| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[462] 8. сам̣вараж̇аад̇агаван̣н̣анаа
[462] 8. Saṃvarajātakavaṇṇanā
ж̇аананд̇о но махаарааж̇аад̇и ид̣̇ам̣ сад̇т̇аа ж̇зд̇аванз вихаранд̇о згам̣ оссадтавийрияам̣ бхигкум̣ аараб̣бха гат̇зси. со гира саавад̇т̇иваасий гулабуд̇д̇о сад̇т̇у д̇хаммад̣̇зсанам̣ суд̇ваа баб̣б̣аж̇ид̇ваа лад̣̇д̇хуубасамбад̣̇о аажарияубаж̇жхааяавад̇д̇ам̣ буурзнд̇о убхаяаани баад̇имогкаани баг̇ун̣аани гад̇ваа барибун̣н̣абан̃жавассо гаммадтаанам̣ г̇ахзд̇ваа ‘‘аран̃н̃з васиссаамий’’д̇и аажарияубаж̇жхааяз аабужчид̇ваа госаларадтз згам̣ бажжанд̇аг̇аамам̣ г̇анд̇ваа д̇ад̇т̇а ирияаабат̇з басаннамануссзхи бан̣н̣асаалам̣ гад̇ваа убадтияамаано вассам̣ убаг̇анд̇ваа яун̃ж̇анд̇о гхадзнд̇о вааяаманд̇о ажжаарад̣̇д̇хзна вийриязна д̇змаасам̣ гаммадтаанам̣ бхаавзд̇ваа обхаасамад̇д̇амби уббаад̣̇зд̇ум̣ асаггонд̇о жинд̇зси ‘‘ад̣̇д̇хаа ахам̣ сад̇т̇аараа д̣̇зсид̇зсу жад̇уусу буг̇г̇алзсу бад̣̇абарамо, гим̣ мз аран̃н̃аваасзна, ж̇зд̇аванам̣ г̇анд̇ваа д̇ат̇ааг̇ад̇асса руубасирим̣ бассанд̇о мад̇хурад̇хаммад̣̇зсанам̣ сун̣анд̇о вийд̇инаамзссаамий’’д̇и. со вийрияам̣ оссаж̇ид̇ваа д̇ад̇о нигканд̇о анубуб̣б̣зна ж̇зд̇аванам̣ г̇анд̇ваа аажарияубаж̇жхааязхи жзва санд̣̇идтасамбхад̇д̇зхи жа ааг̇аманагааран̣ам̣ будто д̇амад̇т̇ам̣ гат̇зд̇ваа д̇зхи ‘‘гасмаа звамагаасий’’д̇и г̇арахид̇ваа сад̇т̇у санд̇игам̣ нзд̇ваа ‘‘гим̣, бхигкавз, анижчамаанам̣ бхигкум̣ аанаяид̇т̇аа’’д̇и вуд̇д̇з ‘‘аяам̣, бханд̇з, вийрияам̣ оссаж̇ид̇ваа ааг̇ад̇о’’д̇и аарожид̇з сад̇т̇аа ‘‘сажжам̣ гираа’’д̇и бужчид̇ваа ‘‘сажжам̣, бханд̇з’’д̇и вуд̇д̇з ‘‘гасмаа бхигку вийрияам̣ оссаж̇и, имасмин̃хи саасанз ниб̣б̣ийрияасса гусийд̇абуг̇г̇аласса аг̇г̇апалам̣ арахад̇д̇ам̣ наама над̇т̇и, аарад̣̇д̇хавийрияаа имам̣ д̇хаммам̣ аараад̇хзнд̇и, д̇вам̣ ко бана буб̣б̣з вийрияаваа оваад̣̇агкамо, д̇знзва гааран̣зна б̣аараан̣асиран̃н̃о буд̇д̇асад̇асса саб̣б̣аганидто худ̇вааби бан̣д̣ид̇аанам̣ оваад̣̇з тад̇ваа сзд̇ажчад̇д̇ам̣ бад̇д̇осий’’д̇и вад̇ваа ад̇ийд̇ам̣ аахари.
Jānanto no mahārājāti idaṃ satthā jetavane viharanto ekaṃ ossaṭṭhavīriyaṃ bhikkhuṃ ārabbha kathesi. So kira sāvatthivāsī kulaputto satthu dhammadesanaṃ sutvā pabbajitvā laddhūpasampado ācariyupajjhāyavattaṃ pūrento ubhayāni pātimokkhāni paguṇāni katvā paripuṇṇapañcavasso kammaṭṭhānaṃ gahetvā ‘‘araññe vasissāmī’’ti ācariyupajjhāye āpucchitvā kosalaraṭṭhe ekaṃ paccantagāmaṃ gantvā tattha iriyāpathe pasannamanussehi paṇṇasālaṃ katvā upaṭṭhiyamāno vassaṃ upagantvā yuñjanto ghaṭento vāyamanto accāraddhena vīriyena temāsaṃ kammaṭṭhānaṃ bhāvetvā obhāsamattampi uppādetuṃ asakkonto cintesi ‘‘addhā ahaṃ satthārā desitesu catūsu puggalesu padaparamo, kiṃ me araññavāsena, jetavanaṃ gantvā tathāgatassa rūpasiriṃ passanto madhuradhammadesanaṃ suṇanto vītināmessāmī’’ti. So vīriyaṃ ossajitvā tato nikkhanto anupubbena jetavanaṃ gantvā ācariyupajjhāyehi ceva sandiṭṭhasambhattehi ca āgamanakāraṇaṃ puṭṭho tamatthaṃ kathetvā tehi ‘‘kasmā evamakāsī’’ti garahitvā satthu santikaṃ netvā ‘‘kiṃ, bhikkhave, anicchamānaṃ bhikkhuṃ ānayitthā’’ti vutte ‘‘ayaṃ, bhante, vīriyaṃ ossajitvā āgato’’ti ārocite satthā ‘‘saccaṃ kirā’’ti pucchitvā ‘‘saccaṃ, bhante’’ti vutte ‘‘kasmā bhikkhu vīriyaṃ ossaji, imasmiñhi sāsane nibbīriyassa kusītapuggalassa aggaphalaṃ arahattaṃ nāma natthi, āraddhavīriyā imaṃ dhammaṃ ārādhenti, tvaṃ kho pana pubbe vīriyavā ovādakkhamo, teneva kāraṇena bārāṇasirañño puttasatassa sabbakaniṭṭho hutvāpi paṇḍitānaṃ ovāde ṭhatvā setacchattaṃ pattosī’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з сам̣варагумааро наама буд̇д̇асад̇асса саб̣б̣аганидто ахоси. рааж̇аа згзгам̣ буд̇д̇ам̣ ‘‘сигкид̇аб̣б̣аяуд̇д̇агам̣ сигкаабзт̇аа’’д̇и згзгасса амажжасса ад̣̇ааси. сам̣варагумаарасса аажарияо амажжо б̣од̇хисад̇д̇о ахоси бан̣д̣ид̇о б̣яад̇д̇о рааж̇абуд̇д̇асса бид̇удтаанз тид̇о. амажжаа сигкид̇асиббз рааж̇абуд̇д̇з ран̃н̃о д̣̇ассзсум̣. рааж̇аа д̇зсам̣ ж̇анабад̣̇ам̣ д̣̇ад̇ваа уяяож̇зси. сам̣варагумааро саб̣б̣асиббасса нибпад̇д̇им̣ бад̇ваа б̣од̇хисад̇д̇ам̣ бужчи ‘‘д̇аад̇а, сажз мам̣ бид̇аа ж̇анабад̣̇ам̣ бзсзд̇и, гим̣ гаромий’’д̇и? ‘‘д̇аад̇а, д̇вам̣ ж̇анабад̣̇з д̣̇ийяамаанз д̇ам̣ аг̇г̇ахзд̇ваа ‘д̣̇зва ахам̣ саб̣б̣аганидто, маяиби г̇ад̇з д̇умхаагам̣ баад̣̇амуулам̣ д̇ужчам̣ бхависсад̇и, ахам̣ д̇умхаагам̣ баад̣̇амуулзязва васиссаамий’д̇и вад̣̇зяяаасий’’д̇и. ат̇згад̣̇ивасам̣ рааж̇аа сам̣варагумаарам̣ ванд̣̇ид̇ваа згаманд̇ам̣ нисиннам̣ бужчи ‘‘гим̣ д̇аад̇а, сиббам̣ д̇з нидтид̇а’’нд̇и? ‘‘аама, д̣̇зваа’’д̇и. ‘‘д̇уяхамби ж̇анабад̣̇ам̣ д̣̇змий’’д̇и. ‘‘д̣̇зва д̇умхаагам̣ баад̣̇амуулам̣ д̇ужчам̣ бхависсад̇и, баад̣̇амуулзязва васиссаамий’’д̇и. рааж̇аа д̇уссид̇ваа ‘‘саад̇хуу’’д̇и самбадижчи. со д̇ад̇о бадтааяа ран̃н̃о баад̣̇амуулзязва худ̇ваа бунаби б̣од̇хисад̇д̇ам̣ бужчи ‘‘д̇аад̇а ан̃н̃ам̣ гим̣ гаромий’’д̇и? ‘‘д̇аад̇а рааж̇аанам̣ згам̣ бураан̣уяяаанам̣ яаажаахий’’д̇и. со ‘‘саад̇хуу’’д̇и уяяаанам̣ яаажид̇ваа д̇ад̇т̇а ж̇аад̇агзхи бубпапалзхи наг̇арз иссараж̇анам̣ сан̇г̇ан̣хид̇ваа буна ‘‘гим̣ гаромий’’д̇и бужчи. ‘‘д̇аад̇а, рааж̇аанам̣ аабужчид̇ваа анд̇онаг̇арз бхад̇д̇авзд̇анам̣ д̇вамзва д̣̇зхий’’д̇и. со д̇ат̇аа гад̇ваа анд̇онаг̇арз гассажи гин̃жи ахаабзд̇ваа бхад̇д̇авзд̇анам̣ д̣̇ад̇ваа буна б̣од̇хисад̇д̇ам̣ бужчид̇ваа рааж̇аанам̣ вин̃н̃аабзд̇ваа анд̇онивзсанз д̣̇аасаборисаанамби хад̇т̇ийнамби ассаанамби б̣алагааяассаби вад̇д̇ам̣ абарихаабзд̇ваа ад̣̇ааси, д̇ирож̇анабад̣̇зхи ааг̇ад̇аанам̣ д̣̇ууд̇аад̣̇ийнам̣ ниваасадтаанаад̣̇ийни ваан̣иж̇аанам̣ сун̇ганд̇и саб̣б̣агаран̣ийяаани ад̇д̇анаава агааси. звам̣ со махаасад̇д̇асса оваад̣̇з тад̇ваа саб̣б̣ам̣ анд̇ож̇анан̃жа б̣ахиж̇анан̃жа нааг̇арз жа радтаваасино жа ааг̇анд̇угз жа ааяавад̇д̇анз жа д̇зна д̇зна сан̇г̇ахавад̇т̇унаа ааб̣анд̇хид̇ваа сан̇г̇ан̣хи, саб̣б̣зсам̣ бияо ахоси манаабо.
Atīte bārāṇasiyaṃ brahmadatte rajjaṃ kārente saṃvarakumāro nāma puttasatassa sabbakaniṭṭho ahosi. Rājā ekekaṃ puttaṃ ‘‘sikkhitabbayuttakaṃ sikkhāpethā’’ti ekekassa amaccassa adāsi. Saṃvarakumārassa ācariyo amacco bodhisatto ahosi paṇḍito byatto rājaputtassa pituṭṭhāne ṭhito. Amaccā sikkhitasippe rājaputte rañño dassesuṃ. Rājā tesaṃ janapadaṃ datvā uyyojesi. Saṃvarakumāro sabbasippassa nipphattiṃ patvā bodhisattaṃ pucchi ‘‘tāta, sace maṃ pitā janapadaṃ peseti, kiṃ karomī’’ti? ‘‘Tāta, tvaṃ janapade dīyamāne taṃ aggahetvā ‘deva ahaṃ sabbakaniṭṭho, mayipi gate tumhākaṃ pādamūlaṃ tucchaṃ bhavissati, ahaṃ tumhākaṃ pādamūleyeva vasissāmī’ti vadeyyāsī’’ti. Athekadivasaṃ rājā saṃvarakumāraṃ vanditvā ekamantaṃ nisinnaṃ pucchi ‘‘kiṃ tāta, sippaṃ te niṭṭhita’’nti? ‘‘Āma, devā’’ti. ‘‘Tuyhampi janapadaṃ demī’’ti. ‘‘Deva tumhākaṃ pādamūlaṃ tucchaṃ bhavissati, pādamūleyeva vasissāmī’’ti. Rājā tussitvā ‘‘sādhū’’ti sampaṭicchi. So tato paṭṭhāya rañño pādamūleyeva hutvā punapi bodhisattaṃ pucchi ‘‘tāta aññaṃ kiṃ karomī’’ti? ‘‘Tāta rājānaṃ ekaṃ purāṇuyyānaṃ yācāhī’’ti. So ‘‘sādhū’’ti uyyānaṃ yācitvā tattha jātakehi pupphaphalehi nagare issarajanaṃ saṅgaṇhitvā puna ‘‘kiṃ karomī’’ti pucchi. ‘‘Tāta, rājānaṃ āpucchitvā antonagare bhattavetanaṃ tvameva dehī’’ti. So tathā katvā antonagare kassaci kiñci ahāpetvā bhattavetanaṃ datvā puna bodhisattaṃ pucchitvā rājānaṃ viññāpetvā antonivesane dāsaporisānampi hatthīnampi assānampi balakāyassapi vattaṃ aparihāpetvā adāsi, tirojanapadehi āgatānaṃ dūtādīnaṃ nivāsaṭṭhānādīni vāṇijānaṃ suṅkanti sabbakaraṇīyāni attanāva akāsi. Evaṃ so mahāsattassa ovāde ṭhatvā sabbaṃ antojanañca bahijanañca nāgare ca raṭṭhavāsino ca āgantuke ca āyavattane ca tena tena saṅgahavatthunā ābandhitvā saṅgaṇhi, sabbesaṃ piyo ahosi manāpo.
абарабхааг̇з рааж̇аанам̣ маран̣аман̃жз нибаннам̣ амажжаа бужчим̣су ‘‘д̣̇зва, д̇умхаагам̣ ажжаязна сзд̇ажчад̇д̇ам̣ гасса д̣̇змаа’’д̇и? ‘‘д̇аад̇а, мама буд̇д̇аа саб̣б̣зби сзд̇ажчад̇д̇асса сааминова. яо бана д̇умхаагам̣ манам̣ г̇ан̣хаад̇и, д̇ассзва сзд̇ажчад̇т̇ам̣ д̣̇ад̣̇зяяаат̇аа’’д̇и. д̇з д̇асмим̣ гаалагад̇з д̇асса сарийрабарихаарам̣ гад̇ваа сад̇д̇амз д̣̇ивасз саннибад̇ид̇ваа ‘‘ран̃н̃аа ‘яо д̇умхаагам̣ манам̣ г̇ан̣хаад̇и, д̇асса сзд̇ажчад̇д̇ам̣ уссаабзяяаат̇аа’д̇и вуд̇д̇ам̣, амхааган̃жа аяам̣ сам̣варагумааро манам̣ г̇ан̣хаад̇ий’’д̇и н̃аад̇агзхи бариваарид̇аа д̇асса ган̃жанамаалам̣ сзд̇ажчад̇д̇ам̣ уссаабаяим̣су. сам̣варамахаарааж̇аа б̣од̇хисад̇д̇асса оваад̣̇з тад̇ваа д̇хаммзна раж̇ж̇ам̣ гаарзси. ид̇арз згуунасад̇агумаараа ‘‘бид̇аа гира но гаалагад̇о, сам̣варагумаарасса гира сзд̇ажчад̇д̇ам̣ уссаабзсум̣, со саб̣б̣аганидто, д̇асса чад̇д̇ам̣ на баабун̣аад̇и, саб̣б̣аж̇здтагасса чад̇д̇ам̣ уссаабзссаамаа’’д̇и згад̇о ааг̇анд̇ваа ‘‘чад̇д̇ам̣ ваа но д̣̇зд̇у, яуд̣̇д̇хам̣ ваа’’д̇и сам̣варамахаарааж̇асса бан̣н̣ам̣ бзсзд̇ваа наг̇арам̣ убарунд̇хим̣су. рааж̇аа б̣од̇хисад̇д̇асса д̇ам̣ бавад̇д̇им̣ аарожзд̇ваа ‘‘ид̣̇аани гим̣ гаромаа’’д̇и бужчи. махаарааж̇а, д̇ава бхаад̇игзхи сад̣̇д̇хим̣ яуж̇жханагижжам̣ над̇т̇и, д̇вам̣ бид̇у санд̇агам̣ д̇ханам̣ сад̇агодтаасз гаарзд̇ваа згуунасад̇ам̣ бхаад̇игаанам̣ бзсзд̇ваа ‘‘имам̣ д̇умхаагам̣ годтаасам̣ бид̇у санд̇агам̣ г̇ан̣хат̇а, наахам̣ д̇умхзхи сад̣̇д̇хим̣ яуж̇жхаамий’’д̇и саасанам̣ бахин̣аахийд̇и. со д̇ат̇аа агааси. ат̇асса саб̣б̣аж̇здтабхаад̇иго убосат̇агумааро наама сзсз ааманд̇зд̇ваа ‘‘д̇аад̇аа, рааж̇аанам̣ наама абхибхавид̇ум̣ самад̇т̇аа наама над̇т̇и, аяан̃жа но ганидтабхаад̇иго бадисад̇д̇уби худ̇ваа на д̇идтад̇и, амхаагам̣ бид̇у санд̇агам̣ д̇ханам̣ бзсзд̇ваа ‘наахам̣ д̇умхзхи сад̣̇д̇хим̣ яуж̇жхаамий’д̇и бзсзси, на ко бана маяам̣ саб̣б̣зби згагкан̣з чад̇д̇ам̣ уссаабзссаама, згассзва чад̇д̇ам̣ уссаабзссаама, аяамзва рааж̇аа ход̇у, зт̇а д̇ам̣ бассид̇ваа рааж̇агудумб̣ам̣ бадижчаад̣̇зд̇ваа амхаагам̣ ж̇анабад̣̇амзва г̇ажчаамаа’’д̇и ааха. ат̇а д̇з саб̣б̣зби гумаараа наг̇арад̣̇ваарам̣ вивараабзд̇ваа бадисад̇д̇уно ахуд̇ваа наг̇арам̣ бависим̣су.
Aparabhāge rājānaṃ maraṇamañce nipannaṃ amaccā pucchiṃsu ‘‘deva, tumhākaṃ accayena setacchattaṃ kassa demā’’ti? ‘‘Tāta, mama puttā sabbepi setacchattassa sāminova. Yo pana tumhākaṃ manaṃ gaṇhāti, tasseva setacchatthaṃ dadeyyāthā’’ti. Te tasmiṃ kālakate tassa sarīraparihāraṃ katvā sattame divase sannipatitvā ‘‘raññā ‘yo tumhākaṃ manaṃ gaṇhāti, tassa setacchattaṃ ussāpeyyāthā’ti vuttaṃ, amhākañca ayaṃ saṃvarakumāro manaṃ gaṇhātī’’ti ñātakehi parivāritā tassa kañcanamālaṃ setacchattaṃ ussāpayiṃsu. Saṃvaramahārājā bodhisattassa ovāde ṭhatvā dhammena rajjaṃ kāresi. Itare ekūnasatakumārā ‘‘pitā kira no kālakato, saṃvarakumārassa kira setacchattaṃ ussāpesuṃ, so sabbakaniṭṭho, tassa chattaṃ na pāpuṇāti, sabbajeṭṭhakassa chattaṃ ussāpessāmā’’ti ekato āgantvā ‘‘chattaṃ vā no detu, yuddhaṃ vā’’ti saṃvaramahārājassa paṇṇaṃ pesetvā nagaraṃ uparundhiṃsu. Rājā bodhisattassa taṃ pavattiṃ ārocetvā ‘‘idāni kiṃ karomā’’ti pucchi. Mahārāja, tava bhātikehi saddhiṃ yujjhanakiccaṃ natthi, tvaṃ pitu santakaṃ dhanaṃ satakoṭṭhāse kāretvā ekūnasataṃ bhātikānaṃ pesetvā ‘‘imaṃ tumhākaṃ koṭṭhāsaṃ pitu santakaṃ gaṇhatha, nāhaṃ tumhehi saddhiṃ yujjhāmī’’ti sāsanaṃ pahiṇāhīti. So tathā akāsi. Athassa sabbajeṭṭhabhātiko uposathakumāro nāma sese āmantetvā ‘‘tātā, rājānaṃ nāma abhibhavituṃ samatthā nāma natthi, ayañca no kaniṭṭhabhātiko paṭisattupi hutvā na tiṭṭhati, amhākaṃ pitu santakaṃ dhanaṃ pesetvā ‘nāhaṃ tumhehi saddhiṃ yujjhāmī’ti pesesi, na kho pana mayaṃ sabbepi ekakkhaṇe chattaṃ ussāpessāma, ekasseva chattaṃ ussāpessāma, ayameva rājā hotu, etha taṃ passitvā rājakuṭumbaṃ paṭicchādetvā amhākaṃ janapadameva gacchāmā’’ti āha. Atha te sabbepi kumārā nagaradvāraṃ vivarāpetvā paṭisattuno ahutvā nagaraṃ pavisiṃsu.
рааж̇ааби д̇зсам̣ амажжзхи бан̣н̣аагаарам̣ г̇аахаабзд̇ваа бадимаг̇г̇ам̣ бзсзд̇и. гумаараа наад̇имаханд̇зна бариваарзна бад̇д̇игаава ааг̇анд̇ваа рааж̇анивзсанам̣ абхирухид̇ваа сам̣варамахаарааж̇асса нибажжагаарам̣ д̣̇ассзд̇ваа нийжаасанз нисийд̣̇им̣су. сам̣варамахаарааж̇аа сзд̇ажчад̇д̇асса хздтаа сийхаасанз нисийд̣̇и, маханд̇о яасо маханд̇ам̣ сирисобхаг̇г̇ам̣ ахоси, ологид̇ологид̇адтаанам̣ гамби. убосат̇агумааро сам̣варамахаарааж̇асса сиривибхавам̣ ологзд̇ваа ‘‘амхаагам̣ бид̇аа ад̇д̇ано ажжаязна сам̣варагумаарасса рааж̇абхаавам̣ н̃ад̇ваа ман̃н̃з амхаагам̣ ж̇анабад̣̇з д̣̇ад̇ваа имасса на ад̣̇аасий’’д̇и жинд̇зд̇ваа д̇зна сад̣̇д̇хим̣ саллабанд̇о д̇иссо г̇аат̇аа абхааси –
Rājāpi tesaṃ amaccehi paṇṇākāraṃ gāhāpetvā paṭimaggaṃ peseti. Kumārā nātimahantena parivārena pattikāva āgantvā rājanivesanaṃ abhiruhitvā saṃvaramahārājassa nipaccakāraṃ dassetvā nīcāsane nisīdiṃsu. Saṃvaramahārājā setacchattassa heṭṭhā sīhāsane nisīdi, mahanto yaso mahantaṃ sirisobhaggaṃ ahosi, olokitolokitaṭṭhānaṃ kampi. Uposathakumāro saṃvaramahārājassa sirivibhavaṃ oloketvā ‘‘amhākaṃ pitā attano accayena saṃvarakumārassa rājabhāvaṃ ñatvā maññe amhākaṃ janapade datvā imassa na adāsī’’ti cintetvā tena saddhiṃ sallapanto tisso gāthā abhāsi –
97.
97.
‘‘ж̇аананд̇о но махаарааж̇а, д̇ава сийлам̣ ж̇анаад̇хибо;
‘‘Jānanto no mahārāja, tava sīlaṃ janādhipo;
имз гумаарз бууж̇знд̇о, на д̇ам̣ гзнажи ман̃н̃ат̇а.
Ime kumāre pūjento, na taṃ kenaci maññatha.
98.
98.
‘‘д̇идтанд̇з но махаарааж̇з, ад̣̇у д̣̇звз д̣̇иван̇г̇ад̇з;
‘‘Tiṭṭhante no mahārāje, adu deve divaṅgate;
н̃аад̇ий д̇ам̣ саманун̃н̃им̣су, самбассам̣ ад̇т̇амад̇д̇ано.
Ñātī taṃ samanuññiṃsu, sampassaṃ atthamattano.
99.
99.
‘‘гзна сам̣вара вад̇д̇зна, сан̃ж̇аад̇з абхид̇идтаси;
‘‘Kena saṃvara vattena, sañjāte abhitiṭṭhasi;
гзна д̇ам̣ наад̇ивад̇д̇анд̇и, н̃аад̇исан̇гхаа самааг̇ад̇аа’’д̇и.
Kena taṃ nātivattanti, ñātisaṅghā samāgatā’’ti.
д̇ад̇т̇а ж̇аананд̇о нод̇и ж̇аананд̇о ну. ж̇анаад̇хибод̇и амхаагам̣ бид̇аа наринд̣̇о. имзд̇и имз згуунасад̇з гумаарз. баал̣ибод̇т̇агзсу бана ‘‘ан̃н̃з гумаарз’’д̇и ликид̇ам̣. бууж̇знд̇од̇и д̇зна д̇зна ж̇анабад̣̇зна маанзнд̇о. на д̇ам̣ гзнажийд̇и куд̣̇д̣̇агзнааби гзнажи ж̇анабад̣̇зна д̇ам̣ бууж̇зд̇аб̣б̣ам̣ на ман̃н̃ид̇т̇а, ‘‘аяам̣ мама ажжаязна рааж̇аа бхависсад̇ий’’д̇и н̃ад̇ваа ман̃н̃з ад̇д̇ано баад̣̇амуулзязва ваасзсийд̇и. д̇идтанд̇з нод̇и д̇идтанд̇з ну, д̇харамаанзязва нууд̇и бужчад̇и, ад̣̇у д̣̇звзд̇и уд̣̇ааху амхаагам̣ бид̇ари д̣̇иван̇г̇ад̇з ад̇д̇ано ад̇т̇ам̣ вуд̣дхим̣ бассанд̇аа сад̣̇д̇хим̣ рааж̇агаарагзхи нзг̇амаж̇аанабад̣̇зхи н̃аад̇аяо д̇ам̣ ‘‘рааж̇аа хохий’’д̇и саманун̃н̃им̣су. вад̇д̇знаад̇и сийлаажаарзна. сан̃ж̇аад̇з абхид̇идтасийд̇и самаанаж̇аад̇игз згуунасад̇абхаад̇аро абхибхавид̇ваа д̇идтаси. наад̇ивад̇д̇анд̇ийд̇и на абхибхаванд̇и.
Tattha jānanto noti jānanto nu. Janādhipoti amhākaṃ pitā narindo. Imeti ime ekūnasate kumāre. Pāḷipotthakesu pana ‘‘aññe kumāre’’ti likhitaṃ. Pūjentoti tena tena janapadena mānento. Na taṃ kenacīti khuddakenāpi kenaci janapadena taṃ pūjetabbaṃ na maññittha, ‘‘ayaṃ mama accayena rājā bhavissatī’’ti ñatvā maññe attano pādamūleyeva vāsesīti. Tiṭṭhante noti tiṭṭhante nu, dharamāneyeva nūti pucchati, adu deveti udāhu amhākaṃ pitari divaṅgate attano atthaṃ vuḍḍhiṃ passantā saddhiṃ rājakārakehi negamajānapadehi ñātayo taṃ ‘‘rājā hohī’’ti samanuññiṃsu. Vattenāti sīlācārena. Sañjāte abhitiṭṭhasīti samānajātike ekūnasatabhātaro abhibhavitvā tiṭṭhasi. Nātivattantīti na abhibhavanti.
д̇ам̣ суд̇ваа сам̣варамахаарааж̇аа ад̇д̇ано г̇ун̣ам̣ гат̇знд̇о ча г̇аат̇аа абхааси –
Taṃ sutvā saṃvaramahārājā attano guṇaṃ kathento cha gāthā abhāsi –
100.
100.
‘‘на рааж̇абуд̇д̇а усууяаами, саман̣аанам̣ махзсинам̣;
‘‘Na rājaputta usūyāmi, samaṇānaṃ mahesinaṃ;
саггажжам̣ д̇з намассаами, баад̣̇з ванд̣̇аами д̇аад̣̇инам̣.
Sakkaccaṃ te namassāmi, pāde vandāmi tādinaṃ.
101.
101.
‘‘д̇з мам̣ д̇хаммаг̇ун̣з яуд̇д̇ам̣, суссуусаманусууяагам̣;
‘‘Te maṃ dhammaguṇe yuttaṃ, sussūsamanusūyakaṃ;
саман̣аа манусаасанд̇и, исий д̇хаммаг̇ун̣з рад̇аа.
Samaṇā manusāsanti, isī dhammaguṇe ratā.
102.
102.
‘‘д̇зсаахам̣ важанам̣ суд̇ваа, саман̣аанам̣ махзсинам̣;
‘‘Tesāhaṃ vacanaṃ sutvā, samaṇānaṃ mahesinaṃ;
на гин̃жи ад̇иман̃н̃аами, д̇хаммз мз нирад̇о мано.
Na kiñci atimaññāmi, dhamme me nirato mano.
103.
103.
‘‘хад̇т̇аарохаа анийгадтаа, рат̇игаа бад̇д̇игаарагаа;
‘‘Hatthārohā anīkaṭṭhā, rathikā pattikārakā;
д̇зсам̣ наббадиб̣анд̇хаами, нивидтам̣ бхад̇д̇авзд̇анам̣.
Tesaṃ nappaṭibandhāmi, niviṭṭhaṃ bhattavetanaṃ.
104.
104.
‘‘махаамад̇д̇аа жа мз ад̇т̇и, манд̇ино барижаарагаа;
‘‘Mahāmattā ca me atthi, mantino paricārakā;
б̣аараан̣асим̣ вохаранд̇и, б̣ахумам̣сасурод̣̇анам̣.
Bārāṇasiṃ voharanti, bahumaṃsasurodanaṃ.
105.
105.
‘‘ат̇оби ваан̣иж̇аа пийд̇аа, наанаарадтзхи ааг̇ад̇аа;
‘‘Athopi vāṇijā phītā, nānāraṭṭhehi āgatā;
д̇зсу мз вихид̇аа рагкаа, звам̣ ж̇аанаахубосат̇аа’’д̇и.
Tesu me vihitā rakkhā, evaṃ jānāhuposathā’’ti.
д̇ад̇т̇а на рааж̇абуд̇д̇аад̇и ахам̣ рааж̇абуд̇д̇а, ган̃жи сад̇д̇ам̣ ‘‘аяам̣ самбад̇д̇и имасса маа ход̇уу’’д̇и на усууяаами. д̇аад̣̇инанд̇и д̇аад̣̇илагкан̣аяуд̇д̇аанам̣ самид̇абаабад̇ааяа саман̣аанам̣ маханд̇аанам̣ сийлагканд̇хаад̣̇ийнам̣ г̇ун̣аанам̣ зсид̇ад̇ааяа махзсийнам̣ д̇хаммигасаман̣аб̣раахман̣аанам̣ бан̃жабад̇идтид̇зна баад̣̇з ванд̣̇аами, д̣̇аанам̣ д̣̇ад̣̇анд̇о д̇хаммиган̃жа нзсам̣ рагкааваран̣аг̇уд̇д̇им̣ бажжубадтабзнд̇о саггажжам̣ д̇з намассаами, манзна самбияааяанд̇о жа бууж̇змийд̇и ад̇т̇о. д̇з манд̇и д̇з саман̣аа мам̣ ‘‘аяам̣ д̇хаммагодтаасз яуд̇д̇абаяуд̇д̇о суссуусам̣ анусууяаго’’д̇и д̇ат̇ад̇о н̃ад̇ваа мам̣ д̇хаммаг̇ун̣з яуд̇д̇ам̣ суссуусам̣ анусууяагам̣ анусаасанд̇и, ‘‘ид̣̇ам̣ гара, ид̣̇ам̣ маа гарий’’д̇и овад̣̇анд̇ийд̇и ад̇т̇о. д̇зсааханд̇и д̇зсам̣ ахам̣. хад̇т̇аарохаад̇и хад̇т̇им̣ ааруяха яуж̇жханагаа яод̇хаа. анийгадтаад̇и хад̇т̇аанийгаад̣̇ийсу тид̇аа. рат̇игаад̇и рат̇аяод̇хаа. бад̇д̇игаарагаад̇и бад̇д̇инова. нивидтанд̇и яам̣ д̇зхи саж̇ж̇ид̇ам̣ бхад̇д̇ан̃жа взд̇анан̃жа, ахам̣ д̇ам̣ наббадиб̣анд̇хаами, абарихаабзд̇ваа д̣̇ад̣̇аамийд̇и ад̇т̇о.
Tattha na rājaputtāti ahaṃ rājaputta, kañci sattaṃ ‘‘ayaṃ sampatti imassa mā hotū’’ti na usūyāmi. Tādinanti tādilakkhaṇayuttānaṃ samitapāpatāya samaṇānaṃ mahantānaṃ sīlakkhandhādīnaṃ guṇānaṃ esitatāya mahesīnaṃ dhammikasamaṇabrāhmaṇānaṃ pañcapatiṭṭhitena pāde vandāmi, dānaṃ dadanto dhammikañca nesaṃ rakkhāvaraṇaguttiṃ paccupaṭṭhapento sakkaccaṃ te namassāmi, manena sampiyāyanto ca pūjemīti attho. Te manti te samaṇā maṃ ‘‘ayaṃ dhammakoṭṭhāse yuttapayutto sussūsaṃ anusūyako’’ti tathato ñatvā maṃ dhammaguṇe yuttaṃ sussūsaṃ anusūyakaṃ anusāsanti, ‘‘idaṃ kara, idaṃ mā karī’’ti ovadantīti attho. Tesāhanti tesaṃ ahaṃ. Hatthārohāti hatthiṃ āruyha yujjhanakā yodhā. Anīkaṭṭhāti hatthānīkādīsu ṭhitā. Rathikāti rathayodhā. Pattikārakāti pattinova. Niviṭṭhanti yaṃ tehi sajjitaṃ bhattañca vetanañca, ahaṃ taṃ nappaṭibandhāmi, aparihāpetvā dadāmīti attho.
махаамад̇д̇аад̇и бхаад̇ига, маяхам̣ махаабан̃н̃аа манд̇зсу гусалаа махааамажжаа жзва авасзсаманд̇ино жа барижаарагаа ад̇т̇и. иминаа имам̣ д̣̇ассзд̇и ‘‘д̇умхз манд̇асамбаннз бан̣д̣ид̇з аажарияз на лабхид̇т̇а, амхаагам̣ бана аажарияаа бан̣д̣ид̇аа убааяагусалаа, д̇з но сзд̇ажчад̇д̇зна яож̇зсу’’нд̇и. б̣аараан̣асинд̇и бхаад̇ига, мама чад̇д̇ам̣ уссаабид̇агаалад̇о бадтааяа ‘‘амхаагам̣ рааж̇аа д̇хаммиго анвад̣̇д̇хамаасам̣ д̣̇зво вассад̇и, д̇зна сассаани самбаж̇ж̇анд̇и, б̣аараан̣асияам̣ б̣ахум̣ каад̣̇ид̇аб̣б̣аяуд̇д̇агам̣ мажчамам̣сам̣ бааяид̇аб̣б̣аяуд̇д̇агам̣ сурод̣̇аган̃жа ж̇аад̇а’’нд̇и звам̣ радтаваасино б̣ахумам̣сасурод̣̇агам̣ гад̇ваа б̣аараан̣асим̣ вохаранд̇и. пийд̇аад̇и хад̇т̇ирад̇анаассарад̇анамуд̇д̇арад̇анаад̣̇ийни аахарид̇ваа нирубад̣̇д̣̇аваа вохаарам̣ гаронд̇аа пийд̇аа самид̣̇д̇хаа. звам̣ ж̇аанаахийд̇и бхаад̇ига убосат̇а ахам̣ имзхи зд̇д̇агзхи гааран̣зхи саб̣б̣аганидтоби худ̇ваа мама бхаад̇игз абхибхавид̇ваа сзд̇ажчад̇д̇ам̣ бад̇д̇о, звам̣ ж̇аанаахийд̇и.
Mahāmattāti bhātika, mayhaṃ mahāpaññā mantesu kusalā mahāamaccā ceva avasesamantino ca paricārakā atthi. Iminā imaṃ dasseti ‘‘tumhe mantasampanne paṇḍite ācariye na labhittha, amhākaṃ pana ācariyā paṇḍitā upāyakusalā, te no setacchattena yojesu’’nti. Bārāṇasinti bhātika, mama chattaṃ ussāpitakālato paṭṭhāya ‘‘amhākaṃ rājā dhammiko anvaddhamāsaṃ devo vassati, tena sassāni sampajjanti, bārāṇasiyaṃ bahuṃ khāditabbayuttakaṃ macchamaṃsaṃ pāyitabbayuttakaṃ surodakañca jāta’’nti evaṃ raṭṭhavāsino bahumaṃsasurodakaṃ katvā bārāṇasiṃ voharanti. Phītāti hatthiratanaassaratanamuttaratanādīni āharitvā nirupaddavā vohāraṃ karontā phītā samiddhā. Evaṃ jānāhīti bhātika uposatha ahaṃ imehi ettakehi kāraṇehi sabbakaniṭṭhopi hutvā mama bhātike abhibhavitvā setacchattaṃ patto, evaṃ jānāhīti.
ат̇асса г̇ун̣ам̣ суд̇ваа убосат̇агумааро д̣̇вз г̇аат̇аа абхааси –
Athassa guṇaṃ sutvā uposathakumāro dve gāthā abhāsi –
106.
106.
‘‘д̇хаммзна гира н̃аад̇ийнам̣, раж̇ж̇ам̣ гаарзхи сам̣вара;
‘‘Dhammena kira ñātīnaṃ, rajjaṃ kārehi saṃvara;
мзд̇хаавий бан̣д̣ид̇о жааси, ат̇оби н̃аад̇инам̣ хид̇о.
Medhāvī paṇḍito cāsi, athopi ñātinaṃ hito.
107.
107.
‘‘д̇ам̣ д̇ам̣ н̃аад̇ибариб̣яуул̣хам̣, наанаарад̇анаможид̇ам̣;
‘‘Taṃ taṃ ñātiparibyūḷhaṃ, nānāratanamocitaṃ;
амид̇д̇аа наббасаханд̇и, инд̣̇ам̣ва асураад̇хибо’’д̇и.
Amittā nappasahanti, indaṃva asurādhipo’’ti.
д̇ад̇т̇а д̇хаммзна гира н̃аад̇ийнанд̇и д̇аад̇а сам̣вара махаарааж̇а, д̇хаммзна гира д̇вам̣ згуунасад̇аанам̣ н̃аад̇ийнам̣ ад̇д̇ано ж̇здтабхаад̇игаанам̣ аанубхаавам̣ абхибхаваси, ид̇о бадтааяа д̇вамзва раж̇ж̇ам̣ гаарзхи, д̇вамзва мзд̇хаавий жзва бан̣д̣ид̇о жа н̃аад̇ийнан̃жа хид̇од̇и ад̇т̇о. д̇ам̣ д̇анд̇и звам̣ вивид̇хаг̇ун̣асамбаннам̣ д̇ам̣. н̃аад̇ибариб̣яуул̣ханд̇и амхзхи згуунасад̇зхи н̃аад̇агзхи бариваарид̇ам̣. наанаарад̇анаможид̇анд̇и наанаарад̇анзхи ожид̇ам̣ сан̃жид̇ам̣ б̣ахурад̇анасан̃жаяам̣. асураад̇хибод̇и яат̇аа д̇аавад̇им̣сзхи бариваарид̇ам̣ инд̣̇ам̣ асурарааж̇аа наббасахад̇и, звам̣ амхзхи аарагкам̣ гаронд̇зхи бариваарид̇ам̣ д̇ам̣ д̇ияож̇анасад̇игз гаасирадтз д̣̇ваад̣̇асаяож̇анигааяа б̣аараан̣асияаа раж̇ж̇ам̣ гаарзнд̇ам̣ амид̇д̇аа наббасаханд̇ийд̇и д̣̇ийбзд̇и.
Tattha dhammena kira ñātīnanti tāta saṃvara mahārāja, dhammena kira tvaṃ ekūnasatānaṃ ñātīnaṃ attano jeṭṭhabhātikānaṃ ānubhāvaṃ abhibhavasi, ito paṭṭhāya tvameva rajjaṃ kārehi, tvameva medhāvī ceva paṇḍito ca ñātīnañca hitoti attho. Taṃ tanti evaṃ vividhaguṇasampannaṃ taṃ. Ñātiparibyūḷhanti amhehi ekūnasatehi ñātakehi parivāritaṃ. Nānāratanamocitanti nānāratanehi ocitaṃ sañcitaṃ bahuratanasañcayaṃ. Asurādhipoti yathā tāvatiṃsehi parivāritaṃ indaṃ asurarājā nappasahati, evaṃ amhehi ārakkhaṃ karontehi parivāritaṃ taṃ tiyojanasatike kāsiraṭṭhe dvādasayojanikāya bārāṇasiyā rajjaṃ kārentaṃ amittā nappasahantīti dīpeti.
сам̣варамахаарааж̇аа саб̣б̣зсамби бхаад̇игаанам̣ маханд̇ам̣ яасам̣ ад̣̇ааси. д̇з д̇асса санд̇игз маасад̣дхамаасам̣ васид̇ваа ‘‘махаарааж̇а ж̇анабад̣̇зсу жорзсу удтаханд̇зсу маяам̣ ж̇ааниссаама, д̇вам̣ раж̇ж̇асукам̣ анубхаваа’’д̇и вад̇ваа ад̇д̇ано ад̇д̇ано ж̇анабад̣̇ам̣ г̇ад̇аа. рааж̇ааби б̣од̇хисад̇д̇асса оваад̣̇з тад̇ваа ааяубарияосаанз д̣̇званаг̇арам̣ буурзнд̇о аг̇амааси.
Saṃvaramahārājā sabbesampi bhātikānaṃ mahantaṃ yasaṃ adāsi. Te tassa santike māsaḍḍhamāsaṃ vasitvā ‘‘mahārāja janapadesu coresu uṭṭhahantesu mayaṃ jānissāma, tvaṃ rajjasukhaṃ anubhavā’’ti vatvā attano attano janapadaṃ gatā. Rājāpi bodhisattassa ovāde ṭhatvā āyupariyosāne devanagaraṃ pūrento agamāsi.
сад̇т̇аа имам̣ д̇хаммад̣̇зсанам̣ аахарид̇ваа ‘‘бхигку звам̣ д̇вам̣ буб̣б̣з оваад̣̇агкамо, ид̣̇аани гасмаа вийрияам̣ на агаасий’’д̇и вад̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз со бхигку сод̇аабад̇д̇ипалз бад̇идтахи.
Satthā imaṃ dhammadesanaṃ āharitvā ‘‘bhikkhu evaṃ tvaṃ pubbe ovādakkhamo, idāni kasmā vīriyaṃ na akāsī’’ti vatvā saccāni pakāsetvā jātakaṃ samodhānesi, saccapariyosāne so bhikkhu sotāpattiphale patiṭṭhahi.
д̇ад̣̇аа сам̣варамахаарааж̇аа аяам̣ бхигку ахоси, убосат̇агумааро саарибуд̇д̇о, сзсабхаад̇игаа т̇зраанут̇зраа, барисаа б̣уд̣̇д̇хабарисаа, оваад̣̇ад̣̇ааяаго амажжо бана ахамзва ахосинд̇и.
Tadā saṃvaramahārājā ayaṃ bhikkhu ahosi, uposathakumāro sāriputto, sesabhātikā therānutherā, parisā buddhaparisā, ovādadāyako amacco pana ahameva ahosinti.
сам̣вараж̇аад̇агаван̣н̣анаа адтамаа.
Saṃvarajātakavaṇṇanā aṭṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 462. сам̣вараж̇аад̇агам̣ • 462. Saṃvarajātakaṃ
