| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
৭. সংৰিধানসিক্খাপদৰণ্ণনা
7. Saṃvidhānasikkhāpadavaṇṇanā
১৮৩. সত্তমে পাল়িযং গচ্ছাম ভগিনি গচ্ছামায্যাতি ভিক্খুপুব্বকং সংৰিধানং, ইতরং ভিক্খুনিপুব্বকং । একদ্ধানমগ্গন্তি একতো অদ্ধানসঙ্খাতং মগ্গং। হিয্যোতি সুৰে। পরেতি ততিযে দিৰসে।
183. Sattame pāḷiyaṃ gacchāma bhagini gacchāmāyyāti bhikkhupubbakaṃ saṃvidhānaṃ, itaraṃ bhikkhunipubbakaṃ . Ekaddhānamagganti ekato addhānasaṅkhātaṃ maggaṃ. Hiyyoti suve. Pareti tatiye divase.
দ্ৰিধা ৰুত্তপ্পকারোতি পাদগমনে পক্খগমনেতি দ্ৰিধা ৰুত্তপ্পকারো। উপচারো ন লব্ভতীতি যো পরিক্খিত্তাদিগামস্স একলেড্ডুপাতাদিউপচারো ৰুত্তো, সো ইধ ন লব্ভতি আসন্নত্তা। এতেন চ অন্তরঘরেযেৰেত্থ গামোতি অধিপ্পেতো, ন সকলং গামখেত্তং। তত্থাপি যত্থ উপচারো লব্ভতি, তত্থ উপচারোক্কমনে এৰ আপত্তীতি দস্সেতি। তেনাহ ‘‘রতনমত্তন্তরো’’তিআদি। উপচারোক্কমনঞ্চেত্থ উপচারব্ভন্তরে পৰিসনমেৰ হোতি। তত্থ অপ্পৰিসিত্ৰাপি উপচারতো বহি অদ্ধযোজনব্ভন্তরগতেন মগ্গেন গচ্ছন্তোপি মগ্গস্স দ্ৰীসু পস্সেসু অদ্ধযোজনব্ভন্তরগতং গামূপচারং সব্বং ওক্কমিত্ৰা গচ্ছতিচ্চেৰ ৰুচ্চতি। অদ্ধযোজনতো বহি গতেন মগ্গেন গচ্ছন্তো ন গামূপচারগণনায কারেতব্বো, অদ্ধযোজনগণনাযেৰ কারেতব্বো। এৰঞ্চ সতি অনন্তরসিক্খাপদে নাৰাযেৰ গামতীরপস্সেন গচ্ছন্তস্স গামূপচারগণনায আপত্তি সমত্থিতা হোতি। ন হি সক্কা নাৰায গামূপচারব্ভন্তরে পৰিসিতুং। তিণ্ণং মগ্গানং সম্বন্ধট্ঠানং সিঙ্ঘাটকং। এত্থন্তরে সংৰিদহিতেতি এত্থ ন কেৰলং যথাৰুত্তরথিকাদীসু এৰ সংৰিদহনে দুক্কটং, অন্তরামগ্গেপীতি অধিপ্পাযো।
Dvidhā vuttappakāroti pādagamane pakkhagamaneti dvidhā vuttappakāro. Upacāro na labbhatīti yo parikkhittādigāmassa ekaleḍḍupātādiupacāro vutto, so idha na labbhati āsannattā. Etena ca antaraghareyevettha gāmoti adhippeto, na sakalaṃ gāmakhettaṃ. Tatthāpi yattha upacāro labbhati, tattha upacārokkamane eva āpattīti dasseti. Tenāha ‘‘ratanamattantaro’’tiādi. Upacārokkamanañcettha upacārabbhantare pavisanameva hoti. Tattha appavisitvāpi upacārato bahi addhayojanabbhantaragatena maggena gacchantopi maggassa dvīsu passesu addhayojanabbhantaragataṃ gāmūpacāraṃ sabbaṃ okkamitvā gacchaticceva vuccati. Addhayojanato bahi gatena maggena gacchanto na gāmūpacāragaṇanāya kāretabbo, addhayojanagaṇanāyeva kāretabbo. Evañca sati anantarasikkhāpade nāvāyeva gāmatīrapassena gacchantassa gāmūpacāragaṇanāya āpatti samatthitā hoti. Na hi sakkā nāvāya gāmūpacārabbhantare pavisituṃ. Tiṇṇaṃ maggānaṃ sambandhaṭṭhānaṃ siṅghāṭakaṃ. Etthantare saṃvidahiteti ettha na kevalaṃ yathāvuttarathikādīsu eva saṃvidahane dukkaṭaṃ, antarāmaggepīti adhippāyo.
অদ্ধযোজনং অতিক্কমন্তস্সাতি অসতি গামে অদ্ধযোজনং অতিক্কমন্তস্স। যস্মিঞ্হি গামখেত্তভূতেপি অরঞ্ঞে অদ্ধযোজনব্ভন্তরে গামো ন হোতি, তম্পি ইধ অগামকং অরঞ্ঞন্তি অধিপ্পেতং, ন ৰিঞ্ঝাটৰাদযো।
Addhayojanaṃ atikkamantassāti asati gāme addhayojanaṃ atikkamantassa. Yasmiñhi gāmakhettabhūtepi araññe addhayojanabbhantare gāmo na hoti, tampi idha agāmakaṃ araññanti adhippetaṃ, na viñjhāṭavādayo.
১৮৫. রট্ঠভেদেতি রট্ঠৰিলোপে। চক্কসমারুল়্হাতি ইরিযাপথচক্কং, সকটচক্কং ৰা সমারুল়্হা। দ্ৰিন্নম্পি সংৰিদহিত্ৰা মগ্গপ্পটিপত্তি, অৰিসঙ্কেতং, সমযাভাৰো, অনাপদা, গামন্তরোক্কমনং ৰা অদ্ধযোজনাতিক্কমো ৰাতি ইমানেত্থ পঞ্চ অঙ্গানি। একতোউপসম্পন্নাদীহি সদ্ধিং সংৰিধায গচ্ছন্তস্স পন মাতুগামসিক্খাপদেন আপত্তি।
185.Raṭṭhabhedeti raṭṭhavilope. Cakkasamāruḷhāti iriyāpathacakkaṃ, sakaṭacakkaṃ vā samāruḷhā. Dvinnampi saṃvidahitvā maggappaṭipatti, avisaṅketaṃ, samayābhāvo, anāpadā, gāmantarokkamanaṃ vā addhayojanātikkamo vāti imānettha pañca aṅgāni. Ekatoupasampannādīhi saddhiṃ saṃvidhāya gacchantassa pana mātugāmasikkhāpadena āpatti.
সংৰিধানসিক্খাপদৰণ্ণনা নিট্ঠিতা।
Saṃvidhānasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৩. ওৰাদৰগ্গো • 3. Ovādavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৭. সংৰিধানসিক্খাপদৰণ্ণনা • 7. Saṃvidhānasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৭. সংৰিদহনসিক্খাপদৰণ্ণনা • 7. Saṃvidahanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৭. সংৰিধানসিক্খাপদৰণ্ণনা • 7. Saṃvidhānasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৭. সংৰিধানসিক্খাপদং • 7. Saṃvidhānasikkhāpadaṃ
