| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. ஸங்வரஸுத்தங்
5. Saṃvarasuttaṃ
98. ‘‘ஸங்வரஞ்ச வோ, பி⁴க்க²வே, தே³ஸெஸ்ஸாமி, அஸங்வரஞ்ச. தங் ஸுணாத². கத²ஞ்ச, பி⁴க்க²வே, அஸங்வரோ ஹோதி? ஸந்தி, பி⁴க்க²வே, சக்கு²விஞ்ஞெய்யா ரூபா இட்டா² கந்தா மனாபா பியரூபா காமூபஸங்ஹிதா ரஜனீயா. தஞ்சே பி⁴க்கு² அபி⁴னந்த³தி அபி⁴வத³தி அஜ்ஜோ²ஸாய திட்ட²தி, வேதி³தப்³ப³மேதங், பி⁴க்க²வே, பி⁴க்கு²னா – ‘பரிஹாயாமி குஸலேஹி த⁴ம்மேஹி’. பரிஹானஞ்ஹேதங் வுத்தங் ப⁴க³வதாதி…பே॰… ஸந்தி, பி⁴க்க²வே, ஜிவ்ஹாவிஞ்ஞெய்யா ரஸா…பே॰… ஸந்தி, பி⁴க்க²வே, மனோவிஞ்ஞெய்யா த⁴ம்மா இட்டா² கந்தா மனாபா பியரூபா காமூபஸங்ஹிதா ரஜனீயா. தஞ்சே பி⁴க்கு² அபி⁴னந்த³தி அபி⁴வத³தி அஜ்ஜோ²ஸாய திட்ட²தி, வேதி³தப்³ப³மேதங், பி⁴க்க²வே, பி⁴க்கு²னா – ‘பரிஹாயாமி குஸலேஹி த⁴ம்மேஹி’. பரிஹானஞ்ஹேதங் வுத்தங் ப⁴க³வதாதி. ஏவங் கோ², பி⁴க்க²வே, அஸங்வரோ ஹோதி.
98. ‘‘Saṃvarañca vo, bhikkhave, desessāmi, asaṃvarañca. Taṃ suṇātha. Kathañca, bhikkhave, asaṃvaro hoti? Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati, veditabbametaṃ, bhikkhave, bhikkhunā – ‘parihāyāmi kusalehi dhammehi’. Parihānañhetaṃ vuttaṃ bhagavatāti…pe… santi, bhikkhave, jivhāviññeyyā rasā…pe… santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati, veditabbametaṃ, bhikkhave, bhikkhunā – ‘parihāyāmi kusalehi dhammehi’. Parihānañhetaṃ vuttaṃ bhagavatāti. Evaṃ kho, bhikkhave, asaṃvaro hoti.
‘‘கத²ஞ்ச, பி⁴க்க²வே, ஸங்வரோ ஹோதி? ஸந்தி, பி⁴க்க²வே, சக்கு²விஞ்ஞெய்யா ரூபா இட்டா² கந்தா மனாபா பியரூபா காமூபஸங்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி, வேதி³தப்³ப³மேதங், பி⁴க்க²வே, பி⁴க்கு²னா – ‘ந பரிஹாயாமி குஸலேஹி த⁴ம்மேஹி’. அபரிஹானஞ்ஹேதங் வுத்தங் ப⁴க³வதாதி …பே॰… ஸந்தி, பி⁴க்க²வே, ஜிவ்ஹாவிஞ்ஞெய்யா ரஸா…பே॰… ஸந்தி, பி⁴க்க²வே, மனோவிஞ்ஞெய்யா த⁴ம்மா இட்டா² கந்தா மனாபா பியரூபா காமூபஸங்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி, வேதி³தப்³ப³மேதங் பி⁴க்கு²னா – ‘ந பரிஹாயாமி குஸலேஹி த⁴ம்மேஹி’. அபரிஹானஞ்ஹேதங் வுத்தங் ப⁴க³வதாதி. ஏவங் கோ², பி⁴க்க²வே, ஸங்வரோ ஹோதீ’’தி. பஞ்சமங்.
‘‘Kathañca, bhikkhave, saṃvaro hoti? Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati, veditabbametaṃ, bhikkhave, bhikkhunā – ‘na parihāyāmi kusalehi dhammehi’. Aparihānañhetaṃ vuttaṃ bhagavatāti …pe… santi, bhikkhave, jivhāviññeyyā rasā…pe… santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati, veditabbametaṃ bhikkhunā – ‘na parihāyāmi kusalehi dhammehi’. Aparihānañhetaṃ vuttaṃ bhagavatāti. Evaṃ kho, bhikkhave, saṃvaro hotī’’ti. Pañcamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. ஸங்வரஸுத்தவண்ணனா • 5. Saṃvarasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. ஸங்வரஸுத்தவண்ணனா • 5. Saṃvarasuttavaṇṇanā
