| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৪. সংৰরসুত্তৰণ্ণনা
4. Saṃvarasuttavaṇṇanā
১৪. চতুত্থে পধানানীতি ৰীরিযানি। সংৰরপ্পধানন্তি চক্খাদীনি সংৰরন্তস্স উপ্পন্নৰীরিযং । পহানপ্পধানন্তি কামৰিতক্কাদযো পজহন্তস্স উপ্পন্নৰীরিযং। ভাৰনাপ্পধানন্তি সম্বোজ্ঝঙ্গে ভাৰেন্তস্স উপ্পন্নৰীরিযং। অনুরক্খণাপ্পধানন্তি সমাধিনিমিত্তং অনুরক্খন্তস্স উপ্পন্নৰীরিযং।
14. Catutthe padhānānīti vīriyāni. Saṃvarappadhānanti cakkhādīni saṃvarantassa uppannavīriyaṃ . Pahānappadhānanti kāmavitakkādayo pajahantassa uppannavīriyaṃ. Bhāvanāppadhānanti sambojjhaṅge bhāventassa uppannavīriyaṃ. Anurakkhaṇāppadhānanti samādhinimittaṃ anurakkhantassa uppannavīriyaṃ.
ৰিৰেকনিস্সিতন্তিআদীসু ৰিৰেকো, ৰিরাগো, নিরোধোতি তীণিপি নিব্বানস্স নামানি। নিব্বানং হি উপধিৰিৰেকত্তা ৰিৰেকো, তং আগম্ম রাগাদযো ৰিরজ্জন্তীতি ৰিরাগো, নিরুজ্ঝন্তীতি নিরোধো। তস্মা ৰিৰেকনিস্সিতন্তিআদীসু আরম্মণৰসেন ৰা অধিগন্তব্বৰসেন ৰা নিব্বাননিস্সিতন্তি অত্থো।
Vivekanissitantiādīsu viveko, virāgo, nirodhoti tīṇipi nibbānassa nāmāni. Nibbānaṃ hi upadhivivekattā viveko, taṃ āgamma rāgādayo virajjantīti virāgo, nirujjhantīti nirodho. Tasmā vivekanissitantiādīsu ārammaṇavasena vā adhigantabbavasena vā nibbānanissitanti attho.
ৰোস্সগ্গপরিণামিন্তি এত্থ দ্ৰে ৰোস্সগ্গা – পরিচ্চাগৰোস্সগ্গো চ পক্খন্দনৰোস্সগ্গো চ। তত্থ ৰিপস্সনা তদঙ্গৰসেন কিলেসে চ খন্ধে চ রাগং পরিচ্চজতীতি পরিচ্চাগৰোস্সগ্গো। মগ্গো আরম্মণৰসেন নিব্বানং পক্খন্দতীতি পক্খন্দনৰোস্সগ্গো। তস্মা ৰোস্সগ্গপরিণামিন্তি যথা ভাৰিযমানো সতিসম্বোজ্ঝঙ্গো ৰোস্সগ্গত্থায পরিণমতি, ৰিপস্সনাভাৰঞ্চ মগ্গভাৰঞ্চ পাপুণাতি, এৰং তং ভাৰেতীতি অযমেত্থ অত্থো। সেসপদেসুপি এসেৰ নযো। ভদ্দকন্তি লদ্ধকং। সমাধিনিমিত্তং ৰুচ্চতি অট্ঠিকসঞ্ঞাদিৰসেন অধিগতো সমাধিযেৰ। অনুরক্খতীতি সমাধিপারিপন্থিকধম্মে রাগদোসমোহে সোধেন্তো রক্খতি। এত্থ চ অট্ঠিকসঞ্ঞাদিকা পঞ্চেৰ সঞ্ঞা ৰুত্তা, ইমস্মিং পন ঠানে দসপি অসুভানি ৰিত্থারেত্ৰা কথেতব্বানি। তেসং ৰিত্থারো ৰিসুদ্ধিমগ্গে (ৰিসুদ্ধি॰ ১.১০২ আদযো) ৰুত্তোযেৰ। গাথায সংৰরাদিনিপ্ফাদকং ৰীরিযমেৰ ৰুত্তং। খযং দুক্খস্স পাপুণেতি দুক্খক্খযসঙ্খাতং অরহত্তং পাপুণেয্যাতি।
Vossaggapariṇāminti ettha dve vossaggā – pariccāgavossaggo ca pakkhandanavossaggo ca. Tattha vipassanā tadaṅgavasena kilese ca khandhe ca rāgaṃ pariccajatīti pariccāgavossaggo. Maggo ārammaṇavasena nibbānaṃ pakkhandatīti pakkhandanavossaggo. Tasmā vossaggapariṇāminti yathā bhāviyamāno satisambojjhaṅgo vossaggatthāya pariṇamati, vipassanābhāvañca maggabhāvañca pāpuṇāti, evaṃ taṃ bhāvetīti ayamettha attho. Sesapadesupi eseva nayo. Bhaddakanti laddhakaṃ. Samādhinimittaṃ vuccati aṭṭhikasaññādivasena adhigato samādhiyeva. Anurakkhatīti samādhipāripanthikadhamme rāgadosamohe sodhento rakkhati. Ettha ca aṭṭhikasaññādikā pañceva saññā vuttā, imasmiṃ pana ṭhāne dasapi asubhāni vitthāretvā kathetabbāni. Tesaṃ vitthāro visuddhimagge (visuddhi. 1.102 ādayo) vuttoyeva. Gāthāya saṃvarādinipphādakaṃ vīriyameva vuttaṃ. Khayaṃ dukkhassa pāpuṇeti dukkhakkhayasaṅkhātaṃ arahattaṃ pāpuṇeyyāti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৪. সংৰরসুত্তং • 4. Saṃvarasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৪. সংৰরসুত্তৰণ্ণনা • 4. Saṃvarasuttavaṇṇanā
