| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஸங்விதா³வஹாரகதா²வண்ணனா
Saṃvidāvahārakathāvaṇṇanā
ஸங்விதா³வஹாரகதா²யங் ஸங்விதா⁴யாதி ஸங்வித³ஹித்வா. தேன நேஸங் து³க்கடாபத்தியோதி ஆணத்திவஸேன பாராஜிகாபத்தியா அஸம்ப⁴வே ஸதீதி வுத்தங். யதி³ ஹி தேன ஆணத்தா யதா²ணத்திவஸேன ஹரந்தி, ஆணத்திக்க²ணே ஏவ பாராஜிகாபத்திங் ஆபஜ்ஜந்தி. பாளியங் ‘‘ஸம்ப³ஹுலா ஸங்வித³ஹித்வா ஏகோ ப⁴ண்ட³ங் அவஹரதி, ஆபத்தி ஸப்³பே³ஸங் பாராஜிகஸ்ஸா’’தி (பாரா॰ 118) எத்தா²பி ஆணாபகானங் ஆணத்திக்க²ணேயேவ ஆபத்தி, அவஹாரகஸ்ஸ உத்³தா⁴ரேதி க³ஹேதப்³போ³. ஸம்ப³ஹுலா பி⁴க்கூ² ஏகங் ஆணாபெந்தி ‘க³ச்சே²தங் ஆஹரா’தி, தஸ்ஸுத்³தா⁴ரே ஸப்³பே³ஸங் பாராஜிகந்திஆதீ³ஸுபி ஏவமேவ அத்தோ² க³ஹேதப்³போ³. ஸாஹத்தி²கங் வா ஆணத்திகஸ்ஸ ஆணத்திகங் வா ஸாஹத்தி²கஸ்ஸ அங்க³ங் ந ஹோதீதி பி⁴ன்னகாலிகத்தா அஞ்ஞமஞ்ஞஸ்ஸ அங்க³ங் ந ஹோதி. ததா² ஹி ஸஹத்தா² அவஹரந்தஸ்ஸ டா²னாசாவனக்க²ணே ஆபத்தி, ஆணத்தியா பன ஆணத்திக்க²ணேயேவாதி பி⁴ன்னகாலிகத்தா ஆபத்தியோதி.
Saṃvidāvahārakathāyaṃ saṃvidhāyāti saṃvidahitvā. Tena nesaṃ dukkaṭāpattiyoti āṇattivasena pārājikāpattiyā asambhave satīti vuttaṃ. Yadi hi tena āṇattā yathāṇattivasena haranti, āṇattikkhaṇe eva pārājikāpattiṃ āpajjanti. Pāḷiyaṃ ‘‘sambahulā saṃvidahitvā eko bhaṇḍaṃ avaharati, āpatti sabbesaṃ pārājikassā’’ti (pārā. 118) etthāpi āṇāpakānaṃ āṇattikkhaṇeyeva āpatti, avahārakassa uddhāreti gahetabbo. Sambahulā bhikkhū ekaṃ āṇāpenti ‘gacchetaṃ āharā’ti, tassuddhāre sabbesaṃ pārājikantiādīsupi evameva attho gahetabbo. Sāhatthikaṃ vā āṇattikassa āṇattikaṃ vā sāhatthikassa aṅgaṃ na hotīti bhinnakālikattā aññamaññassa aṅgaṃ na hoti. Tathā hi sahatthā avaharantassa ṭhānācāvanakkhaṇe āpatti, āṇattiyā pana āṇattikkhaṇeyevāti bhinnakālikattā āpattiyoti.
