| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৫. সণমানসুত্তৰণ্ণনা
5. Saṇamānasuttavaṇṇanā
১৫. পঞ্চমে ঠিতে মজ্ঝন্হিকেতি ঠিতমজ্ঝন্হিকে। সন্নিসীৰেসূতি যথা ফাসুকট্ঠানং উপগন্ত্ৰা সন্নিসিন্নেসু ৰিস্সমমানেসু। ঠিতমজ্ঝন্হিককালো নামেস সব্বসত্তানং ইরিযাপথদুব্বল্যকালো। ইধ পন পক্খীনংযেৰ ৰসেন দস্সিতো। সণতেৰাতি সণতি ৰিয মহাৰিরৰং ৰিয মুচ্চতি। সণমানমেৰ চেত্থ ‘‘সণতেৰা’’তি ৰুত্তং। তপ্পটিভাগং নামেতং। নিদাঘসমযস্মিঞ্হি ঠিতমজ্ঝন্হিককালে চতুপ্পদগণেসু চেৰ পক্খীগণেসু চ সন্নিসিন্নেসু ৰাতপূরিতানং সুসিররুক্খানঞ্চেৰ ছিদ্দৰেণুপব্বানঞ্চ খন্ধেন খন্ধং সাখায সাখং সঙ্ঘট্টযন্তানং পাদপানঞ্চ অরঞ্ঞমজ্ঝে মহাসদ্দো উপ্পজ্জতি । তং সন্ধাযেতং ৰুত্তং। তং ভযং পটিভাতি মন্তি তং এৰরূপে কালে মহাঅরঞ্ঞস্স সণমানং ময্হং ভযং হুত্ৰা উপট্ঠাতি। দন্ধপঞ্ঞা কিরেসা দেৰতা তস্মিং খণে অত্তনো নিসজ্জফাসুকং কথাফাসুকং দুতিযকং অলভন্তী এৰমাহ। যস্মা পন তাদিসে কালে পিণ্ডপাতপটিক্কন্তস্স ৰিৰিত্তে অরঞ্ঞাযতনে কম্মট্ঠানং গহেত্ৰা নিসিন্নস্স ভিক্খুনো অনপ্পকং সুখং উপ্পজ্জতি, যং সন্ধায ৰুত্তং –
15. Pañcame ṭhite majjhanhiketi ṭhitamajjhanhike. Sannisīvesūti yathā phāsukaṭṭhānaṃ upagantvā sannisinnesu vissamamānesu. Ṭhitamajjhanhikakālo nāmesa sabbasattānaṃ iriyāpathadubbalyakālo. Idha pana pakkhīnaṃyeva vasena dassito. Saṇatevāti saṇati viya mahāviravaṃ viya muccati. Saṇamānameva cettha ‘‘saṇatevā’’ti vuttaṃ. Tappaṭibhāgaṃ nāmetaṃ. Nidāghasamayasmiñhi ṭhitamajjhanhikakāle catuppadagaṇesu ceva pakkhīgaṇesu ca sannisinnesu vātapūritānaṃ susirarukkhānañceva chiddaveṇupabbānañca khandhena khandhaṃ sākhāya sākhaṃ saṅghaṭṭayantānaṃ pādapānañca araññamajjhe mahāsaddo uppajjati . Taṃ sandhāyetaṃ vuttaṃ. Taṃ bhayaṃ paṭibhāti manti taṃ evarūpe kāle mahāaraññassa saṇamānaṃ mayhaṃ bhayaṃ hutvā upaṭṭhāti. Dandhapaññā kiresā devatā tasmiṃ khaṇe attano nisajjaphāsukaṃ kathāphāsukaṃ dutiyakaṃ alabhantī evamāha. Yasmā pana tādise kāle piṇḍapātapaṭikkantassa vivitte araññāyatane kammaṭṭhānaṃ gahetvā nisinnassa bhikkhuno anappakaṃ sukhaṃ uppajjati, yaṃ sandhāya vuttaṃ –
‘‘সুঞ্ঞাগারং পৰিট্ঠস্স, সন্তচিত্তস্স ভিক্খুনো।
‘‘Suññāgāraṃ paviṭṭhassa, santacittassa bhikkhuno;
অমানুসী রতী হোতি, সম্মা ধম্মং ৰিপস্সতো’’তি॥ (ধ॰ প॰ ৩৭৩) চ,
Amānusī ratī hoti, sammā dhammaṃ vipassato’’ti. (dha. pa. 373) ca,
‘‘পুরতো পচ্ছতো ৰাপি, অপরো চে ন ৰিজ্জতি।
‘‘Purato pacchato vāpi, aparo ce na vijjati;
অতীৰ ফাসু ভৰতি, একস্স ৰসতো ৰনে’’তি॥ (থেরগা॰ ৫৩৭) চ।
Atīva phāsu bhavati, ekassa vasato vane’’ti. (theragā. 537) ca;
তস্মা ভগৰা দুতিযং গাথমাহ। তত্থ সা রতি পটিভাতি মন্তি যা এৰরূপে কালে এককস্স নিসজ্জা নাম, সা রতি ময্হং উপট্ঠাতীতি অত্থো। সেসং তাদিসমেৰাতি।
Tasmā bhagavā dutiyaṃ gāthamāha. Tattha sā rati paṭibhāti manti yā evarūpe kāle ekakassa nisajjā nāma, sā rati mayhaṃ upaṭṭhātīti attho. Sesaṃ tādisamevāti.
সণমানসুত্তৰণ্ণনা নিট্ঠিতা।
Saṇamānasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. সণমানসুত্তং • 5. Saṇamānasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. সণমানসুত্তৰণ্ণনা • 5. Saṇamānasuttavaṇṇanā
