| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
སཾཝིདཱཝཧཱརཀཐཱཝཎྞནཱ
Saṃvidāvahārakathāvaṇṇanā
སཾཝིདཱཝཧཱརཀཐཱཡཾ ‘‘སམྦཧུལཱ སཾཝིདཧིཏྭཱ ཨེཀོ བྷཎྜཾ ཨཝཧརཏི, ཨཱཔཏྟི སབྦེསཾ པཱརཱཛིཀསྶཱ’’ཏི པཱལི༹ཡཾ ཨཝིསེསེན ཝུཏྟཏྟཱ ཨཱཎཱཔཀཱནཾ ཨཱཎཏྟིཀྑཎེ ཨཱཔཏྟི, ཨཝཧཱརཀསྶ ཨུདྡྷཱརེཏི ཡཐཱསམྦྷཝཾ ཡོཛེཏྭཱ ཨཏྠོ གཧེཏབྦོ ཨཱཎཏྟིཀཐཱཡཾ ‘‘སོ ཏཾ བྷཎྜཾ ཨཝཧརཏི, ཨཱཔཏྟི སབྦེསཾ པཱརཱཛིཀསྶཱ’’ཏིཨཱདཱིསུ ཝིཡ། ཨེཏྠཱཔི ཧི ཨཱཎཱཔཀསྶ ཨཱཎཏྟིཀྑཎེཡེཝ ཨཱཔཏྟི ཝུཏྟཱ། ཏཐཱ ཙ ཝཀྑཏི ‘‘ཨཐ ཏཾ བྷཎྜཾ ཨཝསྶཾ ཧཱརིཡཾ ཧོཏི, ཡཾ པརཏོ སབྦེསཾ ཨཱཔཏྟི པཱརཱཛིཀསྶཱཏི ཝུཏྟཾ, ཏཏོ ཨིམསྶ ཏངྑཎེཡེཝ པཱརཱཛིཀཾ ཧོཏཱིཏི ཨཡཾ ཡུཏྟི སབྦཏྠ ཝེདིཏབྦཱ’’ཏི (པཱརཱ॰ ཨཊྛ॰ ༡.༡༢༡)། སཾཝིདཱཝཧཱརེ ཙ ‘‘ཨཱཎཏྟི ནཏྠཱི’’ཏི ན ཝཏྟབྦཱ ‘‘ཨནྟེཝཱསིཀེསུ ཨེཀམེཀསྶ ཨེཀེཀོ མཱསཀོ སཱཧཏྠིཀོ ཧོཏི, པཉྩ ཨཱཎཏྟིཀཱ’’ཏི ཝཙནཏོ། ཨཱཎཏྟིཡཱ ཙ སཏི ཨཱཎཱཔཀསྶ ཨཱཎཏྟིཀྑཎེཡེཝ ཨཱཔཏྟི ཨིཙྪིཏབྦཱ, ན ཨུདྡྷཱརེ།
Saṃvidāvahārakathāyaṃ ‘‘sambahulā saṃvidahitvā eko bhaṇḍaṃ avaharati, āpatti sabbesaṃ pārājikassā’’ti pāḷiyaṃ avisesena vuttattā āṇāpakānaṃ āṇattikkhaṇe āpatti, avahārakassa uddhāreti yathāsambhavaṃ yojetvā attho gahetabbo āṇattikathāyaṃ ‘‘so taṃ bhaṇḍaṃ avaharati, āpatti sabbesaṃ pārājikassā’’tiādīsu viya. Etthāpi hi āṇāpakassa āṇattikkhaṇeyeva āpatti vuttā. Tathā ca vakkhati ‘‘atha taṃ bhaṇḍaṃ avassaṃ hāriyaṃ hoti, yaṃ parato sabbesaṃ āpatti pārājikassāti vuttaṃ, tato imassa taṅkhaṇeyeva pārājikaṃ hotīti ayaṃ yutti sabbattha veditabbā’’ti (pārā. aṭṭha. 1.121). Saṃvidāvahāre ca ‘‘āṇatti natthī’’ti na vattabbā ‘‘antevāsikesu ekamekassa ekeko māsako sāhatthiko hoti, pañca āṇattikā’’ti vacanato. Āṇattiyā ca sati āṇāpakassa āṇattikkhaṇeyeva āpatti icchitabbā, na uddhāre.
ཡདི ཨེཝཾ ‘‘ཏེསུ ཨེཀོ བྷཎྜཾ ཨཝཧརཏི, ཏསྶུདྡྷཱརེ སབྦེསཾ པཱརཱཛིཀ’’ནྟི ཀསྨཱ ཝུཏྟནྟི? ནཱཡཾ དོསོ། ཨེཏྠ ཧི སབྦེསཾཡེཝ ཨཱཔཏྟིདསྶནཏྠཾ ཨཝཧཱརཀསྶཔི ཨཱཔཏྟིསམྦྷཝཊྛཱནཾ དསྶེནྟོ ‘‘ཏསྶུདྡྷཱརེ སབྦེསཾ པཱརཱཛིཀ’’ནྟི ཨཱཧ, ན པན ཨཱཎཱཔཀཱནམྤི ཨུདྡྷཱརེཡེཝ ཨཱཔཏྟིདསྶནཏྠནྟི ཨེཝམཏྠོ གཧེཏབྦོ། ‘‘སམྦཧུལཱ ཨེཀཾ ཨཱཎཱཔེནྟི ‘གཙྪེཏཾ ཨཱཧརཱ’ཏི, ཏསྶུདྡྷཱརེ སབྦེསཾ པཱརཱཛིཀ’’ནྟིཨཱདཱིསུཔི ཨེཝམེཝ ཨཏྠོ གཧེཏབྦོ། ཨཐ ཝཱ སཾཝིདཱཝཧཱརེ ཨཱཎཱཔཀཱནམྤི ཨུདྡྷཱརེཡེཝ ཨཱཔཏྟི, ན ཨཱཎཏྟིཀྑཎེཏི ཨཱཝེཎིཀམིདཾ ལཀྑཎནྟི ཨཊྛཀཐཱཙརིཡཔྤམཱཎེན གཧེཏབྦཾ, ཨིཏོ ཝཱ ཨཉྙེན པཀཱརེན ཡཐཱ ཨཊྛཀཐཱཡཾ པུབྦེནཱཔརཾ ན ཝིརུཛ྄ཛྷཏི, ཏཐཱ ཝཱིམཾསིཏྭཱ གཧེཏབྦཾ།
Yadi evaṃ ‘‘tesu eko bhaṇḍaṃ avaharati, tassuddhāre sabbesaṃ pārājika’’nti kasmā vuttanti? Nāyaṃ doso. Ettha hi sabbesaṃyeva āpattidassanatthaṃ avahārakassapi āpattisambhavaṭṭhānaṃ dassento ‘‘tassuddhāre sabbesaṃ pārājika’’nti āha, na pana āṇāpakānampi uddhāreyeva āpattidassanatthanti evamattho gahetabbo. ‘‘Sambahulā ekaṃ āṇāpenti ‘gacchetaṃ āharā’ti, tassuddhāre sabbesaṃ pārājika’’ntiādīsupi evameva attho gahetabbo. Atha vā saṃvidāvahāre āṇāpakānampi uddhāreyeva āpatti, na āṇattikkhaṇeti āveṇikamidaṃ lakkhaṇanti aṭṭhakathācariyappamāṇena gahetabbaṃ, ito vā aññena pakārena yathā aṭṭhakathāyaṃ pubbenāparaṃ na virujjhati, tathā vīmaṃsitvā gahetabbaṃ.
སཾཝིདྷཱཡཱཏི སཾཝིདཧིཏྭཱ། ཏེན ནེསཾ དུཀྐཊཱཔཏྟིཡོཏི ཨཱཎཏྟིཝསེན པཱརཱཛིཀཱཔཏྟིཡཱ ཨསམྦྷཝེ སཏི ཝུཏྟཾ། ཡདི ཧི ཏེ ཨཱཎཏྟཱ ཨཝསྶཾ ཏཾ ཧརནྟི, པཱརཱཛིཀཱཔཏྟིཡེཝ ནེསཾ དཊྛབྦཱ, ན དུཀྐཊཱཔཏྟི། སཱཧཏྠིཀཾ ཝཱ ཨཱཎཏྟིཀསྶ ཨཱཎཏྟིཀཾ ཝཱ སཱཧཏྠིཀསྶ ཨངྒཾ ན ཧོཏཱིཏི བྷིནྣཀཱལཝིསཡཏྟཱ ཨཉྙམཉྙསྶ ཨངྒཾ ན ཧོཏི། ཏཐཱ ཧི སཧཏྠཱ ཨཝཧརནྟསྶ ཋཱནཱཙཱཝནེ ཨཱཔཏྟི, ཨཱཎཏྟིཡཱ པན ཨཱཎཏྟིཀྑཎེཡེཝཱཏི བྷིནྣཀཱལཝིསཡཱ སཱཧཏྠིཀཱཎཏྟིཀེཧི ཨཱཔཛྫིཏབྦཱཔཏྟིཡོ།
Saṃvidhāyāti saṃvidahitvā. Tena nesaṃ dukkaṭāpattiyoti āṇattivasena pārājikāpattiyā asambhave sati vuttaṃ. Yadi hi te āṇattā avassaṃ taṃ haranti, pārājikāpattiyeva nesaṃ daṭṭhabbā, na dukkaṭāpatti. Sāhatthikaṃ vā āṇattikassa āṇattikaṃ vā sāhatthikassa aṅgaṃ na hotīti bhinnakālavisayattā aññamaññassa aṅgaṃ na hoti. Tathā hi sahatthā avaharantassa ṭhānācāvane āpatti, āṇattiyā pana āṇattikkhaṇeyevāti bhinnakālavisayā sāhatthikāṇattikehi āpajjitabbāpattiyo.
སཾཝིདཱཝཧཱརཀཐཱཝཎྞནཱ ནིཊྛིཏཱ།
Saṃvidāvahārakathāvaṇṇanā niṭṭhitā.
