| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
10. ஸங்வரகதா²வண்ணனா
10. Saṃvarakathāvaṇṇanā
379. ஆடானாடியஸுத்தே ‘‘ஸந்தி, பி⁴க்க²வே, யக்கா² யேபு⁴ய்யேன பாணாதிபாதா அப்படிவிரதா’’தி (தீ³॰ நி॰ 3.276, 286) ஆக³தத்தா சாதுமஹாராஜிகானங் ஸங்வராஸங்வரஸப்³பா⁴வோ அவிவாத³ஸித்³தோ⁴. யத்த² பன விவாதோ³, தமேவ த³ஸ்ஸெந்தேன தாவதிங்ஸாத³யோ க³ஹிதாதி இமமத்த²ங் த³ஸ்ஸேதுங் ‘‘சாதுமஹாராஜிகான’’ந்தி வுத்தங். ஏவங் ஸதீதி யதி³ தாவதிங்ஸேஸு ஸங்வராஸங்வரோ நத்தி², ஏவங் ஸந்தே. ஸுராபானந்தி எத்தா²பி ‘‘ஸுய்யதீ’’தி பத³ங் ஆனெத்வா ஸம்ப³ந்தி⁴தப்³ப³ங். கத²ங் ஸுய்யதீதி? வுத்தஞ்ஹேதங் கும்ப⁴ஜாதகே –
379. Āṭānāṭiyasutte ‘‘santi, bhikkhave, yakkhā yebhuyyena pāṇātipātā appaṭiviratā’’ti (dī. ni. 3.276, 286) āgatattā cātumahārājikānaṃ saṃvarāsaṃvarasabbhāvo avivādasiddho. Yattha pana vivādo, tameva dassentena tāvatiṃsādayo gahitāti imamatthaṃ dassetuṃ ‘‘cātumahārājikāna’’nti vuttaṃ. Evaṃ satīti yadi tāvatiṃsesu saṃvarāsaṃvaro natthi, evaṃ sante. Surāpānanti etthāpi ‘‘suyyatī’’ti padaṃ ānetvā sambandhitabbaṃ. Kathaṃ suyyatīti? Vuttañhetaṃ kumbhajātake –
‘‘யங் வே பிவித்வா புப்³ப³தே³வா பமத்தா,
‘‘Yaṃ ve pivitvā pubbadevā pamattā,
திதி³வா சுதா ஸஸ்ஸதியா ஸமாயா;
Tidivā cutā sassatiyā samāyā;
தங் தாதி³ஸங் மஜ்ஜமிமங் நிரத்த²ங்,
Taṃ tādisaṃ majjamimaṃ niratthaṃ,
ஜானங் மஹாராஜ கத²ங் பிவெய்யா’’தி. (ஜா॰ 1.16.58);
Jānaṃ mahārāja kathaṃ piveyyā’’ti. (jā. 1.16.58);
தத்த² புப்³ப³தே³வா நாம அஸுரா. தே ஹி தாவதிங்ஸானங் உப்பத்திதோ புப்³ப³தே³வாதி பஞ்ஞாயிங்ஸு. பமத்தாதி ஸுராபானேன பமாத³ங் ஆபன்னா. திதி³வாதி மனுஸ்ஸசாதுமஹாராஜிகலோகே உபாதா³ய ததியலோகபூ⁴தா தே³வட்டா²னா, நாமமேவ வா ஏதங் தஸ்ஸ தே³வட்டா²னஸ்ஸ. ஸஸ்ஸதியாதி கேவலங் தீ³கா⁴யுகதங் ஸந்தா⁴ய வத³தி. ஸமாயா ஸஹ அத்தனோ அஸுரமாயாய, அஸுரமந்தேஹி ஸத்³தி⁴ங் சுதாதி அத்தோ². அட்ட²கதா²யஞ்ச வுத்தங் ‘‘ஆக³ந்துகதே³வபுத்தா ஆக³தாதி நேவாஸிகா க³ந்த⁴பானங் ஸஜ்ஜயிங்ஸு. ஸக்கோ ஸகபரிஸாய ஸஞ்ஞமதா³ஸீ’’தி. தேனாஹ ‘‘தேஸங் ஸுராபானங் அஸங்வரோ ந ஹோதீதி வத்தப்³ப³ங் ஹோதீ’’தி. எத்த² ச தாவதிங்ஸானங் பாதுபா⁴வதோ பட்டா²ய ஸுராபானம்பி தத்த² நாஹோஸி, பகே³வ பாணாதிபாதாத³யோதி விரமிதப்³பா³பா⁴வதோ ஏவ தாவதிங்ஸதோ பட்டா²ய உபரி தே³வலோகேஸு ஸமாதா³னஸம்பத்தவிரதிவஸேன புரேதப்³பா³ ஸங்வரா ந ஸந்தி, லோகுத்தரா பன ஸந்தியேவ. ததா² தேஹி பஹாதப்³பா³ அஸங்வரா. ந ஹி அப்பஹீனானுஸயானங் மக்³க³வஜ்ஜா² கிலேஸா ந ஸந்தீதி.
Tattha pubbadevā nāma asurā. Te hi tāvatiṃsānaṃ uppattito pubbadevāti paññāyiṃsu. Pamattāti surāpānena pamādaṃ āpannā. Tidivāti manussacātumahārājikaloke upādāya tatiyalokabhūtā devaṭṭhānā, nāmameva vā etaṃ tassa devaṭṭhānassa. Sassatiyāti kevalaṃ dīghāyukataṃ sandhāya vadati. Samāyā saha attano asuramāyāya, asuramantehi saddhiṃ cutāti attho. Aṭṭhakathāyañca vuttaṃ ‘‘āgantukadevaputtā āgatāti nevāsikā gandhapānaṃ sajjayiṃsu. Sakko sakaparisāya saññamadāsī’’ti. Tenāha ‘‘tesaṃ surāpānaṃ asaṃvaro na hotīti vattabbaṃ hotī’’ti. Ettha ca tāvatiṃsānaṃ pātubhāvato paṭṭhāya surāpānampi tattha nāhosi, pageva pāṇātipātādayoti viramitabbābhāvato eva tāvatiṃsato paṭṭhāya upari devalokesu samādānasampattavirativasena puretabbā saṃvarā na santi, lokuttarā pana santiyeva. Tathā tehi pahātabbā asaṃvarā. Na hi appahīnānusayānaṃ maggavajjhā kilesā na santīti.
ஸங்வரகதா²வண்ணனா நிட்டி²தா.
Saṃvarakathāvaṇṇanā niṭṭhitā.
ததியவக்³க³வண்ணனா நிட்டி²தா.
Tatiyavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (30) 10. ஸங்வரகதா² • (30) 10. Saṃvarakathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 10. ஸங்வரகதா²வண்ணனா • 10. Saṃvarakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 10. ஸங்வரகதா²வண்ணனா • 10. Saṃvarakathāvaṇṇanā
