| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. ஸங்யோஜனஸுத்தங்
3. Saṃyojanasuttaṃ
53. ஸாவத்தி²யங் விஹரதி …பே॰… ‘‘ஸங்யோஜனியேஸு, பி⁴க்க²வே, த⁴ம்மேஸு அஸ்ஸாதா³னுபஸ்ஸினோ விஹரதோ தண்ஹா பவட்³ட⁴தி. தண்ஹாபச்சயா உபாதா³னங்; உபாதா³னபச்சயா ப⁴வோ; ப⁴வபச்சயா ஜாதி; ஜாதிபச்சயா ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி’’.
53. Sāvatthiyaṃ viharati …pe… ‘‘saṃyojaniyesu, bhikkhave, dhammesu assādānupassino viharato taṇhā pavaḍḍhati. Taṇhāpaccayā upādānaṃ; upādānapaccayā bhavo; bhavapaccayā jāti; jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti’’.
‘‘ஸெய்யதா²பி , பி⁴க்க²வே, தேலஞ்ச படிச்ச வட்டிஞ்ச படிச்ச தேலப்பதீ³போ ஜா²யெய்ய. தத்ர புரிஸோ காலேன காலங் தேலங் ஆஸிஞ்செய்ய வட்டிங் உபஸங்ஹரெய்ய. ஏவஞ்ஹி ஸோ, பி⁴க்க²வே, தேலப்பதீ³போ ததா³ஹாரோ தது³பாதா³னோ சிரங் தீ³க⁴மத்³தா⁴னங் ஜலெய்ய. ஏவமேவ கோ², பி⁴க்க²வே, ஸங்யோஜனியேஸு த⁴ம்மேஸு அஸ்ஸாதா³னுபஸ்ஸினோ விஹரதோ தண்ஹா பவட்³ட⁴தி. தண்ஹாபச்சயா உபாதா³னங்; உபாதா³னபச்சயா ப⁴வோ; ப⁴வபச்சயா ஜாதி ; ஜாதிபச்சயா ஜராமரணங் ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி.
‘‘Seyyathāpi , bhikkhave, telañca paṭicca vaṭṭiñca paṭicca telappadīpo jhāyeyya. Tatra puriso kālena kālaṃ telaṃ āsiñceyya vaṭṭiṃ upasaṃhareyya. Evañhi so, bhikkhave, telappadīpo tadāhāro tadupādāno ciraṃ dīghamaddhānaṃ jaleyya. Evameva kho, bhikkhave, saṃyojaniyesu dhammesu assādānupassino viharato taṇhā pavaḍḍhati. Taṇhāpaccayā upādānaṃ; upādānapaccayā bhavo; bhavapaccayā jāti ; jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti.
‘‘ஸங்யோஜனியேஸு, பி⁴க்க²வே, த⁴ம்மேஸு ஆதீ³னவானுபஸ்ஸினோ விஹரதோ தண்ஹா நிருஜ்ஜ²தி. தண்ஹானிரோதா⁴ உபாதா³னநிரோதோ⁴; உபாதா³னநிரோதா⁴ ப⁴வனிரோதோ⁴; ப⁴வனிரோதா⁴ ஜாதினிரோதோ⁴; ஜாதினிரோதா⁴ ஜராமரணங் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி. ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி.
‘‘Saṃyojaniyesu, bhikkhave, dhammesu ādīnavānupassino viharato taṇhā nirujjhati. Taṇhānirodhā upādānanirodho; upādānanirodhā bhavanirodho; bhavanirodhā jātinirodho; jātinirodhā jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hoti.
‘‘ஸெய்யதா²பி, பி⁴க்க²வே, தேலஞ்ச படிச்ச வட்டிஞ்ச படிச்ச தேலப்பதீ³போ ஜா²யெய்ய. தத்ர புரிஸோ ந காலேன காலங் தேலங் ஆஸிஞ்செய்ய ந வட்டிங் உபஸங்ஹரெய்ய. ஏவஞ்ஹி ஸோ, பி⁴க்க²வே, தேலப்பதீ³போ புரிமஸ்ஸ ச உபாதா³னஸ்ஸ பரியாதா³னா அஞ்ஞஸ்ஸ ச அனுபஹாரா அனாஹாரோ நிப்³பா³யெய்ய. ஏவமேவ கோ², பி⁴க்க²வே, ஸங்யோஜனியேஸு த⁴ம்மேஸு ஆதீ³னவானுபஸ்ஸினோ விஹரதோ தண்ஹா நிருஜ்ஜ²தி. தண்ஹானிரோதா⁴ உபாதா³னநிரோதோ⁴…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’தி. ததியங்.
‘‘Seyyathāpi, bhikkhave, telañca paṭicca vaṭṭiñca paṭicca telappadīpo jhāyeyya. Tatra puriso na kālena kālaṃ telaṃ āsiñceyya na vaṭṭiṃ upasaṃhareyya. Evañhi so, bhikkhave, telappadīpo purimassa ca upādānassa pariyādānā aññassa ca anupahārā anāhāro nibbāyeyya. Evameva kho, bhikkhave, saṃyojaniyesu dhammesu ādīnavānupassino viharato taṇhā nirujjhati. Taṇhānirodhā upādānanirodho…pe… evametassa kevalassa dukkhakkhandhassa nirodho hotī’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. ஸங்யோஜனஸுத்தவண்ணனா • 3. Saṃyojanasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3-4. ஸங்யோஜனஸுத்தத்³வயவண்ணனா • 3-4. Saṃyojanasuttadvayavaṇṇanā
