| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៤. សំវរសុត្តវណ្ណនា
4. Saṃvarasuttavaṇṇanā
១៤. ចតុត្ថេ បធានានីតិ វីរិយានិ។ សំវរប្បធានន្តិ ចក្ខាទីនិ សំវរន្តស្ស ឧប្បន្នវីរិយំ ។ បហានប្បធានន្តិ កាមវិតក្កាទយោ បជហន្តស្ស ឧប្បន្នវីរិយំ។ ភាវនាប្បធានន្តិ សម្ពោជ្ឈង្គេ ភាវេន្តស្ស ឧប្បន្នវីរិយំ។ អនុរក្ខណាប្បធានន្តិ សមាធិនិមិត្តំ អនុរក្ខន្តស្ស ឧប្បន្នវីរិយំ។
14. Catutthe padhānānīti vīriyāni. Saṃvarappadhānanti cakkhādīni saṃvarantassa uppannavīriyaṃ . Pahānappadhānanti kāmavitakkādayo pajahantassa uppannavīriyaṃ. Bhāvanāppadhānanti sambojjhaṅge bhāventassa uppannavīriyaṃ. Anurakkhaṇāppadhānanti samādhinimittaṃ anurakkhantassa uppannavīriyaṃ.
វិវេកនិស្សិតន្តិអាទីសុ វិវេកោ, វិរាគោ, និរោធោតិ តីណិបិ និព្ពានស្ស នាមានិ។ និព្ពានំ ហិ ឧបធិវិវេកត្តា វិវេកោ, តំ អាគម្ម រាគាទយោ វិរជ្ជន្តីតិ វិរាគោ, និរុជ្ឈន្តីតិ និរោធោ។ តស្មា វិវេកនិស្សិតន្តិអាទីសុ អារម្មណវសេន វា អធិគន្តព្ពវសេន វា និព្ពាននិស្សិតន្តិ អត្ថោ។
Vivekanissitantiādīsu viveko, virāgo, nirodhoti tīṇipi nibbānassa nāmāni. Nibbānaṃ hi upadhivivekattā viveko, taṃ āgamma rāgādayo virajjantīti virāgo, nirujjhantīti nirodho. Tasmā vivekanissitantiādīsu ārammaṇavasena vā adhigantabbavasena vā nibbānanissitanti attho.
វោស្សគ្គបរិណាមិន្តិ ឯត្ថ ទ្វេ វោស្សគ្គា – បរិច្ចាគវោស្សគ្គោ ច បក្ខន្ទនវោស្សគ្គោ ច។ តត្ថ វិបស្សនា តទង្គវសេន កិលេសេ ច ខន្ធេ ច រាគំ បរិច្ចជតីតិ បរិច្ចាគវោស្សគ្គោ។ មគ្គោ អារម្មណវសេន និព្ពានំ បក្ខន្ទតីតិ បក្ខន្ទនវោស្សគ្គោ។ តស្មា វោស្សគ្គបរិណាមិន្តិ យថា ភាវិយមានោ សតិសម្ពោជ្ឈង្គោ វោស្សគ្គត្ថាយ បរិណមតិ, វិបស្សនាភាវញ្ច មគ្គភាវញ្ច បាបុណាតិ, ឯវំ តំ ភាវេតីតិ អយមេត្ថ អត្ថោ។ សេសបទេសុបិ ឯសេវ នយោ។ ភទ្ទកន្តិ លទ្ធកំ។ សមាធិនិមិត្តំ វុច្ចតិ អដ្ឋិកសញ្ញាទិវសេន អធិគតោ សមាធិយេវ។ អនុរក្ខតីតិ សមាធិបារិបន្ថិកធម្មេ រាគទោសមោហេ សោធេន្តោ រក្ខតិ។ ឯត្ថ ច អដ្ឋិកសញ្ញាទិកា បញ្ចេវ សញ្ញា វុត្តា, ឥមស្មិំ បន ឋានេ ទសបិ អសុភានិ វិត្ថារេត្វា កថេតព្ពានិ។ តេសំ វិត្ថារោ វិសុទ្ធិមគ្គេ (វិសុទ្ធិ. ១.១០២ អាទយោ) វុត្តោយេវ។ គាថាយ សំវរាទិនិប្ផាទកំ វីរិយមេវ វុត្តំ។ ខយំ ទុក្ខស្ស បាបុណេតិ ទុក្ខក្ខយសង្ខាតំ អរហត្តំ បាបុណេយ្យាតិ។
Vossaggapariṇāminti ettha dve vossaggā – pariccāgavossaggo ca pakkhandanavossaggo ca. Tattha vipassanā tadaṅgavasena kilese ca khandhe ca rāgaṃ pariccajatīti pariccāgavossaggo. Maggo ārammaṇavasena nibbānaṃ pakkhandatīti pakkhandanavossaggo. Tasmā vossaggapariṇāminti yathā bhāviyamāno satisambojjhaṅgo vossaggatthāya pariṇamati, vipassanābhāvañca maggabhāvañca pāpuṇāti, evaṃ taṃ bhāvetīti ayamettha attho. Sesapadesupi eseva nayo. Bhaddakanti laddhakaṃ. Samādhinimittaṃ vuccati aṭṭhikasaññādivasena adhigato samādhiyeva. Anurakkhatīti samādhipāripanthikadhamme rāgadosamohe sodhento rakkhati. Ettha ca aṭṭhikasaññādikā pañceva saññā vuttā, imasmiṃ pana ṭhāne dasapi asubhāni vitthāretvā kathetabbāni. Tesaṃ vitthāro visuddhimagge (visuddhi. 1.102 ādayo) vuttoyeva. Gāthāya saṃvarādinipphādakaṃ vīriyameva vuttaṃ. Khayaṃ dukkhassa pāpuṇeti dukkhakkhayasaṅkhātaṃ arahattaṃ pāpuṇeyyāti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៤. សំវរសុត្តំ • 4. Saṃvarasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៤. សំវរសុត្តវណ្ណនា • 4. Saṃvarasuttavaṇṇanā
