| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៨. សំយោគសុត្តំ
8. Saṃyogasuttaṃ
៥១. ‘‘សំយោគវិសំយោគំ វោ, ភិក្ខវេ, ធម្មបរិយាយំ ទេសេស្សាមិ។ តំ សុណាថ…បេ.… កតមោ ច សោ, ភិក្ខវេ, សំយោគោ វិសំយោគោ ធម្មបរិយាយោ?
51. ‘‘Saṃyogavisaṃyogaṃ vo, bhikkhave, dhammapariyāyaṃ desessāmi. Taṃ suṇātha…pe… katamo ca so, bhikkhave, saṃyogo visaṃyogo dhammapariyāyo?
‘‘ឥត្ថី, ភិក្ខវេ, អជ្ឈត្តំ ឥត្ថិន្ទ្រិយំ មនសិ ករោតិ – ឥត្ថិកុត្តំ ឥត្ថាកប្បំ ឥត្ថិវិធំ ឥត្ថិច្ឆន្ទំ ឥត្ថិស្សរំ ឥត្ថាលង្ការំ។ សា តត្ថ រជ្ជតិ តត្រាភិរមតិ។ សា តត្ថ រត្តា តត្រាភិរតា ពហិទ្ធា បុរិសិន្ទ្រិយំ មនសិ ករោតិ – បុរិសកុត្តំ បុរិសាកប្បំ បុរិសវិធំ បុរិសច្ឆន្ទំ បុរិសស្សរំ បុរិសាលង្ការំ។ សា តត្ថ រជ្ជតិ តត្រាភិរមតិ។ សា តត្ថ រត្តា តត្រាភិរតា ពហិទ្ធា សំយោគំ អាកង្ខតិ។ យញ្ចស្សា សំយោគបច្ចយា ឧប្បជ្ជតិ សុខំ សោមនស្សំ តញ្ច អាកង្ខតិ។ ឥត្ថត្តេ, ភិក្ខវេ, អភិរតា សត្តា បុរិសេសុ សំយោគំ គតា។ ឯវំ ខោ, ភិក្ខវេ, ឥត្ថី ឥត្ថត្តំ នាតិវត្តតិ។
‘‘Itthī, bhikkhave, ajjhattaṃ itthindriyaṃ manasi karoti – itthikuttaṃ itthākappaṃ itthividhaṃ itthicchandaṃ itthissaraṃ itthālaṅkāraṃ. Sā tattha rajjati tatrābhiramati. Sā tattha rattā tatrābhiratā bahiddhā purisindriyaṃ manasi karoti – purisakuttaṃ purisākappaṃ purisavidhaṃ purisacchandaṃ purisassaraṃ purisālaṅkāraṃ. Sā tattha rajjati tatrābhiramati. Sā tattha rattā tatrābhiratā bahiddhā saṃyogaṃ ākaṅkhati. Yañcassā saṃyogapaccayā uppajjati sukhaṃ somanassaṃ tañca ākaṅkhati. Itthatte, bhikkhave, abhiratā sattā purisesu saṃyogaṃ gatā. Evaṃ kho, bhikkhave, itthī itthattaṃ nātivattati.
‘‘បុរិសោ, ភិក្ខវេ, អជ្ឈត្តំ បុរិសិន្ទ្រិយំ មនសិ ករោតិ – បុរិសកុត្តំ បុរិសាកប្បំ បុរិសវិធំ បុរិសច្ឆន្ទំ បុរិសស្សរំ បុរិសាលង្ការំ។ សោ តត្ថ រជ្ជតិ តត្រាភិរមតិ។ សោ តត្ថ រត្តោ តត្រាភិរតោ ពហិទ្ធា ឥត្ថិន្ទ្រិយំ មនសិ ករោតិ – ឥត្ថិកុត្តំ ឥត្ថាកប្បំ ឥត្ថិវិធំ ឥត្ថិច្ឆន្ទំ ឥត្ថិស្សរំ ឥត្ថាលង្ការំ។ សោ តត្ថ រជ្ជតិ តត្រាភិរមតិ។ សោ តត្ថ រត្តោ តត្រាភិរតោ ពហិទ្ធា សំយោគំ អាកង្ខតិ។ យញ្ចស្ស សំយោគបច្ចយា ឧប្បជ្ជតិ សុខំ សោមនស្សំ តញ្ច អាកង្ខតិ។ បុរិសត្តេ, ភិក្ខវេ, អភិរតា សត្តា ឥត្ថីសុ សំយោគំ គតា។ ឯវំ ខោ, ភិក្ខវេ, បុរិសោ បុរិសត្តំ នាតិវត្តតិ។ ឯវំ ខោ, ភិក្ខវេ, សំយោគោ ហោតិ។
‘‘Puriso, bhikkhave, ajjhattaṃ purisindriyaṃ manasi karoti – purisakuttaṃ purisākappaṃ purisavidhaṃ purisacchandaṃ purisassaraṃ purisālaṅkāraṃ. So tattha rajjati tatrābhiramati. So tattha ratto tatrābhirato bahiddhā itthindriyaṃ manasi karoti – itthikuttaṃ itthākappaṃ itthividhaṃ itthicchandaṃ itthissaraṃ itthālaṅkāraṃ. So tattha rajjati tatrābhiramati. So tattha ratto tatrābhirato bahiddhā saṃyogaṃ ākaṅkhati. Yañcassa saṃyogapaccayā uppajjati sukhaṃ somanassaṃ tañca ākaṅkhati. Purisatte, bhikkhave, abhiratā sattā itthīsu saṃyogaṃ gatā. Evaṃ kho, bhikkhave, puriso purisattaṃ nātivattati. Evaṃ kho, bhikkhave, saṃyogo hoti.
‘‘កថញ្ច, ភិក្ខវេ, វិសំយោគោ ហោតិ? ឥត្ថី, ភិក្ខវេ, អជ្ឈត្តំ ឥត្ថិន្ទ្រិយំ ន មនសិ ករោតិ – ឥត្ថិកុត្តំ ឥត្ថាកប្បំ ឥត្ថិវិធំ ឥត្ថិច្ឆន្ទំ ឥត្ថិស្សរំ ឥត្ថាលង្ការំ។ សា តត្ថ ន រជ្ជតិ, សា តត្រ នាភិរមតិ។ សា តត្ថ អរត្តា តត្រ អនភិរតា ពហិទ្ធា បុរិសិន្ទ្រិយំ ន មនសិ ករោតិ – បុរិសកុត្តំ បុរិសាកប្បំ បុរិសវិធំ បុរិសច្ឆន្ទំ បុរិសស្សរំ បុរិសាលង្ការំ។ សា តត្ថ ន រជ្ជតិ, តត្រ នាភិរមតិ។ សា តត្ថ អរត្តា តត្រ អនភិរតា ពហិទ្ធា សំយោគំ នាកង្ខតិ។ យញ្ចស្សា សំយោគបច្ចយា ឧប្បជ្ជតិ សុខំ សោមនស្សំ តញ្ច នាកង្ខតិ។ ឥត្ថត្តេ, ភិក្ខវេ , អនភិរតា សត្តា បុរិសេសុ វិសំយោគំ គតា។ ឯវំ ខោ, ភិក្ខវេ, ឥត្ថី ឥត្ថត្តំ អតិវត្តតិ។
‘‘Kathañca, bhikkhave, visaṃyogo hoti? Itthī, bhikkhave, ajjhattaṃ itthindriyaṃ na manasi karoti – itthikuttaṃ itthākappaṃ itthividhaṃ itthicchandaṃ itthissaraṃ itthālaṅkāraṃ. Sā tattha na rajjati, sā tatra nābhiramati. Sā tattha arattā tatra anabhiratā bahiddhā purisindriyaṃ na manasi karoti – purisakuttaṃ purisākappaṃ purisavidhaṃ purisacchandaṃ purisassaraṃ purisālaṅkāraṃ. Sā tattha na rajjati, tatra nābhiramati. Sā tattha arattā tatra anabhiratā bahiddhā saṃyogaṃ nākaṅkhati. Yañcassā saṃyogapaccayā uppajjati sukhaṃ somanassaṃ tañca nākaṅkhati. Itthatte, bhikkhave , anabhiratā sattā purisesu visaṃyogaṃ gatā. Evaṃ kho, bhikkhave, itthī itthattaṃ ativattati.
‘‘បុរិសោ, ភិក្ខវេ, អជ្ឈត្តំ បុរិសិន្ទ្រិយំ ន មនសិ ករោតិ – បុរិសកុត្តំ បុរិសាកប្បំ បុរិសវិធំ បុរិសច្ឆន្ទំ បុរិសស្សរំ បុរិសាលង្ការំ។ សោ តត្ថ ន រជ្ជតិ, សោ តត្រ នាភិរមតិ។ សោ តត្ថ អរត្តោ តត្រ អនភិរតោ ពហិទ្ធា ឥត្ថិន្ទ្រិយំ ន មនសិ ករោតិ – ឥត្ថិកុត្តំ ឥត្ថាកប្បំ ឥត្ថិវិធំ ឥត្ថិច្ឆន្ទំ ឥត្ថិស្សរំ ឥត្ថាលង្ការំ។ សោ តត្ថ ន រជ្ជតិ, តត្រ នាភិរមតិ។ សោ តត្ថ អរត្តោ តត្រ អនភិរតោ ពហិទ្ធា សំយោគំ នាកង្ខតិ។ យញ្ចស្ស សំយោគបច្ចយា ឧប្បជ្ជតិ សុខំ សោមនស្សំ តញ្ច នាកង្ខតិ។ បុរិសត្តេ, ភិក្ខវេ, អនភិរតា សត្តា ឥត្ថីសុ វិសំយោគំ គតា។ ឯវំ ខោ, ភិក្ខវេ, បុរិសោ បុរិសត្តំ អតិវត្តតិ។ ឯវំ ខោ, ភិក្ខវេ, វិសំយោគោ ហោតិ។ អយំ ខោ, ភិក្ខវេ, សំយោគោ វិសំយោគោ ធម្មបរិយាយោ’’តិ។ អដ្ឋមំ។
‘‘Puriso, bhikkhave, ajjhattaṃ purisindriyaṃ na manasi karoti – purisakuttaṃ purisākappaṃ purisavidhaṃ purisacchandaṃ purisassaraṃ purisālaṅkāraṃ. So tattha na rajjati, so tatra nābhiramati. So tattha aratto tatra anabhirato bahiddhā itthindriyaṃ na manasi karoti – itthikuttaṃ itthākappaṃ itthividhaṃ itthicchandaṃ itthissaraṃ itthālaṅkāraṃ. So tattha na rajjati, tatra nābhiramati. So tattha aratto tatra anabhirato bahiddhā saṃyogaṃ nākaṅkhati. Yañcassa saṃyogapaccayā uppajjati sukhaṃ somanassaṃ tañca nākaṅkhati. Purisatte, bhikkhave, anabhiratā sattā itthīsu visaṃyogaṃ gatā. Evaṃ kho, bhikkhave, puriso purisattaṃ ativattati. Evaṃ kho, bhikkhave, visaṃyogo hoti. Ayaṃ kho, bhikkhave, saṃyogo visaṃyogo dhammapariyāyo’’ti. Aṭṭhamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៨. សំយោគសុត្តវណ្ណនា • 8. Saṃyogasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៧-៨. មេថុនសុត្តាទិវណ្ណនា • 7-8. Methunasuttādivaṇṇanā
