| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. சித்தஸங்யுத்தங்
7. Cittasaṃyuttaṃ
1. ஸங்யோஜனஸுத்தங்
1. Saṃyojanasuttaṃ
343. ஏகங் ஸமயங் ஸம்ப³ஹுலா தே²ரா பி⁴க்கூ² மச்சி²காஸண்டே³ விஹரந்தி அம்பா³டகவனே. தேன கோ² பன ஸமயேன ஸம்ப³ஹுலானங் தே²ரானங் பி⁴க்கூ²னங் பச்சா²ப⁴த்தங் பிண்ட³பாதபடிக்கந்தானங் மண்ட³லமாளே ஸன்னிஸின்னானங் ஸன்னிபதிதானங் அயமந்தராகதா² உத³பாதி³ – ‘‘‘ஸங்யோஜன’ந்தி வா, ஆவுஸோ, ‘ஸங்யோஜனியா த⁴ம்மா’தி வா இமே த⁴ம்மா நானத்தா² நானாப்³யஞ்ஜனா உதா³ஹு ஏகத்தா² ப்³யஞ்ஜனமேவ நான’’ந்தி? தத்ரேகச்சேஹி தே²ரேஹி பி⁴க்கூ²ஹி ஏவங் ப்³யாகதங் ஹோதி – ‘‘‘ஸங்யோஜன’ந்தி வா, ஆவுஸோ, ‘ஸங்யோஜனியா த⁴ம்மா’தி வா இமே த⁴ம்மா நானத்தா² சேவ நானாப்³யஞ்ஜனா சா’’தி. ஏகச்சேஹி தே²ரேஹி பி⁴க்கூ²ஹி ஏவங் ப்³யாகதங் ஹோதி – ‘‘‘ஸங்யோஜன’ந்தி வா, ஆவுஸோ, ‘ஸங்யோஜனியா த⁴ம்மா’தி வா இமே த⁴ம்மா ஏகத்தா² ப்³யஞ்ஜனமேவ நான’’ந்தி.
343. Ekaṃ samayaṃ sambahulā therā bhikkhū macchikāsaṇḍe viharanti ambāṭakavane. Tena kho pana samayena sambahulānaṃ therānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi – ‘‘‘saṃyojana’nti vā, āvuso, ‘saṃyojaniyā dhammā’ti vā ime dhammā nānatthā nānābyañjanā udāhu ekatthā byañjanameva nāna’’nti? Tatrekaccehi therehi bhikkhūhi evaṃ byākataṃ hoti – ‘‘‘saṃyojana’nti vā, āvuso, ‘saṃyojaniyā dhammā’ti vā ime dhammā nānatthā ceva nānābyañjanā cā’’ti. Ekaccehi therehi bhikkhūhi evaṃ byākataṃ hoti – ‘‘‘saṃyojana’nti vā, āvuso, ‘saṃyojaniyā dhammā’ti vā ime dhammā ekatthā byañjanameva nāna’’nti.
தேன கோ² பன ஸமயேன சித்தோ க³ஹபதி மிக³பத²கங் அனுப்பத்தோ ஹோதி கேனசிதே³வ கரணீயேன. அஸ்ஸோஸி கோ² சித்தோ க³ஹபதி ஸம்ப³ஹுலானங் கிர தே²ரானங் பி⁴க்கூ²னங் பச்சா²ப⁴த்தங் பிண்ட³பாதபடிக்கந்தானங் மண்ட³லமாளே ஸன்னிஸின்னானங் ஸன்னிபதிதானங் அயமந்தராகதா² உத³பாதி³ – ‘‘‘ஸங்யோஜன’ந்தி வா, ஆவுஸோ, ‘ஸங்யோஜனியா த⁴ம்மா’தி வா இமே த⁴ம்மா நானத்தா² நானாப்³யஞ்ஜனா உதா³ஹு ஏகத்தா² ப்³யஞ்ஜனமேவ நான’’ந்தி? தத்ரேகச்சேஹி தே²ரேஹி பி⁴க்கூ²ஹி ஏவங் ப்³யாகதங் – ‘‘‘ஸங்யோஜன’ந்தி வா, ஆவுஸோ , ‘ஸங்யோஜனியா த⁴ம்மா’தி வா இமே த⁴ம்மா நானத்தா² சேவ நானாப்³யஞ்ஜனா சா’’தி. ஏகச்சேஹி தே²ரேஹி பி⁴க்கூ²ஹி ஏவங் ப்³யாகதங் ‘ஸங்யோஜன’ந்தி வா, ஆவுஸோ ‘ஸங்யோஜனியா த⁴ம்மா’தி வா இமே த⁴ம்மா ஏகத்தா² ப்³யஞ்ஜனமேவ நானந்தி. அத² கோ² சித்தோ க³ஹபதி யேன தே²ரா பி⁴க்கூ² தேனுபஸங்கமி; உபஸங்கமித்வா தே²ரே பி⁴க்கூ² அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² சித்தோ க³ஹபதி தே²ரே பி⁴க்கூ² ஏதத³வோச – ‘‘ஸுதங் மேதங், ப⁴ந்தே, ஸம்ப³ஹுலானங் கிர தே²ரானங் பி⁴க்கூ²னங் பச்சா²ப⁴த்தங் பிண்ட³பாதபடிக்கந்தானங் மண்ட³லமாளே ஸன்னிஸின்னானங் ஸன்னிபதிதானங் அயமந்தராகதா² உத³பாதி³ – ‘ஸங்யோஜன’ந்தி வா, ஆவுஸோ, ‘ஸங்யோஜனியா த⁴ம்மா’தி வா இமே த⁴ம்மா நானத்தா² நானாப்³யஞ்ஜனா உதா³ஹு ஏகத்தா² ப்³யஞ்ஜனமேவ நான’’ந்தி? ஏகச்சேஹி தே²ரேஹி பி⁴க்கூ²ஹி ஏவங் ப்³யாகதங் – ‘‘‘ஸங்யோஜன’ந்தி வா, ஆவுஸோ, ‘ஸங்யோஜனியா த⁴ம்மா’தி வா இமே த⁴ம்மா நானத்தா² சேவ நானாப்³யஞ்ஜனா சா’’தி. ஏகச்சேஹி தே²ரேஹி பி⁴க்கூ²ஹி ஏவங் ப்³யாகதங் ‘‘‘ஸங்யோஜன’ந்தி வா, ஆவுஸோ, ‘ஸங்யோஜனியா த⁴ம்மா’தி வா இமே த⁴ம்மா ஏகத்தா² ப்³யஞ்ஜனமேவ நான’’ந்தி. ‘‘ஏவங், க³ஹபதீ’’தி.
Tena kho pana samayena citto gahapati migapathakaṃ anuppatto hoti kenacideva karaṇīyena. Assosi kho citto gahapati sambahulānaṃ kira therānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi – ‘‘‘saṃyojana’nti vā, āvuso, ‘saṃyojaniyā dhammā’ti vā ime dhammā nānatthā nānābyañjanā udāhu ekatthā byañjanameva nāna’’nti? Tatrekaccehi therehi bhikkhūhi evaṃ byākataṃ – ‘‘‘saṃyojana’nti vā, āvuso , ‘saṃyojaniyā dhammā’ti vā ime dhammā nānatthā ceva nānābyañjanā cā’’ti. Ekaccehi therehi bhikkhūhi evaṃ byākataṃ ‘saṃyojana’nti vā, āvuso ‘saṃyojaniyā dhammā’ti vā ime dhammā ekatthā byañjanameva nānanti. Atha kho citto gahapati yena therā bhikkhū tenupasaṅkami; upasaṅkamitvā there bhikkhū abhivādetvā ekamantaṃ nisīdi. Ekamantaṃ nisinno kho citto gahapati there bhikkhū etadavoca – ‘‘sutaṃ metaṃ, bhante, sambahulānaṃ kira therānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi – ‘saṃyojana’nti vā, āvuso, ‘saṃyojaniyā dhammā’ti vā ime dhammā nānatthā nānābyañjanā udāhu ekatthā byañjanameva nāna’’nti? Ekaccehi therehi bhikkhūhi evaṃ byākataṃ – ‘‘‘saṃyojana’nti vā, āvuso, ‘saṃyojaniyā dhammā’ti vā ime dhammā nānatthā ceva nānābyañjanā cā’’ti. Ekaccehi therehi bhikkhūhi evaṃ byākataṃ ‘‘‘saṃyojana’nti vā, āvuso, ‘saṃyojaniyā dhammā’ti vā ime dhammā ekatthā byañjanameva nāna’’nti. ‘‘Evaṃ, gahapatī’’ti.
‘‘‘ஸங்யோஜன’ந்தி வா, ப⁴ந்தே, ‘ஸங்யோஜனியா த⁴ம்மா’தி வா இமே த⁴ம்மா நானத்தா² சேவ நானாப்³யஞ்ஜனா ச. தேன ஹி, ப⁴ந்தே, உபமங் வோ கரிஸ்ஸாமி. உபமாயபிதே⁴கச்சே விஞ்ஞூ புரிஸா பா⁴ஸிதஸ்ஸ அத்த²ங் ஆஜானந்தி. ஸெய்யதா²பி, ப⁴ந்தே, காளோ ச ப³லீப³த்³தோ³ ஓதா³தோ ச ப³லீப³த்³தோ³ ஏகேன தா³மேன வா யொத்தேன வா ஸங்யுத்தா அஸ்ஸு. யோ நு கோ² ஏவங் வதெ³ய்ய – ‘காளோ ப³லீப³த்³தோ³ ஓதா³தஸ்ஸ ப³லீப³த்³த³ஸ்ஸ ஸங்யோஜனங் , ஓதா³தோ ப³லீப³த்³தோ³ காளஸ்ஸ ப³லீப³த்³த³ஸ்ஸ ஸங்யோஜன’ந்தி, ஸம்மா நு கோ² ஸோ வத³மானோ வதெ³ய்யா’’தி? ‘‘நோ ஹேதங், க³ஹபதி! ந கோ², க³ஹபதி, காளோ ப³லீப³த்³தோ³ ஓதா³தஸ்ஸ ப³லீப³த்³த³ஸ்ஸ ஸங்யோஜனங், நபி ஓதா³தோ ப³லீப³த்³தோ³ காளஸ்ஸ ப³ளீப³த்³த³ஸ்ஸ ஸங்யோஜனங்; யேன கோ² தே ஏகேன தா³மேன வா யொத்தேன வா ஸங்யுத்தா தங் தத்த² ஸங்யோஜன’’ந்தி. ‘‘ஏவமேவ கோ², ப⁴ந்தே, ந சக்கு² ரூபானங் ஸங்யோஜனங், ந ரூபா சக்கு²ஸ்ஸ ஸங்யோஜனங்; யஞ்ச தத்த² தது³ப⁴யங் படிச்ச உப்பஜ்ஜதி ச²ந்த³ராகோ³ தங் தத்த² ஸங்யோஜனங். ந ஸோதங் ஸத்³தா³னங்… ந கா⁴னங் க³ந்தா⁴னங்… ந ஜிவ்ஹா ரஸானங்… ந காயோ பொ²ட்ட²ப்³பா³னங் ஸங்யோஜனங், ந பொ²ட்ட²ப்³பா³ காயஸ்ஸ ஸங்யோஜனங்; யஞ்ச தத்த² தது³ப⁴யங் படிச்ச உப்பஜ்ஜதி ச²ந்த³ராகோ³ தங் தத்த² ஸங்யோஜனங். ந மனோ த⁴ம்மானங் ஸங்யோஜனங், ந த⁴ம்மா மனஸ்ஸ ஸங்யோஜனங்; யஞ்ச தத்த² தது³ப⁴யங் படிச்ச உப்பஜ்ஜதி ச²ந்த³ராகோ³ தங் தத்த² ஸங்யோஜன’’ந்தி. ‘‘லாபா⁴ தே, க³ஹபதி, ஸுலத்³த⁴ங் தே, க³ஹபதி, யஸ்ஸ தே க³ம்பீ⁴ரே பு³த்³த⁴வசனே பஞ்ஞாசக்கு² கமதீ’’தி. பட²மங்.
‘‘‘Saṃyojana’nti vā, bhante, ‘saṃyojaniyā dhammā’ti vā ime dhammā nānatthā ceva nānābyañjanā ca. Tena hi, bhante, upamaṃ vo karissāmi. Upamāyapidhekacce viññū purisā bhāsitassa atthaṃ ājānanti. Seyyathāpi, bhante, kāḷo ca balībaddo odāto ca balībaddo ekena dāmena vā yottena vā saṃyuttā assu. Yo nu kho evaṃ vadeyya – ‘kāḷo balībaddo odātassa balībaddassa saṃyojanaṃ , odāto balībaddo kāḷassa balībaddassa saṃyojana’nti, sammā nu kho so vadamāno vadeyyā’’ti? ‘‘No hetaṃ, gahapati! Na kho, gahapati, kāḷo balībaddo odātassa balībaddassa saṃyojanaṃ, napi odāto balībaddo kāḷassa baḷībaddassa saṃyojanaṃ; yena kho te ekena dāmena vā yottena vā saṃyuttā taṃ tattha saṃyojana’’nti. ‘‘Evameva kho, bhante, na cakkhu rūpānaṃ saṃyojanaṃ, na rūpā cakkhussa saṃyojanaṃ; yañca tattha tadubhayaṃ paṭicca uppajjati chandarāgo taṃ tattha saṃyojanaṃ. Na sotaṃ saddānaṃ… na ghānaṃ gandhānaṃ… na jivhā rasānaṃ… na kāyo phoṭṭhabbānaṃ saṃyojanaṃ, na phoṭṭhabbā kāyassa saṃyojanaṃ; yañca tattha tadubhayaṃ paṭicca uppajjati chandarāgo taṃ tattha saṃyojanaṃ. Na mano dhammānaṃ saṃyojanaṃ, na dhammā manassa saṃyojanaṃ; yañca tattha tadubhayaṃ paṭicca uppajjati chandarāgo taṃ tattha saṃyojana’’nti. ‘‘Lābhā te, gahapati, suladdhaṃ te, gahapati, yassa te gambhīre buddhavacane paññācakkhu kamatī’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஸங்யோஜனஸுத்தவண்ணனா • 1. Saṃyojanasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஸங்யோஜனஸுத்தவண்ணனா • 1. Saṃyojanasuttavaṇṇanā
