| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
12. ද්‌වාදසමවග්‌ගො
12. Dvādasamavaggo
1. සංවරො කම්‌මන්‌තිකථාවණ්‌ණනා
1. Saṃvaro kammantikathāvaṇṇanā
630-632. ඉදානි සංවරො කම්‌මන්‌තිකථා නාම හොති. තත්‌ථ ‘‘චක්‌ඛුනා රූපං දිස්‌වා නිමිත්‌තග්‌ගාහී හොති, න නිමිත්‌තග්‌ගාහී හොතී’’ති සුත්‌තං නිස්‌සාය ‘‘සංවරොපි අසංවරොපි කම්‌ම’’න්‌ති යෙසං ලද්‌ධි, සෙය්‍යථාපි මහාසංඝිකානං; තෙ සන්‌ධාය පුච්‌ඡා සකවාදිස්‌ස, පටිඤ්‌ඤා ඉතරස්‌ස.
630-632. Idāni saṃvaro kammantikathā nāma hoti. Tattha ‘‘cakkhunā rūpaṃ disvā nimittaggāhī hoti, na nimittaggāhī hotī’’ti suttaṃ nissāya ‘‘saṃvaropi asaṃvaropi kamma’’nti yesaṃ laddhi, seyyathāpi mahāsaṃghikānaṃ; te sandhāya pucchā sakavādissa, paṭiññā itarassa.
අථ නං යා සකසමයෙ චෙතනා ‘‘කම්‌ම’’න්‌ති වුත්‌තා යථා සා කායවචීමනොද්‌වාරෙසු පවත්‌තමානා කායකම්‌මාදිනාමං ලභති, තථා ‘‘යදි තෙ සංවරො කම්‌මං, සොපි චක්‌ඛුන්‌ද්‍රියාදීසු පවත්‌තමානො චක්‌ඛුකම්‌මාදිනාමං ලභෙය්‍යා’’ති චොදෙතුං චක්‌ඛුන්‌ද්‍රියසංවරො චක්‌ඛුකම්‌මන්‌තිආදිමාහ. ඉතරො තාදිසං සුත්‌තපදං අපස්‌සන්‌තො චතූසු ද්‌වාරෙසු පටික්‌ඛිපිත්‌වා පඤ්‌චමෙ කායද්‌වාරෙ පසාදකායං සන්‌ධාය පටික්‌ඛිපති, විඤ්‌ඤත්‌තිකායං සන්‌ධාය පටිජානාති. සො හි පසාදකායම්‌පි විඤ්‌ඤත්‌තිකායම්‌පි කායින්‌ද්‍රියන්‌ත්‌වෙව ඉච්‌ඡති. මනොද්‌වාරෙපි විපාකද්‌වාරං සන්‌ධාය පටික්‌ඛිපති, කම්‌මද්‌වාරං සන්‌ධාය පටිජානාති. අසංවරෙපි එසෙව නයො. ‘‘චක්‌ඛුනා රූපං දිස්‌වා’’ති සුත්‌තං තෙසු ද්‌වාරෙසු සංවරාසංවරමෙව දීපෙති, න තස්‌ස කම්‌මභාවං, තස්‌මා අසාධකන්‌ති.
Atha naṃ yā sakasamaye cetanā ‘‘kamma’’nti vuttā yathā sā kāyavacīmanodvāresu pavattamānā kāyakammādināmaṃ labhati, tathā ‘‘yadi te saṃvaro kammaṃ, sopi cakkhundriyādīsu pavattamāno cakkhukammādināmaṃ labheyyā’’ti codetuṃ cakkhundriyasaṃvaro cakkhukammantiādimāha. Itaro tādisaṃ suttapadaṃ apassanto catūsu dvāresu paṭikkhipitvā pañcame kāyadvāre pasādakāyaṃ sandhāya paṭikkhipati, viññattikāyaṃ sandhāya paṭijānāti. So hi pasādakāyampi viññattikāyampi kāyindriyantveva icchati. Manodvārepi vipākadvāraṃ sandhāya paṭikkhipati, kammadvāraṃ sandhāya paṭijānāti. Asaṃvarepi eseva nayo. ‘‘Cakkhunā rūpaṃ disvā’’ti suttaṃ tesu dvāresu saṃvarāsaṃvarameva dīpeti, na tassa kammabhāvaṃ, tasmā asādhakanti.
සංවරො කම්‌මන්‌තිකථාවණ්‌ණනා.
Saṃvaro kammantikathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (116) 1. සංවරො කම්‌මන්‌තිකථා • (116) 1. Saṃvaro kammantikathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 1. සංවරොකම්‌මන්‌තිකථාවණ්‌ණනා • 1. Saṃvarokammantikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 1. සංවරොකම්‌මන්‌තිකථාවණ්‌ණනා • 1. Saṃvarokammantikathāvaṇṇanā
