| Library / Tipiṭaka / ติปิฎก • Tipiṭaka / ปญฺจปกรณ-อฎฺฐกถา • Pañcapakaraṇa-aṭṭhakathā |
๑๐. สํวรกถาวณฺณนา
10. Saṃvarakathāvaṇṇanā
๓๗๙. อิทานิ สํวรกถา นาม โหติฯ ตตฺถ เยสํ ตาวติํเส เทเว อุปาทาย ตตุตฺตริ เทเวสุ ยสฺมา เต ปญฺจ เวรานิ น สมาจรนฺติ, ตสฺมา สํวโร อตฺถีติ ลทฺธิ, เต สนฺธาย ปุจฺฉา สกวาทิสฺส, เวรสมุทาจารํ อปสฺสโต ปฎิญฺญา อิตรสฺสฯ ตโต ยสฺมา สํวโร นาม สํวริตเพฺพ อสํวเร สติ โหติ, ตสฺมา อสํวรปุจฺฉา สกวาทิสฺส, เทเวสุ ปาณาติปาตาทีนํ อภาเวน ปฎิเกฺขโป อิตรสฺสฯ
379. Idāni saṃvarakathā nāma hoti. Tattha yesaṃ tāvatiṃse deve upādāya tatuttari devesu yasmā te pañca verāni na samācaranti, tasmā saṃvaro atthīti laddhi, te sandhāya pucchā sakavādissa, verasamudācāraṃ apassato paṭiññā itarassa. Tato yasmā saṃvaro nāma saṃvaritabbe asaṃvare sati hoti, tasmā asaṃvarapucchā sakavādissa, devesu pāṇātipātādīnaṃ abhāvena paṭikkhepo itarassa.
อตฺถิ มนุเสฺสสูติอาทิ สํวเร สติ อสํวรสฺส อสํวเร จ สติ สํวรสฺส ปวตฺติทสฺสนตฺถํ วุตฺตํฯ
Atthi manussesūtiādi saṃvare sati asaṃvarassa asaṃvare ca sati saṃvarassa pavattidassanatthaṃ vuttaṃ.
๓๘๐. ปาณาติปาตา เวรมณีติ อาทิปเญฺหสุ ปาณาติปาตาทีนํ อสมาจรณวเสน ปฎิญฺญา, ปาณาติปาตาทีนํ นตฺถิตาย ปฎิเกฺขโป เวทิตโพฺพฯ ปฎิโลมปญฺหา อุตฺตานตฺถาเยวฯ
380. Pāṇātipātā veramaṇīti ādipañhesu pāṇātipātādīnaṃ asamācaraṇavasena paṭiññā, pāṇātipātādīnaṃ natthitāya paṭikkhepo veditabbo. Paṭilomapañhā uttānatthāyeva.
อวสาเน นตฺถิ เทเวสุ สํวโรติปเญฺห ปาณาติปาตาทีนิ กตฺวา ปุน ตโต สํวราภาวํ สนฺธาย ปฎิญฺญา สกวาทิสฺสฯ ตโต ฉลวเสน ยทิ สํวโร นตฺถิ, สเพฺพ เทวา ปาณาติปาติโนติอาทิปุจฺฉา ปรวาทิสฺสฯ เทวานํ เวรสมุทาจารสฺส อภาเวน ปฎิเกฺขโป สกวาทิสฺสฯ นเหวนฺติ วจนมตฺตํ คเหตฺวา ลทฺธิปติฎฺฐาปนํ ปรวาทิสฺสฯ เอวํ ปติฎฺฐิตา ปน ลทฺธิ อปฺปติฎฺฐิตาว โหตีติฯ
Avasāne natthi devesu saṃvarotipañhe pāṇātipātādīni katvā puna tato saṃvarābhāvaṃ sandhāya paṭiññā sakavādissa. Tato chalavasena yadi saṃvaro natthi, sabbe devā pāṇātipātinotiādipucchā paravādissa. Devānaṃ verasamudācārassa abhāvena paṭikkhepo sakavādissa. Nahevanti vacanamattaṃ gahetvā laddhipatiṭṭhāpanaṃ paravādissa. Evaṃ patiṭṭhitā pana laddhi appatiṭṭhitāva hotīti.
สํวรกถาวณฺณนาฯ
Saṃvarakathāvaṇṇanā.
Related texts:
ติปิฎก (มูล) • Tipiṭaka (Mūla) / อภิธมฺมปิฎก • Abhidhammapiṭaka / กถาวตฺถุปาฬิ • Kathāvatthupāḷi / (๓๐) ๑๐. สํวรกถา • (30) 10. Saṃvarakathā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-มูลฎีกา • Pañcapakaraṇa-mūlaṭīkā / ๑๐. สํวรกถาวณฺณนา • 10. Saṃvarakathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-อนุฎีกา • Pañcapakaraṇa-anuṭīkā / ๑๐. สํวรกถาวณฺณนา • 10. Saṃvarakathāvaṇṇanā
