| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
ஸமுட்டா²னஸீஸவண்ணனா
Samuṭṭhānasīsavaṇṇanā
257. தத³னந்தராயாதி தேஸங் த்³வத்திங்ஸவாரானங் அனந்தரங் வுத்தாய ஸமுட்டா²னகதா²ய ஏவமத்தோ² வேதி³தப்³போ³தி யோஜனா. அனத்தா இதி நிச்சி²தாதி அனத்தாத்வேவ வினிச்சி²தா. இமினா அனத்தா இதி நிச்ச²யாதி எத்த² சிதா⁴துயா வினிச்ச²யத்த²ங் த³ஸ்ஸேதி. ‘‘அனிச்சாகாராதீ³ஹீ’’தி இமினா ஸபா⁴க³த⁴ம்மானந்தி எத்த² அனிச்சாகாராதீ³ஹி ஸமானோ பா⁴கோ³ ஏதேஸந்தி ஸபா⁴கா³, தேயேவ த⁴ம்மா ஸபா⁴க³த⁴ம்மாதி வசனத்த²ங் த³ஸ்ஸேதி. நாமமத்தம்பீதி அனிச்சாதி³னாமமத்தம்பி. பிஸத்³தே³ன பகே³வ நாமிகோ அனிச்சாதி³ஸபா⁴வோதி த³ஸ்ஸேதி. ந பஞ்ஞாயதீதி ந கா²யதி. இமினா ந நாயதீதி எத்த² ஞாதா⁴துயா கா²யனத்த²ங் த³ஸ்ஸேதி. து³க்க²ஹானிந்தி எத்த² து³க்க²ங் ஜஹாதீதி து³க்க²ஹானீதி த³ஸ்ஸெந்தோ ஆஹ ‘‘து³க்க²கா⁴தன’’ந்தி. து³க்க²ங் ஹனதீதி து³க்க²கா⁴தனோ, ஸத்³த⁴ம்மோ, தங். ‘‘க²ந்த⁴கா யா ச மாதிகா’’தி வத்தப்³பே³ ஸுகு²ச்சாரணத்தா²ய ரஸ்ஸவஸேன பாடோ² அத்தீ²தி ஆஹ ‘‘க²ந்த⁴கா ய ச மாதிகா’’தி. ஸமுட்டா²னங் நியதோகதந்தி (ஸங்॰ நி॰ 1.216) எத்த² ‘‘ஸமுட்டா²னங் நியதகத’’ந்தி வத்தப்³பே³ ‘‘பரோஸஹஸ்ஸ’’ந்திஆதீ³ஸு விய ஓகாராக³மவஸேன ‘‘ஸமுட்டா²னநியதோகத’’ந்தி வுத்தந்தி ஆஹ ‘‘ஸமுட்டா²னங் நியதகத’’ந்தி. ஏதேனாதி ‘‘ஸமுட்டா²னங் நியதோகத’’ந்தி பாடே²ன. பச்சேதப்³போ³தி பதி ஏதப்³போ³, படிமுக²ங் ஞாதப்³போ³தி அத்தோ². அஞ்ஞேஹீதி தீஹி ஸிக்கா²பதே³ஹி அஞ்ஞேஹி ஸிக்கா²பதே³ஹி.
257.Tadanantarāyāti tesaṃ dvattiṃsavārānaṃ anantaraṃ vuttāya samuṭṭhānakathāya evamattho veditabboti yojanā. Anattā iti nicchitāti anattātveva vinicchitā. Iminā anattā iti nicchayāti ettha cidhātuyā vinicchayatthaṃ dasseti. ‘‘Aniccākārādīhī’’ti iminā sabhāgadhammānanti ettha aniccākārādīhi samāno bhāgo etesanti sabhāgā, teyeva dhammā sabhāgadhammāti vacanatthaṃ dasseti. Nāmamattampīti aniccādināmamattampi. Pisaddena pageva nāmiko aniccādisabhāvoti dasseti. Na paññāyatīti na khāyati. Iminā na nāyatīti ettha ñādhātuyā khāyanatthaṃ dasseti. Dukkhahāninti ettha dukkhaṃ jahātīti dukkhahānīti dassento āha ‘‘dukkhaghātana’’nti. Dukkhaṃ hanatīti dukkhaghātano, saddhammo, taṃ. ‘‘Khandhakā yā ca mātikā’’ti vattabbe sukhuccāraṇatthāya rassavasena pāṭho atthīti āha ‘‘khandhakā ya ca mātikā’’ti. Samuṭṭhānaṃ niyatokatanti (saṃ. ni. 1.216) ettha ‘‘samuṭṭhānaṃ niyatakata’’nti vattabbe ‘‘parosahassa’’ntiādīsu viya okārāgamavasena ‘‘samuṭṭhānaniyatokata’’nti vuttanti āha ‘‘samuṭṭhānaṃ niyatakata’’nti. Etenāti ‘‘samuṭṭhānaṃ niyatokata’’nti pāṭhena. Paccetabboti pati etabbo, paṭimukhaṃ ñātabboti attho. Aññehīti tīhi sikkhāpadehi aññehi sikkhāpadehi.
தத்தா²தி ஸம்பே⁴த³னிதா³னவசனேஸு. ஸம்பே⁴த³வசனேன பச்சேதப்³ப³ந்தி ஸம்ப³ந்தோ⁴. ஹீதி ஸச்சங். தானி தீணி ஸிக்கா²பதா³னி ட²பெத்வாதி ஸம்ப³ந்தோ⁴. பஞ்ஞத்திதே³ஸஸங்கா²தந்தி பஞ்ஞத்திட்டா²னபூ⁴ததே³ஸஸங்கா²தங். ‘‘இமானி தீணீ’’தி இமினா ‘‘தி³ஸ்ஸந்தீ’’தி கிரியாய கத்தாரங் த³ஸ்ஸேதி. ‘‘பஞ்ஞாயந்தீ’’தி இமினா தி³ஸதா⁴துயா கா²யனத்த²ங் த³ஸ்ஸேதி. தத்தா²தி ஸமுட்டா²னநியமஸம்பே⁴த³னிதா³னஸங்கா²தேஸு தீஸு, நித்³தா⁴ரணே பு⁴ம்மங். இதரங் பனாதி ஸமுட்டா²னநியமஸம்பே⁴தே³ஹி அஞ்ஞங் பன.
Tatthāti sambhedanidānavacanesu. Sambhedavacanena paccetabbanti sambandho. Hīti saccaṃ. Tāni tīṇi sikkhāpadāni ṭhapetvāti sambandho. Paññattidesasaṅkhātanti paññattiṭṭhānabhūtadesasaṅkhātaṃ. ‘‘Imāni tīṇī’’ti iminā ‘‘dissantī’’ti kiriyāya kattāraṃ dasseti. ‘‘Paññāyantī’’ti iminā disadhātuyā khāyanatthaṃ dasseti. Tatthāti samuṭṭhānaniyamasambhedanidānasaṅkhātesu tīsu, niddhāraṇe bhummaṃ. Itaraṃ panāti samuṭṭhānaniyamasambhedehi aññaṃ pana.
ஆளவீதி ஆளவியங். ஸக்கேஸு ப⁴க்³கே³ஸு சாதி எத்த² ஜனபத³னாமத்தா ப³ஹுவசனவஸேன வுத்தங்.
Āḷavīti āḷaviyaṃ. Sakkesu bhaggesu cāti ettha janapadanāmattā bahuvacanavasena vuttaṃ.
த்³வீஸு விப⁴ங்கே³ஸு பஞ்ஞத்தங் யங் ஸிக்கா²பத³ங் உத்³தி³ஸந்தீதி யோஜனா. ‘‘விப⁴ங்கே³ஸூ’’தி இமினா விப⁴ங்கே³தி எத்த² ஸுகாரலோபோதி த³ஸ்ஸேதி. தஸ்ஸாதி ஸிக்கா²பத³ஸ்ஸ. யதா²ஞாயந்தி யுத்தியா அனுரூபங். தந்தி ஸமுட்டா²னங். மே ஸுணாதா²தி மம ஸந்திகா ஸுணாத². இதீதி அயமத்தோ².
Dvīsu vibhaṅgesu paññattaṃ yaṃ sikkhāpadaṃ uddisantīti yojanā. ‘‘Vibhaṅgesū’’ti iminā vibhaṅgeti ettha sukāralopoti dasseti. Tassāti sikkhāpadassa. Yathāñāyanti yuttiyā anurūpaṃ. Tanti samuṭṭhānaṃ. Me suṇāthāti mama santikā suṇātha. Itīti ayamattho.
கதி²னந்தி பட²மகதி²னஸமுட்டா²னங். அனநுஞ்ஞாதாய ஸத்³தி⁴ந்தி அனநுஞ்ஞாதஸமுட்டா²னேன ஸத்³தி⁴ங். ஸதி³ஸா இத⁴ தி³ஸ்ஸரேதி எத்த² இத⁴ஸத்³தோ³ அத்த²பகரணவஸேன உப⁴தோவிப⁴ங்க³விஸயோதி ஆஹ ‘‘இத⁴ உப⁴தோவிப⁴ங்கே³’’தி. ‘‘ஸதி³ஸானீ’’தி இமினா ஸதி³ஸாதி எத்த² நிகாரஸ்ஸாகாராதே³ஸோ த³ஸ்ஸிதோ. ‘‘தி³ஸ்ஸந்தீ’’தி இமினா தி³ஸ்ஸரேதி எத்த² அந்திஸத்³த³ஸ்ஸ ரேகாரோ (நிருத்திதீ³பனியங் 570 ஸுதே) த³ஸ்ஸிதோ.
Kathinanti paṭhamakathinasamuṭṭhānaṃ. Ananuññātāya saddhinti ananuññātasamuṭṭhānena saddhiṃ. Sadisā idha dissareti ettha idhasaddo atthapakaraṇavasena ubhatovibhaṅgavisayoti āha ‘‘idha ubhatovibhaṅge’’ti. ‘‘Sadisānī’’ti iminā sadisāti ettha nikārassākārādeso dassito. ‘‘Dissantī’’ti iminā dissareti ettha antisaddassa rekāro (niruttidīpaniyaṃ 570 sute) dassito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / ஸமுட்டா²னஸ்ஸுத்³தா³னங் • Samuṭṭhānassuddānaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / ஸமுட்டா²னஸீஸவண்ணனா • Samuṭṭhānasīsavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸமுட்டா²னஸீஸவண்ணனா • Samuṭṭhānasīsavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸமுட்டா²னஸீஸவண்ணனா • Samuṭṭhānasīsavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸமுட்டா²னஸீஸவண்ணனா • Samuṭṭhānasīsavaṇṇanā
