| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၁၀. သံဝရကထာဝဏ္ဏနာ
10. Saṃvarakathāvaṇṇanā
၃၇၉. ဣဒာနိ သံဝရကထာ နာမ ဟောတိ။ တတ္ထ ယေသံ တာဝတိံသေ ဒေဝေ ဥပာဒာယ တတုတ္တရိ ဒေဝေသု ယသ္မာ တေ ပဉ္စ ဝေရာနိ န သမာစရန္တိ, တသ္မာ သံဝရော အတ္ထီတိ လဒ္ဓိ, တေ သန္ဓာယ ပုစ္ဆာ သကဝာဒိသ္သ, ဝေရသမုဒာစာရံ အပသ္သတော ပဋိညာ ဣတရသ္သ။ တတော ယသ္မာ သံဝရော နာမ သံဝရိတဗ္ဗေ အသံဝရေ သတိ ဟောတိ, တသ္မာ အသံဝရပုစ္ဆာ သကဝာဒိသ္သ, ဒေဝေသု ပာဏာတိပာတာဒီနံ အဘာဝေန ပဋိက္ခေပော ဣတရသ္သ။
379. Idāni saṃvarakathā nāma hoti. Tattha yesaṃ tāvatiṃse deve upādāya tatuttari devesu yasmā te pañca verāni na samācaranti, tasmā saṃvaro atthīti laddhi, te sandhāya pucchā sakavādissa, verasamudācāraṃ apassato paṭiññā itarassa. Tato yasmā saṃvaro nāma saṃvaritabbe asaṃvare sati hoti, tasmā asaṃvarapucchā sakavādissa, devesu pāṇātipātādīnaṃ abhāvena paṭikkhepo itarassa.
အတ္ထိ မနုသ္သေသူတိအာဒိ သံဝရေ သတိ အသံဝရသ္သ အသံဝရေ စ သတိ သံဝရသ္သ ပဝတ္တိဒသ္သနတ္ထံ ဝုတ္တံ။
Atthi manussesūtiādi saṃvare sati asaṃvarassa asaṃvare ca sati saṃvarassa pavattidassanatthaṃ vuttaṃ.
၃၈၀. ပာဏာတိပာတာ ဝေရမဏီတိ အာဒိပဉ္ဟေသု ပာဏာတိပာတာဒီနံ အသမာစရဏဝသေန ပဋိညာ, ပာဏာတိပာတာဒီနံ နတ္ထိတာယ ပဋိက္ခေပော ဝေဒိတဗ္ဗော။ ပဋိလောမပဉ္ဟာ ဥတ္တာနတ္ထာယေဝ။
380. Pāṇātipātā veramaṇīti ādipañhesu pāṇātipātādīnaṃ asamācaraṇavasena paṭiññā, pāṇātipātādīnaṃ natthitāya paṭikkhepo veditabbo. Paṭilomapañhā uttānatthāyeva.
အဝသာနေ နတ္ထိ ဒေဝေသု သံဝရောတိပဉ္ဟေ ပာဏာတိပာတာဒီနိ ကတ္ဝာ ပုန တတော သံဝရာဘာဝံ သန္ဓာယ ပဋိညာ သကဝာဒိသ္သ။ တတော ဆလဝသေန ယဒိ သံဝရော နတ္ထိ, သဗ္ဗေ ဒေဝာ ပာဏာတိပာတိနောတိအာဒိပုစ္ဆာ ပရဝာဒိသ္သ။ ဒေဝာနံ ဝေရသမုဒာစာရသ္သ အဘာဝေန ပဋိက္ခေပော သကဝာဒိသ္သ။ နဟေဝန္တိ ဝစနမတ္တံ ဂဟေတ္ဝာ လဒ္ဓိပတိဋ္ဌာပနံ ပရဝာဒိသ္သ။ ဧဝံ ပတိဋ္ဌိတာ ပန လဒ္ဓိ အပ္ပတိဋ္ဌိတာဝ ဟောတီတိ။
Avasāne natthi devesu saṃvarotipañhe pāṇātipātādīni katvā puna tato saṃvarābhāvaṃ sandhāya paṭiññā sakavādissa. Tato chalavasena yadi saṃvaro natthi, sabbe devā pāṇātipātinotiādipucchā paravādissa. Devānaṃ verasamudācārassa abhāvena paṭikkhepo sakavādissa. Nahevanti vacanamattaṃ gahetvā laddhipatiṭṭhāpanaṃ paravādissa. Evaṃ patiṭṭhitā pana laddhi appatiṭṭhitāva hotīti.
သံဝရကထာဝဏ္ဏနာ။
Saṃvarakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၃၀) ၁၀. သံဝရကထာ • (30) 10. Saṃvarakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁၀. သံဝရကထာဝဏ္ဏနာ • 10. Saṃvarakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁၀. သံဝရကထာဝဏ္ဏနာ • 10. Saṃvarakathāvaṇṇanā
