| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
২০. সমুট্ঠাপনৰারো
20. Samuṭṭhāpanavāro
৩১৪. ৰিৰাদাধিকরণং চতুন্নং অধিকরণানং কতমং অধিকরণং সমুট্ঠাপেতি? ৰিৰাদাধিকরণং চতুন্নং অধিকরণানং ন কতমং অধিকরণং সমুট্ঠাপেতি; অপিচ, ৰিৰাদাধিকরণপচ্চযা চত্তারো অধিকরণা জাযন্তি। যথা কথং ৰিয? 1 ইধ ভিক্খূ ৰিৰদন্তি – ‘‘ধম্মোতি ৰা, অধম্মোতি ৰা, ৰিনযোতি ৰা, অৰিনযোতি ৰা, অভাসিতং অলপিতং তথাগতেনাতি ৰা, ভাসিতং লপিতং তথাগতেনাতি ৰা, অনাচিণ্ণং তথাগতেনাতি ৰা, আচিণ্ণং তথাগতেনাতি ৰা, অপঞ্ঞত্তং তথাগতেনাতি ৰা, পঞ্ঞত্তং তথাগতেনাতি ৰা, আপত্তীতি ৰা, অনাপত্তীতি ৰা, লহুকা আপত্তীতি ৰা, গরুকা আপত্তীতি ৰা, সাৰসেসা আপত্তীতি ৰা, অনৰসেসা আপত্তীতি ৰা, দুট্ঠুল্লা আপত্তীতি ৰা অদুট্ঠুল্লা আপত্তীতি ৰা’’। যং তত্থ ভণ্ডনং কলহো ৰিগ্গহো ৰিৰাদো নানাৰাদো অঞ্ঞথাৰাদো ৰিপচ্চতায ৰোহারো মেধকং 2, ইদং ৰুচ্চতি ৰিৰাদাধিকরণং। ৰিৰাদাধিকরণে সঙ্ঘো ৰিৰদতি। ৰিৰাদাধিকরণং ৰিৰদমানো অনুৰদতি। অনুৰাদাধিকরণং অনুৰদমানো আপত্তিং আপজ্জতি আপত্তাধিকরণং। তায আপত্তিযা সঙ্ঘো কম্মং করোতি কিচ্চাধিকরণং। এৰং ৰিৰাদাধিকরণপচ্চযা চত্তারো অধিকরণা জাযন্তি।
314. Vivādādhikaraṇaṃ catunnaṃ adhikaraṇānaṃ katamaṃ adhikaraṇaṃ samuṭṭhāpeti? Vivādādhikaraṇaṃ catunnaṃ adhikaraṇānaṃ na katamaṃ adhikaraṇaṃ samuṭṭhāpeti; apica, vivādādhikaraṇapaccayā cattāro adhikaraṇā jāyanti. Yathā kathaṃ viya? 3 Idha bhikkhū vivadanti – ‘‘dhammoti vā, adhammoti vā, vinayoti vā, avinayoti vā, abhāsitaṃ alapitaṃ tathāgatenāti vā, bhāsitaṃ lapitaṃ tathāgatenāti vā, anāciṇṇaṃ tathāgatenāti vā, āciṇṇaṃ tathāgatenāti vā, apaññattaṃ tathāgatenāti vā, paññattaṃ tathāgatenāti vā, āpattīti vā, anāpattīti vā, lahukā āpattīti vā, garukā āpattīti vā, sāvasesā āpattīti vā, anavasesā āpattīti vā, duṭṭhullā āpattīti vā aduṭṭhullā āpattīti vā’’. Yaṃ tattha bhaṇḍanaṃ kalaho viggaho vivādo nānāvādo aññathāvādo vipaccatāya vohāro medhakaṃ 4, idaṃ vuccati vivādādhikaraṇaṃ. Vivādādhikaraṇe saṅgho vivadati. Vivādādhikaraṇaṃ vivadamāno anuvadati. Anuvādādhikaraṇaṃ anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ vivādādhikaraṇapaccayā cattāro adhikaraṇā jāyanti.
৩১৫. অনুৰাদাধিকরণং চতুন্নং অধিকরণানং কতমং অধিকরণং সমুট্ঠাপেতি? অনুৰাদাধিকরণং চতুন্নং অধিকরণানং ন কতমং অধিকরণং সমুট্ঠাপেতি; অপিচ, অনুৰাদাধিকরণপচ্চযা চত্তারো অধিকরণা জাযন্তি। যথা কথং ৰিয? 5 ইধ ভিক্খূ ভিক্খুং অনুৰদন্তি সীলৰিপত্তিযা ৰা আচারৰিপত্তিযা ৰা দিট্ঠিৰিপত্তিযা ৰা আজীৰৰিপত্তিযা ৰা। যো তত্থ অনুৰাদো অনুৰদনা অনুল্লপনা অনুভণনা অনুসম্পৰঙ্কতা অব্ভুস্সহনতা অনুবলপ্পদানং, ইদং ৰুচ্চতি অনুৰাদাধিকরণং। অনুৰাদাধিকরণে সঙ্ঘো ৰিৰদতি। ৰিৰাদাধিকরণং ৰিৰদমানো অনুৰদতি। অনুৰাদাধিকরণং অনুৰদমানো আপত্তিং আপজ্জতি আপত্তাধিকরণং। তায আপত্তিযা সঙ্ঘো কম্মং করোতি কিচ্চাধিকরণং। এৰং অনুৰাদাধিকরণপচ্চযা চত্তারো অধিকরণা জাযন্তি।
315. Anuvādādhikaraṇaṃ catunnaṃ adhikaraṇānaṃ katamaṃ adhikaraṇaṃ samuṭṭhāpeti? Anuvādādhikaraṇaṃ catunnaṃ adhikaraṇānaṃ na katamaṃ adhikaraṇaṃ samuṭṭhāpeti; apica, anuvādādhikaraṇapaccayā cattāro adhikaraṇā jāyanti. Yathā kathaṃ viya? 6 Idha bhikkhū bhikkhuṃ anuvadanti sīlavipattiyā vā ācāravipattiyā vā diṭṭhivipattiyā vā ājīvavipattiyā vā. Yo tattha anuvādo anuvadanā anullapanā anubhaṇanā anusampavaṅkatā abbhussahanatā anubalappadānaṃ, idaṃ vuccati anuvādādhikaraṇaṃ. Anuvādādhikaraṇe saṅgho vivadati. Vivādādhikaraṇaṃ vivadamāno anuvadati. Anuvādādhikaraṇaṃ anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ anuvādādhikaraṇapaccayā cattāro adhikaraṇā jāyanti.
৩১৬. আপত্তাধিকরণং চতুন্নং অধিকরণানং কতমং অধিকরণং সমুট্ঠাপেতি? আপত্তাধিকরণং চতুন্নং অধিকরণানং ন কতমং অধিকরণং সমুট্ঠাপেতি; অপিচ, আপত্তাধিকরণপচ্চযা চত্তারো অধিকরণা জাযন্তি। যথা কথং ৰিয? পঞ্চপি আপত্তিক্খন্ধা আপত্তাধিকরণং, সত্তপি আপত্তিক্খন্ধা আপত্তাধিকরণং, ইদং ৰুচ্চতি আপত্তাধিকরণং। আপত্তাধিকরণে সঙ্ঘো ৰিৰদতি। ৰিৰাদাধিকরণং ৰিৰদমানো অনুৰদতি। অনুৰাদাধিকরণং অনুৰদমানো আপত্তিং আপজ্জতি আপত্তাধিকরণং। তায আপত্তিযা সঙ্ঘো কম্মং করোতি কিচ্চাধিকরণং। এৰং আপত্তাধিকরণপচ্চযা চত্তারো অধিকরণা জাযন্তি।
316. Āpattādhikaraṇaṃ catunnaṃ adhikaraṇānaṃ katamaṃ adhikaraṇaṃ samuṭṭhāpeti? Āpattādhikaraṇaṃ catunnaṃ adhikaraṇānaṃ na katamaṃ adhikaraṇaṃ samuṭṭhāpeti; apica, āpattādhikaraṇapaccayā cattāro adhikaraṇā jāyanti. Yathā kathaṃ viya? Pañcapi āpattikkhandhā āpattādhikaraṇaṃ, sattapi āpattikkhandhā āpattādhikaraṇaṃ, idaṃ vuccati āpattādhikaraṇaṃ. Āpattādhikaraṇe saṅgho vivadati. Vivādādhikaraṇaṃ vivadamāno anuvadati. Anuvādādhikaraṇaṃ anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ āpattādhikaraṇapaccayā cattāro adhikaraṇā jāyanti.
৩১৭. কিচ্চাধিকরণং চতুন্নং অধিকরণানং কতমং অধিকরণং সমুট্ঠাপেতি ? কিচ্চাধিকরণং চতুন্নং অধিকরণানং ন কতমং অধিকরণং সমুট্ঠাপেতি, অপিচ কিচ্চাধিকরণপচ্চযা চত্তারো অধিকরণা জাযন্তি। যথা কথং ৰিয? যা সঙ্ঘস্স কিচ্চযতা করণীযতা অপলোকনকম্মং ঞত্তিকম্মং ঞত্তিদুতিযকম্মং ঞত্তিচতুত্থকম্মং, ইদং ৰুচ্চতি কিচ্চাধিকরণং। কিচ্চাধিকরণে সঙ্ঘো ৰিৰদতি। ৰিৰাদাধিকরণং ৰিৰদমানো অনুৰদতি। অনুৰাদাধিকরণং অনুৰদমানো আপত্তিং আপজ্জতি আপত্তাধিকরণং। তায আপত্তিযা সঙ্ঘো কম্মং করোতি কিচ্চাধিকরণং। এৰং কিচ্চাধিকরণপচ্চযা চত্তারো অধিকরণা জাযন্তি।
317. Kiccādhikaraṇaṃ catunnaṃ adhikaraṇānaṃ katamaṃ adhikaraṇaṃ samuṭṭhāpeti ? Kiccādhikaraṇaṃ catunnaṃ adhikaraṇānaṃ na katamaṃ adhikaraṇaṃ samuṭṭhāpeti, apica kiccādhikaraṇapaccayā cattāro adhikaraṇā jāyanti. Yathā kathaṃ viya? Yā saṅghassa kiccayatā karaṇīyatā apalokanakammaṃ ñattikammaṃ ñattidutiyakammaṃ ñatticatutthakammaṃ, idaṃ vuccati kiccādhikaraṇaṃ. Kiccādhikaraṇe saṅgho vivadati. Vivādādhikaraṇaṃ vivadamāno anuvadati. Anuvādādhikaraṇaṃ anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ kiccādhikaraṇapaccayā cattāro adhikaraṇā jāyanti.
সমুট্ঠাপনৰারো নিট্ঠিতো ৰীসতিমো।
Samuṭṭhāpanavāro niṭṭhito vīsatimo.
Footnotes:
Related texts:
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সমুট্ঠাপনৰারকথাৰণ্ণনা • Samuṭṭhāpanavārakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সংসট্ঠৰারাদিৰণ্ণনা • Saṃsaṭṭhavārādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সংসট্ঠৰারাদিৰণ্ণনা • Saṃsaṭṭhavārādivaṇṇanā
