| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
সমুট্ঠানসীসৰণ্ণনা
Samuṭṭhānasīsavaṇṇanā
২৫৭. পাল়িযং নিব্বানঞ্চেৰ পঞ্ঞত্তীতি এত্থ যস্মা সঙ্খতধম্মে উপাদায পঞ্ঞত্তা সম্মুতিসচ্চভূতা পুগ্গলাদিপঞ্ঞত্তি পরমত্থতো অৰিজ্জমানত্তা উপ্পত্তিৰিনাসযুত্তৰত্থুধম্মনিযতেন অনিচ্চদুক্খলক্খণদ্ৰযেন যুত্তাতি ৰত্তুং অযুত্তা, কারকৰেদকাদিরূপেন পন পরিকপ্পিতেন অত্তসভাৰেন ৰিরহিতত্তা ‘‘অনত্তা’’তি ৰত্তুং যুত্তা। তস্মা অযং পঞ্ঞত্তিপি অসঙ্খতত্তসামঞ্ঞতো ৰত্থুভূতেন নিব্বানেন সহ ‘‘অনত্তা ইতি নিচ্ছযা’’তি ৰুত্তা। অৰিজ্জমানাপি হি সম্মুতি কেনচি পচ্চযেন অকতত্তা অসঙ্খতা এৰাতি।
257. Pāḷiyaṃ nibbānañceva paññattīti ettha yasmā saṅkhatadhamme upādāya paññattā sammutisaccabhūtā puggalādipaññatti paramatthato avijjamānattā uppattivināsayuttavatthudhammaniyatena aniccadukkhalakkhaṇadvayena yuttāti vattuṃ ayuttā, kārakavedakādirūpena pana parikappitena attasabhāvena virahitattā ‘‘anattā’’ti vattuṃ yuttā. Tasmā ayaṃ paññattipi asaṅkhatattasāmaññato vatthubhūtena nibbānena saha ‘‘anattā iti nicchayā’’ti vuttā. Avijjamānāpi hi sammuti kenaci paccayena akatattā asaṅkhatā evāti.
করুণাসীতলত্তং, পঞ্ঞাপভাসিতত্তঞ্চ ভগৰতো দস্সেতুং ‘‘বুদ্ধচন্দে, বুদ্ধাদিচ্চে’’তি এতং উভযং ৰুত্তং। হাযতি এতেনাতি হানি, দুক্খস্স হানি দুক্খহানি, সব্বদুক্খাপনূদনকারণন্তি অত্থো। পিটকে তীণি দেসযীতি যস্মা অঞ্ঞেপি মহাৰীরা সম্মাসম্বুদ্ধা সদ্ধম্মং দেসযন্তি, তস্মা অঙ্গীরসো পিটকানি তীণি দেসযীতি যোজনা। মহাগুণন্তি মহানিসংসং। এৰং নীযতি সদ্ধম্মোতি যদি ৰিনযপরিযত্তি অপরিহীনা তিট্ঠতি, এৰং সতি পটিপত্তিপটিৰেধসদ্ধম্মোপি নীযতি পৰত্তীযতি, ন পরিহাযতীতি অত্থো।
Karuṇāsītalattaṃ, paññāpabhāsitattañca bhagavato dassetuṃ ‘‘buddhacande, buddhādicce’’ti etaṃ ubhayaṃ vuttaṃ. Hāyati etenāti hāni, dukkhassa hāni dukkhahāni, sabbadukkhāpanūdanakāraṇanti attho. Piṭake tīṇi desayīti yasmā aññepi mahāvīrā sammāsambuddhā saddhammaṃ desayanti, tasmā aṅgīraso piṭakāni tīṇi desayīti yojanā. Mahāguṇanti mahānisaṃsaṃ. Evaṃ nīyati saddhammoti yadi vinayapariyatti aparihīnā tiṭṭhati, evaṃ sati paṭipattipaṭivedhasaddhammopi nīyati pavattīyati, na parihāyatīti attho.
ৰিনযপরিযত্তি পন কথং তিট্ঠতীতি আহ ‘‘উভতো চা’’তিআদি। পরিৰারেন গন্থিতা তিট্ঠতীতি যোজেতব্বং। তস্সেৰ পরিৰারস্সাতি তস্মিং এৰ পরিৰারে। সমুট্ঠানং নিযতো কতন্তি একচ্চং সমুট্ঠানেন নিযতং কতং। তস্মিং পরিৰারে কিঞ্চি সিক্খাপদং নিযতসমুট্ঠানং অঞ্ঞেহি অসাধারণং, তং পকাসিতন্তি অত্থো।
Vinayapariyatti pana kathaṃ tiṭṭhatīti āha ‘‘ubhato cā’’tiādi. Parivārena ganthitā tiṭṭhatīti yojetabbaṃ. Tasseva parivārassāti tasmiṃ eva parivāre. Samuṭṭhānaṃ niyato katanti ekaccaṃ samuṭṭhānena niyataṃ kataṃ. Tasmiṃ parivāre kiñci sikkhāpadaṃ niyatasamuṭṭhānaṃ aññehi asādhāraṇaṃ, taṃ pakāsitanti attho.
সম্ভেদং নিদানঞ্চঞ্ঞন্তি সম্ভেদো সিক্খাপদানং অঞ্ঞমঞ্ঞসমুট্ঠানেন সংকিণ্ণতা, নিদানঞ্চ পঞ্ঞত্তিট্ঠানং, অঞ্ঞং পুগ্গলাদিৰত্থাদি চ। সুত্তে দিস্সন্তি উপরীতি হেট্ঠা ৰুত্তে, উপরি ৰক্খমানে চ পরিৰারসুত্তে এৰ দিস্সন্তি। যস্মা চ এৰং, তস্মা সকলসাসনাধারস্স ৰিনযস্স ঠিতিহেতুভূতং পরিৰারং সিক্খেতি, এৰমেত্থ যোজনা দট্ঠব্বা।
Sambhedaṃ nidānañcaññanti sambhedo sikkhāpadānaṃ aññamaññasamuṭṭhānena saṃkiṇṇatā, nidānañca paññattiṭṭhānaṃ, aññaṃ puggalādivatthādi ca. Sutte dissanti uparīti heṭṭhā vutte, upari vakkhamāne ca parivārasutte eva dissanti. Yasmā ca evaṃ, tasmā sakalasāsanādhārassa vinayassa ṭhitihetubhūtaṃ parivāraṃ sikkheti, evamettha yojanā daṭṭhabbā.
সম্ভিন্নসমুট্ঠানানীতি অঞ্ঞেহি সাধারণসমুট্ঠানানি। আদিম্হি তাৰ পুরিমনযেতি সব্বপঠমে পঞ্ঞত্তিৰারে আগতনযং সন্ধায ৰদতি, তত্থ পন পঞ্ঞত্তিৰারে ‘‘পঠমং পারাজিকং কত্থ পঞ্ঞত্তন্তি, ৰেসালিযং পঞ্ঞত্ত’’ন্তিআদিনা (পরি॰ ১) নিদানম্পি দিস্সতি এৰ। পরতোতি আগতভাৰং পন সন্ধায পরতো আগতে সুত্তে দিস্সতীতি ৰেদিতব্বন্তি ৰুত্তং। তস্সাতি উভতোৰিভঙ্গপরিযাপন্নস্স সিক্খাপদস্স।
Sambhinnasamuṭṭhānānīti aññehi sādhāraṇasamuṭṭhānāni. Ādimhi tāva purimanayeti sabbapaṭhame paññattivāre āgatanayaṃ sandhāya vadati, tattha pana paññattivāre ‘‘paṭhamaṃ pārājikaṃ kattha paññattanti, vesāliyaṃ paññatta’’ntiādinā (pari. 1) nidānampi dissati eva. Paratoti āgatabhāvaṃ pana sandhāya parato āgate sutte dissatīti veditabbanti vuttaṃ. Tassāti ubhatovibhaṅgapariyāpannassa sikkhāpadassa.
২৫৮. অনিযতা পঠমিকাতি আপত্তিং অপেক্খিত্ৰাৰ ইত্থিলিঙ্গং কতং, পঠমানিযতং সিক্খাপদন্তি অত্থো। পাল়িযং নানুবন্ধে পৰত্তিনিন্তি ৰুট্ঠাপিতং পৰত্তিনিং অননুবন্ধনসিক্খাপদং।
258.Aniyatā paṭhamikāti āpattiṃ apekkhitvāva itthiliṅgaṃ kataṃ, paṭhamāniyataṃ sikkhāpadanti attho. Pāḷiyaṃ nānubandhe pavattininti vuṭṭhāpitaṃ pavattiniṃ ananubandhanasikkhāpadaṃ.
২৬০. এল়কলোমসিক্খাপদৰত্থুস্মিং ‘‘ভিক্খুনিযো এল়কলোমানি ধোৰন্তিযো রজন্তিযো ৰিজটেন্তিযো রিঞ্চন্তি উদ্দেসং পরিপুচ্ছ’’ন্তি (পারা॰ ৫৭৬) আগতত্তা ইমং রিঞ্চন্তি-পদং গহেত্ৰা সিক্খাপদং উপলক্খিতন্তি দস্সেন্তো ‘‘ৰিভঙ্গে ‘রিঞ্চন্তি উদ্দেস’ন্তি আগতং এল়কলোমধোৰাপনসিক্খাপদ’’ন্তি আহ।
260.Eḷakalomasikkhāpadavatthusmiṃ ‘‘bhikkhuniyo eḷakalomāni dhovantiyo rajantiyo vijaṭentiyo riñcanti uddesaṃ paripuccha’’nti (pārā. 576) āgatattā imaṃ riñcanti-padaṃ gahetvā sikkhāpadaṃ upalakkhitanti dassento ‘‘vibhaṅge ‘riñcanti uddesa’nti āgataṃ eḷakalomadhovāpanasikkhāpada’’nti āha.
ৰস্সিকসাটিকসিক্খাপদন্তি অসমযে ৰস্সিকসাটিকপরিযেসনসিক্খাপদং (পারা॰ ৬২৬ আদযো)। রতনসিক্খাপদন্তি রতনং ৰা রতনসম্মতং ৰা পটিসামনসিক্খাপদং (পাচি॰ ৫০২ আদযো)।
Vassikasāṭikasikkhāpadanti asamaye vassikasāṭikapariyesanasikkhāpadaṃ (pārā. 626 ādayo). Ratanasikkhāpadanti ratanaṃ vā ratanasammataṃ vā paṭisāmanasikkhāpadaṃ (pāci. 502 ādayo).
২৬৫. পাল়িযং বুদ্ধঞাণেনাতি পটিৰিদ্ধসব্বঞ্ঞুতঞ্ঞাণেন।
265. Pāḷiyaṃ buddhañāṇenāti paṭividdhasabbaññutaññāṇena.
২৬৭. ‘‘ন দেসেন্তি তথাগতা’’তি এতেন ছত্তপাণিস্স ধম্মদেসনাপটিক্খেপং দস্সেতি।
267.‘‘Na desenti tathāgatā’’ti etena chattapāṇissa dhammadesanāpaṭikkhepaṃ dasseti.
২৬৯. অকতন্তি অঞ্ঞেহি অমিস্সীকতং, নিযতসমুট্ঠানন্তি অত্থো। অকতন্তি ৰা পুব্বে অনাগতং, অভিনৰন্তি অত্থো।
269.Akatanti aññehi amissīkataṃ, niyatasamuṭṭhānanti attho. Akatanti vā pubbe anāgataṃ, abhinavanti attho.
২৭০. সমুট্ঠানঞ্হি সঙ্খেপন্তি এত্থ সঙ্খিপন্তি সঙ্গয্হন্তি সদিসসমুট্ঠানানি এত্থাতি সঙ্খেপো, সমুট্ঠানসীসং। নেতি ৰিনেতি কাযৰচীদুচ্চরিতন্তি নেত্তি, ৰিনযপাল়ি, সা এৰ ধম্মোতি নেত্তিধম্মোতি আহ ‘‘ৰিনযপাল়িধম্মস্সা’’তি।
270.Samuṭṭhānañhi saṅkhepanti ettha saṅkhipanti saṅgayhanti sadisasamuṭṭhānāni etthāti saṅkhepo, samuṭṭhānasīsaṃ. Neti vineti kāyavacīduccaritanti netti, vinayapāḷi, sā eva dhammoti nettidhammoti āha ‘‘vinayapāḷidhammassā’’ti.
সমুট্ঠানসীসৰণ্ণনা নিট্ঠিতা।
Samuṭṭhānasīsavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi
সমুট্ঠানস্সুদ্দানং • Samuṭṭhānassuddānaṃ
১. পঠমপারাজিকসমুট্ঠানং • 1. Paṭhamapārājikasamuṭṭhānaṃ
৩. সঞ্চরিত্তসমুট্ঠানং • 3. Sañcarittasamuṭṭhānaṃ
৮. অদ্ধানসমুট্ঠানং • 8. Addhānasamuṭṭhānaṃ
১০. ধম্মদেসনাসমুট্ঠানং • 10. Dhammadesanāsamuṭṭhānaṃ
১২. চোরিৰুট্ঠাপনসমুট্ঠানং • 12. Corivuṭṭhāpanasamuṭṭhānaṃ
১৩. অননুঞ্ঞাতসমুট্ঠানং • 13. Ananuññātasamuṭṭhānaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā
সমুট্ঠানসীসৰণ্ণনা • Samuṭṭhānasīsavaṇṇanā
পঠমপারাজিকসমুট্ঠানৰণ্ণনা • Paṭhamapārājikasamuṭṭhānavaṇṇanā
সঞ্চরিত্তসমুট্ঠানৰণ্ণনা • Sañcarittasamuṭṭhānavaṇṇanā
অদ্ধানসমুট্ঠানৰণ্ণনা • Addhānasamuṭṭhānavaṇṇanā
ধম্মদেসনাসমুট্ঠানৰণ্ণনা • Dhammadesanāsamuṭṭhānavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সমুট্ঠানসীসৰণ্ণনা • Samuṭṭhānasīsavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
সমুট্ঠানসীসৰণ্ণনা • Samuṭṭhānasīsavaṇṇanā
পঠমপারাজিকসমুট্ঠানৰণ্ণনা • Paṭhamapārājikasamuṭṭhānavaṇṇanā
দুতিযপারাজিকসমুট্ঠানৰণ্ণনা • Dutiyapārājikasamuṭṭhānavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
সমুট্ঠানসীসৰণ্ণনা • Samuṭṭhānasīsavaṇṇanā
পঠমপারাজিকসমুট্ঠানৰণ্ণনা • Paṭhamapārājikasamuṭṭhānavaṇṇanā
সঞ্চরিত্তসমুট্ঠানৰণ্ণনা • Sañcarittasamuṭṭhānavaṇṇanā
অদ্ধানসমুট্ঠানৰণ্ণনা • Addhānasamuṭṭhānavaṇṇanā
ধম্মদেসনাসমুট্ঠানৰণ্ণনা • Dhammadesanāsamuṭṭhānavaṇṇanā
