| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(14) 4. புக்³க³லவக்³கோ³
(14) 4. Puggalavaggo
1. ஸங்யோஜனஸுத்தவண்ணனா
1. Saṃyojanasuttavaṇṇanā
131. சதுத்த²ஸ்ஸ பட²மே உபபத்திப்படிலாப⁴ங் ஸங்வத்தனிகானீதி உபபத்திபடிலாபி⁴யானி. ப⁴வபடிலாபி⁴யானீதி எத்தா²பி ஏஸேவ நயோ. யேஹீதி யேஹி ஸங்யோஜனேஹி ஹேதுபூ⁴தேஹி, கரணபூ⁴தேஹி வா. நனு ச ஸோதாபன்னஸ்ஸபி ஓரம்பா⁴கி³யானி ஸங்யோஜனானி அப்பஹீனானி, கஸ்மா பன ஸகதா³கா³மீயேவ இத⁴ க³ஹிதோதி ஆஹ ‘‘ஸகதா³கா³மிஸ்ஸாதி இத³ங் அப்பஹீனஸங்யோஜனேஸு அரியேஸு உத்தமகோடியா க³ஹித’’ந்தி. தத்த² அப்பஹீனஸங்யோஜனேஸூதி அப்பஹீனஓரம்பா⁴கி³யஸங்யோஜனேஸு. உத்தமகோடியா க³ஹிதந்தி உக்கட்ட²பரிச்சே²தே³ன க³ஹிதங். ஸகதா³கா³மிதோ பரஞ்ஹி அப்பஹீனஓரம்பா⁴கி³யஸங்யோஜனோ அரியோ நாம நத்தி². நனு ச ஸகதா³கா³மிஸ்ஸ பஹீனானிபி ஓரம்பா⁴கி³யானி ஸங்யோஜனானி அத்தி² தி³ட்டி²விசிகிச்சா²ஸீலப்³ப³தபராமாஸஸங்யோஜனானங் பஹீனத்தா, தஸ்மா ‘‘ஓரம்பா⁴கி³யானி ஸங்யோஜனானி அப்பஹீனானீ’’தி கஸ்மா வுத்தந்தி ஆஹ ‘‘ஓரம்பா⁴கி³யேஸு ச அப்பஹீனங் உபாதா³யா’’திஆதி³. யஸ்மா காமராக³ப்³யாபாத³ஸங்யோஜனானி ஸகதா³கா³மிஸ்ஸ அப்பஹீனானி, தஸ்மா தானி அப்பஹீனானி உபாதா³ய ‘‘ஓரம்பா⁴கி³யானி ஸங்யோஜனானி அப்பஹீனானீ’’தி வுத்தங், ந ஸப்³பே³ஸங் அப்பஹீனத்தாதி அதி⁴ப்பாயோ.
131. Catutthassa paṭhame upapattippaṭilābhaṃ saṃvattanikānīti upapattipaṭilābhiyāni. Bhavapaṭilābhiyānīti etthāpi eseva nayo. Yehīti yehi saṃyojanehi hetubhūtehi, karaṇabhūtehi vā. Nanu ca sotāpannassapi orambhāgiyāni saṃyojanāni appahīnāni, kasmā pana sakadāgāmīyeva idha gahitoti āha ‘‘sakadāgāmissāti idaṃ appahīnasaṃyojanesu ariyesu uttamakoṭiyā gahita’’nti. Tattha appahīnasaṃyojanesūti appahīnaorambhāgiyasaṃyojanesu. Uttamakoṭiyā gahitanti ukkaṭṭhaparicchedena gahitaṃ. Sakadāgāmito parañhi appahīnaorambhāgiyasaṃyojano ariyo nāma natthi. Nanu ca sakadāgāmissa pahīnānipi orambhāgiyāni saṃyojanāni atthi diṭṭhivicikicchāsīlabbataparāmāsasaṃyojanānaṃ pahīnattā, tasmā ‘‘orambhāgiyāni saṃyojanāni appahīnānī’’ti kasmā vuttanti āha ‘‘orambhāgiyesu ca appahīnaṃ upādāyā’’tiādi. Yasmā kāmarāgabyāpādasaṃyojanāni sakadāgāmissa appahīnāni, tasmā tāni appahīnāni upādāya ‘‘orambhāgiyāni saṃyojanāni appahīnānī’’ti vuttaṃ, na sabbesaṃ appahīnattāti adhippāyo.
ஸங்யோஜனஸுத்தவண்ணனா நிட்டி²தா.
Saṃyojanasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ஸங்யோஜனஸுத்தங் • 1. Saṃyojanasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. ஸங்யோஜனஸுத்தவண்ணனா • 1. Saṃyojanasuttavaṇṇanā
