| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༢༠. སམུཊྛཱཔནཝཱརོ
20. Samuṭṭhāpanavāro
༣༡༤. ཝིཝཱདཱདྷིཀརཎཾ ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ སམུཊྛཱཔེཏི? ཝིཝཱདཱདྷིཀརཎཾ ཙཏུནྣཾ ཨདྷིཀརཎཱནཾ ན ཀཏམཾ ཨདྷིཀརཎཾ སམུཊྛཱཔེཏི; ཨཔིཙ, ཝིཝཱདཱདྷིཀརཎཔཙྩཡཱ ཙཏྟཱརོ ཨདྷིཀརཎཱ ཛཱཡནྟི། ཡཐཱ ཀཐཾ ཝིཡ? 1 ཨིདྷ བྷིཀྑཱུ ཝིཝདནྟི – ‘‘དྷམྨོཏི ཝཱ, ཨདྷམྨོཏི ཝཱ, ཝིནཡོཏི ཝཱ, ཨཝིནཡོཏི ཝཱ, ཨབྷཱསིཏཾ ཨལཔིཏཾ ཏཐཱགཏེནཱཏི ཝཱ, བྷཱསིཏཾ ལཔིཏཾ ཏཐཱགཏེནཱཏི ཝཱ, ཨནཱཙིཎྞཾ ཏཐཱགཏེནཱཏི ཝཱ, ཨཱཙིཎྞཾ ཏཐཱགཏེནཱཏི ཝཱ, ཨཔཉྙཏྟཾ ཏཐཱགཏེནཱཏི ཝཱ, པཉྙཏྟཾ ཏཐཱགཏེནཱཏི ཝཱ, ཨཱཔཏྟཱིཏི ཝཱ, ཨནཱཔཏྟཱིཏི ཝཱ, ལཧུཀཱ ཨཱཔཏྟཱིཏི ཝཱ, གརུཀཱ ཨཱཔཏྟཱིཏི ཝཱ, སཱཝསེསཱ ཨཱཔཏྟཱིཏི ཝཱ, ཨནཝསེསཱ ཨཱཔཏྟཱིཏི ཝཱ, དུཊྛུལླཱ ཨཱཔཏྟཱིཏི ཝཱ ཨདུཊྛུལླཱ ཨཱཔཏྟཱིཏི ཝཱ’’། ཡཾ ཏཏྠ བྷཎྜནཾ ཀལཧོ ཝིགྒཧོ ཝིཝཱདོ ནཱནཱཝཱདོ ཨཉྙཐཱཝཱདོ ཝིཔཙྩཏཱཡ ཝོཧཱརོ མེདྷཀཾ 2, ཨིདཾ ཝུཙྩཏི ཝིཝཱདཱདྷིཀརཎཾ། ཝིཝཱདཱདྷིཀརཎེ སངྒྷོ ཝིཝདཏི། ཝིཝཱདཱདྷིཀརཎཾ ཝིཝདམཱནོ ཨནུཝདཏི། ཨནུཝཱདཱདྷིཀརཎཾ ཨནུཝདམཱནོ ཨཱཔཏྟིཾ ཨཱཔཛྫཏི ཨཱཔཏྟཱདྷིཀརཎཾ། ཏཱཡ ཨཱཔཏྟིཡཱ སངྒྷོ ཀམྨཾ ཀརོཏི ཀིཙྩཱདྷིཀརཎཾ། ཨེཝཾ ཝིཝཱདཱདྷིཀརཎཔཙྩཡཱ ཙཏྟཱརོ ཨདྷིཀརཎཱ ཛཱཡནྟི།
314. Vivādādhikaraṇaṃ catunnaṃ adhikaraṇānaṃ katamaṃ adhikaraṇaṃ samuṭṭhāpeti? Vivādādhikaraṇaṃ catunnaṃ adhikaraṇānaṃ na katamaṃ adhikaraṇaṃ samuṭṭhāpeti; apica, vivādādhikaraṇapaccayā cattāro adhikaraṇā jāyanti. Yathā kathaṃ viya? 3 Idha bhikkhū vivadanti – ‘‘dhammoti vā, adhammoti vā, vinayoti vā, avinayoti vā, abhāsitaṃ alapitaṃ tathāgatenāti vā, bhāsitaṃ lapitaṃ tathāgatenāti vā, anāciṇṇaṃ tathāgatenāti vā, āciṇṇaṃ tathāgatenāti vā, apaññattaṃ tathāgatenāti vā, paññattaṃ tathāgatenāti vā, āpattīti vā, anāpattīti vā, lahukā āpattīti vā, garukā āpattīti vā, sāvasesā āpattīti vā, anavasesā āpattīti vā, duṭṭhullā āpattīti vā aduṭṭhullā āpattīti vā’’. Yaṃ tattha bhaṇḍanaṃ kalaho viggaho vivādo nānāvādo aññathāvādo vipaccatāya vohāro medhakaṃ 4, idaṃ vuccati vivādādhikaraṇaṃ. Vivādādhikaraṇe saṅgho vivadati. Vivādādhikaraṇaṃ vivadamāno anuvadati. Anuvādādhikaraṇaṃ anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ vivādādhikaraṇapaccayā cattāro adhikaraṇā jāyanti.
༣༡༥. ཨནུཝཱདཱདྷིཀརཎཾ ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ སམུཊྛཱཔེཏི? ཨནུཝཱདཱདྷིཀརཎཾ ཙཏུནྣཾ ཨདྷིཀརཎཱནཾ ན ཀཏམཾ ཨདྷིཀརཎཾ སམུཊྛཱཔེཏི; ཨཔིཙ, ཨནུཝཱདཱདྷིཀརཎཔཙྩཡཱ ཙཏྟཱརོ ཨདྷིཀརཎཱ ཛཱཡནྟི། ཡཐཱ ཀཐཾ ཝིཡ? 5 ཨིདྷ བྷིཀྑཱུ བྷིཀྑུཾ ཨནུཝདནྟི སཱིལཝིཔཏྟིཡཱ ཝཱ ཨཱཙཱརཝིཔཏྟིཡཱ ཝཱ དིཊྛིཝིཔཏྟིཡཱ ཝཱ ཨཱཛཱིཝཝིཔཏྟིཡཱ ཝཱ། ཡོ ཏཏྠ ཨནུཝཱདོ ཨནུཝདནཱ ཨནུལླཔནཱ ཨནུབྷཎནཱ ཨནུསམྤཝངྐཏཱ ཨབྦྷུསྶཧནཏཱ ཨནུབལཔྤདཱནཾ, ཨིདཾ ཝུཙྩཏི ཨནུཝཱདཱདྷིཀརཎཾ། ཨནུཝཱདཱདྷིཀརཎེ སངྒྷོ ཝིཝདཏི། ཝིཝཱདཱདྷིཀརཎཾ ཝིཝདམཱནོ ཨནུཝདཏི། ཨནུཝཱདཱདྷིཀརཎཾ ཨནུཝདམཱནོ ཨཱཔཏྟིཾ ཨཱཔཛྫཏི ཨཱཔཏྟཱདྷིཀརཎཾ། ཏཱཡ ཨཱཔཏྟིཡཱ སངྒྷོ ཀམྨཾ ཀརོཏི ཀིཙྩཱདྷིཀརཎཾ། ཨེཝཾ ཨནུཝཱདཱདྷིཀརཎཔཙྩཡཱ ཙཏྟཱརོ ཨདྷིཀརཎཱ ཛཱཡནྟི།
315. Anuvādādhikaraṇaṃ catunnaṃ adhikaraṇānaṃ katamaṃ adhikaraṇaṃ samuṭṭhāpeti? Anuvādādhikaraṇaṃ catunnaṃ adhikaraṇānaṃ na katamaṃ adhikaraṇaṃ samuṭṭhāpeti; apica, anuvādādhikaraṇapaccayā cattāro adhikaraṇā jāyanti. Yathā kathaṃ viya? 6 Idha bhikkhū bhikkhuṃ anuvadanti sīlavipattiyā vā ācāravipattiyā vā diṭṭhivipattiyā vā ājīvavipattiyā vā. Yo tattha anuvādo anuvadanā anullapanā anubhaṇanā anusampavaṅkatā abbhussahanatā anubalappadānaṃ, idaṃ vuccati anuvādādhikaraṇaṃ. Anuvādādhikaraṇe saṅgho vivadati. Vivādādhikaraṇaṃ vivadamāno anuvadati. Anuvādādhikaraṇaṃ anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ anuvādādhikaraṇapaccayā cattāro adhikaraṇā jāyanti.
༣༡༦. ཨཱཔཏྟཱདྷིཀརཎཾ ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ སམུཊྛཱཔེཏི? ཨཱཔཏྟཱདྷིཀརཎཾ ཙཏུནྣཾ ཨདྷིཀརཎཱནཾ ན ཀཏམཾ ཨདྷིཀརཎཾ སམུཊྛཱཔེཏི; ཨཔིཙ, ཨཱཔཏྟཱདྷིཀརཎཔཙྩཡཱ ཙཏྟཱརོ ཨདྷིཀརཎཱ ཛཱཡནྟི། ཡཐཱ ཀཐཾ ཝིཡ? པཉྩཔི ཨཱཔཏྟིཀྑནྡྷཱ ཨཱཔཏྟཱདྷིཀརཎཾ, སཏྟཔི ཨཱཔཏྟིཀྑནྡྷཱ ཨཱཔཏྟཱདྷིཀརཎཾ, ཨིདཾ ཝུཙྩཏི ཨཱཔཏྟཱདྷིཀརཎཾ། ཨཱཔཏྟཱདྷིཀརཎེ སངྒྷོ ཝིཝདཏི། ཝིཝཱདཱདྷིཀརཎཾ ཝིཝདམཱནོ ཨནུཝདཏི། ཨནུཝཱདཱདྷིཀརཎཾ ཨནུཝདམཱནོ ཨཱཔཏྟིཾ ཨཱཔཛྫཏི ཨཱཔཏྟཱདྷིཀརཎཾ། ཏཱཡ ཨཱཔཏྟིཡཱ སངྒྷོ ཀམྨཾ ཀརོཏི ཀིཙྩཱདྷིཀརཎཾ། ཨེཝཾ ཨཱཔཏྟཱདྷིཀརཎཔཙྩཡཱ ཙཏྟཱརོ ཨདྷིཀརཎཱ ཛཱཡནྟི།
316. Āpattādhikaraṇaṃ catunnaṃ adhikaraṇānaṃ katamaṃ adhikaraṇaṃ samuṭṭhāpeti? Āpattādhikaraṇaṃ catunnaṃ adhikaraṇānaṃ na katamaṃ adhikaraṇaṃ samuṭṭhāpeti; apica, āpattādhikaraṇapaccayā cattāro adhikaraṇā jāyanti. Yathā kathaṃ viya? Pañcapi āpattikkhandhā āpattādhikaraṇaṃ, sattapi āpattikkhandhā āpattādhikaraṇaṃ, idaṃ vuccati āpattādhikaraṇaṃ. Āpattādhikaraṇe saṅgho vivadati. Vivādādhikaraṇaṃ vivadamāno anuvadati. Anuvādādhikaraṇaṃ anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ āpattādhikaraṇapaccayā cattāro adhikaraṇā jāyanti.
༣༡༧. ཀིཙྩཱདྷིཀརཎཾ ཙཏུནྣཾ ཨདྷིཀརཎཱནཾ ཀཏམཾ ཨདྷིཀརཎཾ སམུཊྛཱཔེཏི ? ཀིཙྩཱདྷིཀརཎཾ ཙཏུནྣཾ ཨདྷིཀརཎཱནཾ ན ཀཏམཾ ཨདྷིཀརཎཾ སམུཊྛཱཔེཏི, ཨཔིཙ ཀིཙྩཱདྷིཀརཎཔཙྩཡཱ ཙཏྟཱརོ ཨདྷིཀརཎཱ ཛཱཡནྟི། ཡཐཱ ཀཐཾ ཝིཡ? ཡཱ སངྒྷསྶ ཀིཙྩཡཏཱ ཀརཎཱིཡཏཱ ཨཔལོཀནཀམྨཾ ཉཏྟིཀམྨཾ ཉཏྟིདུཏིཡཀམྨཾ ཉཏྟིཙཏུཏྠཀམྨཾ, ཨིདཾ ཝུཙྩཏི ཀིཙྩཱདྷིཀརཎཾ། ཀིཙྩཱདྷིཀརཎེ སངྒྷོ ཝིཝདཏི། ཝིཝཱདཱདྷིཀརཎཾ ཝིཝདམཱནོ ཨནུཝདཏི། ཨནུཝཱདཱདྷིཀརཎཾ ཨནུཝདམཱནོ ཨཱཔཏྟིཾ ཨཱཔཛྫཏི ཨཱཔཏྟཱདྷིཀརཎཾ། ཏཱཡ ཨཱཔཏྟིཡཱ སངྒྷོ ཀམྨཾ ཀརོཏི ཀིཙྩཱདྷིཀརཎཾ། ཨེཝཾ ཀིཙྩཱདྷིཀརཎཔཙྩཡཱ ཙཏྟཱརོ ཨདྷིཀརཎཱ ཛཱཡནྟི།
317. Kiccādhikaraṇaṃ catunnaṃ adhikaraṇānaṃ katamaṃ adhikaraṇaṃ samuṭṭhāpeti ? Kiccādhikaraṇaṃ catunnaṃ adhikaraṇānaṃ na katamaṃ adhikaraṇaṃ samuṭṭhāpeti, apica kiccādhikaraṇapaccayā cattāro adhikaraṇā jāyanti. Yathā kathaṃ viya? Yā saṅghassa kiccayatā karaṇīyatā apalokanakammaṃ ñattikammaṃ ñattidutiyakammaṃ ñatticatutthakammaṃ, idaṃ vuccati kiccādhikaraṇaṃ. Kiccādhikaraṇe saṅgho vivadati. Vivādādhikaraṇaṃ vivadamāno anuvadati. Anuvādādhikaraṇaṃ anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ kiccādhikaraṇapaccayā cattāro adhikaraṇā jāyanti.
སམུཊྛཱཔནཝཱརོ ནིཊྛིཏོ ཝཱིསཏིམོ།
Samuṭṭhāpanavāro niṭṭhito vīsatimo.
Footnotes:
Related texts:
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / སམུཊྛཱཔནཝཱརཀཐཱཝཎྞནཱ • Samuṭṭhāpanavārakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / སཾསཊྛཝཱརཱདིཝཎྞནཱ • Saṃsaṭṭhavārādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / སཾསཊྛཝཱརཱདིཝཎྞནཱ • Saṃsaṭṭhavārādivaṇṇanā
