| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၇. စိတ္တသံယုတ္တံ
7. Cittasaṃyuttaṃ
၁. သံယောဇနသုတ္တဝဏ္ဏနာ
1. Saṃyojanasuttavaṇṇanā
၃၄၃. စိတ္တသံယုတ္တသ္သ ပဌမေ မစ္ဆိကာသဏ္ဍေတိ ဧဝံနာမကေ ဝနသဏ္ဍေ။ အယမန္တရာကထာ ဥဒပာဒီတိ ပောရာဏကတ္ထေရာ အတိရစ္ဆာနကထာ ဟောန္တိ, နိသိန္နနိသိန္နဋ္ဌာနေ ပဉ္ဟံ သမုဋ္ဌာပေတ္ဝာ အဇာနန္တာ ပုစ္ဆန္တိ, ဇာနန္တာ ဝိသ္သဇ္ဇေန္တိ, တေန နေသံ အယံ ကထာ ဥဒပာဒိ။ မိဂပထကန္တိ ဧဝံနာမကံ အတ္တနော ဘောဂဂာမံ။ သော ကိရ အမ္ဗာဋကာရာမသ္သ ပိဋ္ဌိဘာဂေ ဟောတိ။ တေနုပသင္ကမီတိ ‘‘ထေရာနံ ပဉ္ဟံ ဝိသ္သဇ္ဇေတ္ဝာ ဖာသုဝိဟာရံ ကတ္ဝာ ဒသ္သာမီ’’တိ စိန္တေတ္ဝာ ဥပသင္ကမိ။ ဂမ္ဘီရေ ဗုဒ္ဓဝစနေတိ အတ္ထဂမ္ဘီရေ စေဝ ဓမ္မဂမ္ဘီရေ စ ဗုဒ္ဓဝစနေ။ ပညာစက္ခု ကမတီတိ ဉာဏစက္ခု ဝဟတိ ပဝတ္တတိ။
343. Cittasaṃyuttassa paṭhame macchikāsaṇḍeti evaṃnāmake vanasaṇḍe. Ayamantarākathā udapādīti porāṇakattherā atiracchānakathā honti, nisinnanisinnaṭṭhāne pañhaṃ samuṭṭhāpetvā ajānantā pucchanti, jānantā vissajjenti, tena nesaṃ ayaṃ kathā udapādi. Migapathakanti evaṃnāmakaṃ attano bhogagāmaṃ. So kira ambāṭakārāmassa piṭṭhibhāge hoti. Tenupasaṅkamīti ‘‘therānaṃ pañhaṃ vissajjetvā phāsuvihāraṃ katvā dassāmī’’ti cintetvā upasaṅkami. Gambhīre buddhavacaneti atthagambhīre ceva dhammagambhīre ca buddhavacane. Paññācakkhu kamatīti ñāṇacakkhu vahati pavattati.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. သံယောဇနသုတ္တံ • 1. Saṃyojanasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. သံယောဇနသုတ္တဝဏ္ဏနာ • 1. Saṃyojanasuttavaṇṇanā
