| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
१०. संवरकथावण्णना
10. Saṃvarakathāvaṇṇanā
३७९. इदानि संवरकथा नाम होति। तत्थ येसं तावतिंसे देवे उपादाय ततुत्तरि देवेसु यस्मा ते पञ्च वेरानि न समाचरन्ति, तस्मा संवरो अत्थीति लद्धि, ते सन्धाय पुच्छा सकवादिस्स, वेरसमुदाचारं अपस्सतो पटिञ्ञा इतरस्स। ततो यस्मा संवरो नाम संवरितब्बे असंवरे सति होति, तस्मा असंवरपुच्छा सकवादिस्स, देवेसु पाणातिपातादीनं अभावेन पटिक्खेपो इतरस्स।
379. Idāni saṃvarakathā nāma hoti. Tattha yesaṃ tāvatiṃse deve upādāya tatuttari devesu yasmā te pañca verāni na samācaranti, tasmā saṃvaro atthīti laddhi, te sandhāya pucchā sakavādissa, verasamudācāraṃ apassato paṭiññā itarassa. Tato yasmā saṃvaro nāma saṃvaritabbe asaṃvare sati hoti, tasmā asaṃvarapucchā sakavādissa, devesu pāṇātipātādīnaṃ abhāvena paṭikkhepo itarassa.
अत्थि मनुस्सेसूतिआदि संवरे सति असंवरस्स असंवरे च सति संवरस्स पवत्तिदस्सनत्थं वुत्तं।
Atthi manussesūtiādi saṃvare sati asaṃvarassa asaṃvare ca sati saṃvarassa pavattidassanatthaṃ vuttaṃ.
३८०. पाणातिपाता वेरमणीति आदिपञ्हेसु पाणातिपातादीनं असमाचरणवसेन पटिञ्ञा, पाणातिपातादीनं नत्थिताय पटिक्खेपो वेदितब्बो। पटिलोमपञ्हा उत्तानत्थायेव।
380. Pāṇātipātā veramaṇīti ādipañhesu pāṇātipātādīnaṃ asamācaraṇavasena paṭiññā, pāṇātipātādīnaṃ natthitāya paṭikkhepo veditabbo. Paṭilomapañhā uttānatthāyeva.
अवसाने नत्थि देवेसु संवरोतिपञ्हे पाणातिपातादीनि कत्वा पुन ततो संवराभावं सन्धाय पटिञ्ञा सकवादिस्स। ततो छलवसेन यदि संवरो नत्थि, सब्बे देवा पाणातिपातिनोतिआदिपुच्छा परवादिस्स। देवानं वेरसमुदाचारस्स अभावेन पटिक्खेपो सकवादिस्स। नहेवन्ति वचनमत्तं गहेत्वा लद्धिपतिट्ठापनं परवादिस्स। एवं पतिट्ठिता पन लद्धि अप्पतिट्ठिताव होतीति।
Avasāne natthi devesu saṃvarotipañhe pāṇātipātādīni katvā puna tato saṃvarābhāvaṃ sandhāya paṭiññā sakavādissa. Tato chalavasena yadi saṃvaro natthi, sabbe devā pāṇātipātinotiādipucchā paravādissa. Devānaṃ verasamudācārassa abhāvena paṭikkhepo sakavādissa. Nahevanti vacanamattaṃ gahetvā laddhipatiṭṭhāpanaṃ paravādissa. Evaṃ patiṭṭhitā pana laddhi appatiṭṭhitāva hotīti.
संवरकथावण्णना।
Saṃvarakathāvaṇṇanā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (३०) १०. संवरकथा • (30) 10. Saṃvarakathā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / १०. संवरकथावण्णना • 10. Saṃvarakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / १०. संवरकथावण्णना • 10. Saṃvarakathāvaṇṇanā
