| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
১২. দ্ৰাদসমৰগ্গো
12. Dvādasamavaggo
১. সংৰরো কম্মন্তিকথাৰণ্ণনা
1. Saṃvaro kammantikathāvaṇṇanā
৬৩০-৬৩২. ইদানি সংৰরো কম্মন্তিকথা নাম হোতি। তত্থ ‘‘চক্খুনা রূপং দিস্ৰা নিমিত্তগ্গাহী হোতি, ন নিমিত্তগ্গাহী হোতী’’তি সুত্তং নিস্সায ‘‘সংৰরোপি অসংৰরোপি কম্ম’’ন্তি যেসং লদ্ধি, সেয্যথাপি মহাসংঘিকানং; তে সন্ধায পুচ্ছা সকৰাদিস্স, পটিঞ্ঞা ইতরস্স।
630-632. Idāni saṃvaro kammantikathā nāma hoti. Tattha ‘‘cakkhunā rūpaṃ disvā nimittaggāhī hoti, na nimittaggāhī hotī’’ti suttaṃ nissāya ‘‘saṃvaropi asaṃvaropi kamma’’nti yesaṃ laddhi, seyyathāpi mahāsaṃghikānaṃ; te sandhāya pucchā sakavādissa, paṭiññā itarassa.
অথ নং যা সকসমযে চেতনা ‘‘কম্ম’’ন্তি ৰুত্তা যথা সা কাযৰচীমনোদ্ৰারেসু পৰত্তমানা কাযকম্মাদিনামং লভতি, তথা ‘‘যদি তে সংৰরো কম্মং, সোপি চক্খুন্দ্রিযাদীসু পৰত্তমানো চক্খুকম্মাদিনামং লভেয্যা’’তি চোদেতুং চক্খুন্দ্রিযসংৰরো চক্খুকম্মন্তিআদিমাহ। ইতরো তাদিসং সুত্তপদং অপস্সন্তো চতূসু দ্ৰারেসু পটিক্খিপিত্ৰা পঞ্চমে কাযদ্ৰারে পসাদকাযং সন্ধায পটিক্খিপতি, ৰিঞ্ঞত্তিকাযং সন্ধায পটিজানাতি। সো হি পসাদকাযম্পি ৰিঞ্ঞত্তিকাযম্পি কাযিন্দ্রিযন্ত্ৰেৰ ইচ্ছতি। মনোদ্ৰারেপি ৰিপাকদ্ৰারং সন্ধায পটিক্খিপতি, কম্মদ্ৰারং সন্ধায পটিজানাতি। অসংৰরেপি এসেৰ নযো। ‘‘চক্খুনা রূপং দিস্ৰা’’তি সুত্তং তেসু দ্ৰারেসু সংৰরাসংৰরমেৰ দীপেতি, ন তস্স কম্মভাৰং, তস্মা অসাধকন্তি।
Atha naṃ yā sakasamaye cetanā ‘‘kamma’’nti vuttā yathā sā kāyavacīmanodvāresu pavattamānā kāyakammādināmaṃ labhati, tathā ‘‘yadi te saṃvaro kammaṃ, sopi cakkhundriyādīsu pavattamāno cakkhukammādināmaṃ labheyyā’’ti codetuṃ cakkhundriyasaṃvaro cakkhukammantiādimāha. Itaro tādisaṃ suttapadaṃ apassanto catūsu dvāresu paṭikkhipitvā pañcame kāyadvāre pasādakāyaṃ sandhāya paṭikkhipati, viññattikāyaṃ sandhāya paṭijānāti. So hi pasādakāyampi viññattikāyampi kāyindriyantveva icchati. Manodvārepi vipākadvāraṃ sandhāya paṭikkhipati, kammadvāraṃ sandhāya paṭijānāti. Asaṃvarepi eseva nayo. ‘‘Cakkhunā rūpaṃ disvā’’ti suttaṃ tesu dvāresu saṃvarāsaṃvarameva dīpeti, na tassa kammabhāvaṃ, tasmā asādhakanti.
সংৰরো কম্মন্তিকথাৰণ্ণনা।
Saṃvaro kammantikathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১১৬) ১. সংৰরো কম্মন্তিকথা • (116) 1. Saṃvaro kammantikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. সংৰরোকম্মন্তিকথাৰণ্ণনা • 1. Saṃvarokammantikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. সংৰরোকম্মন্তিকথাৰণ্ণনা • 1. Saṃvarokammantikathāvaṇṇanā
