| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. চিত্তসংযুত্তং
7. Cittasaṃyuttaṃ
১. সংযোজনসুত্তং
1. Saṃyojanasuttaṃ
৩৪৩. একং সমযং সম্বহুলা থেরা ভিক্খূ মচ্ছিকাসণ্ডে ৰিহরন্তি অম্বাটকৰনে। তেন খো পন সমযেন সম্বহুলানং থেরানং ভিক্খূনং পচ্ছাভত্তং পিণ্ডপাতপটিক্কন্তানং মণ্ডলমাল়ে সন্নিসিন্নানং সন্নিপতিতানং অযমন্তরাকথা উদপাদি – ‘‘‘সংযোজন’ন্তি ৰা, আৰুসো, ‘সংযোজনিযা ধম্মা’তি ৰা ইমে ধম্মা নানত্থা নানাব্যঞ্জনা উদাহু একত্থা ব্যঞ্জনমেৰ নান’’ন্তি? তত্রেকচ্চেহি থেরেহি ভিক্খূহি এৰং ব্যাকতং হোতি – ‘‘‘সংযোজন’ন্তি ৰা, আৰুসো, ‘সংযোজনিযা ধম্মা’তি ৰা ইমে ধম্মা নানত্থা চেৰ নানাব্যঞ্জনা চা’’তি। একচ্চেহি থেরেহি ভিক্খূহি এৰং ব্যাকতং হোতি – ‘‘‘সংযোজন’ন্তি ৰা, আৰুসো, ‘সংযোজনিযা ধম্মা’তি ৰা ইমে ধম্মা একত্থা ব্যঞ্জনমেৰ নান’’ন্তি।
343. Ekaṃ samayaṃ sambahulā therā bhikkhū macchikāsaṇḍe viharanti ambāṭakavane. Tena kho pana samayena sambahulānaṃ therānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi – ‘‘‘saṃyojana’nti vā, āvuso, ‘saṃyojaniyā dhammā’ti vā ime dhammā nānatthā nānābyañjanā udāhu ekatthā byañjanameva nāna’’nti? Tatrekaccehi therehi bhikkhūhi evaṃ byākataṃ hoti – ‘‘‘saṃyojana’nti vā, āvuso, ‘saṃyojaniyā dhammā’ti vā ime dhammā nānatthā ceva nānābyañjanā cā’’ti. Ekaccehi therehi bhikkhūhi evaṃ byākataṃ hoti – ‘‘‘saṃyojana’nti vā, āvuso, ‘saṃyojaniyā dhammā’ti vā ime dhammā ekatthā byañjanameva nāna’’nti.
তেন খো পন সমযেন চিত্তো গহপতি মিগপথকং অনুপ্পত্তো হোতি কেনচিদেৰ করণীযেন। অস্সোসি খো চিত্তো গহপতি সম্বহুলানং কির থেরানং ভিক্খূনং পচ্ছাভত্তং পিণ্ডপাতপটিক্কন্তানং মণ্ডলমাল়ে সন্নিসিন্নানং সন্নিপতিতানং অযমন্তরাকথা উদপাদি – ‘‘‘সংযোজন’ন্তি ৰা, আৰুসো, ‘সংযোজনিযা ধম্মা’তি ৰা ইমে ধম্মা নানত্থা নানাব্যঞ্জনা উদাহু একত্থা ব্যঞ্জনমেৰ নান’’ন্তি? তত্রেকচ্চেহি থেরেহি ভিক্খূহি এৰং ব্যাকতং – ‘‘‘সংযোজন’ন্তি ৰা, আৰুসো , ‘সংযোজনিযা ধম্মা’তি ৰা ইমে ধম্মা নানত্থা চেৰ নানাব্যঞ্জনা চা’’তি। একচ্চেহি থেরেহি ভিক্খূহি এৰং ব্যাকতং ‘সংযোজন’ন্তি ৰা, আৰুসো ‘সংযোজনিযা ধম্মা’তি ৰা ইমে ধম্মা একত্থা ব্যঞ্জনমেৰ নানন্তি। অথ খো চিত্তো গহপতি যেন থেরা ভিক্খূ তেনুপসঙ্কমি; উপসঙ্কমিত্ৰা থেরে ভিক্খূ অভিৰাদেত্ৰা একমন্তং নিসীদি। একমন্তং নিসিন্নো খো চিত্তো গহপতি থেরে ভিক্খূ এতদৰোচ – ‘‘সুতং মেতং, ভন্তে, সম্বহুলানং কির থেরানং ভিক্খূনং পচ্ছাভত্তং পিণ্ডপাতপটিক্কন্তানং মণ্ডলমাল়ে সন্নিসিন্নানং সন্নিপতিতানং অযমন্তরাকথা উদপাদি – ‘সংযোজন’ন্তি ৰা, আৰুসো, ‘সংযোজনিযা ধম্মা’তি ৰা ইমে ধম্মা নানত্থা নানাব্যঞ্জনা উদাহু একত্থা ব্যঞ্জনমেৰ নান’’ন্তি? একচ্চেহি থেরেহি ভিক্খূহি এৰং ব্যাকতং – ‘‘‘সংযোজন’ন্তি ৰা, আৰুসো, ‘সংযোজনিযা ধম্মা’তি ৰা ইমে ধম্মা নানত্থা চেৰ নানাব্যঞ্জনা চা’’তি। একচ্চেহি থেরেহি ভিক্খূহি এৰং ব্যাকতং ‘‘‘সংযোজন’ন্তি ৰা, আৰুসো, ‘সংযোজনিযা ধম্মা’তি ৰা ইমে ধম্মা একত্থা ব্যঞ্জনমেৰ নান’’ন্তি। ‘‘এৰং, গহপতী’’তি।
Tena kho pana samayena citto gahapati migapathakaṃ anuppatto hoti kenacideva karaṇīyena. Assosi kho citto gahapati sambahulānaṃ kira therānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi – ‘‘‘saṃyojana’nti vā, āvuso, ‘saṃyojaniyā dhammā’ti vā ime dhammā nānatthā nānābyañjanā udāhu ekatthā byañjanameva nāna’’nti? Tatrekaccehi therehi bhikkhūhi evaṃ byākataṃ – ‘‘‘saṃyojana’nti vā, āvuso , ‘saṃyojaniyā dhammā’ti vā ime dhammā nānatthā ceva nānābyañjanā cā’’ti. Ekaccehi therehi bhikkhūhi evaṃ byākataṃ ‘saṃyojana’nti vā, āvuso ‘saṃyojaniyā dhammā’ti vā ime dhammā ekatthā byañjanameva nānanti. Atha kho citto gahapati yena therā bhikkhū tenupasaṅkami; upasaṅkamitvā there bhikkhū abhivādetvā ekamantaṃ nisīdi. Ekamantaṃ nisinno kho citto gahapati there bhikkhū etadavoca – ‘‘sutaṃ metaṃ, bhante, sambahulānaṃ kira therānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi – ‘saṃyojana’nti vā, āvuso, ‘saṃyojaniyā dhammā’ti vā ime dhammā nānatthā nānābyañjanā udāhu ekatthā byañjanameva nāna’’nti? Ekaccehi therehi bhikkhūhi evaṃ byākataṃ – ‘‘‘saṃyojana’nti vā, āvuso, ‘saṃyojaniyā dhammā’ti vā ime dhammā nānatthā ceva nānābyañjanā cā’’ti. Ekaccehi therehi bhikkhūhi evaṃ byākataṃ ‘‘‘saṃyojana’nti vā, āvuso, ‘saṃyojaniyā dhammā’ti vā ime dhammā ekatthā byañjanameva nāna’’nti. ‘‘Evaṃ, gahapatī’’ti.
‘‘‘সংযোজন’ন্তি ৰা, ভন্তে, ‘সংযোজনিযা ধম্মা’তি ৰা ইমে ধম্মা নানত্থা চেৰ নানাব্যঞ্জনা চ। তেন হি, ভন্তে, উপমং ৰো করিস্সামি। উপমাযপিধেকচ্চে ৰিঞ্ঞূ পুরিসা ভাসিতস্স অত্থং আজানন্তি। সেয্যথাপি, ভন্তে, কাল়ো চ বলীবদ্দো ওদাতো চ বলীবদ্দো একেন দামেন ৰা যোত্তেন ৰা সংযুত্তা অস্সু। যো নু খো এৰং ৰদেয্য – ‘কাল়ো বলীবদ্দো ওদাতস্স বলীবদ্দস্স সংযোজনং , ওদাতো বলীবদ্দো কাল়স্স বলীবদ্দস্স সংযোজন’ন্তি, সম্মা নু খো সো ৰদমানো ৰদেয্যা’’তি? ‘‘নো হেতং, গহপতি! ন খো, গহপতি, কাল়ো বলীবদ্দো ওদাতস্স বলীবদ্দস্স সংযোজনং, নপি ওদাতো বলীবদ্দো কাল়স্স বল়ীবদ্দস্স সংযোজনং; যেন খো তে একেন দামেন ৰা যোত্তেন ৰা সংযুত্তা তং তত্থ সংযোজন’’ন্তি। ‘‘এৰমেৰ খো, ভন্তে, ন চক্খু রূপানং সংযোজনং, ন রূপা চক্খুস্স সংযোজনং; যঞ্চ তত্থ তদুভযং পটিচ্চ উপ্পজ্জতি ছন্দরাগো তং তত্থ সংযোজনং। ন সোতং সদ্দানং… ন ঘানং গন্ধানং… ন জিৰ্হা রসানং… ন কাযো ফোট্ঠব্বানং সংযোজনং, ন ফোট্ঠব্বা কাযস্স সংযোজনং; যঞ্চ তত্থ তদুভযং পটিচ্চ উপ্পজ্জতি ছন্দরাগো তং তত্থ সংযোজনং। ন মনো ধম্মানং সংযোজনং, ন ধম্মা মনস্স সংযোজনং; যঞ্চ তত্থ তদুভযং পটিচ্চ উপ্পজ্জতি ছন্দরাগো তং তত্থ সংযোজন’’ন্তি। ‘‘লাভা তে, গহপতি, সুলদ্ধং তে, গহপতি, যস্স তে গম্ভীরে বুদ্ধৰচনে পঞ্ঞাচক্খু কমতী’’তি। পঠমং।
‘‘‘Saṃyojana’nti vā, bhante, ‘saṃyojaniyā dhammā’ti vā ime dhammā nānatthā ceva nānābyañjanā ca. Tena hi, bhante, upamaṃ vo karissāmi. Upamāyapidhekacce viññū purisā bhāsitassa atthaṃ ājānanti. Seyyathāpi, bhante, kāḷo ca balībaddo odāto ca balībaddo ekena dāmena vā yottena vā saṃyuttā assu. Yo nu kho evaṃ vadeyya – ‘kāḷo balībaddo odātassa balībaddassa saṃyojanaṃ , odāto balībaddo kāḷassa balībaddassa saṃyojana’nti, sammā nu kho so vadamāno vadeyyā’’ti? ‘‘No hetaṃ, gahapati! Na kho, gahapati, kāḷo balībaddo odātassa balībaddassa saṃyojanaṃ, napi odāto balībaddo kāḷassa baḷībaddassa saṃyojanaṃ; yena kho te ekena dāmena vā yottena vā saṃyuttā taṃ tattha saṃyojana’’nti. ‘‘Evameva kho, bhante, na cakkhu rūpānaṃ saṃyojanaṃ, na rūpā cakkhussa saṃyojanaṃ; yañca tattha tadubhayaṃ paṭicca uppajjati chandarāgo taṃ tattha saṃyojanaṃ. Na sotaṃ saddānaṃ… na ghānaṃ gandhānaṃ… na jivhā rasānaṃ… na kāyo phoṭṭhabbānaṃ saṃyojanaṃ, na phoṭṭhabbā kāyassa saṃyojanaṃ; yañca tattha tadubhayaṃ paṭicca uppajjati chandarāgo taṃ tattha saṃyojanaṃ. Na mano dhammānaṃ saṃyojanaṃ, na dhammā manassa saṃyojanaṃ; yañca tattha tadubhayaṃ paṭicca uppajjati chandarāgo taṃ tattha saṃyojana’’nti. ‘‘Lābhā te, gahapati, suladdhaṃ te, gahapati, yassa te gambhīre buddhavacane paññācakkhu kamatī’’ti. Paṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সংযোজনসুত্তৰণ্ণনা • 1. Saṃyojanasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. সংযোজনসুত্তৰণ্ণনা • 1. Saṃyojanasuttavaṇṇanā
