| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
20. ஸமுட்டா²பனவாரோ
20. Samuṭṭhāpanavāro
314. விவாதா³தி⁴கரணங் சதுன்னங் அதி⁴கரணானங் கதமங் அதி⁴கரணங் ஸமுட்டா²பேதி? விவாதா³தி⁴கரணங் சதுன்னங் அதி⁴கரணானங் ந கதமங் அதி⁴கரணங் ஸமுட்டா²பேதி; அபிச, விவாதா³தி⁴கரணபச்சயா சத்தாரோ அதி⁴கரணா ஜாயந்தி. யதா² கத²ங் விய? 1 இத⁴ பி⁴க்கூ² விவத³ந்தி – ‘‘த⁴ம்மோதி வா, அத⁴ம்மோதி வா, வினயோதி வா, அவினயோதி வா, அபா⁴ஸிதங் அலபிதங் ததா²க³தேனாதி வா, பா⁴ஸிதங் லபிதங் ததா²க³தேனாதி வா, அனாசிண்ணங் ததா²க³தேனாதி வா, ஆசிண்ணங் ததா²க³தேனாதி வா, அபஞ்ஞத்தங் ததா²க³தேனாதி வா, பஞ்ஞத்தங் ததா²க³தேனாதி வா, ஆபத்தீதி வா, அனாபத்தீதி வா, லஹுகா ஆபத்தீதி வா, க³ருகா ஆபத்தீதி வா, ஸாவஸேஸா ஆபத்தீதி வா, அனவஸேஸா ஆபத்தீதி வா, து³ட்டு²ல்லா ஆபத்தீதி வா அது³ட்டு²ல்லா ஆபத்தீதி வா’’. யங் தத்த² ப⁴ண்ட³னங் கலஹோ விக்³க³ஹோ விவாதோ³ நானாவாதோ³ அஞ்ஞதா²வாதோ³ விபச்சதாய வோஹாரோ மேத⁴கங் 2, இத³ங் வுச்சதி விவாதா³தி⁴கரணங். விவாதா³தி⁴கரணே ஸங்கோ⁴ விவத³தி. விவாதா³தி⁴கரணங் விவத³மானோ அனுவத³தி. அனுவாதா³தி⁴கரணங் அனுவத³மானோ ஆபத்திங் ஆபஜ்ஜதி ஆபத்தாதி⁴கரணங். தாய ஆபத்தியா ஸங்கோ⁴ கம்மங் கரோதி கிச்சாதி⁴கரணங். ஏவங் விவாதா³தி⁴கரணபச்சயா சத்தாரோ அதி⁴கரணா ஜாயந்தி.
314. Vivādādhikaraṇaṃ catunnaṃ adhikaraṇānaṃ katamaṃ adhikaraṇaṃ samuṭṭhāpeti? Vivādādhikaraṇaṃ catunnaṃ adhikaraṇānaṃ na katamaṃ adhikaraṇaṃ samuṭṭhāpeti; apica, vivādādhikaraṇapaccayā cattāro adhikaraṇā jāyanti. Yathā kathaṃ viya? 3 Idha bhikkhū vivadanti – ‘‘dhammoti vā, adhammoti vā, vinayoti vā, avinayoti vā, abhāsitaṃ alapitaṃ tathāgatenāti vā, bhāsitaṃ lapitaṃ tathāgatenāti vā, anāciṇṇaṃ tathāgatenāti vā, āciṇṇaṃ tathāgatenāti vā, apaññattaṃ tathāgatenāti vā, paññattaṃ tathāgatenāti vā, āpattīti vā, anāpattīti vā, lahukā āpattīti vā, garukā āpattīti vā, sāvasesā āpattīti vā, anavasesā āpattīti vā, duṭṭhullā āpattīti vā aduṭṭhullā āpattīti vā’’. Yaṃ tattha bhaṇḍanaṃ kalaho viggaho vivādo nānāvādo aññathāvādo vipaccatāya vohāro medhakaṃ 4, idaṃ vuccati vivādādhikaraṇaṃ. Vivādādhikaraṇe saṅgho vivadati. Vivādādhikaraṇaṃ vivadamāno anuvadati. Anuvādādhikaraṇaṃ anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ vivādādhikaraṇapaccayā cattāro adhikaraṇā jāyanti.
315. அனுவாதா³தி⁴கரணங் சதுன்னங் அதி⁴கரணானங் கதமங் அதி⁴கரணங் ஸமுட்டா²பேதி? அனுவாதா³தி⁴கரணங் சதுன்னங் அதி⁴கரணானங் ந கதமங் அதி⁴கரணங் ஸமுட்டா²பேதி; அபிச, அனுவாதா³தி⁴கரணபச்சயா சத்தாரோ அதி⁴கரணா ஜாயந்தி. யதா² கத²ங் விய? 5 இத⁴ பி⁴க்கூ² பி⁴க்கு²ங் அனுவத³ந்தி ஸீலவிபத்தியா வா ஆசாரவிபத்தியா வா தி³ட்டி²விபத்தியா வா ஆஜீவவிபத்தியா வா. யோ தத்த² அனுவாதோ³ அனுவத³னா அனுல்லபனா அனுப⁴ணனா அனுஸம்பவங்கதா அப்³பு⁴ஸ்ஸஹனதா அனுப³லப்பதா³னங், இத³ங் வுச்சதி அனுவாதா³தி⁴கரணங். அனுவாதா³தி⁴கரணே ஸங்கோ⁴ விவத³தி. விவாதா³தி⁴கரணங் விவத³மானோ அனுவத³தி. அனுவாதா³தி⁴கரணங் அனுவத³மானோ ஆபத்திங் ஆபஜ்ஜதி ஆபத்தாதி⁴கரணங். தாய ஆபத்தியா ஸங்கோ⁴ கம்மங் கரோதி கிச்சாதி⁴கரணங். ஏவங் அனுவாதா³தி⁴கரணபச்சயா சத்தாரோ அதி⁴கரணா ஜாயந்தி.
315. Anuvādādhikaraṇaṃ catunnaṃ adhikaraṇānaṃ katamaṃ adhikaraṇaṃ samuṭṭhāpeti? Anuvādādhikaraṇaṃ catunnaṃ adhikaraṇānaṃ na katamaṃ adhikaraṇaṃ samuṭṭhāpeti; apica, anuvādādhikaraṇapaccayā cattāro adhikaraṇā jāyanti. Yathā kathaṃ viya? 6 Idha bhikkhū bhikkhuṃ anuvadanti sīlavipattiyā vā ācāravipattiyā vā diṭṭhivipattiyā vā ājīvavipattiyā vā. Yo tattha anuvādo anuvadanā anullapanā anubhaṇanā anusampavaṅkatā abbhussahanatā anubalappadānaṃ, idaṃ vuccati anuvādādhikaraṇaṃ. Anuvādādhikaraṇe saṅgho vivadati. Vivādādhikaraṇaṃ vivadamāno anuvadati. Anuvādādhikaraṇaṃ anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ anuvādādhikaraṇapaccayā cattāro adhikaraṇā jāyanti.
316. ஆபத்தாதி⁴கரணங் சதுன்னங் அதி⁴கரணானங் கதமங் அதி⁴கரணங் ஸமுட்டா²பேதி? ஆபத்தாதி⁴கரணங் சதுன்னங் அதி⁴கரணானங் ந கதமங் அதி⁴கரணங் ஸமுட்டா²பேதி; அபிச, ஆபத்தாதி⁴கரணபச்சயா சத்தாரோ அதி⁴கரணா ஜாயந்தி. யதா² கத²ங் விய? பஞ்சபி ஆபத்திக்க²ந்தா⁴ ஆபத்தாதி⁴கரணங், ஸத்தபி ஆபத்திக்க²ந்தா⁴ ஆபத்தாதி⁴கரணங், இத³ங் வுச்சதி ஆபத்தாதி⁴கரணங். ஆபத்தாதி⁴கரணே ஸங்கோ⁴ விவத³தி. விவாதா³தி⁴கரணங் விவத³மானோ அனுவத³தி. அனுவாதா³தி⁴கரணங் அனுவத³மானோ ஆபத்திங் ஆபஜ்ஜதி ஆபத்தாதி⁴கரணங். தாய ஆபத்தியா ஸங்கோ⁴ கம்மங் கரோதி கிச்சாதி⁴கரணங். ஏவங் ஆபத்தாதி⁴கரணபச்சயா சத்தாரோ அதி⁴கரணா ஜாயந்தி.
316. Āpattādhikaraṇaṃ catunnaṃ adhikaraṇānaṃ katamaṃ adhikaraṇaṃ samuṭṭhāpeti? Āpattādhikaraṇaṃ catunnaṃ adhikaraṇānaṃ na katamaṃ adhikaraṇaṃ samuṭṭhāpeti; apica, āpattādhikaraṇapaccayā cattāro adhikaraṇā jāyanti. Yathā kathaṃ viya? Pañcapi āpattikkhandhā āpattādhikaraṇaṃ, sattapi āpattikkhandhā āpattādhikaraṇaṃ, idaṃ vuccati āpattādhikaraṇaṃ. Āpattādhikaraṇe saṅgho vivadati. Vivādādhikaraṇaṃ vivadamāno anuvadati. Anuvādādhikaraṇaṃ anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ āpattādhikaraṇapaccayā cattāro adhikaraṇā jāyanti.
317. கிச்சாதி⁴கரணங் சதுன்னங் அதி⁴கரணானங் கதமங் அதி⁴கரணங் ஸமுட்டா²பேதி ? கிச்சாதி⁴கரணங் சதுன்னங் அதி⁴கரணானங் ந கதமங் அதி⁴கரணங் ஸமுட்டா²பேதி, அபிச கிச்சாதி⁴கரணபச்சயா சத்தாரோ அதி⁴கரணா ஜாயந்தி. யதா² கத²ங் விய? யா ஸங்க⁴ஸ்ஸ கிச்சயதா கரணீயதா அபலோகனகம்மங் ஞத்திகம்மங் ஞத்திது³தியகம்மங் ஞத்திசதுத்த²கம்மங், இத³ங் வுச்சதி கிச்சாதி⁴கரணங். கிச்சாதி⁴கரணே ஸங்கோ⁴ விவத³தி. விவாதா³தி⁴கரணங் விவத³மானோ அனுவத³தி. அனுவாதா³தி⁴கரணங் அனுவத³மானோ ஆபத்திங் ஆபஜ்ஜதி ஆபத்தாதி⁴கரணங். தாய ஆபத்தியா ஸங்கோ⁴ கம்மங் கரோதி கிச்சாதி⁴கரணங். ஏவங் கிச்சாதி⁴கரணபச்சயா சத்தாரோ அதி⁴கரணா ஜாயந்தி.
317. Kiccādhikaraṇaṃ catunnaṃ adhikaraṇānaṃ katamaṃ adhikaraṇaṃ samuṭṭhāpeti ? Kiccādhikaraṇaṃ catunnaṃ adhikaraṇānaṃ na katamaṃ adhikaraṇaṃ samuṭṭhāpeti, apica kiccādhikaraṇapaccayā cattāro adhikaraṇā jāyanti. Yathā kathaṃ viya? Yā saṅghassa kiccayatā karaṇīyatā apalokanakammaṃ ñattikammaṃ ñattidutiyakammaṃ ñatticatutthakammaṃ, idaṃ vuccati kiccādhikaraṇaṃ. Kiccādhikaraṇe saṅgho vivadati. Vivādādhikaraṇaṃ vivadamāno anuvadati. Anuvādādhikaraṇaṃ anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ kiccādhikaraṇapaccayā cattāro adhikaraṇā jāyanti.
ஸமுட்டா²பனவாரோ நிட்டி²தோ வீஸதிமோ.
Samuṭṭhāpanavāro niṭṭhito vīsatimo.
Footnotes:
Related texts:
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸமுட்டா²பனவாரகதா²வண்ணனா • Samuṭṭhāpanavārakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸங்ஸட்ட²வாராதி³வண்ணனா • Saṃsaṭṭhavārādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸங்ஸட்ட²வாராதி³வண்ணனா • Saṃsaṭṭhavārādivaṇṇanā
