| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
ஸமுட்டா²னஸீஸவண்ணனா
Samuṭṭhānasīsavaṇṇanā
257. தத³னந்தராய பன ஸமுட்டா²னகதா²ய அனத்தா இதி நிச்ச²யாதி அனத்தா இதி நிச்சி²தா. ஸபா⁴க³த⁴ம்மானந்தி அனிச்சாகாராதீ³ஹி ஸபா⁴கா³னங் ஸங்க²தத⁴ம்மானங். நாமமத்தங் ந நாயதீதி நாமமத்தம்பி ந பஞ்ஞாயதி. து³க்க²ஹானிந்தி து³க்க²கா⁴தனங். க²ந்த⁴கா யா ச மாதிகாதி க²ந்த⁴கா யா ச மாதிகாதி அத்தோ². அயமேவ வா பாடோ². ஸமுட்டா²னங் நியதோ கதந்தி ஸமுட்டா²னங் நியதோகதங் நியதகதங்; நியதஸமுட்டா²னந்தி அத்தோ². ஏதேன பூ⁴தாரோசனசோரிவுட்டா²பனஅனநுஞ்ஞாதஸிக்கா²பத³த்தயஸ்ஸ ஸங்க³ஹோ பச்சேதப்³போ³. ஏதானேவ ஹி தீணி ஸிக்கா²பதா³னி நியதஸமுட்டா²னானி, அஞ்ஞேஹி ஸத்³தி⁴ங் அஸம்பி⁴ன்னஸமுட்டா²னானி.
257. Tadanantarāya pana samuṭṭhānakathāya anattā iti nicchayāti anattā iti nicchitā. Sabhāgadhammānanti aniccākārādīhi sabhāgānaṃ saṅkhatadhammānaṃ. Nāmamattaṃ na nāyatīti nāmamattampi na paññāyati. Dukkhahāninti dukkhaghātanaṃ. Khandhakā yā ca mātikāti khandhakā yā ca mātikāti attho. Ayameva vā pāṭho. Samuṭṭhānaṃ niyato katanti samuṭṭhānaṃ niyatokataṃ niyatakataṃ; niyatasamuṭṭhānanti attho. Etena bhūtārocanacorivuṭṭhāpanaananuññātasikkhāpadattayassa saṅgaho paccetabbo. Etāneva hi tīṇi sikkhāpadāni niyatasamuṭṭhānāni, aññehi saddhiṃ asambhinnasamuṭṭhānāni.
ஸம்பே⁴த³ங் நிதா³னஞ்சஞ்ஞந்தி அஞ்ஞம்பி ஸம்பே⁴த³ஞ்ச நிதா³னஞ்ச. தத்த² ஸம்பே⁴த³வசனேன ஸமுட்டா²னஸம்பே⁴த³ஸ்ஸ க³ஹணங் பச்சேதப்³ப³ங், தானி ஹி தீணி ஸிக்கா²பதா³னி ட²பெத்வா ஸேஸானி ஸம்பி⁴ன்னஸமுட்டா²னானி. நிதா³னவசனேன ஸிக்கா²பதா³னங் பஞ்ஞத்திதே³ஸஸங்கா²தங் நிதா³னங் பச்சேதப்³ப³ங். ஸுத்தே தி³ஸ்ஸந்தி உபரீதி ஸிக்கா²பதா³னங் ஸமுட்டா²னநியமோ ஸம்பே⁴தோ³ நிதா³னந்தி இமானி தீணி ஸுத்தம்ஹி ஏவ தி³ஸ்ஸந்தி; பஞ்ஞாயந்தீதி அத்தோ². தத்த² ‘‘ஏகேன ஸமுட்டா²னேன ஸமுட்டா²தி, காயதோ ச சித்ததோ சா’’திஆதி³ம்ஹி தாவ புரிமனயே ஸமுட்டா²னநியமோ ச ஸம்பே⁴தோ³ ச தி³ஸ்ஸந்தி. இதரங் பன நிதா³னங் நாம –
Sambhedaṃ nidānañcaññanti aññampi sambhedañca nidānañca. Tattha sambhedavacanena samuṭṭhānasambhedassa gahaṇaṃ paccetabbaṃ, tāni hi tīṇi sikkhāpadāni ṭhapetvā sesāni sambhinnasamuṭṭhānāni. Nidānavacanena sikkhāpadānaṃ paññattidesasaṅkhātaṃ nidānaṃ paccetabbaṃ. Sutte dissanti uparīti sikkhāpadānaṃ samuṭṭhānaniyamo sambhedo nidānanti imāni tīṇi suttamhi eva dissanti; paññāyantīti attho. Tattha ‘‘ekena samuṭṭhānena samuṭṭhāti, kāyato ca cittato cā’’tiādimhi tāva purimanaye samuṭṭhānaniyamo ca sambhedo ca dissanti. Itaraṃ pana nidānaṃ nāma –
‘‘வேஸாலியா ராஜக³ஹே, ஸாவத்தி²யா ச ஆளவீ;
‘‘Vesāliyā rājagahe, sāvatthiyā ca āḷavī;
கோஸம்பி³யா ச ஸக்கேஸு, ப⁴க்³கே³ஸு சேவ பஞ்ஞத்தா’’தி.
Kosambiyā ca sakkesu, bhaggesu ceva paññattā’’ti.
ஏவங் உபரி தி³ஸ்ஸதி, பரதோ ஆக³தே ஸுத்தே தி³ஸ்ஸதீதி வேதி³தப்³ப³ங்.
Evaṃ upari dissati, parato āgate sutte dissatīti veditabbaṃ.
‘‘விப⁴ங்கே³ த்³வீஸூ’’தி கா³தா²ய அயமத்தோ² – யங் ஸிக்கா²பத³ங் த்³வீஸு விப⁴ங்கே³ஸு பஞ்ஞத்தங் உபோஸத²தி³வஸே பி⁴க்கூ² ச பி⁴க்கு²னியோ ச உத்³தி³ஸந்தி, தஸ்ஸ யதா²ஞாயங் ஸமுட்டா²னங் பவக்கா²மி, தங் மே ஸுணாதா²தி.
‘‘Vibhaṅgedvīsū’’ti gāthāya ayamattho – yaṃ sikkhāpadaṃ dvīsu vibhaṅgesu paññattaṃ uposathadivase bhikkhū ca bhikkhuniyo ca uddisanti, tassa yathāñāyaṃ samuṭṭhānaṃ pavakkhāmi, taṃ me suṇāthāti.
ஸஞ்சரித்தானுபா⁴ஸனஞ்சாதி ஸஞ்சரித்தஞ்ச ஸமனுபா⁴ஸனஞ்ச. அதிரேகஞ்ச சீவரந்தி அதிரேகசீவரங் ; கதி²னந்தி அத்தோ². லோமானி பத³ஸோத⁴ம்மோதி ஏளகலோமானி ச பத³ஸோத⁴ம்மோ ச. பூ⁴தங் ஸங்விதா⁴னேன சாதி பூ⁴தாரோசனஞ்ச ஸங்வித³ஹித்வா அத்³தா⁴னப்படிபஜ்ஜனஞ்ச. தெ²ய்யதே³ஸனா சோரிங் சாதி தெ²ய்யஸத்தோ² ச ச²த்தபாணிஸ்ஸ அகி³லானஸ்ஸ த⁴ம்மதே³ஸனா ச சோரிவுட்டா²பனஞ்ச. அனநுஞ்ஞாதாய தேரஸாதி மாதாபிதுஸாமிகேஹி அனநுஞ்ஞாதாய ஸத்³தி⁴ங் இமானி தேரஸ ஸமுட்டா²னானி ஹொந்தி. ஸதி³ஸா இத⁴ தி³ஸ்ஸரேதி இத⁴ உப⁴தோவிப⁴ங்கே³ ஏதேஸு தேரஸஸு ஸமுட்டா²னஸீஸேஸு ஏகேகஸ்மிங் அஞ்ஞானிபி ஸதி³ஸானி ஸமுட்டா²னானி தி³ஸ்ஸந்தி.
Sañcarittānubhāsanañcāti sañcarittañca samanubhāsanañca. Atirekañca cīvaranti atirekacīvaraṃ ; kathinanti attho. Lomāni padasodhammoti eḷakalomāni ca padasodhammo ca. Bhūtaṃ saṃvidhānena cāti bhūtārocanañca saṃvidahitvā addhānappaṭipajjanañca. Theyyadesanā coriṃ cāti theyyasattho ca chattapāṇissa agilānassa dhammadesanā ca corivuṭṭhāpanañca. Ananuññātāya terasāti mātāpitusāmikehi ananuññātāya saddhiṃ imāni terasa samuṭṭhānāni honti. Sadisā idha dissareti idha ubhatovibhaṅge etesu terasasu samuṭṭhānasīsesu ekekasmiṃ aññānipi sadisāni samuṭṭhānāni dissanti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / ஸமுட்டா²னஸ்ஸுத்³தா³னங் • Samuṭṭhānassuddānaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸமுட்டா²னஸீஸவண்ணனா • Samuṭṭhānasīsavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸமுட்டா²னஸீஸவண்ணனா • Samuṭṭhānasīsavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸமுட்டா²னஸீஸவண்ணனா • Samuṭṭhānasīsavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஸமுட்டா²னஸீஸவண்ணனா • Samuṭṭhānasīsavaṇṇanā
