| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
සමුට්‌ඨානසීසසඞ්‌ඛෙපො
Samuṭṭhānasīsasaṅkhepo
සමුට්‌ඨානස්‌සුද්‌දානං
Samuṭṭhānassuddānaṃ
257.
257.
අනිච්‌චා සබ්‌බෙ සඞ්‌ඛාරා, දුක්‌ඛානත්‌තා ච සඞ්‌ඛතා;
Aniccā sabbe saṅkhārā, dukkhānattā ca saṅkhatā;
නිබ්‌බානඤ්‌චෙව පඤ්‌ඤත්‌ති, අනත්‌තා ඉති නිච්‌ඡයා.
Nibbānañceva paññatti, anattā iti nicchayā.
බුද්‌ධචන්‌දෙ අනුප්‌පන්‌නෙ, බුද්‌ධාදිච්‌චෙ අනුග්‌ගතෙ;
Buddhacande anuppanne, buddhādicce anuggate;
තෙසං සභාගධම්‌මානං, නාමමත්‌තං න නායති.
Tesaṃ sabhāgadhammānaṃ, nāmamattaṃ na nāyati.
දුක්‌කරං විවිධං කත්‌වා, පූරයිත්‌වාන පාරමී;
Dukkaraṃ vividhaṃ katvā, pūrayitvāna pāramī;
උප්‌පජ්‌ජන්‌ති මහාවීරා, චක්‌ඛුභූතා සබ්‍රහ්‌මකෙ.
Uppajjanti mahāvīrā, cakkhubhūtā sabrahmake.
තෙ දෙසයන්‌ති සද්‌ධම්‌මං, දුක්‌ඛහානිං සුඛාවහං;
Te desayanti saddhammaṃ, dukkhahāniṃ sukhāvahaṃ;
අඞ්‌ගීරසො සක්‍යමුනි, සබ්‌බභූතානුකම්‌පකො.
Aṅgīraso sakyamuni, sabbabhūtānukampako.
සබ්‌බසත්‌තුත්‌තමො සීහො, පිටකෙ තීණි දෙසයි;
Sabbasattuttamo sīho, piṭake tīṇi desayi;
සුත්‌තන්‌තමභිධම්‌මඤ්‌ච, විනයඤ්‌ච මහාගුණං.
Suttantamabhidhammañca, vinayañca mahāguṇaṃ.
එවං නීයති සද්‌ධම්‌මො, විනයො යදි තිට්‌ඨති;
Evaṃ nīyati saddhammo, vinayo yadi tiṭṭhati;
උභතො ච විභඞ්‌ගානි, ඛන්‌ධකා යා ච මාතිකා.
Ubhato ca vibhaṅgāni, khandhakā yā ca mātikā.
මාලා සුත්‌තගුණෙනෙව, පරිවාරෙන ගන්‌ථිතා;
Mālā suttaguṇeneva, parivārena ganthitā;
තස්‌සෙව පරිවාරස්‌ස, සමුට්‌ඨානං නියතො කතං.
Tasseva parivārassa, samuṭṭhānaṃ niyato kataṃ.
සම්‌භෙදං නිදානං චඤ්‌ඤං, සුත්‌තෙ දිස්‌සන්‌ති උපරි;
Sambhedaṃ nidānaṃ caññaṃ, sutte dissanti upari;
තස්‌මා සික්‌ඛෙ පරිවාරං, ධම්‌මකාමො සුපෙසලොති.
Tasmā sikkhe parivāraṃ, dhammakāmo supesaloti.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / සමුට්‌ඨානසීසවණ්‌ණනා • Samuṭṭhānasīsavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සමුට්‌ඨානසීසවණ්‌ණනා • Samuṭṭhānasīsavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / සමුට්‌ඨානසීසවණ්‌ණනා • Samuṭṭhānasīsavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / සමුට්‌ඨානසීසවණ්‌ණනා • Samuṭṭhānasīsavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / සමුට්‌ඨානසීසවණ්‌ණනා • Samuṭṭhānasīsavaṇṇanā
