| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
4. සංවරසුත්‌තවණ්‌ණනා
4. Saṃvarasuttavaṇṇanā
14. චතුත්‌ථෙ පධානානීති වීරියානි. සංවරප්‌පධානන්‌ති චක්‌ඛාදීනි සංවරන්‌තස්‌ස උප්‌පන්‌නවීරියං . පහානප්‌පධානන්‌ති කාමවිතක්‌කාදයො පජහන්‌තස්‌ස උප්‌පන්‌නවීරියං. භාවනාප්‌පධානන්‌ති සම්‌බොජ්‌ඣඞ්‌ගෙ භාවෙන්‌තස්‌ස උප්‌පන්‌නවීරියං. අනුරක්‌ඛණාප්‌පධානන්‌ති සමාධිනිමිත්‌තං අනුරක්‌ඛන්‌තස්‌ස උප්‌පන්‌නවීරියං.
14. Catutthe padhānānīti vīriyāni. Saṃvarappadhānanti cakkhādīni saṃvarantassa uppannavīriyaṃ . Pahānappadhānanti kāmavitakkādayo pajahantassa uppannavīriyaṃ. Bhāvanāppadhānanti sambojjhaṅge bhāventassa uppannavīriyaṃ. Anurakkhaṇāppadhānanti samādhinimittaṃ anurakkhantassa uppannavīriyaṃ.
විවෙකනිස්‌සිතන්‌තිආදීසු විවෙකො, විරාගො, නිරොධොති තීණිපි නිබ්‌බානස්‌ස නාමානි. නිබ්‌බානං හි උපධිවිවෙකත්‌තා විවෙකො, තං ආගම්‌ම රාගාදයො විරජ්‌ජන්‌තීති විරාගො, නිරුජ්‌ඣන්‌තීති නිරොධො. තස්‌මා විවෙකනිස්‌සිතන්‌තිආදීසු ආරම්‌මණවසෙන වා අධිගන්‌තබ්‌බවසෙන වා නිබ්‌බානනිස්‌සිතන්‌ති අත්‌ථො.
Vivekanissitantiādīsu viveko, virāgo, nirodhoti tīṇipi nibbānassa nāmāni. Nibbānaṃ hi upadhivivekattā viveko, taṃ āgamma rāgādayo virajjantīti virāgo, nirujjhantīti nirodho. Tasmā vivekanissitantiādīsu ārammaṇavasena vā adhigantabbavasena vā nibbānanissitanti attho.
වොස්‌සග්‌ගපරිණාමින්‌ති එත්‌ථ ද්‌වෙ වොස්‌සග්‌ගා – පරිච්‌චාගවොස්‌සග්‌ගො ච පක්‌ඛන්‌දනවොස්‌සග්‌ගො ච. තත්‌ථ විපස්‌සනා තදඞ්‌ගවසෙන කිලෙසෙ ච ඛන්‌ධෙ ච රාගං පරිච්‌චජතීති පරිච්‌චාගවොස්‌සග්‌ගො. මග්‌ගො ආරම්‌මණවසෙන නිබ්‌බානං පක්‌ඛන්‌දතීති පක්‌ඛන්‌දනවොස්‌සග්‌ගො. තස්‌මා වොස්‌සග්‌ගපරිණාමින්‌ති යථා භාවියමානො සතිසම්‌බොජ්‌ඣඞ්‌ගො වොස්‌සග්‌ගත්‌ථාය පරිණමති, විපස්‌සනාභාවඤ්‌ච මග්‌ගභාවඤ්‌ච පාපුණාති, එවං තං භාවෙතීති අයමෙත්‌ථ අත්‌ථො. සෙසපදෙසුපි එසෙව නයො. භද්‌දකන්‌ති ලද්‌ධකං. සමාධිනිමිත්‌තං වුච්‌චති අට්‌ඨිකසඤ්‌ඤාදිවසෙන අධිගතො සමාධියෙව. අනුරක්‌ඛතීති සමාධිපාරිපන්‌ථිකධම්‌මෙ රාගදොසමොහෙ සොධෙන්‌තො රක්‌ඛති. එත්‌ථ ච අට්‌ඨිකසඤ්‌ඤාදිකා පඤ්‌චෙව සඤ්‌ඤා වුත්‌තා, ඉමස්‌මිං පන ඨානෙ දසපි අසුභානි විත්‌ථාරෙත්‌වා කථෙතබ්‌බානි. තෙසං විත්‌ථාරො විසුද්‌ධිමග්‌ගෙ (විසුද්‌ධි. 1.102 ආදයො) වුත්‌තොයෙව. ගාථාය සංවරාදිනිප්‌ඵාදකං වීරියමෙව වුත්‌තං. ඛයං දුක්‌ඛස්‌ස පාපුණෙති දුක්‌ඛක්‌ඛයසඞ්‌ඛාතං අරහත්‌තං පාපුණෙය්‍යාති.
Vossaggapariṇāminti ettha dve vossaggā – pariccāgavossaggo ca pakkhandanavossaggo ca. Tattha vipassanā tadaṅgavasena kilese ca khandhe ca rāgaṃ pariccajatīti pariccāgavossaggo. Maggo ārammaṇavasena nibbānaṃ pakkhandatīti pakkhandanavossaggo. Tasmā vossaggapariṇāminti yathā bhāviyamāno satisambojjhaṅgo vossaggatthāya pariṇamati, vipassanābhāvañca maggabhāvañca pāpuṇāti, evaṃ taṃ bhāvetīti ayamettha attho. Sesapadesupi eseva nayo. Bhaddakanti laddhakaṃ. Samādhinimittaṃ vuccati aṭṭhikasaññādivasena adhigato samādhiyeva. Anurakkhatīti samādhipāripanthikadhamme rāgadosamohe sodhento rakkhati. Ettha ca aṭṭhikasaññādikā pañceva saññā vuttā, imasmiṃ pana ṭhāne dasapi asubhāni vitthāretvā kathetabbāni. Tesaṃ vitthāro visuddhimagge (visuddhi. 1.102 ādayo) vuttoyeva. Gāthāya saṃvarādinipphādakaṃ vīriyameva vuttaṃ. Khayaṃ dukkhassa pāpuṇeti dukkhakkhayasaṅkhātaṃ arahattaṃ pāpuṇeyyāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 4. සංවරසුත්‌තං • 4. Saṃvarasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4. සංවරසුත්‌තවණ්‌ණනා • 4. Saṃvarasuttavaṇṇanā
