| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
7. සංවිධානසික්‌ඛාපදවණ්‌ණනා
7. Saṃvidhānasikkhāpadavaṇṇanā
183. සත්‌තමෙ පාළියං ගච්‌ඡාම භගිනි ගච්‌ඡාමාය්‍යාති භික්‌ඛුපුබ්‌බකං සංවිධානං, ඉතරං භික්‌ඛුනිපුබ්‌බකං . එකද්‌ධානමග්‌ගන්‌ති එකතො අද්‌ධානසඞ්‌ඛාතං මග්‌ගං. හිය්‍යොති සුවෙ. පරෙති තතියෙ දිවසෙ.
183. Sattame pāḷiyaṃ gacchāma bhagini gacchāmāyyāti bhikkhupubbakaṃ saṃvidhānaṃ, itaraṃ bhikkhunipubbakaṃ . Ekaddhānamagganti ekato addhānasaṅkhātaṃ maggaṃ. Hiyyoti suve. Pareti tatiye divase.
ද්‌විධා වුත්‌තප්‌පකාරොති පාදගමනෙ පක්‌ඛගමනෙති ද්‌විධා වුත්‌තප්‌පකාරො. උපචාරො න ලබ්‌භතීති යො පරික්‌ඛිත්‌තාදිගාමස්‌ස එකලෙඩ්‌ඩුපාතාදිඋපචාරො වුත්‌තො, සො ඉධ න ලබ්‌භති ආසන්‌නත්‌තා. එතෙන ච අන්‌තරඝරෙයෙවෙත්‌ථ ගාමොති අධිප්‌පෙතො, න සකලං ගාමඛෙත්‌තං. තත්‌ථාපි යත්‌ථ උපචාරො ලබ්‌භති, තත්‌ථ උපචාරොක්‌කමනෙ එව ආපත්‌තීති දස්‌සෙති. තෙනාහ ‘‘රතනමත්‌තන්‌තරො’’තිආදි. උපචාරොක්‌කමනඤ්‌චෙත්‌ථ උපචාරබ්‌භන්‌තරෙ පවිසනමෙව හොති. තත්‌ථ අප්‌පවිසිත්‌වාපි උපචාරතො බහි අද්‌ධයොජනබ්‌භන්‌තරගතෙන මග්‌ගෙන ගච්‌ඡන්‌තොපි මග්‌ගස්‌ස ද්‌වීසු පස්‌සෙසු අද්‌ධයොජනබ්‌භන්‌තරගතං ගාමූපචාරං සබ්‌බං ඔක්‌කමිත්‌වා ගච්‌ඡතිච්‌චෙව වුච්‌චති. අද්‌ධයොජනතො බහි ගතෙන මග්‌ගෙන ගච්‌ඡන්‌තො න ගාමූපචාරගණනාය කාරෙතබ්‌බො, අද්‌ධයොජනගණනායෙව කාරෙතබ්‌බො. එවඤ්‌ච සති අනන්‌තරසික්‌ඛාපදෙ නාවායෙව ගාමතීරපස්‌සෙන ගච්‌ඡන්‌තස්‌ස ගාමූපචාරගණනාය ආපත්‌ති සමත්‌ථිතා හොති. න හි සක්‌කා නාවාය ගාමූපචාරබ්‌භන්‌තරෙ පවිසිතුං. තිණ්‌ණං මග්‌ගානං සම්‌බන්‌ධට්‌ඨානං සිඞ්‌ඝාටකං. එත්‌ථන්‌තරෙ සංවිදහිතෙති එත්‌ථ න කෙවලං යථාවුත්‌තරථිකාදීසු එව සංවිදහනෙ දුක්‌කටං, අන්‌තරාමග්‌ගෙපීති අධිප්‌පායො.
Dvidhā vuttappakāroti pādagamane pakkhagamaneti dvidhā vuttappakāro. Upacāro na labbhatīti yo parikkhittādigāmassa ekaleḍḍupātādiupacāro vutto, so idha na labbhati āsannattā. Etena ca antaraghareyevettha gāmoti adhippeto, na sakalaṃ gāmakhettaṃ. Tatthāpi yattha upacāro labbhati, tattha upacārokkamane eva āpattīti dasseti. Tenāha ‘‘ratanamattantaro’’tiādi. Upacārokkamanañcettha upacārabbhantare pavisanameva hoti. Tattha appavisitvāpi upacārato bahi addhayojanabbhantaragatena maggena gacchantopi maggassa dvīsu passesu addhayojanabbhantaragataṃ gāmūpacāraṃ sabbaṃ okkamitvā gacchaticceva vuccati. Addhayojanato bahi gatena maggena gacchanto na gāmūpacāragaṇanāya kāretabbo, addhayojanagaṇanāyeva kāretabbo. Evañca sati anantarasikkhāpade nāvāyeva gāmatīrapassena gacchantassa gāmūpacāragaṇanāya āpatti samatthitā hoti. Na hi sakkā nāvāya gāmūpacārabbhantare pavisituṃ. Tiṇṇaṃ maggānaṃ sambandhaṭṭhānaṃ siṅghāṭakaṃ. Etthantare saṃvidahiteti ettha na kevalaṃ yathāvuttarathikādīsu eva saṃvidahane dukkaṭaṃ, antarāmaggepīti adhippāyo.
අද්‌ධයොජනං අතික්‌කමන්‌තස්‌සාති අසති ගාමෙ අද්‌ධයොජනං අතික්‌කමන්‌තස්‌ස. යස්‌මිඤ්‌හි ගාමඛෙත්‌තභූතෙපි අරඤ්‌ඤෙ අද්‌ධයොජනබ්‌භන්‌තරෙ ගාමො න හොති, තම්‌පි ඉධ අගාමකං අරඤ්‌ඤන්‌ති අධිප්‌පෙතං, න විඤ්‌ඣාටවාදයො.
Addhayojanaṃ atikkamantassāti asati gāme addhayojanaṃ atikkamantassa. Yasmiñhi gāmakhettabhūtepi araññe addhayojanabbhantare gāmo na hoti, tampi idha agāmakaṃ araññanti adhippetaṃ, na viñjhāṭavādayo.
185. රට්‌ඨභෙදෙති රට්‌ඨවිලොපෙ. චක්‌කසමාරුළ්‌හාති ඉරියාපථචක්‌කං, සකටචක්‌කං වා සමාරුළ්‌හා. ද්‌වින්‌නම්‌පි සංවිදහිත්‌වා මග්‌ගප්‌පටිපත්‌ති, අවිසඞ්‌කෙතං, සමයාභාවො, අනාපදා, ගාමන්‌තරොක්‌කමනං වා අද්‌ධයොජනාතික්‌කමො වාති ඉමානෙත්‌ථ පඤ්‌ච අඞ්‌ගානි. එකතොඋපසම්‌පන්‌නාදීහි සද්‌ධිං සංවිධාය ගච්‌ඡන්‌තස්‌ස පන මාතුගාමසික්‌ඛාපදෙන ආපත්‌ති.
185.Raṭṭhabhedeti raṭṭhavilope. Cakkasamāruḷhāti iriyāpathacakkaṃ, sakaṭacakkaṃ vā samāruḷhā. Dvinnampi saṃvidahitvā maggappaṭipatti, avisaṅketaṃ, samayābhāvo, anāpadā, gāmantarokkamanaṃ vā addhayojanātikkamo vāti imānettha pañca aṅgāni. Ekatoupasampannādīhi saddhiṃ saṃvidhāya gacchantassa pana mātugāmasikkhāpadena āpatti.
සංවිධානසික්‌ඛාපදවණ්‌ණනා නිට්‌ඨිතා.
Saṃvidhānasikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 3. ඔවාදවග්‌ගො • 3. Ovādavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 7. සංවිධානසික්‌ඛාපදවණ්‌ණනා • 7. Saṃvidhānasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 7. සංවිදහනසික්‌ඛාපදවණ්‌ණනා • 7. Saṃvidahanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 7. සංවිධානසික්‌ඛාපදවණ්‌ණනා • 7. Saṃvidhānasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 7. සංවිධානසික්‌ඛාපදං • 7. Saṃvidhānasikkhāpadaṃ
