| Library / Tipiṭaka / ਤਿਪਿਟਕ • Tipiṭaka / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā |
ਸਂવਿਦਾવਹਾਰਕਥਾવਣ੍ਣਨਾ
Saṃvidāvahārakathāvaṇṇanā
ਸਂવਿਦਾવਹਾਰਕਥਾਯਂ ਸਂવਿਧਾਯਾਤਿ ਸਂવਿਦਹਿਤ੍વਾ। ਤੇਨ ਨੇਸਂ ਦੁਕ੍ਕਟਾਪਤ੍ਤਿਯੋਤਿ ਆਣਤ੍ਤਿવਸੇਨ ਪਾਰਾਜਿਕਾਪਤ੍ਤਿਯਾ ਅਸਮ੍ਭવੇ ਸਤੀਤਿ વੁਤ੍ਤਂ। ਯਦਿ ਹਿ ਤੇਨ ਆਣਤ੍ਤਾ ਯਥਾਣਤ੍ਤਿવਸੇਨ ਹਰਨ੍ਤਿ, ਆਣਤ੍ਤਿਕ੍ਖਣੇ ਏવ ਪਾਰਾਜਿਕਾਪਤ੍ਤਿਂ ਆਪਜ੍ਜਨ੍ਤਿ। ਪਾਲ਼ਿਯਂ ‘‘ਸਮ੍ਬਹੁਲਾ ਸਂવਿਦਹਿਤ੍વਾ ਏਕੋ ਭਣ੍ਡਂ ਅવਹਰਤਿ, ਆਪਤ੍ਤਿ ਸਬ੍ਬੇਸਂ ਪਾਰਾਜਿਕਸ੍ਸਾ’’ਤਿ (ਪਾਰਾ॰ ੧੧੮) ਏਤ੍ਥਾਪਿ ਆਣਾਪਕਾਨਂ ਆਣਤ੍ਤਿਕ੍ਖਣੇਯੇવ ਆਪਤ੍ਤਿ, ਅવਹਾਰਕਸ੍ਸ ਉਦ੍ਧਾਰੇਤਿ ਗਹੇਤਬ੍ਬੋ। ਸਮ੍ਬਹੁਲਾ ਭਿਕ੍ਖੂ ਏਕਂ ਆਣਾਪੇਨ੍ਤਿ ‘ਗਚ੍ਛੇਤਂ ਆਹਰਾ’ਤਿ, ਤਸ੍ਸੁਦ੍ਧਾਰੇ ਸਬ੍ਬੇਸਂ ਪਾਰਾਜਿਕਨ੍ਤਿਆਦੀਸੁਪਿ ਏવਮੇવ ਅਤ੍ਥੋ ਗਹੇਤਬ੍ਬੋ। ਸਾਹਤ੍ਥਿਕਂ વਾ ਆਣਤ੍ਤਿਕਸ੍ਸ ਆਣਤ੍ਤਿਕਂ વਾ ਸਾਹਤ੍ਥਿਕਸ੍ਸ ਅਙ੍ਗਂ ਨ ਹੋਤੀਤਿ ਭਿਨ੍ਨਕਾਲਿਕਤ੍ਤਾ ਅਞ੍ਞਮਞ੍ਞਸ੍ਸ ਅਙ੍ਗਂ ਨ ਹੋਤਿ। ਤਥਾ ਹਿ ਸਹਤ੍ਥਾ ਅવਹਰਨ੍ਤਸ੍ਸ ਠਾਨਾਚਾવਨਕ੍ਖਣੇ ਆਪਤ੍ਤਿ, ਆਣਤ੍ਤਿਯਾ ਪਨ ਆਣਤ੍ਤਿਕ੍ਖਣੇਯੇવਾਤਿ ਭਿਨ੍ਨਕਾਲਿਕਤ੍ਤਾ ਆਪਤ੍ਤਿਯੋਤਿ।
Saṃvidāvahārakathāyaṃ saṃvidhāyāti saṃvidahitvā. Tena nesaṃ dukkaṭāpattiyoti āṇattivasena pārājikāpattiyā asambhave satīti vuttaṃ. Yadi hi tena āṇattā yathāṇattivasena haranti, āṇattikkhaṇe eva pārājikāpattiṃ āpajjanti. Pāḷiyaṃ ‘‘sambahulā saṃvidahitvā eko bhaṇḍaṃ avaharati, āpatti sabbesaṃ pārājikassā’’ti (pārā. 118) etthāpi āṇāpakānaṃ āṇattikkhaṇeyeva āpatti, avahārakassa uddhāreti gahetabbo. Sambahulā bhikkhū ekaṃ āṇāpenti ‘gacchetaṃ āharā’ti, tassuddhāre sabbesaṃ pārājikantiādīsupi evameva attho gahetabbo. Sāhatthikaṃ vā āṇattikassa āṇattikaṃ vā sāhatthikassa aṅgaṃ na hotīti bhinnakālikattā aññamaññassa aṅgaṃ na hoti. Tathā hi sahatthā avaharantassa ṭhānācāvanakkhaṇe āpatti, āṇattiyā pana āṇattikkhaṇeyevāti bhinnakālikattā āpattiyoti.
