| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
সমুট্ঠানসীসৰণ্ণনা
Samuṭṭhānasīsavaṇṇanā
২৫৭. তদনন্তরায পন সমুট্ঠানকথায অনত্তা ইতি নিচ্ছযাতি অনত্তা ইতি নিচ্ছিতা। সভাগধম্মানন্তি অনিচ্চাকারাদীহি সভাগানং সঙ্খতধম্মানং। নামমত্তং ন নাযতীতি নামমত্তম্পি ন পঞ্ঞাযতি। দুক্খহানিন্তি দুক্খঘাতনং। খন্ধকা যা চ মাতিকাতি খন্ধকা যা চ মাতিকাতি অত্থো। অযমেৰ ৰা পাঠো। সমুট্ঠানং নিযতো কতন্তি সমুট্ঠানং নিযতোকতং নিযতকতং; নিযতসমুট্ঠানন্তি অত্থো। এতেন ভূতারোচনচোরিৰুট্ঠাপনঅননুঞ্ঞাতসিক্খাপদত্তযস্স সঙ্গহো পচ্চেতব্বো। এতানেৰ হি তীণি সিক্খাপদানি নিযতসমুট্ঠানানি, অঞ্ঞেহি সদ্ধিং অসম্ভিন্নসমুট্ঠানানি।
257. Tadanantarāya pana samuṭṭhānakathāya anattā iti nicchayāti anattā iti nicchitā. Sabhāgadhammānanti aniccākārādīhi sabhāgānaṃ saṅkhatadhammānaṃ. Nāmamattaṃ na nāyatīti nāmamattampi na paññāyati. Dukkhahāninti dukkhaghātanaṃ. Khandhakā yā ca mātikāti khandhakā yā ca mātikāti attho. Ayameva vā pāṭho. Samuṭṭhānaṃ niyato katanti samuṭṭhānaṃ niyatokataṃ niyatakataṃ; niyatasamuṭṭhānanti attho. Etena bhūtārocanacorivuṭṭhāpanaananuññātasikkhāpadattayassa saṅgaho paccetabbo. Etāneva hi tīṇi sikkhāpadāni niyatasamuṭṭhānāni, aññehi saddhiṃ asambhinnasamuṭṭhānāni.
সম্ভেদং নিদানঞ্চঞ্ঞন্তি অঞ্ঞম্পি সম্ভেদঞ্চ নিদানঞ্চ। তত্থ সম্ভেদৰচনেন সমুট্ঠানসম্ভেদস্স গহণং পচ্চেতব্বং, তানি হি তীণি সিক্খাপদানি ঠপেত্ৰা সেসানি সম্ভিন্নসমুট্ঠানানি। নিদানৰচনেন সিক্খাপদানং পঞ্ঞত্তিদেসসঙ্খাতং নিদানং পচ্চেতব্বং। সুত্তে দিস্সন্তি উপরীতি সিক্খাপদানং সমুট্ঠাননিযমো সম্ভেদো নিদানন্তি ইমানি তীণি সুত্তম্হি এৰ দিস্সন্তি; পঞ্ঞাযন্তীতি অত্থো। তত্থ ‘‘একেন সমুট্ঠানেন সমুট্ঠাতি, কাযতো চ চিত্ততো চা’’তিআদিম্হি তাৰ পুরিমনযে সমুট্ঠাননিযমো চ সম্ভেদো চ দিস্সন্তি। ইতরং পন নিদানং নাম –
Sambhedaṃ nidānañcaññanti aññampi sambhedañca nidānañca. Tattha sambhedavacanena samuṭṭhānasambhedassa gahaṇaṃ paccetabbaṃ, tāni hi tīṇi sikkhāpadāni ṭhapetvā sesāni sambhinnasamuṭṭhānāni. Nidānavacanena sikkhāpadānaṃ paññattidesasaṅkhātaṃ nidānaṃ paccetabbaṃ. Sutte dissanti uparīti sikkhāpadānaṃ samuṭṭhānaniyamo sambhedo nidānanti imāni tīṇi suttamhi eva dissanti; paññāyantīti attho. Tattha ‘‘ekena samuṭṭhānena samuṭṭhāti, kāyato ca cittato cā’’tiādimhi tāva purimanaye samuṭṭhānaniyamo ca sambhedo ca dissanti. Itaraṃ pana nidānaṃ nāma –
‘‘ৰেসালিযা রাজগহে, সাৰত্থিযা চ আল়ৰী।
‘‘Vesāliyā rājagahe, sāvatthiyā ca āḷavī;
কোসম্বিযা চ সক্কেসু, ভগ্গেসু চেৰ পঞ্ঞত্তা’’তি॥
Kosambiyā ca sakkesu, bhaggesu ceva paññattā’’ti.
এৰং উপরি দিস্সতি, পরতো আগতে সুত্তে দিস্সতীতি ৰেদিতব্বং।
Evaṃ upari dissati, parato āgate sutte dissatīti veditabbaṃ.
‘‘ৰিভঙ্গে দ্ৰীসূ’’তি গাথায অযমত্থো – যং সিক্খাপদং দ্ৰীসু ৰিভঙ্গেসু পঞ্ঞত্তং উপোসথদিৰসে ভিক্খূ চ ভিক্খুনিযো চ উদ্দিসন্তি, তস্স যথাঞাযং সমুট্ঠানং পৰক্খামি, তং মে সুণাথাতি।
‘‘Vibhaṅgedvīsū’’ti gāthāya ayamattho – yaṃ sikkhāpadaṃ dvīsu vibhaṅgesu paññattaṃ uposathadivase bhikkhū ca bhikkhuniyo ca uddisanti, tassa yathāñāyaṃ samuṭṭhānaṃ pavakkhāmi, taṃ me suṇāthāti.
সঞ্চরিত্তানুভাসনঞ্চাতি সঞ্চরিত্তঞ্চ সমনুভাসনঞ্চ। অতিরেকঞ্চ চীৰরন্তি অতিরেকচীৰরং ; কথিনন্তি অত্থো। লোমানি পদসোধম্মোতি এল়কলোমানি চ পদসোধম্মো চ। ভূতং সংৰিধানেন চাতি ভূতারোচনঞ্চ সংৰিদহিত্ৰা অদ্ধানপ্পটিপজ্জনঞ্চ। থেয্যদেসনা চোরিং চাতি থেয্যসত্থো চ ছত্তপাণিস্স অগিলানস্স ধম্মদেসনা চ চোরিৰুট্ঠাপনঞ্চ। অননুঞ্ঞাতায তেরসাতি মাতাপিতুসামিকেহি অননুঞ্ঞাতায সদ্ধিং ইমানি তেরস সমুট্ঠানানি হোন্তি। সদিসা ইধ দিস্সরেতি ইধ উভতোৰিভঙ্গে এতেসু তেরসসু সমুট্ঠানসীসেসু একেকস্মিং অঞ্ঞানিপি সদিসানি সমুট্ঠানানি দিস্সন্তি।
Sañcarittānubhāsanañcāti sañcarittañca samanubhāsanañca. Atirekañca cīvaranti atirekacīvaraṃ ; kathinanti attho. Lomāni padasodhammoti eḷakalomāni ca padasodhammo ca. Bhūtaṃ saṃvidhānena cāti bhūtārocanañca saṃvidahitvā addhānappaṭipajjanañca. Theyyadesanā coriṃ cāti theyyasattho ca chattapāṇissa agilānassa dhammadesanā ca corivuṭṭhāpanañca. Ananuññātāya terasāti mātāpitusāmikehi ananuññātāya saddhiṃ imāni terasa samuṭṭhānāni honti. Sadisā idha dissareti idha ubhatovibhaṅge etesu terasasu samuṭṭhānasīsesu ekekasmiṃ aññānipi sadisāni samuṭṭhānāni dissanti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / সমুট্ঠানস্সুদ্দানং • Samuṭṭhānassuddānaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সমুট্ঠানসীসৰণ্ণনা • Samuṭṭhānasīsavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সমুট্ঠানসীসৰণ্ণনা • Samuṭṭhānasīsavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সমুট্ঠানসীসৰণ্ণনা • Samuṭṭhānasīsavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / সমুট্ঠানসীসৰণ্ণনা • Samuṭṭhānasīsavaṇṇanā
