| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
သံဝိဒာဝဟာရကထာဝဏ္ဏနာ
Saṃvidāvahārakathāvaṇṇanā
သံဝိဒာဝဟာရကထာယံ သံဝိဓာယာတိ သံဝိဒဟိတ္ဝာ။ တေန နေသံ ဒုက္ကဋာပတ္တိယောတိ အာဏတ္တိဝသေန ပာရာဇိကာပတ္တိယာ အသမ္ဘဝေ သတီတိ ဝုတ္တံ။ ယဒိ ဟိ တေန အာဏတ္တာ ယထာဏတ္တိဝသေန ဟရန္တိ, အာဏတ္တိက္ခဏေ ဧဝ ပာရာဇိကာပတ္တိံ အာပဇ္ဇန္တိ။ ပာဠိယံ ‘‘သမ္ဗဟုလာ သံဝိဒဟိတ္ဝာ ဧကော ဘဏ္ဍံ အဝဟရတိ, အာပတ္တိ သဗ္ဗေသံ ပာရာဇိကသ္သာ’’တိ (ပာရာ. ၁၁၈) ဧတ္ထာပိ အာဏာပကာနံ အာဏတ္တိက္ခဏေယေဝ အာပတ္တိ, အဝဟာရကသ္သ ဥဒ္ဓာရေတိ ဂဟေတဗ္ဗော။ သမ္ဗဟုလာ ဘိက္ခူ ဧကံ အာဏာပေန္တိ ‘ဂစ္ဆေတံ အာဟရာ’တိ, တသ္သုဒ္ဓာရေ သဗ္ဗေသံ ပာရာဇိကန္တိအာဒီသုပိ ဧဝမေဝ အတ္ထော ဂဟေတဗ္ဗော။ သာဟတ္ထိကံ ဝာ အာဏတ္တိကသ္သ အာဏတ္တိကံ ဝာ သာဟတ္ထိကသ္သ အင္ဂံ န ဟောတီတိ ဘိန္နကာလိကတ္တာ အညမညသ္သ အင္ဂံ န ဟောတိ။ တထာ ဟိ သဟတ္ထာ အဝဟရန္တသ္သ ဌာနာစာဝနက္ခဏေ အာပတ္တိ, အာဏတ္တိယာ ပန အာဏတ္တိက္ခဏေယေဝာတိ ဘိန္နကာလိကတ္တာ အာပတ္တိယောတိ။
Saṃvidāvahārakathāyaṃ saṃvidhāyāti saṃvidahitvā. Tena nesaṃ dukkaṭāpattiyoti āṇattivasena pārājikāpattiyā asambhave satīti vuttaṃ. Yadi hi tena āṇattā yathāṇattivasena haranti, āṇattikkhaṇe eva pārājikāpattiṃ āpajjanti. Pāḷiyaṃ ‘‘sambahulā saṃvidahitvā eko bhaṇḍaṃ avaharati, āpatti sabbesaṃ pārājikassā’’ti (pārā. 118) etthāpi āṇāpakānaṃ āṇattikkhaṇeyeva āpatti, avahārakassa uddhāreti gahetabbo. Sambahulā bhikkhū ekaṃ āṇāpenti ‘gacchetaṃ āharā’ti, tassuddhāre sabbesaṃ pārājikantiādīsupi evameva attho gahetabbo. Sāhatthikaṃ vā āṇattikassa āṇattikaṃ vā sāhatthikassa aṅgaṃ na hotīti bhinnakālikattā aññamaññassa aṅgaṃ na hoti. Tathā hi sahatthā avaharantassa ṭhānācāvanakkhaṇe āpatti, āṇattiyā pana āṇattikkhaṇeyevāti bhinnakālikattā āpattiyoti.
