| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៥. សណមានសុត្តវណ្ណនា
5. Saṇamānasuttavaṇṇanā
១៥. ឋិតេ មជ្ឈន្ហិកេតិ បុព្ពទ្ធំ និក្ខមិត្វា អបរទ្ធំ អប្បត្វា ឋិតមជ្ឈន្ហេ។ សន្និសីវេសូតិ បរិស្សមវិនោទនត្ថំ សព្ពសោ សន្និសីទន្តេសុ។ ទ-ការស្ស ហិ វ-ការំ កត្វា និទ្ទេសោ។ តេនាហ ‘‘សន្និសិន្នេសុ វិស្សមមានេសូ’’តិ។ សព្ពសត្តានន្តិ សព្ពេសញ្ច អាហារូបជីវិតសត្តានំ ឃម្មតាបនេ សន្តត្តកាយានំ ឥរិយាបថទុព្ពល្យកាលោតិ ឋានាទិឥរិយាបថស្ស អសមត្ថកាលោ។ សណតិ វិយាតិ សទ្ទំ ករោតិ វិយ, យថា តំ អញ្ញម្បិ មហាវនំ វក្ខមាននយេន។ តេនាហ ‘‘តប្បដិភាគំ នាមេត’’ន្តិ ឆិទ្ទវេណុបព្ពានន្តិ រន្ធជាតកីចកមហាវេឡុបព្ពានំ។ ទុតិយកំ សហាយំ អលភន្តី អនភិរតិបរិតស្សនាយ ឯវមាហ។ អនប្បកំ សុខន្តិ វិបុលំ ឧឡារំ វិវេកសុខំ។
15.Ṭhite majjhanhiketi pubbaddhaṃ nikkhamitvā aparaddhaṃ appatvā ṭhitamajjhanhe. Sannisīvesūti parissamavinodanatthaṃ sabbaso sannisīdantesu. Da-kārassa hi va-kāraṃ katvā niddeso. Tenāha ‘‘sannisinnesu vissamamānesū’’ti. Sabbasattānanti sabbesañca āhārūpajīvitasattānaṃ ghammatāpane santattakāyānaṃ iriyāpathadubbalyakāloti ṭhānādiiriyāpathassa asamatthakālo. Saṇati viyāti saddaṃ karoti viya, yathā taṃ aññampi mahāvanaṃ vakkhamānanayena. Tenāha ‘‘tappaṭibhāgaṃ nāmeta’’nti chiddaveṇupabbānanti randhajātakīcakamahāveḷupabbānaṃ. Dutiyakaṃ sahāyaṃ alabhantī anabhiratiparitassanāya evamāha. Anappakaṃ sukhanti vipulaṃ uḷāraṃ vivekasukhaṃ.
ឯកវិហារតាយ សុញ្ញាគារំ បវិដ្ឋស្ស។ តេន កាយវិវេកំ ទស្សេតិ។ អនិច្ចានុបស្សនាទីហិ និច្ចសញ្ញាទិប្បហានេន សន្តចិត្តស្ស។ តេន ចិត្តវិវេកំ ទស្សេតិ។ សំសារេ ភយំ ឥក្ខនតោ ភិក្ខុនោ ឧភយវិវេកសម្បន្នស្ស, តតោ ឯវ ឧត្តរិំ មនុស្សធម្មតោ រតិំ លាភិនោ។ អមានុសី រតីតិ ភាវនារតិ។ បុរតោតិ បុរិមភាគេ។ បច្ឆតោតិ បច្ឆិមភាគេ។ អបរោតិ អញ្ញោ។ បុរតោតិ វា អនាគតេ, អនាគតំ អារព្ភាតិ អត្ថោ។ បច្ឆតោតិ អតីតេ អតីតំ អារព្ភ បដិបត្តិយា វិពាធនតោ។ បរោតិ កោធោ ចិត្តបដិទុស្សនតាយ។ ន បរោតិ អបរោ, លោភោ, សោ ចេ ន វិជ្ជតិ។ ឯតេន អនាគតប្បជប្បនាយ អតីតានុសោចនាយ ច អភាវំ ទស្សេតិ។ អតីវ ផាសុ ភវតីតិ នីវរណជេដ្ឋកស្ស កាមច្ឆន្ទស្ស វិគមេន វិក្ខម្ភិតនីវរណស្ស ឈានស្ស វសេន អតិវិយ ផាសុវិហារោ ហោតិ។ ឯកស្ស វសតោ វនេតិ តណ្ហាទុតិយិកាភាវេន ឯកស្ស អរញ្ញេ វិវេកវាសំ វសតោ។ សេសំ តាទិសមេវាតិ សេសមេត្ថ យំ វត្តព្ពំ, តំ បឋមគាថាយំ វុត្តសទិសមេវ។
Ekavihāratāya suññāgāraṃ paviṭṭhassa. Tena kāyavivekaṃ dasseti. Aniccānupassanādīhi niccasaññādippahānena santacittassa. Tena cittavivekaṃ dasseti. Saṃsāre bhayaṃ ikkhanato bhikkhuno ubhayavivekasampannassa, tato eva uttariṃ manussadhammato ratiṃ lābhino. Amānusī ratīti bhāvanārati. Puratoti purimabhāge. Pacchatoti pacchimabhāge. Aparoti añño. Puratoti vā anāgate, anāgataṃ ārabbhāti attho. Pacchatoti atīte atītaṃ ārabbha paṭipattiyā vibādhanato. Paroti kodho cittapaṭidussanatāya. Na paroti aparo, lobho, so ce na vijjati. Etena anāgatappajappanāya atītānusocanāya ca abhāvaṃ dasseti. Atīva phāsu bhavatīti nīvaraṇajeṭṭhakassa kāmacchandassa vigamena vikkhambhitanīvaraṇassa jhānassa vasena ativiya phāsuvihāro hoti. Ekassa vasato vaneti taṇhādutiyikābhāvena ekassa araññe vivekavāsaṃ vasato. Sesaṃ tādisamevāti sesamettha yaṃ vattabbaṃ, taṃ paṭhamagāthāyaṃ vuttasadisameva.
សណមានសុត្តវណ្ណនា និដ្ឋិតា។
Saṇamānasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៥. សណមានសុត្តំ • 5. Saṇamānasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៥. សណមានសុត្តវណ្ណនា • 5. Saṇamānasuttavaṇṇanā
