| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
7. ஸங்விதா⁴னஸிக்கா²பத³வண்ணனா
7. Saṃvidhānasikkhāpadavaṇṇanā
ஸங்வித³ஹித்வாதி ‘‘ஏஹி, அஸுககா³மங் க³ச்சா²மா’’தி வா ‘‘ஸ்வே அஹங் க³ச்சா²மி, த்வம்பி ஆக³ச்செ²ய்யாஸீ’’தி வா வத்வா. தஞ்ச கோ² ஸங்வித³ஹனங் அத்த²தோ ஸங்கேதகம்மந்தி ஆஹ ‘‘க³மனகாலே ஸங்கேதங் கத்வாதி அத்தோ²’’தி. அகப்பியபூ⁴மியங் ஸங்வித³ஹந்தஸ்ஸாதி அந்தோகா³மே, பி⁴க்கு²னிஉபஸ்ஸயத்³வாரே, ரதி²காய, அஞ்ஞேஸு வா சதுக்கஸிங்கா⁴டகஹத்தி²ஸாலாதீ³ஸு ட²த்வா ஸங்வித³ஹந்தஸ்ஸ. தேனாஹ ‘‘தத்த² ட²பெத்வா’’திஆதி³. ஆஸன்னஸ்ஸாபீதி அச்சாஸன்னஸ்ஸாபி, ரதனமத்தந்தரஸ்ஸாபீதி அதி⁴ப்பாயோ. அஞ்ஞஸ்ஸ கா³மஸ்ஸாதி யதோ நிக்க²மதி, ததோ அஞ்ஞஸ்ஸ கா³மஸ்ஸ. தங் ஓக்கமந்தஸ்ஸாதி தங் அந்தரகா³மஸ்ஸ உபசாரங் ஓக்கமந்தஸ்ஸ. ஸசே தூ³ரங் க³ந்துகாமோ ஹோதி, கா³மூபசாரக³ணனாய ஓக்கமந்தே ஓக்கமந்தே புரிமனயேனேவ ஆபத்தி. தேனாஹ ‘‘இதி கா³மூபசாரோக்கமனக³ணனாய பாசித்தியானீ’’தி. தஸ்ஸ தஸ்ஸ பன கா³மஸ்ஸ அதிக்கமனே அனாபத்தி. கா³மே அஸதீதி அத்³த⁴யோஜனப்³ப⁴ந்தரே கா³மே அஸதி. தஸ்மிங் பன கா³மே ஸதி கா³மந்தரக³ணனாயேவ பாசித்தியானி. அத்³த⁴யோஜனக³ணனாய பாசித்தியந்தி அத்³த⁴யோஜனே அத்³த⁴யோஜனே பாசித்தியங், ஏகமேகங் அத்³த⁴யோஜனங் அதிக்கமந்தஸ்ஸ ‘‘இதா³னி அதிக்கமிஸ்ஸாமீ’’தி பட²மபாதே³ து³க்கடங், து³தியபாதே³ பாசித்தியந்தி அத்தோ². இமஸ்மிஞ்ஹி நயே அதிக்கமனே ஆபத்தி, ஓக்கமனே அனாபத்தி.
Saṃvidahitvāti ‘‘ehi, asukagāmaṃ gacchāmā’’ti vā ‘‘sve ahaṃ gacchāmi, tvampi āgaccheyyāsī’’ti vā vatvā. Tañca kho saṃvidahanaṃ atthato saṅketakammanti āha ‘‘gamanakāle saṅketaṃ katvāti attho’’ti. Akappiyabhūmiyaṃ saṃvidahantassāti antogāme, bhikkhuniupassayadvāre, rathikāya, aññesu vā catukkasiṅghāṭakahatthisālādīsu ṭhatvā saṃvidahantassa. Tenāha ‘‘tattha ṭhapetvā’’tiādi. Āsannassāpīti accāsannassāpi, ratanamattantarassāpīti adhippāyo. Aññassa gāmassāti yato nikkhamati, tato aññassa gāmassa. Taṃ okkamantassāti taṃ antaragāmassa upacāraṃ okkamantassa. Sace dūraṃ gantukāmo hoti, gāmūpacāragaṇanāya okkamante okkamante purimanayeneva āpatti. Tenāha ‘‘iti gāmūpacārokkamanagaṇanāya pācittiyānī’’ti. Tassa tassa pana gāmassa atikkamane anāpatti. Gāme asatīti addhayojanabbhantare gāme asati. Tasmiṃ pana gāme sati gāmantaragaṇanāyeva pācittiyāni. Addhayojanagaṇanāya pācittiyanti addhayojane addhayojane pācittiyaṃ, ekamekaṃ addhayojanaṃ atikkamantassa ‘‘idāni atikkamissāmī’’ti paṭhamapāde dukkaṭaṃ, dutiyapāde pācittiyanti attho. Imasmiñhi naye atikkamane āpatti, okkamane anāpatti.
விஸங்கேதேனாதி (பாசி॰ அட்ட²॰ 185) எத்த² ‘‘புரேப⁴த்தங் க³மிஸ்ஸாமா’’தி வத்வா பச்சா²ப⁴த்தங் க³ச்ச²ந்தி, ‘‘அஜ்ஜ வா க³மிஸ்ஸாமா’’தி ஸ்வே க³ச்ச²ந்தி, ஏவங் காலவிஸங்கேதேயேவ அனாபத்தி. த்³வாரவிஸங்கேதே, பன மக்³க³விஸங்கேதே, வா ஸதிபி ஆபத்தியேவ. ஆபதா³ஸூதி ரட்ட²பே⁴தே³ சக்கஸமாருள்ஹா ஜானபதா³ பரியாயந்தி, ஏவரூபாஸு ஆபதா³ஸு அனாபத்தி. சக்கஸமாருள்ஹாதி ச இரியாபத²சக்கங் வா ஸகடசக்கங் வா ஸமாருள்ஹாதி அத்தோ². மாதுகா³மஸிக்கா²பதே³னாதி (பாசி॰ 413 ஆத³யோ) ஸப்பாணகவக்³கே³ ஸத்தமஸிக்கா²பதே³ன.
Visaṅketenāti (pāci. aṭṭha. 185) ettha ‘‘purebhattaṃ gamissāmā’’ti vatvā pacchābhattaṃ gacchanti, ‘‘ajja vā gamissāmā’’ti sve gacchanti, evaṃ kālavisaṅketeyeva anāpatti. Dvāravisaṅkete, pana maggavisaṅkete, vā satipi āpattiyeva. Āpadāsūti raṭṭhabhede cakkasamāruḷhā jānapadā pariyāyanti, evarūpāsu āpadāsu anāpatti. Cakkasamāruḷhāti ca iriyāpathacakkaṃ vā sakaṭacakkaṃ vā samāruḷhāti attho. Mātugāmasikkhāpadenāti (pāci. 413 ādayo) sappāṇakavagge sattamasikkhāpadena.
ஸங்விதா⁴னஸிக்கா²பத³வண்ணனா நிட்டி²தா.
Saṃvidhānasikkhāpadavaṇṇanā niṭṭhitā.
