| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
10. සංවරකථාවණ්‌ණනා
10. Saṃvarakathāvaṇṇanā
379. ඉදානි සංවරකථා නාම හොති. තත්‌ථ යෙසං තාවතිංසෙ දෙවෙ උපාදාය තතුත්‌තරි දෙවෙසු යස්‌මා තෙ පඤ්‌ච වෙරානි න සමාචරන්‌ති, තස්‌මා සංවරො අත්‌ථීති ලද්‌ධි, තෙ සන්‌ධාය පුච්‌ඡා සකවාදිස්‌ස, වෙරසමුදාචාරං අපස්‌සතො පටිඤ්‌ඤා ඉතරස්‌ස. තතො යස්‌මා සංවරො නාම සංවරිතබ්‌බෙ අසංවරෙ සති හොති, තස්‌මා අසංවරපුච්‌ඡා සකවාදිස්‌ස, දෙවෙසු පාණාතිපාතාදීනං අභාවෙන පටික්‌ඛෙපො ඉතරස්‌ස.
379. Idāni saṃvarakathā nāma hoti. Tattha yesaṃ tāvatiṃse deve upādāya tatuttari devesu yasmā te pañca verāni na samācaranti, tasmā saṃvaro atthīti laddhi, te sandhāya pucchā sakavādissa, verasamudācāraṃ apassato paṭiññā itarassa. Tato yasmā saṃvaro nāma saṃvaritabbe asaṃvare sati hoti, tasmā asaṃvarapucchā sakavādissa, devesu pāṇātipātādīnaṃ abhāvena paṭikkhepo itarassa.
අත්‌ථි මනුස්‌සෙසූතිආදි සංවරෙ සති අසංවරස්‌ස අසංවරෙ ච සති සංවරස්‌ස පවත්‌තිදස්‌සනත්‌ථං වුත්‌තං.
Atthi manussesūtiādi saṃvare sati asaṃvarassa asaṃvare ca sati saṃvarassa pavattidassanatthaṃ vuttaṃ.
380. පාණාතිපාතා වෙරමණීති ආදිපඤ්‌හෙසු පාණාතිපාතාදීනං අසමාචරණවසෙන පටිඤ්‌ඤා, පාණාතිපාතාදීනං නත්‌ථිතාය පටික්‌ඛෙපො වෙදිතබ්‌බො. පටිලොමපඤ්‌හා උත්‌තානත්‌ථායෙව.
380. Pāṇātipātā veramaṇīti ādipañhesu pāṇātipātādīnaṃ asamācaraṇavasena paṭiññā, pāṇātipātādīnaṃ natthitāya paṭikkhepo veditabbo. Paṭilomapañhā uttānatthāyeva.
අවසානෙ නත්‌ථි දෙවෙසු සංවරොතිපඤ්‌හෙ පාණාතිපාතාදීනි කත්‌වා පුන තතො සංවරාභාවං සන්‌ධාය පටිඤ්‌ඤා සකවාදිස්‌ස. තතො ඡලවසෙන යදි සංවරො නත්‌ථි, සබ්‌බෙ දෙවා පාණාතිපාතිනොතිආදිපුච්‌ඡා පරවාදිස්‌ස. දෙවානං වෙරසමුදාචාරස්‌ස අභාවෙන පටික්‌ඛෙපො සකවාදිස්‌ස. නහෙවන්‌ති වචනමත්‌තං ගහෙත්‌වා ලද්‌ධිපතිට්‌ඨාපනං පරවාදිස්‌ස. එවං පතිට්‌ඨිතා පන ලද්‌ධි අප්‌පතිට්‌ඨිතාව හොතීති.
Avasāne natthi devesu saṃvarotipañhe pāṇātipātādīni katvā puna tato saṃvarābhāvaṃ sandhāya paṭiññā sakavādissa. Tato chalavasena yadi saṃvaro natthi, sabbe devā pāṇātipātinotiādipucchā paravādissa. Devānaṃ verasamudācārassa abhāvena paṭikkhepo sakavādissa. Nahevanti vacanamattaṃ gahetvā laddhipatiṭṭhāpanaṃ paravādissa. Evaṃ patiṭṭhitā pana laddhi appatiṭṭhitāva hotīti.
සංවරකථාවණ්‌ණනා.
Saṃvarakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (30) 10. සංවරකථා • (30) 10. Saṃvarakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 10. සංවරකථාවණ්‌ණනා • 10. Saṃvarakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 10. සංවරකථාවණ්‌ණනා • 10. Saṃvarakathāvaṇṇanā
