| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༤. སཾཝརསུཏྟཝཎྞནཱ
4. Saṃvarasuttavaṇṇanā
༡༤. ཙཏུཏྠེ སཾཝརཱདཱིནཾ སཱདྷནཝསེན པདཧཏི ཨེཏེཧཱིཏི པདྷཱནཱནི། སཾཝརནྟསྶ ཨུཔྤནྣཝཱིརིཡནྟི ཡཐཱ ཨབྷིཛ྄ཛྷཱདཡོ ན ཨུཔྤཛྫནྟི, ཨེཝཾ སཏིཡཱ ཨུཔཊྛཱནེ ཙཀྑཱདཱིནཾ པིདཧནེ ཨནལསསྶ ཨུཔྤནྣཝཱིརིཡཾ། པཛཧནྟསྶཱཏི ཝིནོདེནྟསྶ། ཨུཔྤནྣཝཱིརིཡནྟི ཏསྶེཝ པཧཱནསྶ སཱདྷནཝསེན པཝཏྟཝཱིརིཡཾ། བྷཱཝེནྟསྶ ཨུཔྤནྣཝཱིརིཡནྟི ཨེཏྠཱཔི ཨེསེཝ ནཡོ། སམཱདྷིནིམིཏྟནྟི སམཱདྷི ཨེཝ། པུརིམུཔྤནྣསམཱདྷི ཧི པརཏོ ཨུཔྤཛྫནཀསམཱདྷིསྶ ཀཱརཎཾ ཧོཏཱིཏི ‘‘སམཱདྷིནིམིཏྟ’’ནྟི ཝུཏྟཾ།
14. Catutthe saṃvarādīnaṃ sādhanavasena padahati etehīti padhānāni. Saṃvarantassa uppannavīriyanti yathā abhijjhādayo na uppajjanti, evaṃ satiyā upaṭṭhāne cakkhādīnaṃ pidahane analasassa uppannavīriyaṃ. Pajahantassāti vinodentassa. Uppannavīriyanti tasseva pahānassa sādhanavasena pavattavīriyaṃ. Bhāventassa uppannavīriyanti etthāpi eseva nayo. Samādhinimittanti samādhi eva. Purimuppannasamādhi hi parato uppajjanakasamādhissa kāraṇaṃ hotīti ‘‘samādhinimitta’’nti vuttaṃ.
ཨུཔདྷིཝིཝེཀཏྟཱཏི ཁནྡྷཱུཔདྷིཨཱདིཨུཔདྷཱིཧི ཝིཝིཏྟཏྟཱ ཝིནིསྶཊཏྟཱ། ཏཾ ཨཱགམྨཱཏི ཏཾ ནིབྦཱནཾ མགྒེན ཨདྷིགམཧེཏུ། རཱགཱདཡོ ཝིརཛྫནྟི ཨེཏྠ, ཨེཏེནཱཏི ཝིརཱགོ། ཨེཝཾ ནིརོདྷོཔི དཊྛབྦོ། ཡསྨཱ ཨིདྷ བོཛ྄ཛྷངྒམིསྶཀཝསེན ཨིཙྪིཏཱ, ཏསྨཱ ‘‘ཨཱརམྨཎཝསེན ཝཱ ཨདྷིགནྟབྦཝསེན ཝཱ’’ཏི ཝུཏྟཾ། ཏཏྠ ཨདྷིགནྟབྦཝསེནཱཏི ཏནྣིནྣཏཱཝསེན། ཝོསྶགྒཔརིཎཱམིནྟི ཝོསྶགྒཝསེན པརིཎཱམིཏཾ པརིཙྩཛནཝསེན ཙེཝ པཀྑནྡནཝསེན ཙ པརིཎཱམནསཱིལཾ། ཏེནཱཧ ‘‘དྭེ ཝོསྶགྒཱ’’ཏིཨཱདི། ཁནྡྷཱནཾ པརིཙྩཛནཾ ནཱམ ཏཔྤཊིབདྡྷཀིལེསཔྤཧཱནཝསེནཱཏི ཡེནཱཀཱརེན ཝིཔསྶནཱ ཀིལེསེ པཛཧཏི, ཏེནེཝཱཀཱརེན ཏནྣིམིཏྟཀྑནྡྷེ ཙ པཛཧཏཱིཏི ཝཏྟབྦཏཾ ཨརཧཏཱིཏི ཨཱཧ ‘‘ཝིཔསྶནཱ…པེ॰… པརིཙྩཛཏཱི’’ཏི། ཡསྨཱ ཝིཔསྶནཱ ཝུཊྛཱནགཱམིནིབྷཱཝཾ པཱཔུཎནྟཱི ནིནྣཔོཎཔབྦྷཱརབྷཱཝེན ཨེཀཾསཏོ ནིབྦཱནཾ པཀྑནྡཏཱིཏི ཝཏྟབྦཏཾ ལབྷཏི, མགྒོ ཙ སམུཙྪེདཝསེན ཀིལེསེ ཁནྡྷེ ཙ རཱགཾ པརིཙྩཛཏི, ཏསྨཱ ཡཐཱཀྐམཾ ཝིཔསྶནཱམགྒཱནཾ ཝསེན པཀྑནྡནཔརིཙྩཱགཝོསྶགྒཱ ཝེདིཏབྦཱ། ཝོསགྒཏྠཱཡཱཏི པརིཙྩཱགཝོསྶགྒཏྠཱཡ ཙེཝ པཀྑནྡནཝོསྶགྒཏྠཱཡ ཙ། པརིཎམཏཱིཏི པརིཙྩཛཏི། ཏཾ པན པརིཎཱམནཾ ཝུཊྛཱནགཱམིནིབྷཱཝཔྤཏྟིཡཱ ཙེཝ ཨརིཡམགྒབྷཱཝཔྤཏྟིཡཱ ཙ ཨིཙྪིཏནྟི ཨཱཧ ‘‘ཝིཔསྶནཱབྷཱཝཉྩ མགྒབྷཱཝཉྩ པཱཔུཎཱཏཱི’’ཏི། སེསཔདེསཱུཏི ‘‘དྷམྨཝིཙཡསམྦོཛ྄ཛྷངྒཾ བྷཱཝེཏཱི’’ཏིཨཱདཱིསུ སེསསམྦོཛ྄ཛྷངྒཀོཊྛཱསེསུ།
Upadhivivekattāti khandhūpadhiādiupadhīhi vivittattā vinissaṭattā. Taṃ āgammāti taṃ nibbānaṃ maggena adhigamahetu. Rāgādayo virajjanti ettha, etenāti virāgo. Evaṃ nirodhopi daṭṭhabbo. Yasmā idha bojjhaṅgamissakavasena icchitā, tasmā ‘‘ārammaṇavasena vā adhigantabbavasena vā’’ti vuttaṃ. Tattha adhigantabbavasenāti tanninnatāvasena. Vossaggapariṇāminti vossaggavasena pariṇāmitaṃ pariccajanavasena ceva pakkhandanavasena ca pariṇāmanasīlaṃ. Tenāha ‘‘dve vossaggā’’tiādi. Khandhānaṃ pariccajanaṃ nāma tappaṭibaddhakilesappahānavasenāti yenākārena vipassanā kilese pajahati, tenevākārena tannimittakkhandhe ca pajahatīti vattabbataṃ arahatīti āha ‘‘vipassanā…pe… pariccajatī’’ti. Yasmā vipassanā vuṭṭhānagāminibhāvaṃ pāpuṇantī ninnapoṇapabbhārabhāvena ekaṃsato nibbānaṃ pakkhandatīti vattabbataṃ labhati, maggo ca samucchedavasena kilese khandhe ca rāgaṃ pariccajati, tasmā yathākkamaṃ vipassanāmaggānaṃ vasena pakkhandanapariccāgavossaggā veditabbā. Vosaggatthāyāti pariccāgavossaggatthāya ceva pakkhandanavossaggatthāya ca. Pariṇamatīti pariccajati. Taṃ pana pariṇāmanaṃ vuṭṭhānagāminibhāvappattiyā ceva ariyamaggabhāvappattiyā ca icchitanti āha ‘‘vipassanābhāvañca maggabhāvañca pāpuṇātī’’ti. Sesapadesūti ‘‘dhammavicayasambojjhaṅgaṃ bhāvetī’’tiādīsu sesasambojjhaṅgakoṭṭhāsesu.
བྷདྡཀནྟི ཨབྷདྡཀཱནཾ ནཱིཝརཎཱདིཔཱཔདྷམྨཱནཾ ཝིཀྑམྦྷནེན རཱགཝིགམནེན ཨེཀནྟཧིཏཏྟཱ དུལླབྷཏྟཱ ཙ བྷདྡཀཾ སུནྡརཾ། ན ཧི ཨཉྙཾ སམཱདྷིནིམིཏྟཾ ཨེཝཾ དུལླབྷཾ རཱགསྶ ཨུཛུཝིཔཙྩནཱིཀབྷཱུཏཾ ཨཏྠི། ཨནུརཀྑཏཱིཏི ཨེཏྠ ཨནུརཀྑནཱ ནཱམ ཨདྷིགཏསམཱདྷིཏོ ཡཐཱ པརིཧཱནི ན ཧོཏི, ཨེཝཾ པཊིཔཏྟིསཱསན-ཏཔྤཊིཔཀྑཝིགམནེནཱཏི ཨཱཧ ‘‘སམཱདྷཱི’’ཏིཨཱདི། ཨཊྛིཀསཉྙཱདིཀཱཏི ཨཊྛིཀཛ྄ཛྷཱནཱདིཀཱ། སཉྙཱསཱིསེན ཧི ཛྷཱནཾ ཝདཏི། སེསམེཏྠ ཨུཏྟཱནམེཝ།
Bhaddakanti abhaddakānaṃ nīvaraṇādipāpadhammānaṃ vikkhambhanena rāgavigamanena ekantahitattā dullabhattā ca bhaddakaṃ sundaraṃ. Na hi aññaṃ samādhinimittaṃ evaṃ dullabhaṃ rāgassa ujuvipaccanīkabhūtaṃ atthi. Anurakkhatīti ettha anurakkhanā nāma adhigatasamādhito yathā parihāni na hoti, evaṃ paṭipattisāsana-tappaṭipakkhavigamanenāti āha ‘‘samādhī’’tiādi. Aṭṭhikasaññādikāti aṭṭhikajjhānādikā. Saññāsīsena hi jhānaṃ vadati. Sesamettha uttānameva.
སཾཝརསུཏྟཝཎྞནཱ ནིཊྛིཏཱ།
Saṃvarasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༤. སཾཝརསུཏྟཾ • 4. Saṃvarasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༤. སཾཝརསུཏྟཝཎྞནཱ • 4. Saṃvarasuttavaṇṇanā
