuraṇanti garupāvuraṇacetāpanasikkhāpadañca. Lahunti lahupāvuraṇacetāpanasikkhāpadaṃ. ‘‘Vighāsā udasāṭi cā’’ti padacchedo. Dve vighāsāti ‘‘uccāraṃ vā passāvaṃ vā saṅkāraṃ vā vighāsaṃ vā tirokuṭṭe vā tiropākāre vā chaḍḍeyya vā chaḍḍāpeyya vā (pāci. 825), harite chaḍḍeyya vā chaḍḍāpeyya vā’’ti (pāci. 829) evaṃ vuttāni dve vighāsasikkhāpadāni ca. Udasāṭi cāti udakasāṭikasikkhāpadañca. Tathā samaṇacīvaranti tathā ‘‘samaṇacīvaraṃ dadeyyā’’ti (pāci. 917) vuttasikkhāpadañcāti.
೩೭೭. ಇತಿ ಏತೇ ಏಕೂನಪಣ್ಣಾಸ ಧಮ್ಮಾ ದುಕ್ಖನ್ತದಸ್ಸಿನಾ ಭಗವತಾ ಛಸಮುಟ್ಠಾನಿಕಾ ತೇಯೇವ ಸಞ್ಚರಿತ್ತಸಮಾ ಸಞ್ಚರಿತ್ತಸಿಕ್ಖಾಪದೇನ ಸಮಾ ಕತಾ ಅನುಮತಾ ಪಞ್ಞತ್ತಾತಿ ಯೋಜನಾ।
377. Iti ete ekūnapaṇṇāsa dhammā dukkhantadassinā bhagavatā chasamuṭṭhānikā teyeva sañcarittasamā sañcarittasikkhāpadena samā katā anumatā paññattāti yojanā.
ಸಞ್ಚರಿತ್ತಸಮುಟ್ಠಾನವಣ್ಣನಾ।
Sañcarittasamuṭṭhānavaṇṇanā.
೩೭೮. ಸಙ್ಘಭೇದೋತಿ ಸಙ್ಘಭೇದಸಿಕ್ಖಾಪದಞ್ಚ। ಭೇದಾನುವತ್ತದುಬ್ಬಚದೂಸಕಾತಿ ಭೇದಾನುವತ್ತಕದುಬ್ಬಚಕುಲದೂಸಕಸಿಕ್ಖಾಪದಾನಿ ಚ। ದುಟ್ಠುಲ್ಲಚ್ಛಾದನನ್ತಿ ದುಟ್ಠುಲ್ಲಪಟಿಚ್ಛಾದನಸಿಕ್ಖಾಪದಞ್ಚ। ದಿಟ್ಠೀತಿ ದಿಟ್ಠಿಅಪ್ಪಟಿನಿಸ್ಸಜ್ಜನಸಿಕ್ಖಾಪದಞ್ಚ । ಛನ್ದಉಜ್ಜಗ್ಘಿಕಾ ದುವೇತಿ ಛನ್ದಂಅದತ್ವಾಗಮನಸಿಕ್ಖಾಪದಞ್ಚ ಉಜ್ಜಗ್ಘಿಕಾಯ ಅನ್ತರಘರೇ ಗಮನನಿಸೀದನಸಿಕ್ಖಾಪದದ್ವಯಞ್ಚ।
378.Saṅghabhedoti saṅghabhedasikkhāpadañca. Bhedānuvattadubbacadūsakāti bhedānuvattakadubbacakuladūsakasikkhāpadāni ca. Duṭṭhullacchādananti duṭṭhullapaṭicchādanasikkhāpadañca. Diṭṭhīti diṭṭhiappaṭinissajjanasikkhāpadañca . Chandaujjagghikā duveti chandaṃadatvāgamanasikkhāpadañca ujjagghikāya antaraghare gamananisīdanasikkhāpadadvayañca.
೩೭೯. ಅಪ್ಪಸದ್ದಾ ದುವೇ ವುತ್ತಾತಿ ‘‘ಅಪ್ಪಸದ್ದೋ ಅನ್ತರಘರೇ ಗಮಿಸ್ಸಾಮಿ, ನಿಸೀದಿಸ್ಸಾಮೀ’’ತಿ (ಪಾಚಿ॰ ೫೮೮, ೫೮೯) ವುತ್ತಾನಿ ದ್ವೇ ಸಿಕ್ಖಾಪದಾನಿ ಚ। ನ ಬ್ಯಾಹರೇತಿ ‘‘ನ ಸಕಬಳೇನ ಮುಖೇನ ಬ್ಯಾಹರಿಸ್ಸಾಮೀ’’ತಿ (ಪಾಚಿ॰ ೬೧೯) ವುತ್ತಸಿಕ್ಖಾಪದಞ್ಚ। ಛಮಾ, ನೀಚಾಸನೇ, ಠಾನನ್ತಿ ‘‘ಛಮಾಯಂ ನಿಸೀದಿತ್ವಾ (ಪಾಚಿ॰ ೬೪೫), ನೀಚೇ ಆಸನೇ ನಿಸೀದಿತ್ವಾ (ಪಾಚಿ॰ ೬೪೭), ಠಿತೋ ನಿಸಿನ್ನಸ್ಸಾ’’ತಿ (ಪಾಚಿ॰ ೬೪೮) ವುತ್ತಸಿಕ್ಖಾಪದಞ್ಚ। ಪಚ್ಛತೋ ಉಪ್ಪಥೇನ ಚಾತಿ ‘‘ಪಚ್ಛತೋ ಗಚ್ಛನ್ತೋ ಪುರತೋ ಗಚ್ಛನ್ತಸ್ಸ (ಪಾಚಿ॰ ೬೪೯), ಉಪ್ಪಥೇನ ಗಚ್ಛನ್ತೋ ಪಥೇನ ಗಚ್ಛನ್ತಸ್ಸಾ’’ತಿ (ಪಾಚಿ॰ ೬೫೦) ವುತ್ತಸಿಕ್ಖಾಪದದ್ವಯಞ್ಚ।
379.Appasaddā duve vuttāti ‘‘appasaddo antaraghare gamissāmi, nisīdissāmī’’ti (pāci. 588, 589) vuttāni dve sikkhāpadāni ca. Na byāhareti ‘‘na sakabaḷena mukhena byāharissāmī’’ti (pāci. 619) vuttasikkhāpadañca. Chamā, nīcāsane, ṭhānanti ‘‘chamāyaṃ nisīditvā (pāci. 645), nīce āsane nisīditvā (pāci. 647), ṭhito nisinnassā’’ti (pāci. 648) vuttasikkhāpadañca. Pacchato uppathena cāti ‘‘pacchato gacchanto purato gacchantassa (pāci. 649), uppathena gacchanto pathena gacchantassā’’ti (pāci. 650) vuttasikkhāpadadvayañca.
೩೮೦. ವಜ್ಜಚ್ಛಾದಾತಿ ವಜ್ಜತೋ ಪಟಿಚ್ಛಾದನಸಿಕ್ಖಾಪದಞ್ಚ। ಅನುವತ್ತಾ ಚಾತಿ ಉಕ್ಖಿತ್ತಾನುವತ್ತನಸಿಕ್ಖಾಪದಞ್ಚ। ಗಹಣನ್ತಿ ‘‘ಹತ್ಥಗ್ಗಹಣಂ ವಾ ಸಾದಿಯೇಯ್ಯಾ’’ತಿ (ಪಾಚಿ॰ ೬೭೫) ವುತ್ತಸಿಕ್ಖಾಪದಞ್ಚ। ಓಸಾರೇಯ್ಯ ಚಾತಿ ‘‘ಅನಪಲೋಕೇತ್ವಾ ಕಾರಕಸಙ್ಘಂ ಅನಞ್ಞಾಯ ಗಣಸ್ಸ ಛನ್ದಂ ಓಸಾರೇಯ್ಯಾ’’ತಿ (ಪಾಚಿ॰ ೬೯೫) ವುತ್ತಸಿಕ್ಖಾಪದಞ್ಚ। ಪಚ್ಚಕ್ಖಾಮೀತಿ ಸಿಕ್ಖಾ ಚಾತಿ ‘‘ಬುದ್ಧಂ ಪಚ್ಚಾಚಿಕ್ಖಾಮೀ’’ತಿ (ಪಾಚಿ॰ ೭೧೦) ವುತ್ತಸಿಕ್ಖಾಪದಞ್ಚ। ತಥಾ ಕಿಸ್ಮಿಞ್ಚಿದೇವ ಚಾತಿ ‘‘ಕಿಸ್ಮಿಞ್ಚಿದೇವ ಅಧಿಕರಣೇ ಪಚ್ಚಾಕತಾ’’ತಿ (ಪಾಚಿ॰ ೭೧೬) ವುತ್ತಸಿಕ್ಖಾಪದಞ್ಚ।
380.Vajjacchādāti vajjato paṭicchādanasikkhāpadañca. Anuvattā cāti ukkhittānuvattanasikkhāpadañca. Gahaṇanti ‘‘hatthaggahaṇaṃ vā sādiyeyyā’’ti (pāci. 675) vuttasikkhāpadañca. Osāreyya cāti ‘‘anapaloketvā kārakasaṅghaṃ anaññāya gaṇassa chandaṃ osāreyyā’’ti (pāci. 695) vuttasikkhāpadañca. Paccakkhāmīti sikkhā cāti ‘‘buddhaṃ paccācikkhāmī’’ti (pāci. 710) vuttasikkhāpadañca. Tathā kismiñcideva cāti ‘‘kismiñcideva adhikaraṇe paccākatā’’ti (pāci. 716) vuttasikkhāpadañca.
೩೮೧. ಸಂಸಟ್ಠಾ ದ್ವೇ ಚಾತಿ ‘‘ಭಿಕ್ಖುನಿಯೋ ಪನೇವ ಸಂಸಟ್ಠಾ ವಿಹರನ್ತೀ’’ತಿ (ಪಾಚಿ॰ ೭೨೨) ಚ ‘‘ಯಾ ಪನ ಭಿಕ್ಖುನೀ ಏವಂ ವದೇಯ್ಯ ಸಂಸಟ್ಠಾವ, ಅಯ್ಯೇ, ತುಮ್ಹೇ ವಿಹರಥಾ’’ತಿಆದಿವಚನಂ (ಪಾಚಿ॰ ೭೨೮) ಪಟಿಚ್ಚ ವುತ್ತಸಿಕ್ಖಾಪದದ್ವಯಞ್ಚ। ವಧಿತ್ವಾ ಚಾತಿ ‘‘ಅತ್ತಾನಂ ವಧಿತ್ವಾ ವಧಿತ್ವಾ ರೋದೇಯ್ಯಾ’’ತಿ (ಪಾಚಿ॰ ೮೮೦) ವುತ್ತಸಿಕ್ಖಾಪದಞ್ಚ। ವಿಸಿಬ್ಬೇತ್ವಾ ಚಾತಿ ‘‘ಭಿಕ್ಖುನಿಯಾ ಚೀವರಂ ವಿಸಿಬ್ಬೇತ್ವಾ ವಾ ವಿಸಿಬ್ಬಾಪೇತ್ವಾ ವಾ’’ತಿ (ಪಾಚಿ॰ ೮೯೩) ವುತ್ತಸಿಕ್ಖಾಪದಞ್ಚ। ದುಕ್ಖಿತನ್ತಿ ‘‘ದುಕ್ಖಿತಂ ಸಹಜೀವಿನಿ’’ನ್ತಿ (ಪಾಚಿ॰ ೯೪೭) ವುತ್ತಸಿಕ್ಖಾಪದಞ್ಚ। ಪುನದೇವ ಚ ಸಂಸಟ್ಠಾತಿ ‘‘ಸಂಸಟ್ಠಾ ವಿಹರೇಯ್ಯ ಗಹಪತಿನಾ ವಾ ಗಹಪತಿಪುತ್ತೇನ ವಾ’’ತಿ (ಪಾಚಿ॰ ೯೫೬) ಏವಂ ಪುನ ವುತ್ತಸಂಸಟ್ಠಸಿಕ್ಖಾಪದಞ್ಚ। ನೇವ ವೂಪಸಮೇಯ್ಯ ಚಾತಿ ‘‘‘ಏಹಾಯ್ಯೇ, ಇಮಂ ಅಧಿಕರಣಂ ವೂಪಸಮೇಹೀ’ತಿ (ಪಾಚಿ॰ ೯೯೫) ವುಚ್ಚಮಾನಾ ‘ಸಾಧೂ’ತಿ ಪಟಿಸ್ಸುಣಿತ್ವಾ ಸಾ ಪಚ್ಛಾ ಅನನ್ತರಾಯಿಕಿನೀ ನೇವ ವೂಪಸಮೇಯ್ಯಾ’’ತಿ ವುತ್ತಸಿಕ್ಖಾಪದಞ್ಚ।
381.Saṃsaṭṭhā dve cāti ‘‘bhikkhuniyo paneva saṃsaṭṭhā viharantī’’ti (pāci. 722) ca ‘‘yā pana bhikkhunī evaṃ vadeyya saṃsaṭṭhāva, ayye, tumhe viharathā’’tiādivacanaṃ (pāci. 728) paṭicca vuttasikkhāpadadvayañca. Vadhitvā cāti ‘‘attānaṃ vadhitvā vadhitvā rodeyyā’’ti (pāci. 880) vuttasikkhāpadañca. Visibbetvā cāti ‘‘bhikkhuniyā cīvaraṃ visibbetvā vā visibbāpetvā vā’’ti (pāci. 893) vuttasikkhāpadañca. Dukkhitanti ‘‘dukkhitaṃ sahajīvini’’nti (pāci. 947) vuttasikkhāpadañca. Punadeva ca saṃsaṭṭhāti ‘‘saṃsaṭṭhā vihareyya gahapatinā vā gahapatiputtena vā’’ti (pāci. 956) evaṃ puna vuttasaṃsaṭṭhasikkhāpadañca. Neva vūpasameyya cāti ‘‘‘ehāyye, imaṃ adhikaraṇaṃ vūpasamehī’ti (pāci. 995) vuccamānā ‘sādhū’ti paṭissuṇitvā sā pacchā anantarāyikinī neva vūpasameyyā’’ti vuttasikkhāpadañca.
೩೮೨. ಜಾನಂ ಸಭಿಕ್ಖುಕಾರಾಮನ್ತಿ ‘‘ಜಾನಂ ಸಭಿಕ್ಖುಕಂ ಆರಾಮಂ ಅನಾಪುಚ್ಛಾ ಪವಿಸೇಯ್ಯಾ’’ತಿ (ಪಾಚಿ॰ ೧೦೨೪) ವುತ್ತಸಿಕ್ಖಾಪದಞ್ಚ। ತಥೇವ ನ ಪವಾರಯೇತಿ ‘‘ಉಭತೋಸಙ್ಘೇ ತೀಹಿ ಠಾನೇಹಿ ನ ಪವಾರೇಯ್ಯಾ’’ತಿ (ಪಾಚಿ॰ ೧೦೫೧) ವುತ್ತಸಿಕ್ಖಾಪದಞ್ಚ। ತಥಾ ಅನ್ವದ್ಧಮಾಸಞ್ಚಾತಿ ‘‘ಅನ್ವದ್ಧಮಾಸಂ ಭಿಕ್ಖುನಿಯಾ ಭಿಕ್ಖುಸಙ್ಘತೋ ದ್ವೇ ಧಮ್ಮಾ ಪಚ್ಚಾಸೀಸಿತಬ್ಬಾ’’ತಿ (ಪಾಚಿ॰ ೧೦೫೯) ವುತ್ತಸಿಕ್ಖಾಪದಞ್ಚ। ಸಹಜೀವಿನಿಯೋ ದುವೇತಿ ‘‘ಸಹಜೀವಿನಿಂ ವುಟ್ಠಾಪೇತ್ವಾ ದ್ವೇ ವಸ್ಸಾನಿ ನೇವ ಅನುಗ್ಗಣ್ಹೇಯ್ಯ (ಪಾಚಿ॰ ೧೧೦೮), ಸಹಜೀವಿನಿಂ ವುಟ್ಠಾಪೇತ್ವಾ ನೇವ ವೂಪಕಾಸೇಯ್ಯಾ’’ತಿ (ಪಾಚಿ॰ ೧೧೧೬) ವುತ್ತಸಿಕ್ಖಾಪದದ್ವಯಞ್ಚ।
382.Jānaṃsabhikkhukārāmanti ‘‘jānaṃ sabhikkhukaṃ ārāmaṃ anāpucchā paviseyyā’’ti (pāci. 1024) vuttasikkhāpadañca. Tatheva na pavārayeti ‘‘ubhatosaṅghe tīhi ṭhānehi na pavāreyyā’’ti (pāci. 1051) vuttasikkhāpadañca. Tathā anvaddhamāsañcāti ‘‘anvaddhamāsaṃ bhikkhuniyā bhikkhusaṅghato dve dhammā paccāsīsitabbā’’ti (pāci. 1059) vuttasikkhāpadañca. Sahajīviniyo duveti ‘‘sahajīviniṃ vuṭṭhāpetvā dve vassāni neva anuggaṇheyya (pāci. 1108), sahajīviniṃ vuṭṭhāpetvā neva vūpakāseyyā’’ti (pāci. 1116) vuttasikkhāpadadvayañca.
೩೮೩-೪. ಸಚೇ ಮೇ ಚೀವರಂ ಅಯ್ಯೇತಿ ‘‘ಸಚೇ ಮೇ ತ್ವಂ, ಅಯ್ಯೇ, ಚೀವರಂ ದಸ್ಸಸಿ, ಏವಾಹಂ ತಂ ವುಟ್ಠಾಪೇಸ್ಸಾಮೀ’’ತಿ (ಪಾಚಿ॰ ೧೧೫೧) ವುತ್ತಸಿಕ್ಖಾಪದಞ್ಚ। ಅನುಬನ್ಧಿಸ್ಸಸೀತಿ ‘‘ಸಚೇ ಮಂ ತ್ವಂ, ಅಯ್ಯೇ, ದ್ವೇ ವಸ್ಸಾನಿ ಅನುಬನ್ಧಿಸ್ಸಸಿ, ಏವಾಹಂ ತಂ ವುಟ್ಠಾಪೇಸ್ಸಾಮೀ’’ತಿ (ಪಾಚಿ॰ ೧೧೫೫) ವುತ್ತಸಿಕ್ಖಾಪದಞ್ಚ। ಅಸಮೇನ ಸಮ್ಬುದ್ಧೇನ ಪಕಾಸಿತಾ ಇಮೇ ಸತ್ತತಿಂಸ ಧಮ್ಮಾ ಸಬ್ಬೇ ಕಾಯವಾಚಾದಿತೋ ಕಾಯವಾಚಾಚಿತ್ತತೋ ಏಕಸಮುಟ್ಠಾನಾ ಕತಾ ಸಮನುಭಾಸನಾ ಸಿಯುಂ ಸಮುಟ್ಠಾನತೋ ಸಮನುಭಾಸನಸಿಕ್ಖಾಪದೇನ ಸದಿಸಾ ಸಿಯುನ್ತಿ ಯೋಜನಾ।
383-4.Sace me cīvaraṃ ayyeti ‘‘sace me tvaṃ, ayye, cīvaraṃ dassasi, evāhaṃ taṃ vuṭṭhāpessāmī’’ti (pāci. 1151) vuttasikkhāpadañca. Anubandhissasīti ‘‘sace maṃ tvaṃ, ayye, dve vassāni anubandhissasi, evāhaṃ taṃ vuṭṭhāpessāmī’’ti (pāci. 1155) vuttasikkhāpadañca. Asamena sambuddhena pakāsitā ime sattatiṃsa dhammā sabbe kāyavācādito kāyavācācittato ekasamuṭṭhānā katā samanubhāsanā siyuṃ samuṭṭhānato samanubhāsanasikkhāpadena sadisā siyunti yojanā.
ಸಮನುಭಾಸನಸಮುಟ್ಠಾನವಣ್ಣನಾ।
Samanubhāsanasamuṭṭhānavaṇṇanā.
೩೮೫. ಕಥಿನಾನಿ ಚ ತೀಣೀತಿ ‘‘ನಿಟ್ಠಿತಚೀವರಸ್ಮಿಂ ಭಿಕ್ಖುನಾ ಉಬ್ಭತಸ್ಮಿಂ ಕಥಿನೇ’’ತಿ (ಪಾರಾ॰ ೪೬೨) ವುತ್ತಾನಿ ಆದಿತೋ ತೀಣಿ ಸಿಕ್ಖಾಪದಾನಿ। ಪತ್ತೋತಿ ‘‘ದಸಾಹಪರಮಂ ಅತಿರೇಕಪತ್ತೋ’’ತಿ (ಪಾರಾ॰ ೬೦೧) ವುತ್ತಸಿಕ್ಖಾಪದಞ್ಚ। ಭೇಸಜ್ಜಮೇವ ಚಾತಿ ‘‘ಪಟಿಸಾಯನೀಯಾನಿ ಭೇಸಜ್ಜಾನೀ’’ತಿ (ಪಾರಾ॰ ೬೨೨) ವುತ್ತಸಿಕ್ಖಾಪದಞ್ಚ। ಅಚ್ಚೇಕಮ್ಪಿ ಚಾತಿ ಅಚ್ಚೇಕಸಿಕ್ಖಾಪದಞ್ಚ। ಸಾಸಙ್ಕನ್ತಿ ತದನನ್ತರಮೇವ ಸಾಸಙ್ಕಸಿಕ್ಖಾಪದಞ್ಚ। ಪಕ್ಕಮನ್ತದ್ವಯಮ್ಪಿ ಚಾತಿ ‘‘ತಂ ಪಕ್ಕಮನ್ತೋ ನೇವ ಉದ್ಧರೇಯ್ಯಾ’’ತಿ (ಪಾಚಿ॰ ೧೦೯, ೧೧೫) ಭೂತಗಾಮವಗ್ಗೇ ವುತ್ತಸಿಕ್ಖಾಪದದ್ವಯಞ್ಚ।
385.Kathināni ca tīṇīti ‘‘niṭṭhitacīvarasmiṃ bhikkhunā ubbhatasmiṃ kathine’’ti (pārā. 462) vuttāni ādito tīṇi sikkhāpadāni. Pattoti ‘‘dasāhaparamaṃ atirekapatto’’ti (pārā. 601) vuttasikkhāpadañca. Bhesajjameva cāti ‘‘paṭisāyanīyāni bhesajjānī’’ti (pārā. 622) vuttasikkhāpadañca. Accekampi cāti accekasikkhāpadañca. Sāsaṅkanti tadanantarameva sāsaṅkasikkhāpadañca. Pakkamantadvayampi cāti ‘‘taṃ pakkamanto neva uddhareyyā’’ti (pāci. 109, 115) bhūtagāmavagge vuttasikkhāpadadvayañca.
೩೮೬. ತಥಾ ಉಪಸ್ಸಯಂ ಗನ್ತ್ವಾತಿ ‘‘ಭಿಕ್ಖುನುಪಸ್ಸಯಂ ಉಪಸಙ್ಕಮಿತ್ವಾ ಭಿಕ್ಖುನಿಯೋ ಓವದೇಯ್ಯಾ’’ತಿ (ಪಾಚಿ॰ ೧೫೮) ವುತ್ತಸಿಕ್ಖಾಪದಞ್ಚ। ಪರಮ್ಪರಂ ಭೋಜನನ್ತಿ ‘‘ಪರಮ್ಪರಭೋಜನೇ ಪಾಚಿತ್ತಿಯ’’ನ್ತಿ (ಪಾಚಿ॰ ೨೨೧) ವುತ್ತಸಿಕ್ಖಾಪದಞ್ಚ। ಅನತಿರಿತ್ತನ್ತಿ ‘‘ಅನತಿರಿತ್ತಂ ಖಾದನೀಯಂ ವಾ ಭೋಜನೀಯಂ ವಾ’’ತಿ (ಪಾಚಿ॰ ೨೩೮) ವುತ್ತಸಿಕ್ಖಾಪದಞ್ಚ। ಸಭತ್ತೋತಿ ‘‘ನಿಮನ್ತಿತೋ ಸಭತ್ತೋ ಸಮಾನೋ’’ತಿ (ಪಾಚಿ॰ ೨೯೯) ವುತ್ತಸಿಕ್ಖಾಪದಞ್ಚ। ವಿಕಪ್ಪೇತ್ವಾ ತಥೇವ ಚಾತಿ ‘‘ಚೀವರಂ ವಿಕಪ್ಪೇತ್ವಾ’’ತಿ (ಪಾಚಿ॰ ೩೭೩) ವುತ್ತಸಿಕ್ಖಾಪದಞ್ಚ।
386.Tathā upassayaṃ gantvāti ‘‘bhikkhunupassayaṃ upasaṅkamitvā bhikkhuniyo ovadeyyā’’ti (pāci. 158) vuttasikkhāpadañca. Paramparaṃ bhojananti ‘‘paramparabhojane pācittiya’’nti (pāci. 221) vuttasikkhāpadañca. Anatirittanti ‘‘anatirittaṃ khādanīyaṃ vā bhojanīyaṃ vā’’ti (pāci. 238) vuttasikkhāpadañca. Sabhattoti ‘‘nimantito sabhatto samāno’’ti (pāci. 299) vuttasikkhāpadañca. Vikappetvā tatheva cāti ‘‘cīvaraṃ vikappetvā’’ti (pāci. 373) vuttasikkhāpadañca.
೩೮೭. ರಞ್ಞೋತಿ ‘‘ರಞ್ಞೋ ಖತ್ತಿಯಸ್ಸಾ’’ತಿ (ಪಾಚಿ॰ ೪೯೮) ವುತ್ತಸಿಕ್ಖಾಪದಞ್ಚ। ವಿಕಾಲೇತಿ ‘‘ವಿಕಾಲೇ ಗಾಮಂ ಪವಿಸೇಯ್ಯಾ’’ತಿ (ಪಾಚಿ॰ ೫೦೯-೫೧೨) ವುತ್ತಸಿಕ್ಖಾಪದಞ್ಚ। ವೋಸಾಸಾತಿ ‘‘ವೋಸಾಸಮಾನರೂಪಾ ಠಿತಾ’’ತಿ (ಪಾಚಿ॰ ೫೫೮) ವುತ್ತಸಿಕ್ಖಾಪದಞ್ಚ। ‘‘ಆರಞ್ಞಕೇ ಉಸ್ಸಯವಾದಿಕಾ’’ತಿ ಪದಚ್ಛೇದೋ। ಆರಞ್ಞಕೇತಿ ‘‘ತಥಾರೂಪೇಸು ಆರಞ್ಞಕೇಸು ಸೇನಾಸನೇಸು ಪುಬ್ಬೇ ಅಪ್ಪಟಿಸಂವಿದಿತ’’ನ್ತಿ (ಪಾಚಿ॰ ೫೭೦) ವುತ್ತಸಿಕ್ಖಾಪದಞ್ಚ। ಉಸ್ಸಯವಾದಿಕಾತಿ ‘‘ಉಸ್ಸಯವಾದಿಕಾ ವಿಹರೇಯ್ಯಾ’’ತಿ (ಪಾಚಿ॰ ೬೭೯) ವುತ್ತಸಿಕ್ಖಾಪದಞ್ಚ। ಪತ್ತಸನ್ನಿಚಯಞ್ಚೇವಾತಿ ‘‘ಪತ್ತಸನ್ನಿಚಯಂ ಕರೇಯ್ಯಾ’’ತಿ (ಪಾಚಿ॰ ೭೩೪) ವುತ್ತಸಿಕ್ಖಾಪದಞ್ಚ। ಪುರೇ, ಪಚ್ಛಾ, ವಿಕಾಲಕೇತಿ ‘‘ಯಾ ಪನ ಭಿಕ್ಖುನೀ ಪುರೇಭತ್ತಂ ಕುಲಾನಿ ಉಪಸಙ್ಕಮಿತ್ವಾ’’ತಿ (ಪಾಚಿ॰ ೮೫೫) ಚ ‘‘ಪಚ್ಛಾಭತ್ತಂ ಕುಲಾನಿ ಉಪಸಙ್ಕಮಿತ್ವಾ’’ತಿ (ಪಾಚಿ॰ ೮೬೦) ಚ ‘‘ವಿಕಾಲೇ ಕುಲಾನಿ ಉಪಸಙ್ಕಮಿತ್ವಾ’’ತಿ (ಪಾಚಿ॰ ೮೬೫) ಚ ವುತ್ತಸಿಕ್ಖಾಪದತ್ತಯಞ್ಚ।
387.Raññoti ‘‘rañño khattiyassā’’ti (pāci. 498) vuttasikkhāpadañca. Vikāleti ‘‘vikāle gāmaṃ paviseyyā’’ti (pāci. 509-512) vuttasikkhāpadañca. Vosāsāti ‘‘vosāsamānarūpā ṭhitā’’ti (pāci. 558) vuttasikkhāpadañca. ‘‘Āraññake ussayavādikā’’ti padacchedo. Āraññaketi ‘‘tathārūpesu āraññakesu senāsanesu pubbe appaṭisaṃvidita’’nti (pāci. 570) vuttasikkhāpadañca. Ussayavādikāti ‘‘ussayavādikā vihareyyā’’ti (pāci. 679) vuttasikkhāpadañca. Pattasannicayañcevāti ‘‘pattasannicayaṃ kareyyā’’ti (pāci. 734) vuttasikkhāpadañca. Pure, pacchā, vikālaketi ‘‘yā pana bhikkhunī purebhattaṃ kulāni upasaṅkamitvā’’ti (pāci. 855) ca ‘‘pacchābhattaṃ kulāni upasaṅkamitvā’’ti (pāci. 860) ca ‘‘vikāle kulāni upasaṅkamitvā’’ti (pāci. 865) ca vuttasikkhāpadattayañca.
೩೮೮-೯. ಪಞ್ಚಾಹಿಕನ್ತಿ ‘‘ಪಞ್ಚಾಹಿಕಂ ಸಙ್ಘಾಟಿಚಾರಂ ಅತಿಕ್ಕಮೇಯ್ಯಾ’’ತಿ (ಪಾಚಿ॰ ೮೯೮) ವುತ್ತಸಿಕ್ಖಾಪದಞ್ಚ। ಸಙ್ಕಮನಿನ್ತಿ ‘‘ಚೀವರಸಙ್ಕಮನೀಯಂ ಧಾರೇಯ್ಯಾ’’ತಿ (ಪಾಚಿ॰ ೯೦೩) ವುತ್ತಸಿಕ್ಖಾಪದಞ್ಚ। ತಥಾ ಆವಸಥದ್ವಯನ್ತಿ ‘‘ಆವಸಥಚೀವರಂ ಅನಿಸ್ಸಜ್ಜಿತ್ವಾ ಪರಿಭುಞ್ಜೇಯ್ಯ (ಪಾಚಿ॰ ೧೦೦೪), ಆವಸಥಂ ಅನಿಸ್ಸಜ್ಜಿತ್ವಾ ಚಾರಿಕಂ ಪಕ್ಕಮೇಯ್ಯಾ’’ತಿ (ಪಾಚಿ॰ ೧೦೦೯) ಏವಂ ಆವಸಥೇನ ಸದ್ಧಿಂ ವುತ್ತಸಿಕ್ಖಾಪದದ್ವಯಞ್ಚ। ಪಸಾಖೇತಿ ‘‘ಪಸಾಖೇ ಜಾತಂ ಗಣ್ಡಂ ವಾ’’ತಿ (ಪಾಚಿ॰ ೧೦೬೩) ವುತ್ತಸಿಕ್ಖಾಪದಞ್ಚ। ಆಸನೇ ಚಾತಿ ‘‘ಭಿಕ್ಖುಸ್ಸ ಪುರತೋ ಅನಾಪುಚ್ಛಾ ಆಸನೇ ನಿಸೀದೇಯ್ಯಾ’’ತಿ (ಪಾಚಿ॰ ೧೨೧೫) ವುತ್ತಸಿಕ್ಖಾಪದಞ್ಚಾತಿ ಇಮೇ ಪನ ಏಕೂನತಿಂಸ ಧಮ್ಮಾ ಕಾಯವಾಚತೋ, ಕಾಯವಾಚಾಚಿತ್ತತೋ ಚ ಸಮುಟ್ಠಾನತೋ ಸಬ್ಬೇ ದ್ವಿಸಮುಟ್ಠಾನಿಕಾ, ತತೋಯೇವ ಕಥಿನಸಮ್ಭವಾ ಕಥಿನಸಮುಟ್ಠಾನಾ ಹೋನ್ತೀತಿ ಯೋಜನಾ।
388-9.Pañcāhikanti ‘‘pañcāhikaṃ saṅghāṭicāraṃ atikkameyyā’’ti (pāci. 898) vuttasikkhāpadañca. Saṅkamaninti ‘‘cīvarasaṅkamanīyaṃ dhāreyyā’’ti (pāci. 903) vuttasikkhāpadañca. Tathā āvasathadvayanti ‘‘āvasathacīvaraṃ anissajjitvā paribhuñjeyya (pāci. 1004), āvasathaṃ anissajjitvā cārikaṃ pakkameyyā’’ti (pāci. 1009) evaṃ āvasathena saddhiṃ vuttasikkhāpadadvayañca. Pasākheti ‘‘pasākhe jātaṃ gaṇḍaṃ vā’’ti (pāci. 1063) vuttasikkhāpadañca. Āsane cāti ‘‘bhikkhussa purato anāpucchā āsane nisīdeyyā’’ti (pāci. 1215) vuttasikkhāpadañcāti ime pana ekūnatiṃsa dhammā kāyavācato, kāyavācācittato ca samuṭṭhānato sabbe dvisamuṭṭhānikā, tatoyeva kathinasambhavā kathinasamuṭṭhānā hontīti yojanā.
ಕಥಿನಸಮುಟ್ಠಾನವಣ್ಣನಾ।
Kathinasamuṭṭhānavaṇṇanā.
೩೯೦. ದ್ವೇ ಸೇಯ್ಯಾತಿ ದ್ವೇ ಸಹಸೇಯ್ಯಸಿಕ್ಖಾಪದಾನಿ ಚ। ಆಹಚ್ಚಪಾದೋ ಚಾತಿ ಆಹಚ್ಚಪಾದಕಸಿಕ್ಖಾಪದಞ್ಚ। ಪಿಣ್ಡಞ್ಚಾತಿ ಆವಸಥಪಿಣ್ಡಭೋಜನಸಿಕ್ಖಾಪದಞ್ಚ। ಗಣಭೋಜನನ್ತಿ ಗಣಭೋಜನಸಿಕ್ಖಾಪದಞ್ಚ । ವಿಕಾಲೇತಿ ವಿಕಾಲಭೋಜನಸಿಕ್ಖಾಪದಞ್ಚ। ಸನ್ನಿಧಿಞ್ಚೇವಾತಿ ಸನ್ನಿಧಿಕಾರಕಸಿಕ್ಖಾಪದಞ್ಚ। ದನ್ತಪೋನನ್ತಿ ದನ್ತಪೋನಸಿಕ್ಖಾಪದಞ್ಚ। ಅಚೇಲಕನ್ತಿ ಅಚೇಲಕಸಿಕ್ಖಾಪದಞ್ಚ।
390.Dve seyyāti dve sahaseyyasikkhāpadāni ca. Āhaccapādo cāti āhaccapādakasikkhāpadañca. Piṇḍañcāti āvasathapiṇḍabhojanasikkhāpadañca. Gaṇabhojananti gaṇabhojanasikkhāpadañca . Vikāleti vikālabhojanasikkhāpadañca. Sannidhiñcevāti sannidhikārakasikkhāpadañca. Dantaponanti dantaponasikkhāpadañca. Acelakanti acelakasikkhāpadañca.
೩೯೧. ಉಯ್ಯುತ್ತಞ್ಚಾತಿ ‘‘ಉಯ್ಯುತ್ತಂ ಸೇನಂ ದಸ್ಸನಾಯ ಗಚ್ಛೇಯ್ಯಾ’’ತಿ (ಪಾಚಿ॰ ೩೧೧) ವುತ್ತಸಿಕ್ಖಾಪದಞ್ಚ। ‘‘ವಸೇ ಉಯ್ಯೋಧಿ’’ನ್ತಿ ಪದಚ್ಛೇದೋ। ವಸೇತಿ ‘‘ಸೇನಾಯ ವಸೇಯ್ಯಾ’’ತಿ (ಪಾಚಿ॰ ೩೧೮) ವುತ್ತಸಿಕ್ಖಾಪದಞ್ಚ। ಉಯ್ಯೋಧಿನ್ತಿ ‘‘ಉಯ್ಯೋಧಿಕಂ ವಾ…ಪೇ॰… ಅನೀಕದಸ್ಸನಂ ವಾ ಗಚ್ಛೇಯ್ಯಾ’’ತಿ (ಪಾಚಿ॰ ೩೨೩) ವುತ್ತಸಿಕ್ಖಾಪದಞ್ಚ । ಸುರಾತಿ ಸುರಾಪಾನಸಿಕ್ಖಾಪದಞ್ಚ। ಓರೇನ ನ್ಹಾಯನನ್ತಿ ಓರೇನದ್ಧಮಾಸನಹಾಯನಸಿಕ್ಖಾಪದಞ್ಚ। ದುಬ್ಬಣ್ಣಕರಣಞ್ಚೇವಾತಿ ‘‘ತಿಣ್ಣಂ ದುಬ್ಬಣ್ಣಕರಣಾನ’’ನ್ತಿ (ಪಾಚಿ॰ ೩೬೮) ವುತ್ತಸಿಕ್ಖಾಪದಞ್ಚ। ಪಾಟಿದೇಸನೀಯದ್ವಯನ್ತಿ ವುತ್ತಾವಸೇಸಂ ಪಾಟಿದೇಸನೀಯದ್ವಯಞ್ಚ।
391.Uyyuttañcāti ‘‘uyyuttaṃ senaṃ dassanāya gaccheyyā’’ti (pāci. 311) vuttasikkhāpadañca. ‘‘Vase uyyodhi’’nti padacchedo. Vaseti ‘‘senāya vaseyyā’’ti (pāci. 318) vuttasikkhāpadañca. Uyyodhinti ‘‘uyyodhikaṃ vā…pe… anīkadassanaṃ vā gaccheyyā’’ti (pāci. 323) vuttasikkhāpadañca . Surāti surāpānasikkhāpadañca. Orena nhāyananti orenaddhamāsanahāyanasikkhāpadañca. Dubbaṇṇakaraṇañcevāti ‘‘tiṇṇaṃ dubbaṇṇakaraṇāna’’nti (pāci. 368) vuttasikkhāpadañca. Pāṭidesanīyadvayanti vuttāvasesaṃ pāṭidesanīyadvayañca.
೩೯೨. ಲಸುಣನ್ತಿ ಲಸುಣಸಿಕ್ಖಾಪದಞ್ಚ। ಉಪತಿಟ್ಠೇಯ್ಯಾತಿ ‘‘ಭಿಕ್ಖುಸ್ಸ ಭುಞ್ಜನ್ತಸ್ಸ ಪಾನೀಯೇನ ವಾ ವಿಧೂಪನೇನ ವಾ ಉಪತಿಟ್ಠೇಯ್ಯಾ’’ತಿ (ಪಾಚಿ॰ ೮೧೬) ವುತ್ತಸಿಕ್ಖಾಪದಞ್ಚ। ನಚ್ಚದಸ್ಸನಮೇವ ಚಾತಿ ‘‘ನಚ್ಚಂ ವಾ ಗೀತಂ ವಾ ವಾದಿತಂ ವಾ ದಸ್ಸನಾಯ ಗಚ್ಛೇಯ್ಯಾ’’ತಿ (ಪಾಚಿ॰ ೮೩೪) ವುತ್ತಸಿಕ್ಖಾಪದಞ್ಚ। ನಗ್ಗನ್ತಿ ‘‘ನಗ್ಗಾ ನಹಾಯೇಯ್ಯಾ’’ತಿ (ಪಾಚಿ॰ ೮೮೪) ವುತ್ತಸಿಕ್ಖಾಪದಞ್ಚ। ಅತ್ಥರಣನ್ತಿ ‘‘ಏಕತ್ಥರಣಪಾವುರಣಾ ತುವಟ್ಟೇಯ್ಯು’’ನ್ತಿ (ಪಾಚಿ॰ ೯೩೭) ವುತ್ತಸಿಕ್ಖಾಪದಞ್ಚ। ಮಞ್ಚೇತಿ ‘‘ಏಕಮಞ್ಚೇ ತುವಟ್ಟೇಯ್ಯು’’ನ್ತಿ (ಪಾಚಿ॰ ೯೩೩) ವುತ್ತಸಿಕ್ಖಾಪದಞ್ಚ। ಅನ್ತೋರಟ್ಠೇತಿ ‘‘ಅನ್ತೋರಟ್ಠೇ ಸಾಸಙ್ಕಸಮ್ಮತೇ’’ತಿ (ಪಾಚಿ॰ ೯೬೨) ವುತ್ತಸಿಕ್ಖಾಪದಞ್ಚ। ತಥಾ ಬಹೀತಿ ‘‘ತಿರೋರಟ್ಠೇ ಸಾಸಙ್ಕಸಮ್ಮತೇ’’ತಿ (ಪಾಚಿ॰ ೯೬೬) ವುತ್ತಸಿಕ್ಖಾಪದಞ್ಚ।
392.Lasuṇanti lasuṇasikkhāpadañca. Upatiṭṭheyyāti ‘‘bhikkhussa bhuñjantassa pānīyena vā vidhūpanena vā upatiṭṭheyyā’’ti (pāci. 816) vuttasikkhāpadañca. Naccadassanameva cāti ‘‘naccaṃ vā gītaṃ vā vāditaṃ vā dassanāya gaccheyyā’’ti (pāci. 834) vuttasikkhāpadañca. Nagganti ‘‘naggā nahāyeyyā’’ti (pāci. 884) vuttasikkhāpadañca. Attharaṇanti ‘‘ekattharaṇapāvuraṇā tuvaṭṭeyyu’’nti (pāci. 937) vuttasikkhāpadañca. Mañceti ‘‘ekamañce tuvaṭṭeyyu’’nti (pāci. 933) vuttasikkhāpadañca. Antoraṭṭheti ‘‘antoraṭṭhe sāsaṅkasammate’’ti (pāci. 962) vuttasikkhāpadañca. Tathā bahīti ‘‘tiroraṭṭhe sāsaṅkasammate’’ti (pāci. 966) vuttasikkhāpadañca.
೩೯೩. ಅನ್ತೋವಸ್ಸನ್ತಿ ‘‘ಅನ್ತೋವಸ್ಸಂ ಚಾರಿಕಂ ಚರೇಯ್ಯಾ’’ತಿ (ಪಾಚಿ॰ ೯೭೦) ವುತ್ತಸಿಕ್ಖಾಪದಞ್ಚ। ಅಗಾರಞ್ಚಾತಿ ‘‘ರಾಜಾಗಾರಂ ವಾ ಚಿತ್ತಾಗಾರಂ ವಾ…ಪೇ॰… ಪೋಕ್ಖರಣಿಂ ವಾ ದಸ್ಸನಾಯ ಗಚ್ಛೇಯ್ಯಾ’’ತಿ (ಪಾಚಿ॰ ೯೭೮) ವುತ್ತಸಿಕ್ಖಾಪದಞ್ಚ। ಆಸನ್ದಿನ್ತಿ ‘‘ಆಸನ್ದಿಂ ವಾ ಪಲ್ಲಙ್ಕಂ ವಾ ಪರಿಭುಞ್ಜೇಯ್ಯಾ’’ತಿ (ಪಾಚಿ॰ ೯೮೩) ವುತ್ತಸಿಕ್ಖಾಪದಞ್ಚ। ಸುತ್ತಕನ್ತನನ್ತಿ ‘‘ಸುತ್ತಂ ಕನ್ತೇಯ್ಯಾ’’ತಿ (ಪಾಚಿ॰ ೯೮೭) ವುತ್ತಸಿಕ್ಖಾಪದಞ್ಚ। ವೇಯ್ಯಾವಚ್ಚನ್ತಿ ‘‘ಗಿಹಿವೇಯ್ಯಾವಚ್ಚಂ ಕರೇಯ್ಯಾ’’ತಿ (ಪಾಚಿ॰ ೯೯೧) ವುತ್ತಸಿಕ್ಖಾಪದಞ್ಚ। ಸಹತ್ಥಾ ಚಾತಿ ‘‘ಅಗಾರಿಕಸ್ಸ ವಾ ಪರಿಬ್ಬಾಜಕಸ್ಸ ವಾ ಪರಿಬ್ಬಾಜಿಕಾಯ ವಾ ಸಹತ್ಥಾ ಖಾದನೀಯಂ ವಾ ಭೋಜನೀಯಂ ವಾ ದದೇಯ್ಯಾ’’ತಿ (ಪಾಚಿ॰ ೧೦೦೦) ವುತ್ತಸಿಕ್ಖಾಪದಞ್ಚ । ಆವಾಸೇ ಚ ಅಭಿಕ್ಖುಕೇತಿ ‘‘ಅಭಿಕ್ಖುಕೇ ಆವಾಸೇ ವಸ್ಸಂ ವಸೇಯ್ಯಾ’’ತಿ (ಪಾಚಿ॰ ೧೦೪೭) ವುತ್ತಸಿಕ್ಖಾಪದಞ್ಚ।
393.Antovassanti ‘‘antovassaṃ cārikaṃ careyyā’’ti (pāci. 970) vuttasikkhāpadañca. Agārañcāti ‘‘rājāgāraṃ vā cittāgāraṃ vā…pe… pokkharaṇiṃ vā dassanāya gaccheyyā’’ti (pāci. 978) vuttasikkhāpadañca. Āsandinti ‘‘āsandiṃ vā pallaṅkaṃ vā paribhuñjeyyā’’ti (pāci. 983) vuttasikkhāpadañca. Suttakantananti ‘‘suttaṃ kanteyyā’’ti (pāci. 987) vuttasikkhāpadañca. Veyyāvaccanti ‘‘gihiveyyāvaccaṃ kareyyā’’ti (pāci. 991) vuttasikkhāpadañca. Sahatthā cāti ‘‘agārikassa vā paribbājakassa vā paribbājikāya vā sahatthā khādanīyaṃ vā bhojanīyaṃ vā dadeyyā’’ti (pāci. 1000) vuttasikkhāpadañca . Āvāse ca abhikkhuketi ‘‘abhikkhuke āvāse vassaṃ vaseyyā’’ti (pāci. 1047) vuttasikkhāpadañca.
೩೯೪. ಛತ್ತನ್ತಿ ‘‘ಛತ್ತುಪಾಹನಂ ಧಾರೇಯ್ಯಾ’’ತಿ (ಪಾಚಿ॰ ೧೧೭೮) ವುತ್ತಸಿಕ್ಖಾಪದಞ್ಚ। ಯಾನಞ್ಚಾತಿ ‘‘ಯಾನೇನ ಯಾಯೇಯ್ಯಾ’’ತಿ (ಪಾಚಿ॰ ೧೧೮೬) ವುತ್ತಸಿಕ್ಖಾಪದಞ್ಚ। ಸಙ್ಘಾಣಿನ್ತಿ ‘‘ಸಙ್ಘಾಣಿಂ ಧಾರೇಯ್ಯಾ’’ತಿ (ಪಾಚಿ॰ ೧೧೯೧) ವುತ್ತಸಿಕ್ಖಾಪದಞ್ಚ। ಅಲಙ್ಕಾರನ್ತಿ ‘‘ಇತ್ಥಾಲಙ್ಕಾರಂ ಧಾರೇಯ್ಯಾ’’ತಿ (ಪಾಚಿ॰ ೧೧೯೫) ವುತ್ತಸಿಕ್ಖಾಪದಞ್ಚ। ಗನ್ಧವಾಸಿತನ್ತಿ ‘‘ಗನ್ಧವಣ್ಣಕೇನ ನಹಾಯೇಯ್ಯ (ಪಾಚಿ॰ ೧೧೯೯), ವಾಸಿತಕೇನ ಪಿಞ್ಞಾಕೇನ ನಹಾಯೇಯ್ಯಾ’’ತಿ (ಪಾಚಿ॰ ೧೨೦೩) ವುತ್ತಸಿಕ್ಖಾಪದದ್ವಯಞ್ಚ। ‘‘ಭಿಕ್ಖುನೀ…ಪೇ॰… ಗಿಹಿನಿಯಾ’’ತಿ ಏತೇನ ‘‘ಭಿಕ್ಖುನಿಯಾ ಉಮ್ಮದ್ದಾಪೇಯ್ಯಾ’’ತಿಆದೀನಿ (ಪಾಚಿ॰ ೧೨೦೭) ಚತ್ತಾರಿ ಸಿಕ್ಖಾಪದಾನಿ ವುತ್ತಾನಿ।
394.Chattanti ‘‘chattupāhanaṃ dhāreyyā’’ti (pāci. 1178) vuttasikkhāpadañca. Yānañcāti ‘‘yānena yāyeyyā’’ti (pāci. 1186) vuttasikkhāpadañca. Saṅghāṇinti ‘‘saṅghāṇiṃ dhāreyyā’’ti (pāci. 1191) vuttasikkhāpadañca. Alaṅkāranti ‘‘itthālaṅkāraṃ dhāreyyā’’ti (pāci. 1195) vuttasikkhāpadañca. Gandhavāsitanti ‘‘gandhavaṇṇakena nahāyeyya (pāci. 1199), vāsitakena piññākena nahāyeyyā’’ti (pāci. 1203) vuttasikkhāpadadvayañca. ‘‘Bhikkhunī…pe… gihiniyā’’ti etena ‘‘bhikkhuniyā ummaddāpeyyā’’tiādīni (pāci. 1207) cattāri sikkhāpadāni vuttāni.
೩೯೫. ತಥಾಸಂಕಚ್ಚಿಕಾತಿ ‘‘ಅಸಂಕಚ್ಚಿಕಾ ಗಾಮಂ ಪವಿಸೇಯ್ಯಾ’’ತಿ (ಪಾಚಿ॰ ೧೨೨೫) ಏವಂ ವುತ್ತಸಿಕ್ಖಾಪದಞ್ಚ। ಇಮೇ ಪನ ತೇಚತ್ತಾಲೀಸ ಧಮ್ಮಾ ಸಬ್ಬೇ ಕಾಯಚಿತ್ತವಸೇನ ದ್ವಿಸಮುಟ್ಠಾನಿಕಾ। ಏಳಕಲೋಮೇನ ಸಮುಟ್ಠಾನತೋ ಸಮಾ ಹೋನ್ತೀತಿ ಯೋಜನಾ।
395.Tathāsaṃkaccikāti ‘‘asaṃkaccikā gāmaṃ paviseyyā’’ti (pāci. 1225) evaṃ vuttasikkhāpadañca. Ime pana tecattālīsa dhammā sabbe kāyacittavasena dvisamuṭṭhānikā. Eḷakalomena samuṭṭhānato samā hontīti yojanā.
ಏಳಕಲೋಮಸಮುಟ್ಠಾನವಣ್ಣನಾ।
Eḷakalomasamuṭṭhānavaṇṇanā.
೩೯೬-೭. ಅಞ್ಞತ್ರಾತಿ ‘‘ಮಾತುಗಾಮಸ್ಸ ಉತ್ತರಿಛಪ್ಪಞ್ಚವಾಚಾಹಿ ಧಮ್ಮಂ ದೇಸೇಯ್ಯ ಅಞ್ಞತ್ರ ವಿಞ್ಞುನಾ ಪುರಿಸವಿಗ್ಗಹೇನಾ’’ತಿ (ಪಾಚಿ॰ ೬೩) ವುತ್ತಸಿಕ್ಖಾಪದಞ್ಚ। ಅಸಮ್ಮತೋ ಚೇವಾತಿ ‘‘ಅಸಮ್ಮತೋ ಭಿಕ್ಖುನಿಯೋ ಓವದೇಯ್ಯಾ’’ತಿ (ಪಾಚಿ॰ ೧೪೬) ವುತ್ತಸಿಕ್ಖಾಪದಞ್ಚ। ತಥಾ ಅತ್ಥಙ್ಗತೇನ ಚಾತಿ ‘‘ಅತ್ಥಙ್ಗತೇ ಸೂರಿಯೇ ಭಿಕ್ಖುನಿಯೋ ಓವದೇಯ್ಯಾ’’ತಿ (ಪಾಚಿ॰ ೧೫೪) ವುತ್ತಸಿಕ್ಖಾಪದಞ್ಚ। ತಿರಚ್ಛಾನವಿಜ್ಜಾ ದ್ವೇ ವುತ್ತಾತಿ ‘‘ತಿರಚ್ಛಾನವಿಜ್ಜಂ ಪರಿಯಾಪುಣೇಯ್ಯ, ವಾಚೇಯ್ಯಾ’’ತಿ (ಪಾಚಿ॰ ೧೦೧೪, ೧೦೧೮) ಏವಂ ವುತ್ತಾನಿ ದ್ವೇ ಸಿಕ್ಖಾಪದಾನಿ ಚ। ಅನೋಕಾಸಕತಮ್ಪಿ ಚಾತಿ ‘‘ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛೇಯ್ಯಾ’’ತಿ (ಪಾಚಿ॰ ೧೨೨೦) ವುತ್ತಸಿಕ್ಖಾಪದಞ್ಚಾತಿ ಇಮೇ ಪನ ಸಬ್ಬೇ ಛ ಧಮ್ಮಾ ವಾಚತೋ, ವಾಚಾಚಿತ್ತತೋ ಚಾತಿ ಇಮೇಹಿ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾನಿಕಾ ಹೋನ್ತಿ। ಪದಸೋಧಮ್ಮತುಲ್ಯತಾ ಅಯಮೇತೇಸಂ ಪದಸೋಧಮ್ಮೇನ ಸದಿಸಭಾವೋತಿ ಯೋಜನಾ।
396-7.Aññatrāti ‘‘mātugāmassa uttarichappañcavācāhi dhammaṃ deseyya aññatra viññunā purisaviggahenā’’ti (pāci. 63) vuttasikkhāpadañca. Asammato cevāti ‘‘asammato bhikkhuniyo ovadeyyā’’ti (pāci. 146) vuttasikkhāpadañca. Tathā atthaṅgatena cāti ‘‘atthaṅgate sūriye bhikkhuniyo ovadeyyā’’ti (pāci. 154) vuttasikkhāpadañca. Tiracchānavijjā dve vuttāti ‘‘tiracchānavijjaṃ pariyāpuṇeyya, vāceyyā’’ti (pāci. 1014, 1018) evaṃ vuttāni dve sikkhāpadāni ca. Anokāsakatampi cāti ‘‘anokāsakataṃ bhikkhuṃ pañhaṃ puccheyyā’’ti (pāci. 1220) vuttasikkhāpadañcāti ime pana sabbe cha dhammā vācato, vācācittato cāti imehi dvīhi samuṭṭhānehi samuṭṭhānikā honti. Padasodhammatulyatā ayametesaṃ padasodhammena sadisabhāvoti yojanā.
ಪದಸೋಧಮ್ಮಸಮುಟ್ಠಾನವಣ್ಣನಾ।
Padasodhammasamuṭṭhānavaṇṇanā.
೩೯೮-೯. ಏಕನ್ತಿ ‘‘ಭಿಕ್ಖುನಿಯಾ ಸದ್ಧಿಂ ಸಂವಿಧಾಯ ಏಕದ್ಧಾನಮಗ್ಗಂ ಪಟಿಪಜ್ಜೇಯ್ಯಾ’’ತಿ (ಪಾಚಿ॰ ೧೮೦) ವುತ್ತಸಿಕ್ಖಾಪದಞ್ಚ। ನಾವನ್ತಿ ‘‘ಏಕನಾವಂ ಅಭಿರುಹೇಯ್ಯಾ’’ತಿ (ಪಾಚಿ॰ ೧೮೮) ವುತ್ತಸಿಕ್ಖಾಪದಞ್ಚ। ಪಣೀತಞ್ಚಾತಿ ‘‘ಪಣೀತಭೋಜನಾನಿ ಅಗಿಲಾನೋ ಅತ್ತನೋ ಅತ್ಥಾಯ ವಿಞ್ಞಾಪೇತ್ವಾಭುಞ್ಜೇಯ್ಯಾ’’ತಿ (ಪಾಚಿ॰ ೨೫೯) ವುತ್ತಸಿಕ್ಖಾಪದಞ್ಚ। ಸಂವಿಧಾನಞ್ಚಾತಿ ಮಾತುಗಾಮೇನ ಸದ್ಧಿಂ ಸಂವಿಧಾಯ ಗಮನಸಿಕ್ಖಾಪದಞ್ಚ। ಸಂಹರೇತಿ ‘‘ಸಮ್ಬಾಧೇ ಲೋಮಂ ಸಂಹರಾಪೇಯ್ಯಾ’’ತಿ (ಪಾಚಿ॰ ೭೯೯) ವುತ್ತಸಿಕ್ಖಾಪದಞ್ಚ। ಧಞ್ಞನ್ತಿ ‘‘ಆಮಕಧಞ್ಞಂ ವಿಞ್ಞತ್ವಾ ವಾ’’ತಿ (ಪಾಚಿ॰ ೮೨೧) ವುತ್ತಸಿಕ್ಖಾಪದಞ್ಚ। ನಿಮನ್ತಿತಾ ಚೇವಾತಿ ‘‘ನಿಮನ್ತಿತಾ ವಾ ಪವಾರಿತಾ ವಾ ಖಾದನೀಯಂ ವಾ ಭೋಜನೀಯಂ ವಾ ಖಾದೇಯ್ಯ ವಾ ಭುಞ್ಜೇಯ್ಯ ವಾ’’ತಿ (ಪಾಚಿ॰ ೧೦೩೮) ವುತ್ತಸಿಕ್ಖಾಪದಞ್ಚ। ಪಾಟಿದೇಸನಿಯಟ್ಠಕನ್ತಿ ಭಿಕ್ಖುನೀನಂ ವುತ್ತಾ ಅಟ್ಠ ಪಾಟಿದೇಸನೀಯಾ ಚೇತಿ ಬುದ್ಧಸೇಟ್ಠೇನ ಪಞ್ಞತ್ತಾ ಏತಾ ಚುದ್ದಸ ಸಿಕ್ಖಾ ಚತುಸಮುಟ್ಠಾನಾ ಕಾಯತೋ, ಕಾಯವಾಚತೋ, ಕಾಯಚಿತ್ತತೋ, ವಾಚಾಚಿತ್ತತೋ ಚಾತಿ ಚತೂಹಿ ಸಮುಟ್ಠಾನೇಹಿ ಸಮುಟ್ಠಹನ್ತಿ। ಸಮುಟ್ಠಾನತೋ ಅದ್ಧಾನೇನ ಅದ್ಧಾನಸಿಕ್ಖಾಪದೇನ ಸಮಾ ಹೋನ್ತೀತಿ ಮತಾತಿ ಯೋಜನಾ।
398-9.Ekanti ‘‘bhikkhuniyā saddhiṃ saṃvidhāya ekaddhānamaggaṃ paṭipajjeyyā’’ti (pāci. 180) vuttasikkhāpadañca. Nāvanti ‘‘ekanāvaṃ abhiruheyyā’’ti (pāci. 188) vuttasikkhāpadañca. Paṇītañcāti ‘‘paṇītabhojanāni agilāno attano atthāya viññāpetvābhuñjeyyā’’ti (pāci. 259) vuttasikkhāpadañca. Saṃvidhānañcāti mātugāmena saddhiṃ saṃvidhāya gamanasikkhāpadañca. Saṃhareti ‘‘sambādhe lomaṃ saṃharāpeyyā’’ti (pāci. 799) vuttasikkhāpadañca. Dhaññanti ‘‘āmakadhaññaṃ viññatvā vā’’ti (pāci. 821) vuttasikkhāpadañca. Nimantitā cevāti ‘‘nimantitā vā pavāritā vā khādanīyaṃ vā bhojanīyaṃ vā khādeyya vā bhuñjeyya vā’’ti (pāci. 1038) vuttasikkhāpadañca. Pāṭidesaniyaṭṭhakanti bhikkhunīnaṃ vuttā aṭṭha pāṭidesanīyā ceti buddhaseṭṭhena paññattā etā cuddasa sikkhā catusamuṭṭhānā kāyato, kāyavācato, kāyacittato, vācācittato cāti catūhi samuṭṭhānehi samuṭṭhahanti. Samuṭṭhānato addhānena addhānasikkhāpadena samā hontīti matāti yojanā.
ಅದ್ಧಾನಸಮುಟ್ಠಾನವಣ್ಣನಾ।
Addhānasamuṭṭhānavaṇṇanā.
೪೦೦-೧. ಸುತಿನ್ತಿ ಉಪಸ್ಸುತಿತಿಟ್ಠನಸಿಕ್ಖಾಪದಞ್ಚ। ಸೂಪಾದಿವಿಞ್ಞತ್ತಿನ್ತಿ ಸೂಪೋದನವಿಞ್ಞತ್ತಿಸಿಕ್ಖಾಪದಞ್ಚ। ಅನ್ಧಕಾರೇತಿ ‘‘ರತ್ತನ್ಧಕಾರೇ ಅಪ್ಪದೀಪೇ’’ತಿ (ಪಾಚಿ॰ ೮೩೯) ವುತ್ತಸಿಕ್ಖಾಪದಞ್ಚ। ತಥೇವ ಚ ಪಟಿಚ್ಛನ್ನೇತಿ ‘‘ಪಟಿಚ್ಛನ್ನೇ ಓಕಾಸೇ’’ತಿ (ಪಾಚಿ॰ ೮೪೩) ವುತ್ತಸಿಕ್ಖಾಪದಞ್ಚ। ಓಕಾಸೇತಿ ‘‘ಅಜ್ಝೋಕಾಸೇ ಪುರಿಸೇನ ಸದ್ಧಿ’’ನ್ತಿ (ಪಾಚಿ॰ ೮೪೭) ಏವಂ ವುತ್ತಸಿಕ್ಖಾಪದಞ್ಚ। ಬ್ಯೂಹೇ ಚಾತಿ ತದನನ್ತರಮೇವ ‘‘ರಥಿಕಾಯ ವಾ ಬ್ಯೂಹೇ ವಾ ಸಿಙ್ಘಾಟಕೇ ವಾ ಪುರಿಸೇನ ಸದ್ಧಿ’’ನ್ತಿ (ಪಾಚಿ॰ ೮೫೧) ಆಗತಸಿಕ್ಖಾಪದಞ್ಚಾತಿ ಇಮೇ ಸಬ್ಬೇಪಿ ಆದಿಚ್ಚಬನ್ಧುನಾ ದೇಸಿತಾ ಛ ಧಮ್ಮಾ ಚತುತ್ಥಚ್ಛಟ್ಠತೋ ಕಾಯಚಿತ್ತತೋ, ಕಾಯವಾಚಾಚಿತ್ತತೋ ಚ ಸಮುಟ್ಠಹನ್ತಾ ಥೇಯ್ಯಸತ್ಥಸಮುಟ್ಠಾನಾ ಥೇಯ್ಯಸತ್ಥಸಿಕ್ಖಾಪದೇನ ಸಮಾನಸಮುಟ್ಠಾನಾ ಸಿಯುನ್ತಿ ಯೋಜನಾ।
400-1.Sutinti upassutitiṭṭhanasikkhāpadañca. Sūpādiviññattinti sūpodanaviññattisikkhāpadañca. Andhakāreti ‘‘rattandhakāre appadīpe’’ti (pāci. 839) vuttasikkhāpadañca. Tatheva ca paṭicchanneti ‘‘paṭicchanne okāse’’ti (pāci. 843) vuttasikkhāpadañca. Okāseti ‘‘ajjhokāse purisena saddhi’’nti (pāci. 847) evaṃ vuttasikkhāpadañca. Byūhe cāti tadanantarameva ‘‘rathikāya vā byūhe vā siṅghāṭake vā purisena saddhi’’nti (pāci. 851) āgatasikkhāpadañcāti ime sabbepi ādiccabandhunā desitā cha dhammā catutthacchaṭṭhato kāyacittato, kāyavācācittato ca samuṭṭhahantā theyyasatthasamuṭṭhānā theyyasatthasikkhāpadena samānasamuṭṭhānā siyunti yojanā.
ಥೇಯ್ಯಸತ್ಥಸಮುಟ್ಠಾನವಣ್ಣನಾ।
Theyyasatthasamuṭṭhānavaṇṇanā.
೪೦೨. ಛತ್ತ, ದಣ್ಡಕರಸ್ಸಾಪೀತಿ ‘‘ನ ಛತ್ತಪಾಣಿಸ್ಸ ದಣ್ಡಪಾಣಿಸ್ಸಾ’’ತಿ (ಪಾಚಿ॰ ೬೩೫) ವುತ್ತಸಿಕ್ಖಾಪದದ್ವಯಞ್ಚ। ಸತ್ಥಾವುಧಕರಸ್ಸಾಪೀತಿ ‘‘ನ ಸತ್ಥಪಾಣಿಸ್ಸ (ಪಾಚಿ॰ ೬೩೬), ನ ಆವುಧಪಾಣಿಸ್ಸಾ’’ತಿ (ಪಾಚಿ॰ ೬೩೭) ವುತ್ತಸಿಕ್ಖಾಪದದ್ವಯಞ್ಚ। ಪಾದುಕೂಪಾಹನಾ, ಯಾನನ್ತಿ ‘‘ನ ಪಾದುಕಾರುಳ್ಹಸ್ಸ (ಪಾಚಿ॰ ೬೩೮), ನ ಉಪಾಹನಾರುಳ್ಹಸ್ಸ (ಪಾಚಿ॰ ೬೩೯), ನ ಯಾನಗತಸ್ಸಾ’’ತಿ (ಪಾಚಿ॰ ೬೪೦) ವುತ್ತಸಿಕ್ಖಾಪದತ್ತಯಞ್ಚ। ಸೇಯ್ಯಾ, ಪಲ್ಲತ್ಥಿಕಾಯ ಚಾತಿ ‘‘ನ ಸಯನಗತಸ್ಸ (ಪಾಚಿ॰ ೬೪೧), ನ ಪಲ್ಲತ್ಥಿಕಾಯ ನಿಸಿನ್ನಸ್ಸಾ’’ತಿ (ಪಾಚಿ॰ ೬೪೨) ವುತ್ತಸಿಕ್ಖಾಪದದ್ವಯಞ್ಚ।
402.Chatta, daṇḍakarassāpīti ‘‘na chattapāṇissa daṇḍapāṇissā’’ti (pāci. 635) vuttasikkhāpadadvayañca. Satthāvudhakarassāpīti ‘‘na satthapāṇissa (pāci. 636), na āvudhapāṇissā’’ti (pāci. 637) vuttasikkhāpadadvayañca. Pādukūpāhanā, yānanti ‘‘na pādukāruḷhassa (pāci. 638), na upāhanāruḷhassa (pāci. 639), na yānagatassā’’ti (pāci. 640) vuttasikkhāpadattayañca. Seyyā, pallatthikāya cāti ‘‘na sayanagatassa (pāci. 641), na pallatthikāya nisinnassā’’ti (pāci. 642) vuttasikkhāpadadvayañca.
೪೦೩. ವೇಠಿತೋಗುಣ್ಠಿತೋ ಚಾತಿ ‘‘ನ ವೇಠಿತಸೀಸಸ್ಸ (ಪಾಚಿ॰ ೬೪೩), ನ ಓಗುಣ್ಠಿತಸೀಸಸ್ಸಾ’’ತಿ (ಪಾಚಿ॰ ೬೪೪) ವುತ್ತಸಿಕ್ಖಾಪದದ್ವಯಞ್ಚಾತಿ ನಿದಸ್ಸಿತಾ ಸಬ್ಬೇ ಏಕಾದಸ ಧಮ್ಮಾ ವಾಚಾಚಿತ್ತಸಙ್ಖಾತೇನ ಏಕೇನ ಸಮುಟ್ಠಾನೇನ ಸಮುಟ್ಠಿತಾ ಧಮ್ಮದೇಸನಸಮುಟ್ಠಾನಾತಿ ಸಞ್ಞಿತಾ ಸಲ್ಲಕ್ಖಿತಾತಿ ಯೋಜನಾ।
403.Veṭhitoguṇṭhito cāti ‘‘na veṭhitasīsassa (pāci. 643), na oguṇṭhitasīsassā’’ti (pāci. 644) vuttasikkhāpadadvayañcāti nidassitā sabbe ekādasa dhammā vācācittasaṅkhātena ekena samuṭṭhānena samuṭṭhitā dhammadesanasamuṭṭhānāti saññitā sallakkhitāti yojanā.
ಧಮ್ಮದೇಸನಸಮುಟ್ಠಾನವಣ್ಣನಾ।
Dhammadesanasamuṭṭhānavaṇṇanā.
೪೦೪. ಏವಂ ತಾವ ಸಮ್ಭಿನ್ನಸಮುಟ್ಠಾನಂ ವೇದಿತಬ್ಬಂ, ನಿಯತಸಮುಟ್ಠಾನಂ ತಿವಿಧಂ, ತಂ ಏಕಸ್ಸೇವ ಸಿಕ್ಖಾಪದಸ್ಸ ಹೋತೀತಿ ವಿಸುಂಯೇವ ದಸ್ಸೇತುಮಾಹ ‘‘ಭೂತಾರೋಚನಕಞ್ಚೇವಾ’’ತಿಆದಿ। ಭೂತಾರೋಚನಕಞ್ಚೇವಾತಿ ತೀಹಿ ಅಚಿತ್ತಕಸಮುಟ್ಠಾನೇಹಿ ಸಮುಟ್ಠಿತಂ ಭೂತಾರೋಚನಸಿಕ್ಖಾಪದಞ್ಚ। ಚೋರಿವುಟ್ಠಾಪನಮ್ಪಿ ಚಾತಿ ವಾಚಾಚಿತ್ತತೋ, ಕಾಯವಾಚಾಚಿತ್ತತೋ ಚಾತಿ ದ್ವೀಹಿ ಸಮುಟ್ಠಿತಂ ಚೋರಿವುಟ್ಠಾಪನಸಿಕ್ಖಾಪದಞ್ಚ। ಅನನುಞ್ಞಾತಮೇವ ಅನನುಞ್ಞಾತಮತ್ತಂ। ಅನನುಞ್ಞಾತಮತ್ತನ್ತಿ ವಾಚತೋ, ಕಾಯವಾಚತೋ, ವಾಚಾಚಿತ್ತತೋ, ಕಾಯವಾಚಾಚಿತ್ತತೋ ಚಾತಿ ಚತೂಹಿ ಸಮುಟ್ಠಿತಂ ಅನನುಞ್ಞಾತಸಿಕ್ಖಾಪದಞ್ಚಾತಿ। ಇದಂ ತಯನ್ತಿ ಇದಂ ಸಿಕ್ಖಾಪದತ್ತಯಂ। ಅಸಮ್ಭಿನ್ನನ್ತಿ ಕೇನಚಿ ಅಞ್ಞೇನ ಸಿಕ್ಖಾಪದೇನ ಅಸಮ್ಮಿಸ್ಸಸಮುಟ್ಠಾನಂ।
404. Evaṃ tāva sambhinnasamuṭṭhānaṃ veditabbaṃ, niyatasamuṭṭhānaṃ tividhaṃ, taṃ ekasseva sikkhāpadassa hotīti visuṃyeva dassetumāha ‘‘bhūtārocanakañcevā’’tiādi. Bhūtārocanakañcevāti tīhi acittakasamuṭṭhānehi samuṭṭhitaṃ bhūtārocanasikkhāpadañca. Corivuṭṭhāpanampi cāti vācācittato, kāyavācācittato cāti dvīhi samuṭṭhitaṃ corivuṭṭhāpanasikkhāpadañca. Ananuññātameva ananuññātamattaṃ. Ananuññātamattanti vācato, kāyavācato, vācācittato, kāyavācācittato cāti catūhi samuṭṭhitaṃ ananuññātasikkhāpadañcāti. Idaṃ tayanti idaṃ sikkhāpadattayaṃ. Asambhinnanti kenaci aññena sikkhāpadena asammissasamuṭṭhānaṃ.
ಇತಿ ಉತ್ತರೇ ಲೀನತ್ಥಪಕಾಸನಿಯಾ
Iti uttare līnatthapakāsaniyā
ಸಮುಟ್ಠಾನಸೀಸಕಥಾವಣ್ಣನಾ ನಿಟ್ಠಿತಾ।
Samuṭṭhānasīsakathāvaṇṇanā niṭṭhitā.
