| Library / Tipiṭaka / တိပိဋက • Tipiṭaka / ဝဇိရဗုဒ္ဓိ-ဋီကာ • Vajirabuddhi-ṭīkā |
၇. သံဝိဓာနသိက္ခာပဒဝဏ္ဏနာ
7. Saṃvidhānasikkhāpadavaṇṇanā
၁၈၁. တာ ဘိက္ခုနိယော ဒူသယိံသူတိ ဝိပရိဏာမော ကာတဗ္ဗော။
181. Tā bhikkhuniyo dūsayiṃsūti vipariṇāmo kātabbo.
၁၈၂-၄. သမ္ပဒန္တီတိ ပဒသာ ဂစ္ဆန္တိ။ ဝုတ္တနယေနေဝာတိ ‘‘သမ္ပတန္တိ ဧတ္ထာတိ သမ္ပာတော’’တိအာဒိနာ။ ပဒဂတေ ဥပစာရော န လဗ္ဘတိ, အစ္စာသန္နတ္တာ မိသ္သံ ဝိယ ဟောတီတိ။ ကုက္ကုဋဝသ္သိတပရိစ္ဆိန္နော မဟာအဋ္ဌကထာယံ။ ‘‘တမ္ပိ ဝောဟာရေနာ’’တိ လိခိတံ။ ‘‘ယေဘုယ္ယေန တထာ သန္နိဝေသော ဟောတီတိ ကတ္ဝာ အဋ္ဌကထာယံ ဝုတ္တံ, တသ္မာ န ပမာဒလေခော’’တိ စ, ‘‘ဥက္ကဋ္ဌပရိစ္ဆေဒေန ဝုတ္တံ အဋ္ဌကထာယံ, တတော ဥဒ္ဓံ အဒ္ဓယောဇနလက္ခဏသမ္ပတ္တံ နာမ ဟောတီတိ ဂဟေတဗ္ဗ’’န္တိ စ ဝုတ္တံ။ ‘‘ကပ္ပိယဘူမိ ကိရာယံ။ပေ.။ န ဝဒန္တီ’’တိ ဝုတ္တံ။ ဒုဒ္ဒသဉ္ဟေတ္ထ ကာရဏံ။ ကတရံ ပန တန္တိ? ‘‘ဂစ္ဆာမာတိ သံဝိဒဟတိ, အာပတ္တိ ဒုက္ကဋသ္သာ’’တိ ဝုတ္တံ။ တတ္ထ ‘‘ဂစ္ဆာမာ’’တိ ဝတ္တမာနဝစနန္တဉ္စ, အမဂ္ဂေ ဘိက္ခုနုပသ္သယာဒိမ္ဟိ န သမ္ဘဝတိယေဝ မနုသ္သာနံ အန္တရဃရာဒိမ္ဟိ မဂ္ဂသင္ခေပဂမနတော, ဥစ္စာသယနာဒိဥပ္ပတ္တိဋ္ဌာနတ္တာ စ။ န တိတ္ထိယသေယ္ယာယ ဝာ ပဗ္ဗဇိတာဝာသတ္တာ။ ဒ္ဝာရေတိ သမီပတ္ထေ ဘုမ္မံ, တသ္မာ တံ ဒသ္သေတုံ ပုန ‘‘ရထိကာယာ’’တိ အာဟ။ သေသအဋ္ဌကထာယံ ‘‘ဧတ္ထန္တရေ သံဝိဒဟိတေပိ ဘိက္ခုနော ဒုက္ကဋ’’န္တိ အာဂတတ္တာ န သမေတိ။ ‘‘ဂာမန္တရေ’’တိ ဝစနတော အညဂာမသ္သ ဥပစာရောက္ကမနေ ဧဝ အာပတ္တိ။ ‘‘အဒ္ဓယောဇနေ’’တိ ဝစနတော အတိက္ကမနေယေဝ ယုတ္တံ။
182-4.Sampadantīti padasā gacchanti. Vuttanayenevāti ‘‘sampatanti etthāti sampāto’’tiādinā. Padagate upacāro na labbhati, accāsannattā missaṃ viya hotīti. Kukkuṭavassitaparicchinno mahāaṭṭhakathāyaṃ. ‘‘Tampi vohārenā’’ti likhitaṃ. ‘‘Yebhuyyena tathā sanniveso hotīti katvā aṭṭhakathāyaṃ vuttaṃ, tasmā na pamādalekho’’ti ca, ‘‘ukkaṭṭhaparicchedena vuttaṃ aṭṭhakathāyaṃ, tato uddhaṃ addhayojanalakkhaṇasampattaṃ nāma hotīti gahetabba’’nti ca vuttaṃ. ‘‘Kappiyabhūmi kirāyaṃ…pe… na vadantī’’ti vuttaṃ. Duddasañhettha kāraṇaṃ. Kataraṃ pana tanti? ‘‘Gacchāmāti saṃvidahati, āpatti dukkaṭassā’’ti vuttaṃ. Tattha ‘‘gacchāmā’’ti vattamānavacanantañca, amagge bhikkhunupassayādimhi na sambhavatiyeva manussānaṃ antaragharādimhi maggasaṅkhepagamanato, uccāsayanādiuppattiṭṭhānattā ca. Na titthiyaseyyāya vā pabbajitāvāsattā. Dvāreti samīpatthe bhummaṃ, tasmā taṃ dassetuṃ puna ‘‘rathikāyā’’ti āha. Sesaaṭṭhakathāyaṃ ‘‘etthantare saṃvidahitepi bhikkhuno dukkaṭa’’nti āgatattā na sameti. ‘‘Gāmantare’’ti vacanato aññagāmassa upacārokkamane eva āpatti. ‘‘Addhayojane’’ti vacanato atikkamaneyeva yuttaṃ.
၁၈၅. ရဋ္ဌဘေဒေတိ ဝိလောပေ။ ပောရာဏဂဏ္ဌိပဒေ ‘‘တယောပိ သင္ကေတာ ကာလဒိဝသမဂ္ဂဝသေန, တတ္ထ ပစ္ဆိမေနေဝ အာပတ္တီ’’တိ ဝုတ္တံ။ ‘‘ဣမိနာ မဂ္ဂေနာ’’တိ ဝိသ္သဇ္ဇေတ္ဝာ အညေန ဂစ္ဆန္တိ စေ, အာပတ္တိယေဝာတိ အတ္ထော။
185.Raṭṭhabhedeti vilope. Porāṇagaṇṭhipade ‘‘tayopi saṅketā kāladivasamaggavasena, tattha pacchimeneva āpattī’’ti vuttaṃ. ‘‘Iminā maggenā’’ti vissajjetvā aññena gacchanti ce, āpattiyevāti attho.
သံဝိဓာနသိက္ခာပဒဝဏ္ဏနာ နိဋ္ဌိတာ။
Saṃvidhānasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၃. ဩဝာဒဝဂ္ဂော • 3. Ovādavaggo
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၇. သံဝိဓာနသိက္ခာပဒဝဏ္ဏနာ • 7. Saṃvidhānasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၇. သံဝိဒဟနသိက္ခာပဒဝဏ္ဏနာ • 7. Saṃvidahanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၇. သံဝိဓာနသိက္ခာပဒဝဏ္ဏနာ • 7. Saṃvidhānasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၇. သံဝိဓာနသိက္ခာပဒံ • 7. Saṃvidhānasikkhāpadaṃ
