| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၆. သံယောဇနသုတ္တံ
6. Saṃyojanasuttaṃ
၆. ‘‘ဒ္ဝေမေ, ဘိက္ခဝေ, ဓမ္မာ။ ကတမေ ဒ္ဝေ? ယာ စ သံယောဇနိယေသု ဓမ္မေသု အသ္သာဒာနုပသ္သိတာ, ယာ စ သံယောဇနိယေသု ဓမ္မေသု နိဗ္ဗိဒာနုပသ္သိတာ။ သံယောဇနိယေသု, ဘိက္ခဝေ, ဓမ္မေသု အသ္သာဒာနုပသ္သီ ဝိဟရန္တော ရာဂံ န ပဇဟတိ, ဒောသံ န ပဇဟတိ, မောဟံ န ပဇဟတိ။ ရာဂံ အပ္ပဟာယ, ဒောသံ အပ္ပဟာယ, မောဟံ အပ္ပဟာယ န ပရိမုစ္စတိ ဇာတိယာ ဇရာယ မရဏေန သောကေဟိ ပရိဒေဝေဟိ ဒုက္ခေဟိ ဒောမနသ္သေဟိ ဥပာယာသေဟိ။ န ပရိမုစ္စတိ ဒုက္ခသ္မာတိ ဝဒာမိ။
6. ‘‘Dveme, bhikkhave, dhammā. Katame dve? Yā ca saṃyojaniyesu dhammesu assādānupassitā, yā ca saṃyojaniyesu dhammesu nibbidānupassitā. Saṃyojaniyesu, bhikkhave, dhammesu assādānupassī viharanto rāgaṃ na pajahati, dosaṃ na pajahati, mohaṃ na pajahati. Rāgaṃ appahāya, dosaṃ appahāya, mohaṃ appahāya na parimuccati jātiyā jarāya maraṇena sokehi paridevehi dukkhehi domanassehi upāyāsehi. Na parimuccati dukkhasmāti vadāmi.
‘‘သံယောဇနိယေသု, ဘိက္ခဝေ, ဓမ္မေသု နိဗ္ဗိဒာနုပသ္သီ ဝိဟရန္တော ရာဂံ ပဇဟတိ, ဒောသံ ပဇဟတိ, မောဟံ ပဇဟတိ။ ရာဂံ ပဟာယ, ဒောသံ ပဟာယ, မောဟံ ပဟာယ, ပရိမုစ္စတိ ဇာတိယာ ဇရာယ မရဏေန သောကေဟိ ပရိဒေဝေဟိ ဒုက္ခေဟိ ဒောမနသ္သေဟိ ဥပာယာသေဟိ။ ပရိမုစ္စတိ ဒုက္ခသ္မာတိ ဝဒာမိ။ ဣမေ ခော, ဘိက္ခဝေ, ဒ္ဝေ ဓမ္မာ’’တိ။ ဆဋ္ဌံ။
‘‘Saṃyojaniyesu, bhikkhave, dhammesu nibbidānupassī viharanto rāgaṃ pajahati, dosaṃ pajahati, mohaṃ pajahati. Rāgaṃ pahāya, dosaṃ pahāya, mohaṃ pahāya, parimuccati jātiyā jarāya maraṇena sokehi paridevehi dukkhehi domanassehi upāyāsehi. Parimuccati dukkhasmāti vadāmi. Ime kho, bhikkhave, dve dhammā’’ti. Chaṭṭhaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၆. သံယောဇနသုတ္တဝဏ္ဏနာ • 6. Saṃyojanasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. သံယောဇနသုတ္တဝဏ္ဏနာ • 6. Saṃyojanasuttavaṇṇanā
