| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. সংযোজনিযধম্মসুত্তং
9. Saṃyojaniyadhammasuttaṃ
১২২. ‘‘সংযোজনিযে চ, ভিক্খৰে, ধম্মে দেসেস্সামি সংযোজনঞ্চ। তং সুণাথ। কতমে চ, ভিক্খৰে, সংযোজনিযা ধম্মা, কতমঞ্চ সংযোজনং? সন্তি, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা। ইমে ৰুচ্চন্তি, ভিক্খৰে, সংযোজনিযা ধম্মা। যো তত্থ ছন্দরাগো, তং তত্থ সংযোজনং…পে॰… সন্তি, ভিক্খৰে, জিৰ্হাৰিঞ্ঞেয্যা রসা…পে॰… সন্তি, ভিক্খৰে, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা। ইমে ৰুচ্চন্তি, ভিক্খৰে, সংযোজনিযা ধম্মা। যো তত্থ ছন্দরাগো তং তত্থ সংযোজন’’ন্তি। নৰমং।
122. ‘‘Saṃyojaniye ca, bhikkhave, dhamme desessāmi saṃyojanañca. Taṃ suṇātha. Katame ca, bhikkhave, saṃyojaniyā dhammā, katamañca saṃyojanaṃ? Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Ime vuccanti, bhikkhave, saṃyojaniyā dhammā. Yo tattha chandarāgo, taṃ tattha saṃyojanaṃ…pe… santi, bhikkhave, jivhāviññeyyā rasā…pe… santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Ime vuccanti, bhikkhave, saṃyojaniyā dhammā. Yo tattha chandarāgo taṃ tattha saṃyojana’’nti. Navamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯-১০. সংযোজনিযধম্মসুত্তাদিৰণ্ণনা • 9-10. Saṃyojaniyadhammasuttādivaṇṇanā
