| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
(၁၄) ၄. ပုဂ္ဂလဝဂ္ဂော
(14) 4. Puggalavaggo
၁. သံယောဇနသုတ္တဝဏ္ဏနာ
1. Saṃyojanasuttavaṇṇanā
၁၃၁. စတုတ္ထသ္သ ပဌမေ ဥပပတ္တိပ္ပဋိလာဘံ သံဝတ္တနိကာနီတိ ဥပပတ္တိပဋိလာဘိယာနိ။ ဘဝပဋိလာဘိယာနီတိ ဧတ္ထာပိ ဧသေဝ နယော။ ယေဟီတိ ယေဟိ သံယောဇနေဟိ ဟေတုဘူတေဟိ, ကရဏဘူတေဟိ ဝာ။ နနု စ သောတာပန္နသ္သပိ ဩရမ္ဘာဂိယာနိ သံယောဇနာနိ အပ္ပဟီနာနိ, ကသ္မာ ပန သကဒာဂာမီယေဝ ဣဓ ဂဟိတောတိ အာဟ ‘‘သကဒာဂာမိသ္သာတိ ဣဒံ အပ္ပဟီနသံယောဇနေသု အရိယေသု ဥတ္တမကောဋိယာ ဂဟိတ’’န္တိ။ တတ္ထ အပ္ပဟီနသံယောဇနေသူတိ အပ္ပဟီနဩရမ္ဘာဂိယသံယောဇနေသု။ ဥတ္တမကောဋိယာ ဂဟိတန္တိ ဥက္ကဋ္ဌပရိစ္ဆေဒေန ဂဟိတံ။ သကဒာဂာမိတော ပရဉ္ဟိ အပ္ပဟီနဩရမ္ဘာဂိယသံယောဇနော အရိယော နာမ နတ္ထိ။ နနု စ သကဒာဂာမိသ္သ ပဟီနာနိပိ ဩရမ္ဘာဂိယာနိ သံယောဇနာနိ အတ္ထိ ဒိဋ္ဌိဝိစိကိစ္ဆာသီလဗ္ဗတပရာမာသသံယောဇနာနံ ပဟီနတ္တာ, တသ္မာ ‘‘ဩရမ္ဘာဂိယာနိ သံယောဇနာနိ အပ္ပဟီနာနီ’’တိ ကသ္မာ ဝုတ္တန္တိ အာဟ ‘‘ဩရမ္ဘာဂိယေသု စ အပ္ပဟီနံ ဥပာဒာယာ’’တိအာဒိ။ ယသ္မာ ကာမရာဂဗ္ယာပာဒသံယောဇနာနိ သကဒာဂာမိသ္သ အပ္ပဟီနာနိ, တသ္မာ တာနိ အပ္ပဟီနာနိ ဥပာဒာယ ‘‘ဩရမ္ဘာဂိယာနိ သံယောဇနာနိ အပ္ပဟီနာနီ’’တိ ဝုတ္တံ, န သဗ္ဗေသံ အပ္ပဟီနတ္တာတိ အဓိပ္ပာယော။
131. Catutthassa paṭhame upapattippaṭilābhaṃ saṃvattanikānīti upapattipaṭilābhiyāni. Bhavapaṭilābhiyānīti etthāpi eseva nayo. Yehīti yehi saṃyojanehi hetubhūtehi, karaṇabhūtehi vā. Nanu ca sotāpannassapi orambhāgiyāni saṃyojanāni appahīnāni, kasmā pana sakadāgāmīyeva idha gahitoti āha ‘‘sakadāgāmissāti idaṃ appahīnasaṃyojanesu ariyesu uttamakoṭiyā gahita’’nti. Tattha appahīnasaṃyojanesūti appahīnaorambhāgiyasaṃyojanesu. Uttamakoṭiyā gahitanti ukkaṭṭhaparicchedena gahitaṃ. Sakadāgāmito parañhi appahīnaorambhāgiyasaṃyojano ariyo nāma natthi. Nanu ca sakadāgāmissa pahīnānipi orambhāgiyāni saṃyojanāni atthi diṭṭhivicikicchāsīlabbataparāmāsasaṃyojanānaṃ pahīnattā, tasmā ‘‘orambhāgiyāni saṃyojanāni appahīnānī’’ti kasmā vuttanti āha ‘‘orambhāgiyesu ca appahīnaṃ upādāyā’’tiādi. Yasmā kāmarāgabyāpādasaṃyojanāni sakadāgāmissa appahīnāni, tasmā tāni appahīnāni upādāya ‘‘orambhāgiyāni saṃyojanāni appahīnānī’’ti vuttaṃ, na sabbesaṃ appahīnattāti adhippāyo.
သံယောဇနသုတ္တဝဏ္ဏနာ နိဋ္ဌိတာ။
Saṃyojanasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. သံယောဇနသုတ္တံ • 1. Saṃyojanasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁. သံယောဇနသုတ္တဝဏ္ဏနာ • 1. Saṃyojanasuttavaṇṇanā
