| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၂၁. ဧကဝီသတိမဝဂ္ဂော
21. Ekavīsatimavaggo
(၂၀၂) ၃. သံယောဇနကထာ
(202) 3. Saṃyojanakathā
၈၈၁. အတ္ထိ ကိဉ္စိ သံယောဇနံ အပ္ပဟာယ အရဟတ္တပ္ပတ္တီတိ? အာမန္တာ။ အတ္ထိ ကိဉ္စိ သက္ကာယဒိဋ္ဌိံ အပ္ပဟာယ။ပေ.။ ဝိစိကိစ္ဆံ အပ္ပဟာယ။ပေ.။ သီလဗ္ဗတပရာမာသံ အပ္ပဟာယ။ ရာဂံ အပ္ပဟာယ။ ဒောသံ အပ္ပဟာယ။ မောဟံ အပ္ပဟာယ။ အနောတ္တပ္ပံ အပ္ပဟာယ အရဟတ္တပ္ပတ္တီတိ? န ဟေဝံ ဝတ္တဗ္ဗေ။ပေ.။။
881. Atthi kiñci saṃyojanaṃ appahāya arahattappattīti? Āmantā. Atthi kiñci sakkāyadiṭṭhiṃ appahāya…pe… vicikicchaṃ appahāya…pe… sīlabbataparāmāsaṃ appahāya… rāgaṃ appahāya… dosaṃ appahāya… mohaṃ appahāya… anottappaṃ appahāya arahattappattīti? Na hevaṃ vattabbe…pe….
အတ္ထိ ကိဉ္စိ သံယောဇနံ အပ္ပဟာယ အရဟတ္တပ္ပတ္တီတိ? အာမန္တာ။ အရဟာ သရာဂော သဒောသော သမောဟော သမာနော သမက္ခော သပဠာသော သဥပာယာသော သကိလေသောတိ? န ဟေဝံ ဝတ္တဗ္ဗေ။ပေ.။ နနု အရဟာ နိရာဂော နိဒ္ဒောသော နိမ္မောဟော နိမ္မာနော နိမ္မက္ခော နိပ္ပဠာသော နိရုပာယာသော နိက္ကိလေသောတိ? အာမန္တာ။ ဟဉ္စိ အရဟာ နိရာဂော။ပေ.။ နိက္ကိလေသော, နော စ ဝတ ရေ ဝတ္တဗ္ဗေ – ‘‘အတ္ထိ ကိဉ္စိ သံယောဇနံ အပ္ပဟာယ အရဟတ္တပ္ပတ္တီ’’တိ။
Atthi kiñci saṃyojanaṃ appahāya arahattappattīti? Āmantā. Arahā sarāgo sadoso samoho samāno samakkho sapaḷāso saupāyāso sakilesoti? Na hevaṃ vattabbe…pe… nanu arahā nirāgo niddoso nimmoho nimmāno nimmakkho nippaḷāso nirupāyāso nikkilesoti? Āmantā. Hañci arahā nirāgo…pe… nikkileso, no ca vata re vattabbe – ‘‘atthi kiñci saṃyojanaṃ appahāya arahattappattī’’ti.
၈၈၂. န ဝတ္တဗ္ဗံ – ‘‘အတ္ထိ ကိဉ္စိ သံယောဇနံ အပ္ပဟာယ အရဟတ္တပ္ပတ္တီ’’တိ ? အာမန္တာ။ အရဟာ သဗ္ဗံ ဗုဒ္ဓဝိသယံ ဇာနာတီတိ? န ဟေဝံ ဝတ္တဗ္ဗေ။ တေန ဟိ အတ္ထိ ကိဉ္စိ သံယောဇနံ အပ္ပဟာယ အရဟတ္တပ္ပတ္တီတိ။
882. Na vattabbaṃ – ‘‘atthi kiñci saṃyojanaṃ appahāya arahattappattī’’ti ? Āmantā. Arahā sabbaṃ buddhavisayaṃ jānātīti? Na hevaṃ vattabbe. Tena hi atthi kiñci saṃyojanaṃ appahāya arahattappattīti.
သံယောဇနကထာ နိဋ္ဌိတာ။
Saṃyojanakathā niṭṭhitā.
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၃. သညောဇနကထာဝဏ္ဏနာ • 3. Saññojanakathāvaṇṇanā
