| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. සංවෙජනීයසුත්‌තං
8. Saṃvejanīyasuttaṃ
118. ‘‘චත්‌තාරිමානි, භික්‌ඛවෙ, සද්‌ධස්‌ස කුලපුත්‌තස්‌ස දස්‌සනීයානි සංවෙජනීයානි ඨානානි. කතමානි චත්‌තාරි? ‘ඉධ තථාගතො ජාතො’ති, භික්‌ඛවෙ, සද්‌ධස්‌ස කුලපුත්‌තස්‌ස දස්‌සනීයං සංවෙජනීයං ඨානං. ‘ඉධ තථාගතො අනුත්‌තරං සම්‌මාසම්‌බොධිං අභිසම්‌බුද්‌ධො’ති, භික්‌ඛවෙ, සද්‌ධස්‌ස කුලපුත්‌තස්‌ස දස්‌සනීයං සංවෙජනීයං ඨානං. ‘ඉධ තථාගතො අනුත්‌තරං ධම්‌මචක්‌කං පවත්‌තෙසී’ති, භික්‌ඛවෙ, සද්‌ධස්‌ස කුලපුත්‌තස්‌ස දස්‌සනීයං සංවෙජනීයං ඨානං. ‘ඉධ තථාගතො අනුපාදිසෙසාය නිබ්‌බානධාතුයා පරිනිබ්‌බුතො’ති , භික්‌ඛවෙ, සද්‌ධස්‌ස කුලපුත්‌තස්‌ස දස්‌සනීයං සංවෙජනීයං ඨානං. ඉමානි ඛො, භික්‌ඛවෙ, චත්‌තාරි සද්‌ධස්‌ස කුලපුත්‌තස්‌ස දස්‌සනීයානි සංවෙජනීයානි ඨානානී’’ති. අට්‌ඨමං.
118. ‘‘Cattārimāni, bhikkhave, saddhassa kulaputtassa dassanīyāni saṃvejanīyāni ṭhānāni. Katamāni cattāri? ‘Idha tathāgato jāto’ti, bhikkhave, saddhassa kulaputtassa dassanīyaṃ saṃvejanīyaṃ ṭhānaṃ. ‘Idha tathāgato anuttaraṃ sammāsambodhiṃ abhisambuddho’ti, bhikkhave, saddhassa kulaputtassa dassanīyaṃ saṃvejanīyaṃ ṭhānaṃ. ‘Idha tathāgato anuttaraṃ dhammacakkaṃ pavattesī’ti, bhikkhave, saddhassa kulaputtassa dassanīyaṃ saṃvejanīyaṃ ṭhānaṃ. ‘Idha tathāgato anupādisesāya nibbānadhātuyā parinibbuto’ti , bhikkhave, saddhassa kulaputtassa dassanīyaṃ saṃvejanīyaṃ ṭhānaṃ. Imāni kho, bhikkhave, cattāri saddhassa kulaputtassa dassanīyāni saṃvejanīyāni ṭhānānī’’ti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 8-10. සංවෙජනීයාදිසුත්‌තත්‌තයවණ්‌ණනා • 8-10. Saṃvejanīyādisuttattayavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8-10. සංවෙජනීයසුත්‌තාදිවණ්‌ණනා • 8-10. Saṃvejanīyasuttādivaṇṇanā
