| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៦. សំយោជនសុត្តវណ្ណនា
6. Saṃyojanasuttavaṇṇanā
៦. ឆដ្ឋេ សំយោជនិយេសុ ធម្មេសូតិ ទសន្នំ សំយោជនានំ បច្ចយភូតេសុ តេភូមកធម្មេសុ។ អស្សាទានុបស្សិតាតិ អស្សាទតោ បស្សិតា បស្សនភាវោតិ អត្ថោ។ និព្ពិទានុបស្សិតាតិ និព្ពិទាវសេន ឧក្កណ្ឋនវសេន បស្សនភាវោ។ ជាតិយាតិ ខន្ធនិព្ពត្តិតោ។ ជរាយាតិ ខន្ធបរិបាកតោ។ មរណេនាតិ ខន្ធភេទតោ។ សោកេហីតិ អន្តោនិជ្ឈាយនលក្ខណេហិ សោកេហិ។ បរិទេវេហីតិ តន្និស្សិតលាលប្បិតលក្ខណេហិ បរិទេវេហិ។ ទុក្ខេហីតិ កាយបដិបីឡនទុក្ខេហិ។ ទោមនស្សេហីតិ មនោវិឃាតទោមនស្សេហិ។ ឧបាយាសេហីតិ អធិមត្តាយាសលក្ខណឧបាយាសេហិ។ ទុក្ខស្មាតិ សកលវដ្ដទុក្ខតោ។ បជហតីតិ មគ្គេន បជហតិ។ បហាយាតិ ឯត្ថ បន ផលក្ខណោ កថិតោ។ ឥមស្មិំ សុត្តេ វដ្ដវិវដ្ដំ កថិតំ។ ឆដ្ឋំ។
6. Chaṭṭhe saṃyojaniyesu dhammesūti dasannaṃ saṃyojanānaṃ paccayabhūtesu tebhūmakadhammesu. Assādānupassitāti assādato passitā passanabhāvoti attho. Nibbidānupassitāti nibbidāvasena ukkaṇṭhanavasena passanabhāvo. Jātiyāti khandhanibbattito. Jarāyāti khandhaparipākato. Maraṇenāti khandhabhedato. Sokehīti antonijjhāyanalakkhaṇehi sokehi. Paridevehīti tannissitalālappitalakkhaṇehi paridevehi. Dukkhehīti kāyapaṭipīḷanadukkhehi. Domanassehīti manovighātadomanassehi. Upāyāsehīti adhimattāyāsalakkhaṇaupāyāsehi. Dukkhasmāti sakalavaṭṭadukkhato. Pajahatīti maggena pajahati. Pahāyāti ettha pana phalakkhaṇo kathito. Imasmiṃ sutte vaṭṭavivaṭṭaṃ kathitaṃ. Chaṭṭhaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៦. សំយោជនសុត្តំ • 6. Saṃyojanasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៦. សំយោជនសុត្តវណ្ណនា • 6. Saṃyojanasuttavaṇṇanā
