| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
10. ஸங்வரகதா²வண்ணனா
10. Saṃvarakathāvaṇṇanā
379. இதா³னி ஸங்வரகதா² நாம ஹோதி. தத்த² யேஸங் தாவதிங்ஸே தே³வே உபாதா³ய ததுத்தரி தே³வேஸு யஸ்மா தே பஞ்ச வேரானி ந ஸமாசரந்தி, தஸ்மா ஸங்வரோ அத்தீ²தி லத்³தி⁴, தே ஸந்தா⁴ய புச்சா² ஸகவாதி³ஸ்ஸ, வேரஸமுதா³சாரங் அபஸ்ஸதோ படிஞ்ஞா இதரஸ்ஸ. ததோ யஸ்மா ஸங்வரோ நாம ஸங்வரிதப்³பே³ அஸங்வரே ஸதி ஹோதி, தஸ்மா அஸங்வரபுச்சா² ஸகவாதி³ஸ்ஸ, தே³வேஸு பாணாதிபாதாதீ³னங் அபா⁴வேன படிக்கே²போ இதரஸ்ஸ.
379. Idāni saṃvarakathā nāma hoti. Tattha yesaṃ tāvatiṃse deve upādāya tatuttari devesu yasmā te pañca verāni na samācaranti, tasmā saṃvaro atthīti laddhi, te sandhāya pucchā sakavādissa, verasamudācāraṃ apassato paṭiññā itarassa. Tato yasmā saṃvaro nāma saṃvaritabbe asaṃvare sati hoti, tasmā asaṃvarapucchā sakavādissa, devesu pāṇātipātādīnaṃ abhāvena paṭikkhepo itarassa.
அத்தி² மனுஸ்ஸேஸூதிஆதி³ ஸங்வரே ஸதி அஸங்வரஸ்ஸ அஸங்வரே ச ஸதி ஸங்வரஸ்ஸ பவத்தித³ஸ்ஸனத்த²ங் வுத்தங்.
Atthi manussesūtiādi saṃvare sati asaṃvarassa asaṃvare ca sati saṃvarassa pavattidassanatthaṃ vuttaṃ.
380. பாணாதிபாதா வேரமணீதி ஆதி³பஞ்ஹேஸு பாணாதிபாதாதீ³னங் அஸமாசரணவஸேன படிஞ்ஞா, பாணாதிபாதாதீ³னங் நத்தி²தாய படிக்கே²போ வேதி³தப்³போ³. படிலோமபஞ்ஹா உத்தானத்தா²யேவ.
380. Pāṇātipātā veramaṇīti ādipañhesu pāṇātipātādīnaṃ asamācaraṇavasena paṭiññā, pāṇātipātādīnaṃ natthitāya paṭikkhepo veditabbo. Paṭilomapañhā uttānatthāyeva.
அவஸானே நத்தி² தே³வேஸு ஸங்வரோதிபஞ்ஹே பாணாதிபாதாதீ³னி கத்வா புன ததோ ஸங்வராபா⁴வங் ஸந்தா⁴ய படிஞ்ஞா ஸகவாதி³ஸ்ஸ. ததோ ச²லவஸேன யதி³ ஸங்வரோ நத்தி², ஸப்³பே³ தே³வா பாணாதிபாதினோதிஆதி³புச்சா² பரவாதி³ஸ்ஸ. தே³வானங் வேரஸமுதா³சாரஸ்ஸ அபா⁴வேன படிக்கே²போ ஸகவாதி³ஸ்ஸ. நஹேவந்தி வசனமத்தங் க³ஹெத்வா லத்³தி⁴பதிட்டா²பனங் பரவாதி³ஸ்ஸ. ஏவங் பதிட்டி²தா பன லத்³தி⁴ அப்பதிட்டி²தாவ ஹோதீதி.
Avasāne natthi devesu saṃvarotipañhe pāṇātipātādīni katvā puna tato saṃvarābhāvaṃ sandhāya paṭiññā sakavādissa. Tato chalavasena yadi saṃvaro natthi, sabbe devā pāṇātipātinotiādipucchā paravādissa. Devānaṃ verasamudācārassa abhāvena paṭikkhepo sakavādissa. Nahevanti vacanamattaṃ gahetvā laddhipatiṭṭhāpanaṃ paravādissa. Evaṃ patiṭṭhitā pana laddhi appatiṭṭhitāva hotīti.
ஸங்வரகதா²வண்ணனா.
Saṃvarakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (30) 10. ஸங்வரகதா² • (30) 10. Saṃvarakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 10. ஸங்வரகதா²வண்ணனா • 10. Saṃvarakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 10. ஸங்வரகதா²வண்ணனா • 10. Saṃvarakathāvaṇṇanā
