| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. ஸங்வரஸுத்தவண்ணனா
4. Saṃvarasuttavaṇṇanā
14. சதுத்தே² ஸங்வராதீ³னங் ஸாத⁴னவஸேன பத³ஹதி ஏதேஹீதி பதா⁴னானி. ஸங்வரந்தஸ்ஸ உப்பன்னவீரியந்தி யதா² அபி⁴ஜ்ஜா²த³யோ ந உப்பஜ்ஜந்தி, ஏவங் ஸதியா உபட்டா²னே சக்கா²தீ³னங் பித³ஹனே அனலஸஸ்ஸ உப்பன்னவீரியங். பஜஹந்தஸ்ஸாதி வினோதெ³ந்தஸ்ஸ. உப்பன்னவீரியந்தி தஸ்ஸேவ பஹானஸ்ஸ ஸாத⁴னவஸேன பவத்தவீரியங். பா⁴வெந்தஸ்ஸ உப்பன்னவீரியந்தி எத்தா²பி ஏஸேவ நயோ. ஸமாதி⁴னிமித்தந்தி ஸமாதி⁴ ஏவ. புரிமுப்பன்னஸமாதி⁴ ஹி பரதோ உப்பஜ்ஜனகஸமாதி⁴ஸ்ஸ காரணங் ஹோதீதி ‘‘ஸமாதி⁴னிமித்த’’ந்தி வுத்தங்.
14. Catutthe saṃvarādīnaṃ sādhanavasena padahati etehīti padhānāni. Saṃvarantassa uppannavīriyanti yathā abhijjhādayo na uppajjanti, evaṃ satiyā upaṭṭhāne cakkhādīnaṃ pidahane analasassa uppannavīriyaṃ. Pajahantassāti vinodentassa. Uppannavīriyanti tasseva pahānassa sādhanavasena pavattavīriyaṃ. Bhāventassa uppannavīriyanti etthāpi eseva nayo. Samādhinimittanti samādhi eva. Purimuppannasamādhi hi parato uppajjanakasamādhissa kāraṇaṃ hotīti ‘‘samādhinimitta’’nti vuttaṃ.
உபதி⁴விவேகத்தாதி க²ந்தூ⁴பதி⁴ஆதி³உபதீ⁴ஹி விவித்தத்தா வினிஸ்ஸடத்தா. தங் ஆக³ம்மாதி தங் நிப்³பா³னங் மக்³கே³ன அதி⁴க³மஹேது. ராகா³த³யோ விரஜ்ஜந்தி எத்த², ஏதேனாதி விராகோ³. ஏவங் நிரோதோ⁴பி த³ட்ட²ப்³போ³. யஸ்மா இத⁴ பொ³ஜ்ஜ²ங்க³மிஸ்ஸகவஸேன இச்சி²தா, தஸ்மா ‘‘ஆரம்மணவஸேன வா அதி⁴க³ந்தப்³ப³வஸேன வா’’தி வுத்தங். தத்த² அதி⁴க³ந்தப்³ப³வஸேனாதி தன்னின்னதாவஸேன. வொஸ்ஸக்³க³பரிணாமிந்தி வொஸ்ஸக்³க³வஸேன பரிணாமிதங் பரிச்சஜனவஸேன சேவ பக்க²ந்த³னவஸேன ச பரிணாமனஸீலங். தேனாஹ ‘‘த்³வே வொஸ்ஸக்³கா³’’திஆதி³. க²ந்தா⁴னங் பரிச்சஜனங் நாம தப்படிப³த்³த⁴கிலேஸப்பஹானவஸேனாதி யேனாகாரேன விபஸ்ஸனா கிலேஸே பஜஹதி, தேனேவாகாரேன தன்னிமித்தக்க²ந்தே⁴ ச பஜஹதீதி வத்தப்³ப³தங் அரஹதீதி ஆஹ ‘‘விபஸ்ஸனா…பே॰… பரிச்சஜதீ’’தி. யஸ்மா விபஸ்ஸனா வுட்டா²னகா³மினிபா⁴வங் பாபுணந்தீ நின்னபோணபப்³பா⁴ரபா⁴வேன ஏகங்ஸதோ நிப்³பா³னங் பக்க²ந்த³தீதி வத்தப்³ப³தங் லப⁴தி, மக்³கோ³ ச ஸமுச்சே²த³வஸேன கிலேஸே க²ந்தே⁴ ச ராக³ங் பரிச்சஜதி, தஸ்மா யதா²க்கமங் விபஸ்ஸனாமக்³கா³னங் வஸேன பக்க²ந்த³னபரிச்சாக³வொஸ்ஸக்³கா³ வேதி³தப்³பா³. வோஸக்³க³த்தா²யாதி பரிச்சாக³வொஸ்ஸக்³க³த்தா²ய சேவ பக்க²ந்த³னவொஸ்ஸக்³க³த்தா²ய ச. பரிணமதீதி பரிச்சஜதி. தங் பன பரிணாமனங் வுட்டா²னகா³மினிபா⁴வப்பத்தியா சேவ அரியமக்³க³பா⁴வப்பத்தியா ச இச்சி²தந்தி ஆஹ ‘‘விபஸ்ஸனாபா⁴வஞ்ச மக்³க³பா⁴வஞ்ச பாபுணாதீ’’தி. ஸேஸபதே³ஸூதி ‘‘த⁴ம்மவிசயஸம்பொ³ஜ்ஜ²ங்க³ங் பா⁴வேதீ’’திஆதீ³ஸு ஸேஸஸம்பொ³ஜ்ஜ²ங்க³கொட்டா²ஸேஸு.
Upadhivivekattāti khandhūpadhiādiupadhīhi vivittattā vinissaṭattā. Taṃ āgammāti taṃ nibbānaṃ maggena adhigamahetu. Rāgādayo virajjanti ettha, etenāti virāgo. Evaṃ nirodhopi daṭṭhabbo. Yasmā idha bojjhaṅgamissakavasena icchitā, tasmā ‘‘ārammaṇavasena vā adhigantabbavasena vā’’ti vuttaṃ. Tattha adhigantabbavasenāti tanninnatāvasena. Vossaggapariṇāminti vossaggavasena pariṇāmitaṃ pariccajanavasena ceva pakkhandanavasena ca pariṇāmanasīlaṃ. Tenāha ‘‘dve vossaggā’’tiādi. Khandhānaṃ pariccajanaṃ nāma tappaṭibaddhakilesappahānavasenāti yenākārena vipassanā kilese pajahati, tenevākārena tannimittakkhandhe ca pajahatīti vattabbataṃ arahatīti āha ‘‘vipassanā…pe… pariccajatī’’ti. Yasmā vipassanā vuṭṭhānagāminibhāvaṃ pāpuṇantī ninnapoṇapabbhārabhāvena ekaṃsato nibbānaṃ pakkhandatīti vattabbataṃ labhati, maggo ca samucchedavasena kilese khandhe ca rāgaṃ pariccajati, tasmā yathākkamaṃ vipassanāmaggānaṃ vasena pakkhandanapariccāgavossaggā veditabbā. Vosaggatthāyāti pariccāgavossaggatthāya ceva pakkhandanavossaggatthāya ca. Pariṇamatīti pariccajati. Taṃ pana pariṇāmanaṃ vuṭṭhānagāminibhāvappattiyā ceva ariyamaggabhāvappattiyā ca icchitanti āha ‘‘vipassanābhāvañca maggabhāvañca pāpuṇātī’’ti. Sesapadesūti ‘‘dhammavicayasambojjhaṅgaṃ bhāvetī’’tiādīsu sesasambojjhaṅgakoṭṭhāsesu.
ப⁴த்³த³கந்தி அப⁴த்³த³கானங் நீவரணாதி³பாபத⁴ம்மானங் விக்க²ம்ப⁴னேன ராக³விக³மனேன ஏகந்தஹிதத்தா து³ல்லப⁴த்தா ச ப⁴த்³த³கங் ஸுந்த³ரங். ந ஹி அஞ்ஞங் ஸமாதி⁴னிமித்தங் ஏவங் து³ல்லப⁴ங் ராக³ஸ்ஸ உஜுவிபச்சனீகபூ⁴தங் அத்தி². அனுரக்க²தீதி எத்த² அனுரக்க²னா நாம அதி⁴க³தஸமாதி⁴தோ யதா² பரிஹானி ந ஹோதி, ஏவங் படிபத்திஸாஸன-தப்படிபக்க²விக³மனேனாதி ஆஹ ‘‘ஸமாதீ⁴’’திஆதி³. அட்டி²கஸஞ்ஞாதி³காதி அட்டி²கஜ்ஜா²னாதி³கா. ஸஞ்ஞாஸீஸேன ஹி ஜா²னங் வத³தி. ஸேஸமெத்த² உத்தானமேவ.
Bhaddakanti abhaddakānaṃ nīvaraṇādipāpadhammānaṃ vikkhambhanena rāgavigamanena ekantahitattā dullabhattā ca bhaddakaṃ sundaraṃ. Na hi aññaṃ samādhinimittaṃ evaṃ dullabhaṃ rāgassa ujuvipaccanīkabhūtaṃ atthi. Anurakkhatīti ettha anurakkhanā nāma adhigatasamādhito yathā parihāni na hoti, evaṃ paṭipattisāsana-tappaṭipakkhavigamanenāti āha ‘‘samādhī’’tiādi. Aṭṭhikasaññādikāti aṭṭhikajjhānādikā. Saññāsīsena hi jhānaṃ vadati. Sesamettha uttānameva.
ஸங்வரஸுத்தவண்ணனா நிட்டி²தா.
Saṃvarasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. ஸங்வரஸுத்தங் • 4. Saṃvarasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. ஸங்வரஸுத்தவண்ணனா • 4. Saṃvarasuttavaṇṇanā
