| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. ஸங்யோஜனஸுத்தவண்ணனா
6. Saṃyojanasuttavaṇṇanā
6. ச²ட்டே² ஸங்யோஜனானங் ஹிதா பச்சயபா⁴வேனாதி ஸங்யோஜனியா, தேபூ⁴மகா த⁴ம்மா. தேனாஹ ‘‘த³ஸன்னங் ஸங்யோஜனான’’ந்திஆதி³. ஸங்யோஜனியே த⁴ம்மே அஸ்ஸாத³தோ அனுபஸ்ஸதி ஸீலேனாதி அஸ்ஸாதா³னுபஸ்ஸீ, தஸ்ஸ பா⁴வோ அஸ்ஸாதா³னுபஸ்ஸிதா. நிப்³பி³தா³னுபஸ்ஸிதாதி எத்தா²பி ஏஸேவ நயோ. உக்கண்ட²னவஸேனாதி ஸங்யோஜனியேஸு தேபூ⁴மகத⁴ம்மேஸு நிப்³பி³ந்த³னவஸேன. ஜனநங் ஜாதி, க²ந்தா⁴னங் பாதுபா⁴வோதி ஆஹ ‘‘ஜாதியாதி க²ந்த⁴னிப்³ப³த்திதோ’’தி, க²ந்தா⁴னங் தத்த² தத்த² ப⁴வே அபராபரங் நிப்³ப³த்திதோதி அத்தோ². க²ந்த⁴பரிபாகோ ஏகப⁴வபரியாபன்னானங் க²ந்தா⁴னங் புராணபா⁴வோ. ஏகப⁴வபரியாபன்னஜீவிதிந்த்³ரியப்பப³ந்த⁴விச்சே²த³வஸேன க²ந்தா⁴னங் பே⁴தோ³ இத⁴ மரணந்தி ஆஹ ‘‘மரணேனாதி க²ந்த⁴பே⁴த³தோ’’தி. அந்தோனிஜ்ஜா²னங் சித்தஸந்தாபோ. பரிதே³வோ நாம ஞாதிப்³யஸனாதீ³ஹி பு²ட்ட²ஸ்ஸ வாசாவிப்பலாபோ. ஸோ ச ஸோகஸமுட்டா²னோதி ஆஹ ‘‘தன்னிஸ்ஸிதலாலப்பிதலக்க²ணேஹி பரிதே³வேஹீ’’தி. லாலப்பிதங் வாசாவிப்பலாபோ, ஸோ ச அத்த²தோ ஸத்³தோ³யேவ.
6. Chaṭṭhe saṃyojanānaṃ hitā paccayabhāvenāti saṃyojaniyā, tebhūmakā dhammā. Tenāha ‘‘dasannaṃ saṃyojanāna’’ntiādi. Saṃyojaniye dhamme assādato anupassati sīlenāti assādānupassī, tassa bhāvo assādānupassitā. Nibbidānupassitāti etthāpi eseva nayo. Ukkaṇṭhanavasenāti saṃyojaniyesu tebhūmakadhammesu nibbindanavasena. Jananaṃ jāti, khandhānaṃ pātubhāvoti āha ‘‘jātiyāti khandhanibbattito’’ti, khandhānaṃ tattha tattha bhave aparāparaṃ nibbattitoti attho. Khandhaparipāko ekabhavapariyāpannānaṃ khandhānaṃ purāṇabhāvo. Ekabhavapariyāpannajīvitindriyappabandhavicchedavasena khandhānaṃ bhedo idha maraṇanti āha ‘‘maraṇenāti khandhabhedato’’ti. Antonijjhānaṃ cittasantāpo. Paridevo nāma ñātibyasanādīhi phuṭṭhassa vācāvippalāpo. So ca sokasamuṭṭhānoti āha ‘‘tannissitalālappitalakkhaṇehi paridevehī’’ti. Lālappitaṃ vācāvippalāpo, so ca atthato saddoyeva.
து³க்க²ந்தி இத⁴ காயிகங் து³க்க²ங் அதி⁴ப்பேதந்தி ஆஹ ‘‘காயபடிபீளனது³க்கே²ஹீ’’தி. மனோவிகா⁴ததோ³மனஸ்ஸேஹீதி மனஸோ விகா⁴தகரேஹி தோ³மனஸ்ஸேஹி. ப்³யாபாத³ஸம்பயோகே³ன மனஸோ விஹனநரஸஞ்ஹி தோ³மனஸ்ஸங். பு⁴ஸோ ஆயாஸோ உபாயாஸோ யதா² ‘‘பு⁴ஸமாதா³னங் உபாதா³ன’’ந்தி, ஸோ ச அத்த²தோ ஞாதிப்³யஸனாதீ³ஹி பு²ட்ட²ஸ்ஸ அதி⁴மத்தசேதோது³க்க²ப்பபா⁴விதோ தோ³ஸோயேவ. காயசித்தானஞ்ஹி ஆயாஸனவஸேன தோ³ஸஸ்ஸேவ பவத்திஆகாரோ உபாயாஸோதி வுச்சதி ஸங்கா²ரக்க²ந்த⁴பரியாபன்னோ. தங் சுத்³த³ஸஹி அகுஸலசேதஸிகேஹி அஞ்ஞோ ஏகோ சேதஸிகத⁴ம்மோதி ஏகே. யங் விஸாதோ³தி ச வத³ந்தி.
Dukkhanti idha kāyikaṃ dukkhaṃ adhippetanti āha ‘‘kāyapaṭipīḷanadukkhehī’’ti. Manovighātadomanassehīti manaso vighātakarehi domanassehi. Byāpādasampayogena manaso vihananarasañhi domanassaṃ. Bhuso āyāso upāyāso yathā ‘‘bhusamādānaṃ upādāna’’nti, so ca atthato ñātibyasanādīhi phuṭṭhassa adhimattacetodukkhappabhāvito dosoyeva. Kāyacittānañhi āyāsanavasena dosasseva pavattiākāro upāyāsoti vuccati saṅkhārakkhandhapariyāpanno. Taṃ cuddasahi akusalacetasikehi añño eko cetasikadhammoti eke. Yaṃ visādoti ca vadanti.
ஸங்யோஜனஸுத்தவண்ணனா நிட்டி²தா.
Saṃyojanasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. ஸங்யோஜனஸுத்தங் • 6. Saṃyojanasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. ஸங்யோஜனஸுத்தவண்ணனா • 6. Saṃyojanasuttavaṇṇanā
